Genesis 7 - Yak'usda Ooghuni

Dutadiltꞌo-un

¹ ꞋEt whe Moodihti (Yahweh) ꞌen Nowe ꞌuyulhni, “Nyuzkeh cha, nyunchꞌoh cha, mbene la nyoh whutꞌine tsꞌiyawh ndi tsꞌi cho behdilh, daintꞌoh la tsꞌihꞌun dune inli, ndi ꞌandit dune toh ndoh whuya hoozulh dune toh daintꞌoh la tsꞌihꞌun dune inli-un ꞌet whunusꞌen.

² Ndi yun kꞌut khuna-i ootsun hooloh-i, lhtakꞌantꞌi dune ꞌinkꞌez tsꞌeke bulh ꞌilhoh didoh-i nanki whe khuna-i tsꞌiyawh. Ndi khuna-i dutsun-i cha, dune cha tsꞌeke cha, ꞌohwhi ꞌi tsꞌiyawh olhchoot.

³ ꞋInkꞌez ndi yun kꞌut ndai la nudilh-i dutꞌai tsꞌiyawh cha lhtakꞌantꞌi dune ꞌinkꞌez tsꞌeke bulh cha, ꞌohwhi tsꞌiyawh ndi yun kꞌut khuna-i ndai la hutinalh-i.

⁴ Lhtakꞌantꞌi dzin hukwꞌelhꞌaz ꞌet ndi yun kꞌut dit whunizyat (40) dzin ꞌinkꞌez dit whunizyat ꞌulhdzis whutsꞌun nawhutilhtilh. Ndai ꞌusla ndi yun kꞌut ꞌusjiz-i tsꞌiyawh hooloh whutilhtselh.”

⁵ ꞋEt Nowe ntsꞌenꞌa Moodihti (Yahweh) yuba nahizya, tsꞌiyawh ꞌet nduja.

⁶ Nowe ꞌen 600 be nawhudizut yun kꞌut indaꞌ whe ndi yun kꞌut ꞌet dutadiltꞌo.

⁷ ꞋEt Nowe ooyeꞌke ooꞌat cha, ꞌinkꞌez ooyeꞌke buꞌatke cha tsꞌiyawh ꞌi nyoo tsꞌi cho huye indil ꞌawet too ndo ꞌutinelh ꞌet huwa.

⁸ Ndai la khuna-i lhditsun-i ꞌinkꞌez khuna-i dutsun ꞌi cha, dutꞌai cha ꞌinkꞌez ndi yun kꞌut nulhꞌas-i tsꞌiyawh.

⁹ Nanki hinli whe ndi tsꞌi cho bez Nowe tsꞌun dahunilhꞌaz, dune ꞌinkꞌez tsꞌeke cha. ꞋEt ntsꞌenꞌa Yakꞌusda (Elohim) ꞌen Nowe yuba nahizya, ꞌet nduhuja.

¹⁰ ꞋEt hukwꞌelhꞌaz lhtakꞌantꞌi dzin inleꞌ ꞌet ꞌawet ndi yun kꞌut too whuzdliꞌ.

¹¹ Nowe be yus kꞌut-un, whunizyat lhkꞌu tat whunizyat (600) ꞌet ꞌuhooja whulh nanki sanun (2) whunizyat ꞌon ꞌat lhtakꞌantꞌit dzin (17) ꞌet ꞌuhooja ndi yun kꞌut too tsꞌiyawh oodahaꞌdiltsꞌut, ꞌinkꞌez ndo yakꞌuz whudadintꞌaz cha whudahaꞌdankat.

¹² Dit whunizyat dzin ꞌinkꞌez dit whunizyat ꞌulhdzis ꞌet ndi yun kꞌut yun chan honleꞌ.

¹³ Soo ꞌet dzin za Nowe ooyeꞌke cha, Shem, Ham ꞌinkꞌez Japheth, ꞌinkꞌez Nowe ooꞌat, ꞌinkꞌez ooyasꞌatke cha tsꞌiyawh ndi tsꞌi cho huye indil.

¹⁴ ꞋEnne cha ꞌinkꞌez tsꞌiyawh khuna-i lhelhtsꞌun didoh, tsꞌiyawh musdoos lhelhtsꞌun didoh, tsꞌiyai yun nulhꞌas lhelhtsꞌun didoh, ꞌinkꞌez yat whudutꞌai lhelhtsꞌun didoh cha, tsꞌiyai didoh lhelhchꞌa ꞌuwhutꞌen.

¹⁵ Nanki whe tsꞌiyawh Nowe bulh ndi tsꞌi cho huye indil. Ndai la khuna-i ndi yun kꞌut ooyiz hoonli-i tsꞌiyawh.

¹⁶ ꞋEt ndowhi tsꞌiyawh tsꞌeke dune tubulh. Ndi yun kꞌut hoonli-i Yakꞌusda (Elohim) ꞌen yuba nahizya, whuz unꞌa ndi tsꞌi huye indil ꞌinkꞌez buchꞌaz naꞌdinꞌai.

¹⁷ Ndi ha tadiltꞌo-i too dit whunizyat dzin (40) ꞌet ꞌantꞌeꞌ too ndo za lheꞌinelh ꞌinkꞌez ndi tsꞌi cho dudinlat yun ando tsꞌe whuz dudinlat.

¹⁸ Too ꞌet za ndutꞌen ꞌinkꞌez nus za lheꞌiltus ndi yun kꞌut, ꞌinkꞌez ndi tsꞌi cho ꞌoh nulat.

¹⁹ ꞋEt ndi yun kꞌut too tube takhulh suliꞌ. Dzulh ꞌowhi cha tsꞌiyawh ba ndo ha tadiltꞌo.

²⁰ Ndo za ꞌutꞌen (15 cubits) ꞌinkꞌez ndi too dzulh ba ndo ha tadiltꞌo.

²¹ ꞋEt ndi yun kꞌut khuna-i nuhutnah-i, dutꞌai cha, ꞌinkꞌez musdoos nduntꞌi-i cha, yun nulhꞌas-i cha, tsꞌiyawh dune cha tsꞌiyawh hooloh huzdliꞌ.

²² Mbene la ooyiz hoonline husjizne, ꞌinkꞌez hoonli husjiz-i ꞌohwhi tsꞌiyawh yun kꞌut ꞌuntꞌoh-i, tsꞌiyawh yaidla.

²³ ꞋEt ndi yun kꞌut hoonli khuna-i tsꞌiyawh gak whulhtsi. Yun nulhꞌas-i cha, dune cha, ꞌinkꞌez khuna-i cha, dutꞌai cha, tsꞌiyawh gak whulhtsi. Nowe ꞌinkꞌez yulh ꞌutꞌenne ꞌenne za ndi tsꞌi cho bet hukhuna.

²⁴ ꞋEt whunizyat whunizyat ꞌinkꞌez kwulat whunizyat dzin (150) ꞌet ꞌuwhulhyiz whe ndi yun kꞌut too honleꞌ.