Genesis 49 - Yak'usda Ooghuni

Jacob ooyeꞌke bubulh dawhutanelh budaniꞌ

¹ ꞋInkꞌez Jacob duyeꞌke bukaꞌ dani ꞌinkꞌez ꞌutni, “ꞋIlhoozahdilh ꞌet de sih nohbulh dawhutanelh la ꞌudekꞌez dzin nohudutasnelh.

² ꞋIlhozahdilh ꞌinkꞌez oozulhtsꞌai Jacob ooyeꞌke ꞌinkꞌez nohbá Israel oozulhtsꞌai.

³ Reuben nyun ꞌudetso syeꞌ whuzdli-un inli. Ndai la be ꞌustus-i ꞌinkꞌez ꞌudechoo be ꞌustus suliꞌ-i, ndai la ꞌilhoh tuneꞌ zustꞌen-un ꞌinkꞌez dalcho-i be be ꞌustus-i cha.

⁴ Too nudutunne ootꞌa niuznootan ꞌaitꞌoh. ꞋAw hoonzoo lhotuzanꞌel mbá oolili kꞌut ꞌet inteꞌ ꞌinkꞌez whudutsun whuzilhtsi. Ndai la ookꞌosteꞌ-i ꞌi ookwꞌut inteꞌ ꞌet huwa.

⁵ Simeon ꞌinkꞌez Levi bulh lhulhutsinke hudli. Be dzoh neꞌudzut-i bubulh ꞌuntꞌoh, ndet la huwhutꞌi-un.

⁶ ꞋAw szul buzih neooyaꞌ junih. Be dastiꞌ-i, ndet la huwhutꞌi-un bubulh ꞌuyotꞌeꞌ junih. Huhunilchꞌe whe dune huzilhghi ꞌet huwa, ꞌinkꞌez kꞌuneꞌ hutꞌen whe musdoos dune kechun dugha hininguz.

⁷ Bube huske-i ookwꞌehoodeh, tube be oonujut ꞌet huwa. Huye huske-i tube ookwꞌehunduda. Jacob ꞌet lhkꞌebutistelh ꞌinkꞌez Israel ꞌet lhelhdun nebutastelh.

⁸ Judah nyun ꞌutantꞌelh, nyulhutsinke nyuhudutalhtiꞌ. Nla ꞌi mbene la nchꞌaz ditnine bukꞌudutalni, mbá buzkeh ꞌenne mbut yo ꞌuhuntitsulh.

⁹ Judah ꞌi khuna-iti lion huyulhni, ꞌi ooyaz ꞌuntꞌoh. Ndai la ꞌinghan-i syeꞌ, ꞌi bulh ndo ꞌinja. Yo untutꞌaih ꞌinkꞌez khuna-iti lion huyulhni, ꞌi kꞌunꞌa ꞌusti ꞌinkꞌez khuna-iti lion unli de, mbe suba hinolhchꞌeh?

¹⁰ Ndai la lerwene tuz nuhidutun-i, ꞌi Judah yuyit lheꞌtistꞌel. ꞋInkꞌez keyoh huwu ni ookꞌuneꞌ whutꞌen-i, ꞌi ꞌaw ooke eguz whuchꞌa naoodzit ꞌaitꞌoh, Shiloh whusainya ꞌet whutsꞌun. ꞋInkꞌez dunene ꞌen bukꞌoh tsꞌe hikꞌuneꞌ ootꞌen ha.

¹¹ Oodonkey ꞌi nyoo duchun nudunulhye ꞌidutaguz, ꞌinkꞌez donkey ooyaz ꞌi duchun nudunulhye ꞌi soo ꞌukꞌenus unzoo yuzih neitalhtelh. Dunaih ꞌi tsꞌekoo tooꞌ be tunayuzguz, ꞌinkꞌez dunaih ꞌi mai tsꞌekoo tooꞌ huyilh-i, i ootooꞌ ꞌi be tunayuzguz.

¹² Oona ꞌi tsꞌekoo tooꞌ anus dunulhgus, ꞌinkꞌez ooghoo lilet anus ꞌulhyul

¹³ Zebulun ꞌen yatoo ba hoonzoo-un ꞌet whutitꞌelh. Ndai la tsꞌi yanakuk-i, ꞌi ba, ꞌinkꞌez keyoh Sidon ꞌet whuzih whutitꞌelh.

¹⁴ Issachar ꞌen donkey ulhtus-i ꞌuntꞌoh. Ndai ndaz-i yeguz nanki, ꞌi ꞌet titꞌelh.

¹⁵ Natsꞌulyiz-un hoonzoo-un ꞌet honꞌen ꞌinkꞌez yun kꞌut hoonzoo ꞌutighelh wheni yo ꞌutinelh. ꞋInkꞌez ꞌulhna didohne huzdliꞌ.

¹⁶ Dan ꞌen duduneꞌne buba nahutiyeh. Israel ꞌilhoh didohne ootsꞌu haindene ꞌenne ꞌuhintꞌoh.

¹⁷ Dan ꞌen ti whuzih tlꞌughus, viper, tileh. Tlꞌughus ꞌoolchꞌoolh-i ti whuzih, ꞌinkꞌez yeztli kꞌentsꞌul cha oolhchꞌoolh. ꞋInkꞌez mbe la yukusda-un ꞌen kꞌoh unꞌa yukꞌudutildus.

¹⁸ O Moodihti (Yahweh) ndet la whesutalhyih-un hubasꞌeꞌ!

