Genesis 9 - Yak'usda Ooghuni

¹ ꞋEt Yakꞌusda (Elohim) ꞌen Nowe ꞌinkꞌez ooyeꞌke tucha tsꞌiyawh soo hoonzoo-un hubúlhni whe ꞌubulhni, “Lhane cho ooleꞌ ndi yun doolhbun hubulhni.

² Ndi yun kꞌut khuna-i tsꞌiyai huye ntiljut, dutꞌai cha ndi yun nuhutnah-i ꞌinkꞌez lho cha tsꞌiyawh nohla kꞌez be huwantꞌai.

³ Dantꞌi tsꞌiyawh ꞌusjiz ꞌi nukhutnah, ꞌi ꞌutꞌalh-i nohba ooleꞌ. ꞋEt ndai tsꞌiyawh nohgha nusla, ꞌutꞌan ha nuyeh tsꞌuꞌalh-i hoontsꞌi.

⁴ ꞋEt hoontsꞌi ndi khuna-i ꞌawhuz buzkaiꞌ be khuna bulh ꞌuntꞌoh, ꞌi ꞌaw lhuzonꞌal. Ndi ‘be khutna’, ꞌi buzkaiꞌ ꞌuntꞌoh ni whe ꞌutni.

⁵ ꞋAlha dune nyuzkaiꞌ ha whulhtsi de sbut hutiyin wheꞌ hoontꞌoh. Khuna-i dune silhghi ꞌi hoontsꞌi whuz unꞌa za ꞌuhoontꞌoh. Dune ꞌuyoon dune silhghi-un mbe ꞌuja-un buzkaiꞌ ookaꞌ nuszun.

⁶ Mbe dune ꞌuyoon buzkaiꞌ whulhtsi-un, ꞌuyoon dune ndun dune ꞌuja-un yuzkaiꞌ whutilhtselh wheꞌ hoontꞌoh, Yakꞌusda (Elohim) dune yulh ndultꞌoh yulhtsi ꞌet huwa.

⁷ ꞋInkꞌez nohni, lhane cho nohuzkeh ooleꞌ. Lhanꞌun cho ndi yun kꞌut whutꞌenne lhane cho nohhuzkeꞌ hooleꞌ.”

⁸ ꞋEt Yakꞌusda (Elohim) Nowe ꞌinkꞌez ooyeꞌke te ꞌenne ꞌubulhni,

⁹ “ꞋEt si whunulhꞌen sghuni ꞌi bulh ꞌi nohbulh lhadusla. Mbene la nohtsꞌu haindene nohkꞌelhꞌaz ꞌenne cha.

¹⁰ ꞋInkꞌez khuna-i tsꞌiyawh nohbulh ꞌuntꞌoh-i, dutꞌai cha, musdoos cha, ꞌinkꞌez khuna-i tsꞌiyawh ndi yun kꞌut hoonli-i nohbulh ꞌuntꞌoh-i, ꞌi tsꞌiyawh tsꞌi cho be nohbulh dehailhꞌaz, yun kꞌut khuna-i tsꞌiyawh.

¹¹ Whuz unꞌa sghuni ꞌi bulh ꞌi nohbulh lhadusla. ꞋAw doo cha za ndi yun kꞌut ndai la khuna-i tsꞌiyawh ꞌusjiz-i, tsꞌiyawh ꞌaw too be ꞌaw huboosghan ꞌaitꞌoh. ꞋAw doo cha za dutadiltꞌo whe ndi yun gak ooselh ꞌaitꞌoh.”

¹² ꞋInkꞌez Yakꞌusda (Elohim) ꞌutni, “Njan ꞌet si whehoodalhꞌeh khuni nohtsꞌun lhadusla-i, si ꞌinkꞌez nohni nohbulh, ndai ndi yun kꞌut ꞌusjiz-i hoonli-i tsꞌiyawh ꞌilhiz wheni khuni ꞌuntꞌoh.

¹³ Ditni naꞌanguz kwꞌus toh ꞌi ꞌusla. ꞋI gha whe hoodatꞌen tileh si ꞌinkꞌez ndi yun kꞌut-i bulh khuna-i ꞌusla-i.

¹⁴ ꞋEt ꞌuhotꞌeꞌ, ndet yun kꞌut, kwꞌus whulhlih teh, ꞌet ditni naꞌanguz ꞌi tsꞌunoolhꞌen kwꞌus toh ꞌet.

