Genesis 6 - Yak'usda Ooghuni

Dune huye untsiꞌ-i ꞌinkꞌez be buba nahisda

¹ ꞋEt ꞌuhooja, ndi yun kꞌut dune ꞌawet nus za ꞌuhuniltsuk whe ꞌinkꞌez tsꞌekoo bubuzkeh suliꞌ.

² Yakꞌusda (Elohim) ooyeꞌke ꞌenne ndunne tsꞌekoo dune ootseꞌkene huhinzoo hubonilhꞌen. ꞋInkꞌez mbene la bukaꞌ huninzunne ꞌenne tsꞌekoo bubu hilhchoot, buꞌatke holeꞌ ha.

³ ꞋEt Moodihti (Yahweh) ꞌutni, “Syoghi ꞌaw ꞌilhiz wheni dune bulh buchꞌaz dotni ꞌaitꞌoh. ꞋAlha ndi yun kꞌut dune unli ꞌet hoontsꞌi whunizyat whunizyai ꞌinkꞌez nat whunizyai (120) be yus kꞌut tileh whe ndi yun kꞌut tidalh.”

⁴ ꞋEt ꞌoh daꞌ njan yun kꞌut dunechone hanleꞌ. ꞋEt hukwꞌelhꞌaz Yakꞌusda (Elohim) ooyeꞌke ꞌenne ndi yun kꞌut dune butseꞌke buzisda ꞌinkꞌez bubuzkehke yahonleꞌ. ꞋEt ndunne dune whuzdliꞌne, ꞌenne dune lhtuscho ꞌinkꞌez nchane ꞌuhintꞌoh.

⁵ ꞋEt Moodihti (Yahweh) bunilhꞌen ndi yun kꞌut dune huye untsiꞌ tube ncha suliꞌ. Tsꞌiyawh ꞌahoolhyiz wheni ndune bubeni untsiꞌ, ꞌet whunilhꞌen.

⁶ ꞋEt Moodihti (Yahweh) tube huwu dzi unduda ndi yun kꞌut dune ꞌinla-un, oodzi yo tube whunduda suliꞌ.

⁷ ꞋEt Moodihti (Yahweh) ꞌutni, “Mbene la dune ndi yun kꞌut wheni ꞌubuslane, soo tsꞌiyawh gak hubutiselh. Ndi dune ꞌinkꞌez khuna-i, yun kꞌut nulhꞌas-i ꞌinkꞌez ndo dutꞌai nudilh-i cha, ꞌi tsꞌiyawh. ꞋEt tube huwu sdzi unduda ꞌubusdla ꞌet huwa.”

⁸ ꞋEt hoontsꞌi Nowe ꞌen Moodihti (Yahweh) oonalh ndi ye netsꞌun unzoo-i ꞌet nahoonꞌai.

Nowe ꞌen Yakꞌusda (Elohim) yuba soo nduja

⁹ Nowe tsꞌu haindene hukwꞌeguz ꞌet ꞌuhoontꞌoh. Nowe ꞌen tsꞌihꞌun dune unli, khuna daꞌ whe ꞌaw ookꞌeholtsꞌit hooloh. Nowe ꞌen Yakꞌusda (Elohim) bulh nuya inleꞌ.

¹⁰ Nowe tane ooyeꞌke suliꞌ: Shem, Ham, ꞌinkꞌez Japheth.

¹¹ Yakꞌusda (Elohim) oonalh ndi yun kꞌut ndulcho dune nintaꞌhonilhꞌen ꞌinkꞌez dune lhezudla-un, dulcho whe whudizbun.

¹² ꞋEt Yakꞌusda (Elohim) njan yun kꞌut ꞌet whunilhꞌen whe ꞌalha tube nintaꞌwhuntꞌen. Dunene, ꞌenne tsꞌiyawh soo tsꞌihꞌun ꞌantsꞌi halhjut leꞌ hintꞌoh suliꞌ.

Tsꞌi cho ꞌulya

¹³ Yakꞌusda (Elohim) ꞌen Nowe ꞌuyulhni, “Njan tsꞌiyawh ndai la ꞌusjiz-i, ꞌawet sba whula toh suliꞌ. Dunene ꞌenne bulagha tsꞌe ndi yun kꞌut tsꞌiyawh be lhezudla-i be hodilhbun. ꞋEt whunilhꞌen, ndi yun ndulcho whe ndi khuna tsꞌiyawh yun kꞌut husjiz-i, tsꞌiyawh bulh gak whutiselh.

¹⁴ Ndi duchun gopher hiyulhni, ꞌi be tsꞌi cho ꞌónleh. ꞋInkꞌez bez tsꞌe ꞌet lhelhdun whulai holhtselh. Dzeh ꞌi be bez tsꞌe ꞌinkꞌez yoo ꞌaz tsꞌe cha be ondzeh.

¹⁵ ꞋInkꞌez ꞌet ndiz unꞌa ndi tsꞌi cho ꞌi ꞌonleh: 450 feet ꞌet ꞌuhoolyiz, ꞌinkꞌez 75 feet ꞌet ꞌuhooltel, ꞌinkꞌez 45 feet naoodalhzaꞌ.

¹⁶ Dadintꞌaz cho ooba ꞌonleh. ꞋIlho cubit ndo ooban whutsꞌun, ꞌet neninꞌa holhtselh. Oozih kꞌut ꞌet dati-un ꞌonleh. ꞋUdeyo-un yun cha ꞌonleh ꞌinkꞌez ꞌon do cha ꞌudun ꞌuhoonleh, ꞌinkꞌez bulh tat-un yun ꞌet ꞌuhonleh.

¹⁷ ꞋEt whunilhꞌen ꞌet si ꞌutisnelh, yun kꞌut ndulhcho too ha tadutisbilh. Yat whutah ꞌet gak whutiselh. Tsꞌiyawh ndai ndi ꞌusjiz be tsꞌukhuna bulh ꞌuntꞌoh, ꞌi gak tileh. Ndi yun kꞌut ꞌet tsꞌiyai yatadlah.

¹⁸ ꞋEt hoontsꞌi nyun ntsꞌun sghuni ntlꞌa dutisꞌalh. ꞋInkꞌez ndi tsꞌi cho bez tonyaꞌ, nyun, nyeꞌke, nꞌat, ꞌinkꞌez nyeꞌkeh buꞌatke cha, ꞌen dulh ꞌúbolneh.

¹⁹ ꞋInkꞌez ndai la ndi yun kꞌut ꞌusjiz-i, lhawh didoh ꞌilho whe nawh didoh-i, ꞌi ndi ꞌi tsꞌi cho be ꞌonlelh. ꞋEt tsꞌiyawh hutinalh wheni tsꞌeke cha ꞌinkꞌez dune cha unli-i didoh-i tsꞌiyawh.

²⁰ Ndai la ndo nudilh-i dundultꞌoh-i, yun nulhꞌas-i dundultꞌoh-i cha, ꞌinkꞌez yun nutsꞌeh-i dundultꞌoh-i cha, nanki dundultꞌoh-i tsꞌiyawh ntsꞌun tidulh, hutinalh wheni.

²¹ ꞋInkꞌez ndai la ꞌutꞌalh-i tsꞌiyawh, tanꞌulh-i tsꞌiyawh be ꞌonlelh, ꞌi tsꞌiyawh ꞌulhonlelh. ꞋI la oohꞌalh nyun ꞌinkꞌez ndi khuna-i cha.”

²² ꞋEt Nowe ꞌet nduja, ntsꞌenꞌa Yakꞌusda (Elohim) yuba nahizya, ꞌet tsꞌiyawh nduja.