Genesis 44 - Yak'usda Ooghuni

Joseph oolubot

¹ ꞋInkꞌez nyoon duyoh whumoodih unli-un ꞌen ꞌuyulhni, “Dune tsꞌiyawh ꞌezdla-i ꞌutꞌalh-i buba idilhbun, soo nahitilelh-un ꞌet ꞌuldaz-i, ꞌinkꞌez sooniya huye huyonket, ꞌi cha ꞌezdla-i buba denayinꞌaih.

² ꞋInkꞌez slubot silver ꞌuntꞌoh-i, ꞌi ꞌudekꞌoh-un ꞌen ꞌezdla-i ooba deyinꞌaih, ꞌinkꞌez lhes maiꞌ huye ꞌonket-i cha buba denayinꞌaih.” ꞋEt daja Joseph yulhni la, whuz unꞌa ꞌuja.

³ Soo bundadaꞌ yulhkai ꞌet ꞌawet dune whenabuhalhꞌaꞌ dudonkey tucha.

⁴ ꞋEt nyo keyoh whuti ꞌawet whanꞌunyaz ha nahidil, ꞌet Joseph nyoon yuba ꞌutꞌen-un ꞌuyulhni, “Dudinyaih, nyoonne buba nanyalh ꞌinkꞌez butꞌasinya de, ꞌet ꞌubudini, ‘ꞋEt di ha hoonzoo-un ꞌet hoontsiꞌ hukwꞌunꞌa kwꞌelha whuzulhtsi?

⁵ Ndi lubot ꞌi iloh eh smoodih ye ꞌutnai-i ꞌinkꞌez ꞌi be nus whunilhꞌen yutnai te? Hoontsiꞌ hukwꞌunꞌa ꞌuhja ꞌet dahja.’”

⁶ ꞋEt butꞌasuya ꞌinkꞌez ndi khuni ꞌi be bubulh yailhduk.

⁷ ꞋInkꞌez ꞌuhuyulhni, “ꞋEt di ha smoodih ndi khuni ꞌi be nebulh yailhduk? ꞋAw mba ꞌutꞌenne ꞌaw whuz unꞌa ndulhutsꞌutꞌen wheꞌ hoontꞌoh.

⁸ Nilhꞌen ndi sooniya yun kꞌut Canaan tsꞌe ha natsꞌandzai, neꞌezdlai-i bet natsꞌinꞌaiꞌ-i. Ntsꞌenꞌa silver kꞌus gold bulh ꞌi nemoodih ooyoh ꞌet tsꞌuduntitꞌih?

⁹ Mbe la mba ꞌutꞌen-un ooghu naꞌyinla-un de, ꞌen daootsah ꞌinkꞌez wheni cha nemoodih be ꞌulhna tsꞌooleh sih.”

¹⁰ ꞋInkꞌez ꞌutni, “ꞋEt daja duhni la, mbe oochꞌeꞌ toh natsꞌinla de, ꞌen si seꞌulhna tileh ꞌinkꞌez nohni ꞌaw nohkꞌelhoowhutaltsꞌulh.”

¹¹ ꞋEt soo ꞌa cho ꞌet ꞌilhone hinli ndai la be ꞌuzdla-i yun nahuyanla ꞌinkꞌez hikꞌu naꞌanꞌuk.

¹² ꞋEt nyoon dune ꞌudetso whudilhdzulh-un, ꞌen oochꞌeꞌ ꞌi cho yet nuniztai, ꞌudekꞌoh-un whutsꞌun, ꞌinkꞌez nyoo lubot ꞌi Benjamin ooꞌezdla-i bet nayinꞌai.

¹³ ꞋEt dunaih ye yidalhchꞌul ꞌinkꞌez nyoo dudonkey hikꞌena ꞌinla, ꞌinkꞌez keyoh whuti tsꞌe nahoosdil.

¹⁴ ꞋEt Judah ꞌinkꞌez dulhutsinke Joseph ooyoh tsꞌu nahoosdil, ꞌawhuz ꞌet ꞌutꞌen, hibut ꞌet yun nachaniti.

¹⁵ ꞋInkꞌez Joseph ꞌubulhni, “Dantꞌi ꞌutꞌen-i ꞌuhla? ꞋAw eh tꞌeoonuzuhzun dantꞌoh-un ꞌustꞌoh, ꞌen dune nus whunilhꞌen whe ꞌuntꞌoh tꞌeooninzin!”

¹⁶ ꞋEt Judah ꞌutni, “Nemoodih daja uzdutanelh? Kꞌus ntsꞌenꞌa ꞌaw nekꞌelhuholhtsꞌit hukwꞌunꞌa naꞌtsꞌuhooleh? Yakꞌusda (Elohim) mba ꞌutꞌenne ꞌutꞌen ntsꞌih-i bulh nabinla. Njan nuzdilhya, moodihti be ꞌulhna wheni cha ꞌinkꞌez mbe ndi lubot ooꞌezdlai-i be yuzꞌai ꞌen cha.”

