Genesis 48 - Yak'usda Ooghuni

Jacob ꞌen Joseph ooyeꞌke, soo hoonzoo-un butsꞌun tizooꞌ

¹ ꞋEt hukwꞌelhꞌaz njan duhooja whe Joseph ꞌuhuyulhni, “Mbá nduda,” ꞌinkꞌez duyeꞌke nane Manasseh ꞌinkꞌez Ephraim ꞌenne hubilhchoot.

² ꞋInkꞌez Jacob huyulhni, “Whunilhꞌen nyeꞌ Joseph ntsꞌun tizya.” ꞋInkꞌez Israel do ꞌuja ꞌinkꞌez lili kꞌut ndo netlꞌa dindaꞌ.

³ ꞋEt Jacob, Joseph ꞌuyulhni, “Yakꞌusda ꞋUkꞌenus ꞋUltus-un ꞌustꞌoh (El Shaddai) snalhtsꞌet hainya Canaan whuyun kꞌut Luz whe ꞌinkꞌez soo hoonzoo-un stsꞌun tizooꞌ.

⁴ ꞋInkꞌez ꞌusulhni, ‘Whunilhꞌen lhane ntsꞌu ha tidoh dune lhane whe ntsꞌu ha hutidoh, ꞌinkꞌez ndi yun ꞌi ntsꞌu haindene nkꞌelhꞌaz de ꞌilhiz wheni bugha itasꞌalh.’

⁵ ꞋAndit ꞌet nane nyeꞌke Ephraim ꞌinkꞌez Manesseh, Egypt ꞌet nyuzkeh huzdliꞌ, nghu tisyalh whutso ꞌenne schꞌeꞌ ꞌuhintꞌoh. Reuben ꞌinkꞌez Simeon bulh bukꞌunꞌa schꞌeꞌ hutileh.

⁶ Nyuzkeh njan hukwꞌelhꞌaz nyuzkeh hutilehne, ꞌenne ndunne dudulhutsin be nabootanzi, ndai la buchꞌeꞌ yutaleh-i ꞌinka.

⁷ ꞋEt si keyoh Padden tsꞌe hasya, Rachel szih ꞌet Canaan yun kꞌut dazsai, tsꞌidulh whe keyoh Ephrath ꞌawet nilhduk suliꞌ whe ꞌet, ꞌinkꞌez Ephrath tsꞌu ti (Bethlehem tsꞌuwhutni-un) ꞌet ꞌasti.”

⁸ ꞋEt Israel, Joseph ooyeꞌke bunilhꞌen ꞌinkꞌez ꞌutni, “Ndunne ꞌenne mbene wheꞌ hintꞌoh?”

⁹ ꞋInkꞌez Joseph dubá ꞌulhni, “Syeꞌke ꞌuhintꞌoh. Njan yun kꞌut Yakꞌusda (Elohim) sgha bunilhtine.” ꞋInkꞌez ꞌutni, “Deꞌ ndiz stsꞌu bilhtelh ꞌinkꞌez si soo hoonzoo-un butsꞌun tiszooꞌ.”

¹⁰ ꞋInkꞌez Israel oona ꞌawet njan be tetsun suliꞌ tube hoonyan ꞌet huwa ꞌaw soo cho lhubisꞌen. ꞋEt Joseph hizih nebunilhti ꞌinkꞌez nabuditsꞌooz ꞌinkꞌez bubontun.

¹¹ ꞋInkꞌez Israel, Joseph ꞌulhni, “ꞋAw nyunin ntisꞌelh ꞌaw huwu ni lhnuzuszut, ꞌet hoontsꞌi ꞌalha Yakꞌusda (Elohim) nyuzkeh bubusunilhtan.”

¹² ꞋEt Joseph dugwut zih uzyin whuz de habalhti ꞌinkꞌez soo yun tsꞌe nenintꞌai yubut nachaninti.