¹⁵ Ndai la nohni cha ꞌinkꞌez khuna-i cha tsꞌiyawh ꞌi oonatiznih khuni nohtsꞌun lhadusla-i, tsꞌiyawh ꞌaw doo cha ꞌon ꞌat too ndo ha tadiltꞌo, yun kꞌut hoonli-i gak ooselh ꞌaitꞌoh.

¹⁶ Ditni kwun ꞌi kwꞌus toh hoonli de ꞌi nusꞌen de ꞌet whunatiznih, ꞌilhiz wheni ndi khuni Yakꞌusda (Elohim) ꞌinkꞌez ndi yun kꞌut hoonli-i ꞌusjiz-i tsꞌiyawh khuni nohba lhadúsla, oonatiznih.”

¹⁷ ꞋEt Yakꞌusda (Elohim) Nowe ꞌulhni, “Njan whe hoodatꞌen-un ꞌuhoontꞌoh, ꞌuwhusla-un, njan khuni nohba lhadúsla ꞌuhoontꞌoh, Si ꞌinkꞌez ndi yun kꞌut hoonli tsꞌiyawh ꞌusjiz-i bulh lheto khuni.”

Nowe ꞌinkꞌez buyeꞌke ꞌen hubulh dahooja

¹⁸ ꞋAndit ꞌet Nowe ooyeꞌke ꞌen ndi tsꞌi cho be ha handil, ꞌen Shem, Ham, ꞌinkꞌez Japheth. ꞋInkꞌez Ham, ꞌen Canaan be oobá ꞌuntꞌoh.

¹⁹ Ndunne tane ꞌenne Nowe ooyeꞌke hinle, ꞌenne butsꞌu haidune. ꞋEnne bugha ndi yun kꞌut whudizbun.

²⁰ ꞋInkꞌez Nowe ha nuyeh-i ghana-un suliꞌ, duchun oomaiꞌ hoonli-i ꞌet ꞌuhoonla.

²¹ ꞋEt ndi tsꞌekoo tooꞌ ꞌuyinla-i yitnaiꞌ whe tanisnaiꞌ ꞌinkꞌez ookꞌeꞌtizkat nimbali tꞌah.

²² ꞋEt Ham Canaan oobá ꞌen dubá ye ꞌustꞌet yanꞌen ꞌinkꞌez nane dulhusinke ꞌenne budaniꞌ ꞌaz.

²³ ꞋEt Shem ꞌinkꞌez Japheth bulh naih hilhchoot ꞌinkꞌez dutꞌa tsꞌe kꞌehuyilhbal duwus kꞌut ꞌinkꞌez kꞌoh unꞌa hiꞌus whe dubá hikꞌehuyinꞌoh ꞌaw dubá lhuhinilhꞌel, ye ꞌustꞌet lhuhuyiꞌel.

²⁴ ꞋEt Nowe tsꞌekoo tooꞌ ꞌutnaiꞌ whe tsꞌe ninzut, ꞌudekꞌoh-un duyeꞌ ꞌen dadudinla la ꞌet tꞌeoonanzin.

²⁵ ꞋInkꞌez ꞌutni, “Canaan ookꞌehidih. Dune ba ꞌutꞌen-un ꞌenne bubaꞌ titꞌelh ꞌet la dudulhutsinke cha bubaꞌ titelh.”

²⁶ ꞋInkꞌez ꞌutni, “Moodihti (Yahweh) soo hoonzoo-un unli. Shem ooYakꞌusda (Elohim) ꞌuntꞌoh. ꞋInkꞌez Canaan yunat neꞌutꞌen-un ooleꞌ.

²⁷ Yakꞌusda (Elohim) Japheth ncha yoolhtselh, Shem oonimbali tꞌah ꞌoh hootꞌeꞌ, ꞌinkꞌez Canaan yunat neꞌootꞌen.”

²⁸ ꞋInkꞌez Nowe butadiltꞌo hukwꞌelhꞌaz ꞌet whunizyat tat whunizyat ꞌinkꞌez kwulat whunizyat yus kꞌut (350) ꞌet nakhitnaꞌ.

²⁹ ꞋEt Nowe ꞌalhgoh ndi yun kꞌut ꞌindaꞌ-un whunizyat ꞌilho hooloh whunizyat ꞌinkꞌez kwulat whunizyai yus kꞌut (950) whe dazsai.