¹⁷ ꞋEt hoontsꞌi ꞌutni, “ꞋAw ꞌet ndosneh ꞌaitꞌoh. ꞋEt hoontsꞌi mbe slubot nuyuꞌa-un, ꞌen seꞌulhna tileh. ꞋEt nohni, nohdzi whudooghel whe nohbá ootsꞌu nahdulh.”

Judah ꞌen Benjamin ba tedudlih

¹⁸ ꞋEt Judah yuzih neninya ꞌinkꞌez ꞌutni, “ꞋAw smoodihti si mbut yatisduk ꞌet sgha ooninꞌaih, ꞌinkꞌez be hunilchꞌe-i mba ꞌutꞌen-un bulh hunolchꞌeh junih. Pharaoh diltꞌoh whe ꞌintꞌoh.

¹⁹ Smoodih mba ꞌutꞌenne budini, ‘Nohbá hoonli kꞌus nohulhutsin?’

²⁰ ꞋEt nemoodih ꞌutsꞌutni, ‘Nebá hoonli, duneti ꞌinkꞌez duneti suliꞌ whe ooyaz whuzdliꞌ, tsꞌoodun unli, ꞌen bulhutsin dazsai, ꞌinkꞌez ndun tsꞌoodun ooloo buzkeh ꞌenne didutchꞌoh gaih unli, ꞌinkꞌez oobá yukꞌensiꞌ.’

²¹ ꞋEt mba ꞌutꞌenne ꞌubudini, ‘Ndiz stsꞌolhtelh. Noosꞌen sih.’

²² ꞋEt smoodihti ꞌutsꞌutni, ‘ꞋAw ndun duneyaz dubá yuchꞌa ooyaꞌ ꞌaitꞌoh. Dubá yuchꞌa suya de, oobá datitsah.’

²³ ꞋEt hoontsꞌi mba ꞌutꞌenne ꞌubudini, ‘Ndun ꞌudekꞌoh-un nohulhutsin, ꞌaw ndiz lhtulhtel de, ꞌaw snin ꞌaw naoohtꞌen ꞌaitꞌoh.’

²⁴ ꞋEt whuz unꞌa mba ꞌutꞌen-un oozih neznindil, ꞌubá ꞌinkꞌez daja dini la, nemoodih inli uzdaniꞌ.

²⁵ ꞋInkꞌez ꞌubá ꞌuneꞌulhni, ‘Whuz nahdulh ꞌinkꞌez ꞌutꞌalh-iyaz oohket.’

²⁶ ꞋEt hoontsꞌi ꞌutsꞌutni, ‘ꞋAw whuz naztoodilh ꞌaitꞌoh, ꞌudekꞌoh-un neulhutsin nebulh ꞌutꞌen de, ꞌet de za whuz naztidulh. ꞋEn ooyit de ꞌaw nyoon dune oonin nalhtsꞌutistꞌel.’

²⁷ ꞋEt mba ꞌutꞌen-un, ꞌubá ꞌuneꞌulhni, ‘Tꞌeoonuhzun sꞌat nane dune sghu sulhtsi.

²⁸ ꞋInkꞌez ꞌilhoghun ꞌen sgho whenya ꞌinkꞌez ꞌudusni, “ꞋAlhaꞌ la yabeꞌ yudalhchꞌul.” ꞋEt whutsꞌun ꞌaw nalhuzistꞌen.

²⁹ ꞋEt hoontsꞌi ndun ꞌen cha sghulhchoot de, ꞌinkꞌez hoonli hoontsiꞌ-un bulh ꞌuhooja de, ndi stsꞌeghaꞌ dulgi-i tsꞌodi be nyo tsꞌun kꞌut tsꞌe tisyalh.’

³⁰ ꞋEt huwa mba ꞌutꞌen-un, hukwa ndun tsꞌoodun ꞌaw nebulh lheꞌustꞌen, tube nzih ꞌutitelh-un hukwaꞌ ninzun ꞌet huwa.

³¹ ꞋEt ꞌuwhutanelh, ndun duneyaz nebulh lheꞌustꞌen de, datitsah. ꞋEt mba ꞌutꞌenne, wheni gha, mba ꞌutꞌen-un nebá, ꞌen ootsighaꞌ dulgi suliꞌ kꞌet tsꞌun kꞌut tsꞌe tiyalh.

³² ꞋEt ndun mba ꞌutꞌen-un, ndun duneyaz yukꞌedanya whe ꞌuntꞌoh. ‘ꞋAw whusanalhustel de, ꞌen sbá ghun ꞌilhiz skꞌewhutaltsꞌulh wheꞌ hoontꞌoh,’ dasniꞌ.

³³ ꞋEt huwa si nyo ndun duneyaz ꞌen ookꞌet nye ꞌusna oosleꞌ, ꞌinkꞌez nyoon duneyaz dudulhutsinke bubulh natootꞌas.

³⁴ ꞋEt huwa ntsꞌenꞌa suba, sbá ootsꞌu toosyaꞌ ndun duneyaz sulh lheꞌustꞌen de, ꞌet sih ntisꞌelh dawhultsiꞌ lah sbá ookꞌewhutaltsꞌulh ꞌet huwa?”