Genesis 50 - Yak'usda Ooghuni

¹ ꞋEt Joseph dubá yunin kꞌechaniti ꞌinkꞌez yukꞌut intse ꞌinkꞌez naiditsꞌooz.

² ꞋInkꞌez Joseph yuba ꞌutꞌenne, yoo be duyunne, ꞌenne dubá oozi lhahidooleh hubulhni. ꞋEt yoo be duyunne, ꞌenne Israel oozi yesaꞌ sooꞌ titꞌelh-i, ꞌi be highaizna.

³ Dit whunizyat dzin (40) ꞌet whuz unꞌa hubaꞌ hoontꞌoh tsꞌet ubuhulhti, ꞌinkꞌez bukꞌenihunudleh. Whuz unꞌa buzih lhadulyanne, ꞌinkꞌez Egypt whutꞌenne, ꞌenne lhtakꞌantꞌit whunizyat dzin (70) ꞌet hikꞌenudleh whe inleꞌ.

⁴ ꞋEt ꞌawet ndi dzin lhaoodinla ꞌet Joseph, Pharaoh ooyoh whutꞌine hubulhni, “ꞋAndit nohna soo tsꞌihꞌun sulh newhunaꞌai de, ꞌet Pharaoh soo nehoozulhtsꞌai, ꞌen dudoohniꞌ,

⁵ ‘ꞋUbá ootsꞌun nahizusya whe njan dudusni, “Whunilhꞌen ꞌawet datisah. Ndet la stsꞌun kꞌut, Canaan yun kꞌut ꞌuwhusla-un ꞌet ꞌasolhtelh,” sulhni. ꞋEt huwa sla dinih, ꞌubá ꞌatistelh ꞌinkꞌez la whusanaoosja.’”

⁶ ꞋInkꞌez Pharaoh ꞌutni, “Whuz inyalh ꞌinkꞌez mbá ꞌailhtih, khuni daja dini la ootsꞌu nahizinya-i kꞌunꞌa.”

⁷ ꞋEt Joseph whuz dubá whenayalhti ꞌaitilhtelh ha, mbene la Pharaoh yuba ꞌutꞌenne cha tsꞌiyawh hiyulh whendil. Ooyoh ꞌudetso whudilhdzulhne, ꞌenne cha ꞌinkꞌez Egypt yun kꞌut ꞌudetso whudilhdzulhne, ꞌenne cha hiyulh whendil.

⁸ Joseph ooyoh whutꞌine, bulhutsinke ꞌinkꞌez oobá ooyoh dilhtsꞌine cha tsꞌiyawh hiyulh whendil. Tsꞌoodunne ꞌinkꞌez bughunaꞌ cha, musdoos cha, ꞌinkꞌez tsꞌiyawh nyo Goshen whuyun kꞌut ꞌet neboninla.

⁹ ꞋEt yeztli ꞌinkꞌez nyowhi huye nudilh-i huye ꞌuzdla-i cha tubeh lhane dune ꞌilhozdil.

¹⁰ ꞋEt nyo Atad oochꞌeꞌ lhes maiꞌ dunuldus-un, ꞌet nehunindil, Jordan whanooꞌ ꞌuhoontꞌoh, ꞌinkꞌez soo tube ꞌet hikꞌeniudle. ꞋEt Joseph ꞌen lhtakꞌantꞌit dzin ꞌet dubá yukꞌenudleh whe inleꞌ.

¹¹ ꞋEt nyo Canaan whutꞌenne dune nyo lhes maiꞌ dunuldus-un ꞌet hikꞌenudleh whunilhꞌen, ꞌet huwhuhunilhꞌen ꞌinkꞌez ꞌuhutni, “Njan ꞌet tube Egypt whutꞌenne hukwꞌe hunduda whe hikꞌenudleh.” ꞋEt huwa ooboozih Abel Mizraim, Jordan whanooꞌ whuzꞌaih ꞌi hooziꞌ huyulhtsi.

¹² ꞋEt duyeꞌke daja hubulhni la, whuz unꞌa ꞌuhuyinla.

¹³ Ooyeꞌke Canaan keyoh tsꞌe nahuyoolhti ꞌinkꞌez nyo Machpelah yun ꞌet tseꞌan ꞌet ꞌahayalhti, Mamre whutso ꞌet Abraham nyoo yun Ephron, Hitt whutꞌen-un, ꞌen tsꞌun yonket tsꞌun kꞌut wheni.

