Genesis 45 - Yak'usda Ooghuni

Joseph bubulhutsinke bunalh ha honꞌai

¹ ꞋEt Joseph ꞌaw ꞌon ꞌun ꞌoodudotun ꞌaitꞌoh, nyoonne yunat nudilhyane bunalh, ꞌinkꞌez ꞌudija, “Tsꞌiyanne nꞌaz nahutoodilh!” ꞋEt Joseph nyoonne dudulhutsin mbe ꞌuntꞌoh-un hubudaniꞌ.

² ꞋInkꞌez soo ꞌultus-un intse ꞌinkꞌez nyoonne Egypt whutꞌenne ꞌinkꞌez Pharaoh ooyoh cha tsꞌiyawh whulh hidantsꞌo.

³ ꞋEt Joseph bubulhtsinke ꞌenne ꞌubulhni, “Si Joseph ꞌustꞌoh. Sbá ꞌawhuz eh khuna?” ꞋEt hoontsꞌi bulhutsinke ꞌaw hiyulh yatoolhdih ꞌaitꞌoh. Whuz tube buba nekꞌeꞌhoonil kꞌet.

⁴ ꞋEt Joseph dudulhutsinke ꞌubulhni, “ꞋAnih szih nenuhdilh.” ꞋInkꞌez hizih nenindil ꞌinkꞌez ꞌutni, “Joseph ꞌustꞌoh! Nohulhutsin Egypt tsꞌe be ꞌohket inleꞌ-un.

⁵ ꞋInkꞌez ꞌandit nohdzi undoodaꞌ kꞌus dulh nahunolhchꞌeh junih. Njan seꞌohket ꞌet huwa, Yakꞌusda ꞌen ndiz sutilhꞌaꞌ dune yalhosdla ha.

⁶ Nat yus kꞌut whutsꞌun njan dai honeꞌ. ꞋAwhuz kwulat yus kꞌut ꞌet ꞌaw dune ꞌaꞌ noolelh cha ꞌaitꞌoh, haꞌ hunoolelh cha ꞌaitꞌoh tileh.

⁷ ꞋInkꞌez Yakꞌusda (Elohim) nohtso ndiz whe salhꞌaꞌ, Ndi yun kꞌut nohtsꞌu haindene huhoona, ꞌaw dalhuhoosa. Hooncha whe bulaꞌ tinelh.

⁸ ꞋEt ꞌandit nohni iloh ndiz whe silhꞌaꞌ. Yakꞌusda (Elohim) ꞌen Pharaoh cha oobá sulhtsi ꞌinkꞌez ooyoh cha whumoodih ꞌusli. ꞋInkꞌez Egypt yun kꞌut ndulcho whucha whumoodih ꞌusli.

⁹ Soo ꞌa ꞌinkꞌez ꞌubá ootsꞌun nahdulh ꞌinkꞌez ꞌuduhni, ‘Nyeꞌ Joseph ꞌutni, “Yakꞌusda (Elohim) ꞌen Egypt whumoodih sulhtsi. Ndiz stsꞌinyalh, saꞌ ꞌontꞌen junih!

¹⁰ Njan Goshen yun kꞌut ꞌet sih hontꞌeꞌ. Soo szih ꞌutantꞌelh, nyun cha ꞌinkꞌez nyuzkeh cha, nyuzkeh bubuzkeh cha, nghunaꞌ, ꞌusbai bulh cha ꞌinkꞌez ndai ꞌintꞌi tsꞌiyawh.

¹¹ ꞋEt njan ookwꞌut yinka dutalhtsꞌilh-i ꞌi nohgha tisꞌaih doo ka sih nyun cha ꞌinkꞌez nyoh dilhtsꞌine cha, ndai ꞌintꞌi-i cha telhꞌen ooleꞌ ꞌawhuz kwulat yus kꞌut dai whutaleh wheꞌ hoontꞌoh.”’

¹² ꞋInkꞌez whunilhꞌen nohna cha ꞌinkꞌez sulhutsin Benjamin oona be nanulhtꞌoh sze ꞌuwhutni, nohbulh yasduk.

¹³ ꞋEt de sih ꞌubá dastꞌoh la njan Egypt, ndet hoohꞌen-un cha ꞌinkꞌez soo ꞌa ꞌubá ndiz ulhtelh.”

¹⁴ ꞋEt dulhutsin Benjamin yutsꞌilchun kꞌet yilhchoot ꞌinkꞌez intse ꞌinkꞌez Benjamin cha yutsꞌilchun kꞌut ꞌet intse.

