Genesis 8 - Yak'usda Ooghuni

Too ꞌawet yo ꞌuja

¹ ꞋEt Yakꞌusda (Elohim) Nowe ꞌinkꞌez khuna-i ndai la ꞌusjiz-i tsꞌi bet tsꞌiyawh yulh ꞌuntꞌohne whunalnih, ꞌinkꞌez Yakꞌusda nilhtsꞌi ꞌi ꞌuyinla ꞌi ndi yun kꞌut nalhtsꞌi, ꞌet too yo ꞌuja.

² Ndi yun kꞌut too tsꞌiyawh ꞌinkꞌez ndo yakꞌuz whudadintꞌaz cha tsꞌiyawh yudanaꞌdinla ꞌinkꞌez yakꞌuz tsꞌun chan ꞌetsul ꞌuyinla.

³ ꞋInkꞌez too tsꞌiyawh yo wheꞌ ninleꞌ, whunizyat whunizyat ꞌinkꞌez ꞌon ꞌat kwulat whunizyat dzin (150) ꞌet too yo ꞌuja.

⁴ ꞋEt ndi tsꞌi ꞌi ntsꞌe ndi dzulh Ararat huyulhni ꞌuntꞌoh, ꞌi lhtakꞌantꞌit sanun ꞌinkꞌez whunizyat ꞌon ꞌat lhtakꞌantꞌit dzin (17), ꞌi kꞌut neninkez.

⁵ ꞋInkꞌez too yo ꞌuja ꞌinkꞌez yo za lheꞌinelh whunizyat sanun whutsꞌun, ꞌudechoo dzin ꞌet dzulh oolatoh hooltsai.

⁶ ꞋEt ꞌuhooja dit whunizyat dzin (40) ꞌetsul ꞌuhooja whe Nowe dadintꞌaz ꞌi dahaꞌ idantan.

⁷ Datsancho ꞌi yula ditni ꞌaz ndulcho ꞌawh nutꞌo za ꞌutꞌen, too gak tileh whutsꞌun.

⁸ ꞋEt doo cha dutꞌaiyaz, ꞌimbin huyulhni, ꞌi yula ditni ꞌawet tila too yo ꞌuja ha.

⁹ ꞋEt ndi ꞌimbin ꞌaw nootꞌah-un hooloh, ꞌet ka ndi tsꞌi cho yutsꞌun naoostꞌo, ꞌawhuz ndi yun ndulcho too hoonli. ꞋEt huwa Nowe dula be yuba tedilni ꞌinkꞌez ꞌet danainilhti.

¹⁰ ꞋEt doo cha lhtakꞌantꞌi dzin ꞌet whubailhꞌeꞌ. ꞋEt doo cha ndi ꞌimbin yula ditni.

¹¹ ꞋEt hulhgha ꞌet ndi ꞌimbin whusanatꞌo ꞌinkꞌez duchun, olive hiyulhni, ootꞌan ꞌandit ha nalhyai, ꞌi ooze yudiztan. ꞋEt ꞌawet Nowe tꞌeooninzin ndi yun kꞌut ꞌawet too hooloh suliꞌ.

¹² ꞋEt doo cha lhtakꞌantꞌi dzin ꞌet huba ꞌilhꞌeꞌ, ꞌet doo cha ndi ꞌimbin, ꞌi yula ditni ꞌinkꞌez ꞌaw whusanalhitꞌoh.

¹³ ꞋEt ꞌuhooja lhkꞌu tat whunizyat yus kꞌut ꞌinkꞌez ꞌet ꞌudechoo yus kꞌut (601), ꞌinkꞌez ꞌudechoo sanun ꞌudechoo dzin sanun ꞌet yun kꞌut naoodisgih. ꞋInkꞌez Nowe ndi tsꞌi ndo yudahaꞌdantan ꞌinkꞌez whunilhꞌen ndulcho yun naoodisgih.

¹⁴ ꞋEt whulh nanki sanun nat whunizyat dzin ꞌon ꞌat lhtakꞌantꞌi dzin sanun (27), ꞌet yun naoodisgih.

¹⁵ Yakꞌusda (Elohim) ꞌen Nowe yulh yailhduk ꞌuyulhni,

¹⁶ “Nyoo tsꞌi tenanindaih ndai la nꞌat cha ꞌinkꞌez nyuzkehke, duꞌatke tubulh tenanuhdilh.

¹⁷ Ndai la tsi bet daltsꞌiꞌ-i khuna-i ꞌusjiz-i tsꞌiyawh tenaninle, dutꞌai cha ꞌinkꞌez khuna-i ꞌinkꞌez yun nulhꞌas-i cha, ꞌet si ndi yun kꞌut lhai hooleꞌ.”

¹⁸ ꞋEt Nowe teninya ꞌinkꞌez buzke cha ooꞌat cha ꞌinkꞌez buꞌatke cha tsꞌiyawh bubulh.

¹⁹ Khuna-i ndai la yun nulhꞌas-i cha, dutꞌai cha, tsꞌiyawh lhulhdidoh-i, ꞌi tsꞌiyawh ndi tsꞌi huye haindil.

Yakꞌusda (Elohim) ꞌen Nowe khuni ꞌinla

²⁰ ꞋEt Nowe ꞌen Moodihti (Yahweh) tsꞌun loodel ꞌuzdilhkꞌun kꞌut, ꞌi ꞌinla, ꞌinkꞌez ndai la khuna-i ꞌaw lhditsun-i, ꞌinkꞌez ndai la dutꞌai ꞌaw lhditsun-i cha, ꞌohwhi ꞌi kꞌut yudalhkꞌun.

²¹ ꞋEt Moodihti (Yahweh) ndi sooltsun-i yunahoolhtsun. ꞋInkꞌez Moodihti (Yahweh) didutchꞌoh dudzi yo ꞌutni, “ꞋAw ꞌon ꞌat ndi yun dune gha ꞌaw ookꞌehoosyih ꞌaitꞌoh. Dahintꞌoh la dune budzi ntsiꞌ hintsool whutsꞌun, ꞌet hoontsꞌi ꞌaw doo cha ꞌon ꞌat khuna-i ndi yun kꞌut gak hooselh ꞌaitꞌoh.

²² Ndi yun hoonli whutoh ꞌaꞌ nukat-un ꞌinkꞌez haꞌ nukat-un, whuzkꞌuz ꞌinkꞌez whunulwus-un cha, khit cha ꞌinkꞌez shin cha. ꞋInkꞌez dzenis cha ꞌinkꞌez ꞌulhdzis cha hoonli-un, ꞌaw ꞌetsul lheꞌwhutasnel.”