¹⁴ ꞋEt Joseph dubá ꞌayalhti whe ꞌet Egypt tsꞌu naoosja, bulhutsinke cha, yulh nusudilne ꞌenne cha tsꞌiyawh whuz nahoosdil.

Joseph bulhutsinke soo naꞌbudutni

¹⁵ ꞋEt Joseph bulhutsinke bubá ꞌawet dazsai ꞌet ꞌuhutni, “Joseph netsꞌu dootni tilah, datsꞌinla la hoontsꞌi hukwꞌunꞌa ꞌutsꞌinla ꞌet tilah neba kꞌelha hoolhtselh.”

¹⁶ ꞋEt Joseph hitsꞌo tlꞌa khuni inꞌai ꞌuhuyulhni, “Mbá datitsah whutso njan ndutni,

¹⁷ ‘ꞋEt Joseph dohniꞌ, “Ntsꞌu tezdudlih, nyulhutsinke buba whunahodolnoh ꞌinkꞌez whe nintaꞌhuntꞌen cha tube hoontsꞌi kꞌunꞌa ꞌunyuhinla, ꞌet huwa mbá ooYakꞌusda (Elohim) ba ꞌutꞌenne, ꞌenne buba whunahoodolnoh.”’” ꞋInkꞌez Joseph intse hiyulh yailhduk whe.

¹⁸ ꞋEt bulhutsinke ꞌenne cha hinin tsꞌe ꞌet hibut nahankat ꞌinkꞌez ꞌuhutni, “Whunilhꞌen mba ꞌutꞌenne tsinli.”

¹⁹ Joseph ꞌubulhni, “Whenulhjut iloh. Yakꞌusda (Elohim) ꞌen la ookꞌedusda wheꞌ duhni?

²⁰ ꞋEt nohni tube hoontsiꞌ hukwꞌunꞌa ꞌusutilelh kꞌunꞌa ꞌusuhla, ꞌet hoontsꞌi Yakꞌusda (Elohim) ꞌen ooba hoonzoo hukwꞌunꞌa ꞌuhoonla, ꞌandit dzin wheni dune lhane hubutisyih ha.

²¹ ꞋEt huwa whenulhjut iloh, nohuzkehyaz cha nohni cha tsꞌiyai be lhanohdutisleh.” ꞋInkꞌez kꞌenaꞌbuninꞌa ꞌinkꞌez soo cho khuni nzoo-i be bubulh yailhduk.

Joseph dazsai

²² ꞋEt Joseph Egypt yun kꞌut ꞌet hootꞌeꞌ, dichꞌoh cha ꞌinkꞌez oobá ooyoh whutꞌine inleꞌne, ꞌenne cha ꞌinkꞌez Joseph whunizyat whunizyai ꞌon ꞌat whunizyai (110) yus kꞌut ꞌet khana.

²³ Joseph ꞌet Ephraim buzkeh tawh whudidoh whutsꞌun bunalhꞌen, Machir buzkeh Manasseh ooyeꞌ, ꞌenne cha Joseph oogwꞌut kꞌut ꞌet hunizyai.

²⁴ ꞋInkꞌez Joseph dulhutsinke ꞌubulhni, “ꞋAwet datisah, ꞌet hoontsꞌi Yakꞌusda (Elohim) ꞌalha nohtsꞌun nutiyalh ꞌinkꞌez ndi yun chꞌa nanohtalelh, ꞌinkꞌez Abraham, Isaac ꞌinkꞌez Jacob cha yun butsꞌi yooziꞌ-i, whuz nanohtilelh.”

²⁵ ꞋEt Joseph, Israel buzkeh hitsꞌu nahizya ꞌet ꞌubulhni, “ꞋAlhaꞌ Yakꞌusda (Elohim) nohtsꞌun nutiyalh ꞌinkꞌez ustsꞌun ꞌi njan whuchꞌa naoolelh.”

²⁶ ꞋEt Joseph dazsai, 110 be yus kꞌut ꞌinkꞌez hizi saꞌ sooꞌ titꞌelh huba lhahidinla ꞌinkꞌez Egypt ꞌet chunkelh ꞌet hitalhtelh ha.