¹³ ꞋInkꞌez Joseph nahultꞌoh hubilhchoot, Ephraim ꞌen nailhnih tsꞌunkꞌus yilhchoot, Israel ꞌintlꞌus tsꞌe oola tsꞌun ꞌinkꞌez Manesseh ꞌen ꞌintlꞌus tsꞌe dula be Israel nailhnih tsꞌunkꞌus hubilhchoot ꞌinkꞌez hizih nebunilhti.

¹⁴ ꞋInkꞌez Israel dula nailhnih be Ephraim ootsi kꞌut nedilni, ꞌen ꞌudekꞌoh-un ꞌuntꞌoh, ꞌinkꞌez ꞌintlꞌus tsꞌe ꞌet Manesseh ootsi kꞌut ꞌet nedilni, ꞌinkꞌez yukꞌunudulnih-un Manesseh ꞌen ꞌudetso-un whuzdli.

¹⁵ ꞋInkꞌez Joseph soo hoonzoo-un be ubulh yalhduk ꞌinkꞌez ꞌutni, “Yakꞌusda (Elohim) mbe la sbáke Abraham ꞌinkꞌez Isaac bulh hitso nusuꞌazne, Yakꞌusda (Elohim) mbe la ꞌandit dzin whutsꞌun yinka susda nduwhulhyiz whe sgha ꞌanꞌaih,

¹⁶ Ndun Lizas mbe la hoontsiꞌ-un whuchꞌa nasonket-un, ꞌen ndunne duneyaz soo hoonzoo-i be za tlꞌa ookat. Ndai sooziꞌ ꞌi be bubohozi, ꞌinkꞌez sbáke Abraham ꞌinkꞌez Isaac bubooziꞌ be cha, ꞌinkꞌez soo ndi yun kꞌut ꞌet lhane cho hooleꞌ.”

¹⁷ ꞋEt Joseph dubá nailhnih tsꞌunkꞌus ꞌet Ephraim kꞌedilni ꞌet whunilhꞌen, ꞌet whutsꞌu dutni ꞌinkꞌez dubá oola yilhchoot Ephraim ootsi kꞌudilhni whe ꞌinkꞌez Manesseh ootsi kꞌedilhni.

¹⁸ ꞋInkꞌez Joseph dubá ꞌulhni, “ꞋAwundooh sbá, ndun ꞌen ꞌudetso-un whuzdli whe ꞌuntꞌoh, nailhnih tsꞌunkꞌus ꞌet ootsi kꞌedilni.”

¹⁹ ꞋEt hoontsꞌi oobá hukwa lheꞌnizun ꞌinkꞌez ꞌutni, “Tꞌeoonuszun syeꞌ, tꞌeoonuszun ꞌen cha ndi yun kꞌut dune tileh ꞌinkꞌez ncha tileh. ꞋEt hoontsꞌi ndun ookꞌoh-un, ꞌen yanus ꞌulcho tileh ꞌinkꞌez soo keyoh whudizbun whe yutsꞌu ha yandene hutileh.”

²⁰ ꞋEt nahultꞌoh soo hoonzoo-un be ubulh yalhduk whe ꞌutni, “Nohni nohbá Israel soo hoonzoo-un be nohbulh yalhduk ꞌinkꞌez ꞌudutinelh, ‘Yakꞌusda (Elohim), Ephraim ꞌinkꞌez Manesseh bukꞌunꞌa oohtꞌeꞌ’.” ꞋEt whuz unꞌa Ephraim ꞌen Manesseh tso nenilhti.

²¹ ꞋEt Israel, Joseph ꞌuyulhni, “Whunilhꞌen ꞌawet dassah whe ꞌustꞌoh, ꞌet hoontsꞌi Yakꞌusda (Elohim) nyulh ꞌutitꞌelh mbáke bukeyoh tsꞌe whuz nanyutilhtelh.

²² ꞋOn ꞌun cha ndai la nyulhutsinke bugha inusla-i, yun ꞌilhoh ꞌultsuk ꞌi be nyun ngha nusla. ꞋI Amor whutꞌenne ooghu yuschoot inleꞌ, saluzti be ꞌinkꞌez skꞌaza be.”