Genesis 43 - Yak'usda Ooghuni

Joseph bulhutsinke ꞌenne Benjamin bulh whusanahidil

¹ Tubeh nyo yun kꞌut dai be oonisjoot.

² ꞋEt ꞌuhooja ndi lhes maiꞌ gak huyulhtsi whe Egypt huyonket-i, bubá ꞌubulhni, “Whuz nahdulh ꞌinkꞌez ꞌutꞌalh-iyaz oohket.”

³ ꞋEt hoontsꞌi Judah ꞌen ꞌuyulhni, “Nyoon dune soo tsꞌihꞌun negha daniꞌ njan dune neulhni, ‘ꞋAw snin doo cha noolhꞌen ꞌaitꞌoh nohulhutsin nohbulh eꞌustꞌen de.’

⁴ Neulhutsin nebulh whelhꞌaꞌ de, ꞌet de za whuz uztidulh ꞌinkꞌez ꞌutꞌalh-i mba tsꞌootakulh.

⁵ ꞋEt ꞌaw ndun nebulh tolhꞌaꞌ ꞌaitꞌoh de, ꞌaw whuz uztoodilh ꞌaitꞌoh. Nyoon dune njan dune neulhni, ‘ꞋAw snin oohꞌen ꞌaitꞌoh noulhutsin nohbulh whusalhiyal de.’”

⁶ ꞋInkꞌez Israel ꞌutni, “ꞋEt dahoontꞌoh huwa sdabe tankꞌus unꞌa ꞌusuhla nyoon dune dahniꞌ, ꞌawhuz ꞌuyoon cha nohulhutsin ꞌet dahniꞌ?”

⁷ ꞋEt ꞌuhutni, “Dune soo tsꞌihꞌun neoodalhkut, wheni ꞌinkꞌez nenatneke cha ꞌinkꞌez ꞌutni, ‘Nohbá khuna eh? ꞋUyoon cha eh nohulhutsin?’ ꞋInkꞌez ꞌet tsꞌudaniꞌ. Ntsꞌenꞌa tꞌetsꞌontazin, ‘Nyulhutsin ookwa nahdulh,’ nedutanelh?”

⁸ ꞋEt Judah, oobá Israel ꞌuyulhni, “Nyoon duneyaz, si stlꞌa ilhtih ꞌinkꞌez sih whuz naztoodilh ꞌinkꞌez tsꞌuhoonaꞌ. ꞋAw yatsꞌodlah ꞌaitꞌoh, wheni cha ꞌinkꞌez nyun cha ꞌinkꞌez neuzkehkeyaz cha.

⁹ Si sichꞌoh ꞌet ndun ookwꞌedutisyalh, soo slakꞌez ꞌet oola dutanih. ꞋEt ꞌaw mba whusanalhustel ꞌinkꞌez mbut nenalhustel de, ꞌilhiz wheni si skꞌeholtsꞌit.

¹⁰ ꞋEt ꞌaw saꞌ nulheꞌtsꞌitꞌel de, ꞌandit ꞌawet whulh nat daꞌ whusanatsꞌidil ooleꞌ.”

¹¹ ꞋInkꞌez bubá Israel hubulhni, “Whuz unꞌa sih ꞌuhotꞌeꞌ. ꞋInkꞌez njan duhneh, ndo ho ha nuyeh-i, mai ꞌukꞌenus unzoo-i buba deyulhle, ꞌinkꞌez dune ootsꞌitilhdulh ꞌi cha bahlelh. Be ꞌuzdudultlo-i naꞌulhyeh-i, ntsool-iyaz cha, ꞌinkꞌez tsꞌihnatlꞌuz ntsool-iyaz cha bulh butaꞌwhutꞌen-i cha ꞌinkꞌez myrrh huyulhni, ꞌi cha, ꞌinkꞌez duchun kꞌut ha nuyeh-i pistachio ꞌinkꞌez almond huyulhni, ꞌi cha ooba yihlelh.

¹² Sooniya nawh ꞌuniltsuk-i, ꞌi toohdzaih ꞌinkꞌez nyoo sooniya nohba denahuyandzai inleꞌ-i, ꞌi cha toohdzaih, nahunitꞌa whutilah ꞌuhuja.

¹³ Nohulhutsin cha nohbulh tooꞌas. Dugweꞌ duduhdilh ꞌinkꞌez dune ootsꞌu nahdulh.

¹⁴ ꞋInkꞌez Yakꞌusda ꞋUkꞌenus ꞋUltus-un ꞌuntꞌoh (El Shaddai), ꞌen nohgha teꞌnozeh nyoon oobut. ꞋInkꞌez si ꞌilhoghun nohulhutsin ꞌen cha yula dootnih ꞌinkꞌez Benjamin. ꞋEt ꞌawet tsꞌodi susliꞌ de, ꞌawet tsꞌodi susliꞌ.”

¹⁵ ꞋEt nyoonne dune nyoo hitsꞌu hitilhdulh-i cha ꞌinkꞌez Benjamin cha, ꞌen cha hubulh tizꞌaz, sooniya nawh ꞌuniltsuk-i cha, ꞌinkꞌez Egypt tsꞌe whehandil. ꞋInkꞌez Joseph hibut nenindil.

¹⁶ ꞋEt Joseph, Benjamin bubulh nuꞌas yutilhꞌen whe nyoon ooyoh huwunli-un ꞌuyulhni, “Ndunne dune syoh tsꞌe hubulh inꞌus, ꞌinkꞌez khuna-i nasilghe ꞌinkꞌez lhadinleh. Dzetniz ꞌet ndunne dune sulh naꞌhutitꞌulh.”