¹⁹ Gad ꞌen lhuganne didohne ꞌenne hikꞌut nutidulh, ꞌet hoontsꞌi ꞌudekꞌoh ꞌet whuchꞌaꞌ tilhdoh.

²⁰ Asher ꞌutꞌalh-i ootsꞌu ha yultsꞌuk-i, ꞌi tube dutatiꞌ, ꞌinkꞌez nzoo-i ootsꞌu ha tikulh.

²¹ Naphtali ꞌen yeztsꞌe oolazditni-i leꞌ ꞌuntꞌoh, khuni nzoo-i za huwaꞌaih.

²² Joseph ꞌen duchun zooschum cho ootsꞌa ha ꞌukat-i unli. Too kꞌet whuzih ꞌet ootsꞌa hakat-i ꞌuzooschum unli. ꞋInkꞌez be ꞌuzooschum nyo sih hukwꞌut ndulcho whe hoonli.

²³ Mbene la kꞌaza be lhuganne tube hidzi undalhdaꞌ. Nuhinulhtso ꞌinkꞌez hutsꞌuditni.

²⁴ ꞋEt hoontsꞌi ookꞌaza ulhtus-un ꞌet za ꞌuntꞌoh inleꞌ. ꞋInkꞌez oogan ꞌi cha ꞌonus oonutꞌi lhtus suliꞌ. Jacob ooYakꞌusda (Elohim) be oonujut-un ulhtus-un, oola ꞌi be ꞌuntꞌoh (ꞌen ꞋUsbai Ghunli-un unli, Israel Whutseꞌ ꞌuntꞌoh).

²⁵ Mbá ooYakꞌusda (El), ꞌen nlaꞌutinelh. ꞋInkꞌez ꞋUkꞌenus ꞋUltus-un (EL Shaddai), ꞌen soo hoonzoo-i za ntlꞌa ookat. Yakꞌuz tsꞌe hakat-i, ꞌi be mba soo hoonzoo-i ntlꞌa ookat. Yatoo tꞌah tsꞌe hoonli ꞌi be cha mba soo hoonzoo-i whutaleh. Tsꞌekoo butsꞌooꞌ tsꞌoodunne huye ꞌulhtuk-i be ꞌinkꞌez tsꞌekoo buchan cha mba soo hoonzoo-i ntlꞌa ookat whutaleh.

²⁶ Mbá soo hoonzoo-i nohtlꞌa ookat, ꞌi stsodaꞌne ꞌonus soo hoonzoo-i za butlꞌa yiltsꞌut, whanus unzoo suliꞌ. Ndo yakꞌuz ꞌilhiz wheni nodistꞌai-un soo ꞌukꞌenus nilhdzaꞌ-un ꞌet whutsꞌun, ꞌi Joseph ootsi kꞌut ꞌutitꞌelh ꞌinkꞌez ootsitꞌah hukwꞌut, ꞌi bulhutsinke anus ꞌutitꞌelh.

²⁷ Benjamin ꞌen yus tube ooyeꞌiltsꞌul-i unli, bundadaꞌ ꞌet si yuzilhghi-i yooꞌalh, ꞌinkꞌez ꞌulhdzis ꞌet ndai la yughan-i, oogha yunkat-i lhkꞌeyulih.”

²⁸ Ndunne ꞌenne tsꞌiyawh Israel tsꞌu haindene whunizyane ꞌon ꞌat nane didohne, ꞌet ndi khuni ꞌi be buba hubulh yailhduk ꞌinkꞌez soo hoonzoo-i butsꞌun tizooꞌ, ꞌilhoghun hinli whe ntsꞌenꞌa la didutchꞌoh soo hoonzoo-i be ubulh yalhduk.

Jacob dazsai ꞌinkꞌez ꞌahuyalhti

²⁹ ꞋEt ꞌinkꞌez ꞌubulhni, “ꞋAwet sulh duneꞌne, ubulh ꞌistꞌeꞌne ꞌenne ꞌawet butsꞌun tisyalh. Ndet la tseꞌan Ephron yun kꞌut ꞌi Hitt whutꞌen-un ꞌuntꞌoh, ꞌen ootseꞌan ꞌet sbákene bubulh ꞌasoolhtelh,

³⁰ tseꞌan ꞌet Machpelah yun kꞌut ꞌet ꞌuhoontꞌoh, Mamre whutso Canaan yun kꞌut ꞌi Abraham, Ephron, Hitt whutꞌen-un unli-un, ꞌen ooyun, tsꞌun kꞌut wheni ꞌet honket.

³¹ ꞋEt Abraham ꞌinkꞌez Sarah ooꞌat bulh cha ꞌabuhalhti, ꞌet Isaac ꞌinkꞌez ooꞌat Rebekah bulh cha ꞌabuhalhti, ꞌinkꞌez si cha ꞌet Leah ꞌasti.

³² Ndai la yun ꞌinkꞌez tseꞌan ookꞌu whuzꞌai-i, ꞌi Heth ooyeꞌkene tsꞌun huyonket.”

³³ ꞋInkꞌez Jacob ꞌawet buzkeh hubulh yalhduk-un ꞌetsul ꞌudija whe, lili kꞌenadilꞌez ꞌinkꞌez ꞌudekꞌez ha najiz. ꞋInkꞌez whutsodaꞌ oonatneke bubulh ꞌuntꞌohne ꞌenne butsꞌun whenya.