¹⁵ ꞋEt ꞌon ꞌun cha dulhutsinke tsꞌiyawh nabuditsꞌooz ꞌinkꞌez bughintse. ꞋEt hukwꞌelhꞌaz bulhutsinke yulh yahalhduk.

¹⁶ ꞋEt tsꞌiyawh dawhudaniꞌ lah Pharaoh ooyoh bulh ꞌuhudantsꞌo ꞌinkꞌez ꞌuhutni, “Joseph bulhutsinke whusahandil,” ꞌinkꞌez Pharaoh cha ꞌinkꞌez yuba ꞌutꞌenne cha tsꞌiyawh huhoontꞌiꞌ.

¹⁷ ꞋInkꞌez Pharaoh Joseph ꞌulhni, “Nyulhutsinke budini, ‘Nohghunaꞌ bunaꞌilhghelh ꞌinkꞌez nahdulh Canaan yun tsꞌe.

¹⁸ Nohbá ndiz ulhtelh ꞌinkꞌez nohyoh whutꞌine cha, tsꞌiyawh ndiz stsꞌun uhdulh. Ndai la kꞌus unzoo-i njan yun Egypt ꞌi si nohgha ooslelh ꞌinkꞌez njan yun kꞌut whukꞌo, ꞌi sih oohꞌalh.’

¹⁹ ꞋEt whuz unꞌa khuni mba ꞌulya, ꞌet dineh, ‘Njan Egypt yun kꞌut mbene ꞌulgoo-i tsꞌiyawh ilhchoot. Nohuzkehyaz ꞌinkꞌez nohꞌatke cha ꞌinkꞌez nohbá cha ꞌinkꞌez whusahdilh.

²⁰ ꞋInkꞌez ndai la njan uhtꞌi-i ooghuni oohleꞌ junih. Ndai la Egypt yun kꞌut ꞌukꞌenus nzoo-i, ꞌi nohchꞌeꞌ ꞌuntꞌoh.’”

²¹ ꞋEt Israel ooyeꞌke ꞌet nduhuja, ꞌinkꞌez Joseph be neꞌulgoo-i cha tsꞌiyawh butlꞌa yanla. Daja Pharaoh daja yulhni la hukwꞌunꞌa ꞌinkꞌez nuhudilh-un hitiꞌulh-i cha butlꞌa nayanla.

²² Tsꞌiyawh ꞌilhoghun hinli whe naih lhkꞌenahidutilelh-i cha ꞌinkꞌez Benjamin ꞌen tat whunizyai tat ꞌultsuk-i (300) ꞌi silver yugha inindzai, ꞌinkꞌez kwulat kꞌenaidutilelh-i naih, ꞌi cha yugha ininla.

²³ ꞋInkꞌez dubá ꞌen ndi donkey ꞌi yutsꞌo tlꞌa yanla, whunizyai donkey, Egypt ndai la unzoo-i tsꞌiyawh ꞌi hikꞌenahuyinla, ꞌinkꞌez whunizyai tsꞌeke donkey, ꞌi cha lhes maiꞌ cha, lhes cha ꞌinkꞌez ꞌutꞌalh-i cha, oobá yutiꞌulh ha cha, ndiz nahatidulh huba, ꞌi hikꞌenahuyinla.

²⁴ ꞋEt dudulhutsinke whenabalhꞌa ꞌinkꞌez whe nahidil ꞌinkꞌez ꞌubulhni, “Khun te nyo nuhdil whute dzoh nohdeh junih.”

²⁵ ꞋEt Egypt whe nahidil ꞌinkꞌez Canaan yun kꞌenahidil, dubá Jacob ꞌen ootsꞌun.

²⁶ ꞋInkꞌez hidaniꞌ, “Joseph ꞌawhuz khuna ꞌinkꞌez Egypt yun kꞌut ndulcho whe moodih unli.” ꞋEt Jacob oodzi ꞌankwꞌus ꞌetsul ꞌuja, ꞌaw hiba ꞌalha lheꞌdusnih ꞌet huwa.

²⁷ ꞋEt Joseph daja hubulhni la hidaniꞌ, ꞌinkꞌez nyoo be neꞌulgoo-i cha hinilhꞌen Joseph butsꞌo tlꞌa yanla-i, ꞌet Jacob ooyughi ndo naꞌuja.

²⁸ ꞋEt Israel ꞌutni, “ꞋAwet sooꞌ hooja. Syeꞌ Joseph ꞌawhuz khuna, whuz toosya ꞌinkꞌez sih naoostꞌen datisah whutso.”