¹⁷ ꞋEt dune Joseph daja yulhni la whuz unꞌa ꞌuja. ꞋInkꞌez nyoonne dune Joseph ooyoh tsꞌe dabuninla.

¹⁸ ꞋEt nyoonne dune whe hunuljut, Joseph ooyoh tsꞌe dabunila, ꞌinkꞌez ꞌuhutni, “Nyoo sooniya ꞌi ka la neꞌinla neꞌuzdla-i be nahuyandzai-i ꞌudechoo njan daneuninla. Nechꞌaz nedutadalh-un ꞌet hukwunuta ꞌulhnane kꞌunꞌa neutalhchulh nyoo ghunaꞌ, donkey cha.”

¹⁹ ꞋEt nyoon Joseph buyoh whumoodih yuzih nenindil nyo dati ꞌet hiyulh yailhduk.

²⁰ ꞋEt ꞌuhiyulhni, “O dune ncha-un, ꞌalha ꞌudecho whusatsꞌandil whe ꞌutꞌalh-i tsꞌootakulh haꞌ tsꞌuja.

²¹ ꞋEt ꞌuhooja, nenatsꞌuntatus naztisdil whe ndi ꞌeꞌuzdla-i ookwꞌunatsꞌunꞌuk ꞌinkꞌez ꞌilhoghun tsinli whe nezoonuyaꞌ nyo ꞌezdla-i be yuzdzai whe, ꞌinka ndi sooniya whusanatsꞌandzai.

²² ꞋInkꞌez ꞌuyoo sooniya cha whusatsꞌanꞌai, ꞌutꞌalh-i be tsꞌootakulh ha. ꞋAw tꞌetsꞌonuszun mbe subah nyoo sooniya neꞌezdla-i be nayandzai.”

²³ ꞋEt hoontsꞌi ꞌutni, “Nohbulh whudoghel. ꞋAw whenulhjut iloh. NohYakꞌusda (Elohim) ꞌen nohbá ooYakꞌusda (Elohim) ndi ꞌen nohꞌezdla-i ye yanꞌai whe ꞌuntꞌoh. Nohzooniya nusꞌa whe.” ꞋInkꞌez Simeon butlꞌa nayalhti.

²⁴ ꞋEt ndun dune Joseph ooyoh dabuninla, ꞌinkꞌez too bugha nilhdzo ꞌi be duke tanahuzguz ꞌinkꞌez bughunaꞌ cha yutlꞌaꞌ dantsut.

²⁵ ꞋInkꞌez nyoo Joseph hitsꞌu hitilhdulh-i lhahidinla, dzetniz wheni nyo ꞌet ꞌutꞌalh-i naꞌhutitꞌulh ꞌet tꞌehonanzin.

²⁶ ꞋEt Joseph duyoh dananja whe nyoo hitsꞌu hitilhdulh-i hitlꞌa huyanla, ꞌinkꞌez hibut yo huntizsel soo yun whutsꞌun.

²⁷ ꞋEt dahintꞌoh lah ꞌet hukwa boodulhkut ꞌinkꞌez ꞌutni, “Nohbá soo ꞌuntꞌoh eh, duneti ooghu yalhduk-un, ꞌawhuz eh khuna?”

²⁸ ꞋEt ꞌuhuyulhni, “Mba ꞌutꞌen-un nebá tube soo ꞌuntꞌoh. ꞋAwhuz khuna.” ꞋInkꞌez yubut yo ꞌuntizsel ꞌinkꞌez nyo naꞌhududilhdil.

²⁹ ꞋEt ndo yutanꞌen ꞌinkꞌez dudulhutsin Benjamin yutilhꞌen, ooloo ooyeꞌ, ꞌinkꞌez ꞌutni, “Ndun ꞌen ꞌudekꞌoh nohbulhutsin, ooghun sulh yalhduk inleꞌ?” ꞋInkꞌez ꞌutni, “Yakꞌusda (Elohim) soo cho ntsꞌun oozooꞌ syeꞌ.”

³⁰ ꞋEt oodzi tubeh dulhutsin yukꞌeni unli ꞌinkꞌez ꞌutsꞌun whe naja soo ꞌa cho. ꞋInkꞌez ꞌet whenintse, ꞌinkꞌez ꞌusti tsꞌe whuz dananja ꞌinkꞌez ꞌet ꞌutso.

³¹ ꞋEt nenaꞌnilde ꞌinkꞌez tenanja ꞌinkꞌez kꞌoh ꞌududootun ꞌinkꞌez ꞌutni, “ꞋUtꞌalh-i ꞌet nenuhle bubut neinuhle.”

³² ꞋEt didutchꞌoh ꞌutiꞌulh-un hiba neꞌninla, ꞌinkꞌez nyoonne cha didutchꞌoh ꞌet ꞌuhutiꞌulh-un buba neꞌninla. ꞋInkꞌez Egypt whutꞌenne ꞌenne cha didutchꞌoh duba neꞌhuninla. ꞋAw Egypt whutꞌenne, Hebrew whutꞌenne ꞌaw bubulheꞌhusꞌal, Egypt whutꞌenne buba hoontsiꞌ.

³³ ꞋEt hibut natlꞌa diltsꞌiꞌ. ꞋUdetso whuzdli-un, ꞌudechoo ꞌinkꞌez ꞌudekꞌoh whuzdli-un, ꞌen ꞌudekꞌez, ꞌinkꞌez nyoonne dune tube buba hooncha lhonulꞌen.

³⁴ ꞋEt tsꞌiyawh bubut neꞌninkai, ꞌet hoontsꞌi Benjamin yuba deyanla, ꞌi kwulat ꞌi be ꞌonus ꞌultsuk, ꞌi yugha ininꞌai. ꞋInkꞌez too hitnaiꞌ ꞌinkꞌez hiyulh whunalhni.