Genesis 42 - Yak'usda Ooghuni

Joseph bulhutsinke Egypt tsꞌe whehandil

¹ ꞋEt Jacob yun kꞌut Egypt ꞌet lhes maiꞌ hoonli whunilhꞌen ꞌet duyeꞌ ꞌubulhni, “Di ha ꞌantsꞌi lhunulhꞌen?”

² ꞋInkꞌez ꞌet ꞌutni, “Egypt ꞌet lhes maiꞌ hoonli ꞌet whulh ꞌudastsꞌo, whuz uhdulh ꞌinkꞌez ꞌet neba oohket ꞌet de sih tsꞌuhoonaꞌ ꞌinkꞌez yatsꞌilhosdla.”

³ ꞋEt Joseph bulhutsinke whunizyane, Egypt tsꞌe whenandil lhes maiꞌ hootakulh ha.

⁴ ꞋEt hoontsꞌi Jacob ꞌaw Joseph bulhutsin Benjamin, ꞌen ꞌaw bubulh whelhuyilhꞌalh, “Doo ka sih hoontsiꞌ-un bulh ꞌuhoneh,” ni ꞌinka.

⁵ ꞋEt Israel ooyeꞌke whuz lhes maiꞌ hootakulh ha whuz whehandil, Canaan ꞌet cha dai hoonli ꞌet huwa.

⁶ ꞋEt Joseph nyo usda-un dulcho whe bumoodih unli. ꞋEn za ndi lhes maiꞌ yeꞌ ooket keyoh whuduneꞌne tsꞌun. ꞋEt Joseph bulhutsinke whusahandil ꞌinkꞌez hibut soo yoo yo cho yo ꞌuhuntutsulh ꞌankwꞌus yun nonutꞌa whe.

⁷ ꞋEt Joseph dulhutsinke bunilhꞌen ꞌinkꞌez naboolhtsꞌit, ꞌet hoontsꞌi tꞌebunuzun hukwꞌunꞌa neꞌutꞌen ꞌinkꞌez khuni ulhtus ꞌi be bubulh yalhduk ꞌinkꞌez ꞌubulhni, “Ntsꞌez de hahdil?” ꞋEt ꞌuhutni, “Canaan yun kꞌut tsꞌe ha tsꞌandil tꞌalh-i tsꞌootakulh ha.”

⁸ ꞋEt Joseph dulhutsinke naboolhtsꞌit ꞌinkꞌez didut ꞌaw nalhuhuyooltsꞌulh.

⁹ ꞋEt Joseph ntsꞌenꞌa la bughu nusuti-un ꞌet whunalnih ꞌinkꞌez ꞌubulhni, “Nunutꞌiꞌne ꞌuhtꞌoh! Datsꞌintꞌoh la tetsꞌulꞌen neuntilhꞌelh ha ꞌuhja, ndiz tihdil!”

¹⁰ ꞋEt ꞌuhuyulhni, “ꞋAwundooh nemoodih, mba ꞌutꞌenne njan ꞌutꞌalh-i hootakulh ha ꞌuhuja whusahandil.

¹¹ Tsꞌiyawh ꞌilhoghun dune ooyeꞌke za ꞌutsꞌintꞌoh, ꞌaw dune ꞌundunutꞌihne lhtsꞌiloh. Mba ꞌutꞌenne ꞌaw nulhdulhꞌenne iloh ꞌuhintꞌoh.”

¹² ꞋEt hoontsꞌi ꞌubulhni, “ꞋAwundooh! ꞋEt hoontsꞌi njan datsꞌintꞌoh la tetsꞌulꞌen, ꞌet whuntilhꞌelh ha ꞌuhja!”

¹³ ꞋEt ꞌuhuyulhni, “Mba ꞌutꞌenne ꞌenne whunizyane ꞌon ꞌat nane lhulhutsinke hinli. ꞋIlhoghun dune za ooyeꞌ Canaan whutꞌen-un, ꞌudekꞌoh-un ꞌen ꞌubá yuzih netlꞌa didaꞌ, ꞌinkꞌez ꞌilhoghun cha hooloh suliꞌ inleꞌ.”

¹⁴ ꞋEt hoontsꞌi Joseph ꞌubulhni, “Daja dusni la, ꞌet ꞌalha ꞌudusni, nulhdulhꞌenne unli whe ꞌuhtꞌoh!

¹⁵ Ndiz unꞌa ꞌet ootalhdzih. Pharaoh ye khuna-i njan ꞌaw whuchꞌa nalhtuzihdulh, ꞌudekꞌoh-un nohulhutsin whusainya de za.

¹⁶ ꞋIlhoghun whuz nalhꞌalh ꞌinkꞌez ꞌudekꞌoh-un nohulhutsin whusayoolhtelh. ꞋInkꞌez nohni ꞌadutilalh, ꞌet de nohghun ootalhdzih tsꞌihꞌun unꞌa ꞌuduhni tilah. Pharaoh ye khuna-i be nulhdulhꞌenne uhli tilah ꞌuhtꞌoh!”

¹⁷ ꞋEt tsꞌiyawh ꞌabanla tat dzin whutsꞌun.

¹⁸ ꞋEt Joseph ꞌubulhni whulh tat dzin-un, “ꞋEt nduhneh ꞌinkꞌez hoohnaꞌ, Yakꞌusda (Elohim) be nuzjut ꞌet huwa.

¹⁹ Tsