Genesis 46 - Yak'usda Ooghuni

Jacob ꞌen Egypt yun kꞌut tsꞌun tizya

¹ ꞋEt Israel ndai la yutꞌi-i tubulh tizya, Beersheba keyoh tsꞌe oozya ꞌinkꞌez oobá Isaac ooYakꞌusda (Elohim) tsꞌun khuna-i dalhkꞌun.

² ꞋEt Yakꞌusda (Elohim) ꞌen Israel ꞌulhdzis yunalhtsꞌet hainya ꞌinkꞌez ꞌutni, “Jacob, Jacob” ni, ꞌet ꞌuyulhni, “Njan ꞌustꞌoh”.

³ ꞋInkꞌez ꞌutni, “Yakꞌusda (El) ꞌustꞌoh, mbá ooYakꞌusda (Elohim). ꞋAw wheniljut whe Egypt tsꞌe tonyaꞌ junih, nyun tube didoh-un ncha-un ꞌet nyutiselh.

⁴ Egypt tsꞌe nyulh ꞌutisnelh ꞌinkꞌez ndo naꞌnyutislelh. ꞋInkꞌez ꞌalha Joseph ꞌen nyuna kꞌedutalni.”

⁵ ꞋEt whe Jacob ꞌen Beersheba ꞌet dudinya, ꞌinkꞌez Israel whuyeꞌke ꞌen hube ꞌubá whuz hitilhti, bubuzkehyaz cha, ꞌinkꞌez buꞌatke cha, ꞌen ndi nulbas be buhanla, ꞌi Pharoaoh hubutsꞌotlꞌa yanla.

⁶ ꞋInkꞌez khuna-i cha ꞌinkꞌez ndai la huyutꞌi-i cha, Canaan bugha ininkat-i, ꞌi tubulh Egypt tsꞌe whehandil, Jacob ꞌinkꞌez tsꞌu haindene bubulh.

⁷ Ooyeꞌke ꞌinkꞌez ooyeꞌke ꞌon ꞌun ooyeꞌke, ootseꞌke ꞌinkꞌez buyeꞌke butseꞌke, tsꞌiyawh Egypt tsꞌe boozdla.

⁸ ꞋEt ndi Israel buzkeh bubooziꞌ: Jacob ooyeꞌke, ꞌinkꞌez Egypt tsꞌe whendilne, Reuben ꞌen ꞌudetso ooyeꞌ, Jacob ooyeꞌ.

⁹ Reuben ooyeꞌke ꞌenne: Hanoch, Pallu, Hezron ꞌinkꞌez Carmi.

¹⁰ Simeon ooyeꞌke ꞌenne: Jemuel, Jamin, Ohad, Jachin, Zohar ꞌinkꞌez Shaul, Canaan whutꞌen-un tsꞌeke ooyeꞌ.

¹¹ Levi ooyeꞌke ꞌenne: Gershon, Kohath ꞌinkꞌez Merari.

¹² Judah ooyeꞌke ꞌenne: Er, Onan, Shelah, Perez ꞌinkꞌez Zerah (ꞌet hoontsꞌi Er ꞌinkꞌez Onan bulh ꞌenne Canaan keyoh dahuzsai). Perez ooyeꞌke ꞌenne: Hezron ꞌinkꞌez Hamul bulh.

¹³ Issachar ooyeꞌke ꞌenne: Tola, Puvvah, Iob ꞌinkꞌez Shimron.

¹⁴ Zebulun ooyeꞌke ꞌenne: Sered, Elon ꞌinkꞌez Jahleel.

¹⁵ Ndunne Leah ooyeꞌke, ꞌenne Jacob ghu bulhtsi Paddan Aram tsꞌe. Ootseꞌ Dinah, ꞌen cha. Mbene la ooyeꞌke ꞌinkꞌez ootseꞌke cha tat whunizyai ꞌon ꞌat tane (33) hinli.

¹⁶ Gad ooyeꞌke ꞌenne: Zipheon, Haggi, Shuni, Ezbon, Eri, Arodi ꞌinkꞌez Areli.

¹⁷ Asher ooyeꞌke ꞌenne: Imnah, Ishvah, Ishvi, Beriah ꞌinkꞌez Serah bubulhtus. ꞋInkꞌez Beriah ooyeꞌke ꞌenne: Heber ꞌinkꞌez Malchiel.

¹⁸ Ndunne ꞌenne Zilpah ooyeꞌke: Laban, Leah dutseꞌ gha inilhti, ꞌen Jacob ghu bulhtsine whunizyane ꞌon ꞌat lhkꞌutane (16) hinli.

¹⁹ Rachel ooyeꞌke, Jacob ooꞌat: Joseph ꞌinkꞌez Benjamin.

²⁰ ꞋEt Joseph ootsꞌun keyoh Egypt hooni, ꞌenne Manasseh ꞌinkꞌez Ephraim. ꞋEnne Asenath Poti-Pherah whutseꞌ, keyoh On lubret, ꞌen buzkeh.

²¹ Benjamin buzkeh ꞌenne: Bela, Becher, Ashbel, Bera, Naaman, Ehi, Rosh, Muppin, Huppim ꞌinkꞌez Ard.

²² Ndunne ꞌenne Rachel ooyeꞌke, ꞌalhgoh whunizyane ꞌon ꞌat dine (14), ꞌen Jacob ghu bulhtsi.

²³ Dan ooyeꞌ ꞌen Hushim huyulhni.

²⁴ Naphtali ooyeꞌke ꞌenne: Jahzeel, Guni, Jezer ꞌinkꞌez Shillem.

²⁵ Ndunne ꞌenne Bilhah ooyeꞌke, ꞌen Laban ootseꞌ, Rachel, gha inilhti, ꞌen ndunne Jacob ghu bulhtsi lhtakꞌantꞌine hinli.

²⁶ ꞋEt Jacob yulh whendilne Egypt tsꞌe, tsꞌiyawh hitsꞌu hainde, Jacob ooyeꞌke, buꞌatke, ꞌaw ꞌenne iloh, ꞌalhgoh lhkꞌu tat whunizyai ꞌon ꞌat lhkꞌutane (66) hinli.

²⁷ ꞋInkꞌez Joseph ooyeꞌke, Egypt ꞌenne nane hinli, Jacob bulh whusahandilne Egypt tsꞌe hoozdil whe lhtakꞌantꞌit whunizyane (70) hinli.

Jacob ꞌen yun kꞌut Goshen ꞌet nenina

²⁸ ꞋEt Judah ꞌen butso yutilhꞌaꞌ Joseph tsꞌun ntsꞌe la Goshen tsꞌe whuzꞌai ꞌinkꞌez Goshen yun kꞌuz tsꞌe hoozdil.

²⁹ ꞋEt Joseph nyoo ye nuya-i, ꞌi lhaidinla, ꞌinkꞌez Goshen tsꞌe whenya, dubá Israel yudutizya ꞌinkꞌez yubut neninya. ꞋInkꞌez yutsꞌilchun kꞌet yukꞌiltsꞌut ꞌinkꞌez saꞌ whe ꞌet yutsꞌilchun kꞌet intse.

³⁰ ꞋInkꞌez Israel, ꞌen Joseph ꞌuyulhni, “ꞋAwet whute daoosah-un sgha ooninꞌaih, nyunin ꞌusꞌen ꞌawhuz khina ꞌet huwa.”

³¹ ꞋEt Joseph dulhutsinke ꞌinkꞌez dubá ooyoh dilhtsꞌine cha ꞌubulhni, “Toosyaꞌ ꞌinkꞌez Pharaoh dosniꞌ, njan dudoosniꞌ sih, ‘Sulhutsinke ꞌinkꞌez sbá ooyoh dilhtsꞌine cha, Canaan huwhutꞌine sgho nindil.

³² ꞋInkꞌez dune ꞌenne ꞌusbai ghunline, whuz unꞌa khuna-i gha ꞌaihne hinli, ꞌinkꞌez dughunaꞌ cha tsꞌiyawh ndai la huyutꞌi-i cha tsꞌiyawh sahuyanla.’

³³ ꞋEt ꞌuhoneh Pharaoh nohka hizya ꞌinkꞌez ꞌutni de, ‘Dahoontꞌoh-un la huwahna?’

³⁴ ꞋEt ꞌudoohniꞌ, ‘Mba ꞌutꞌenne bube ꞌutꞌen dakꞌez whutsꞌun, khuna-i gha hana tsꞌoodunne tsinli whutsꞌun ꞌandit whutsꞌun, wheni cha ꞌinkꞌez netsodaꞌ nebáke ꞌenne cha.’ ꞋEt de sih ndi yun kꞌut Goshen yun kꞌut hoohtꞌeꞌ, ꞌusbai ghunline tsꞌiyawh ꞌilhoghun hinli whe Egypt whutꞌenne bubaꞌ huninzun ꞌet huwa.”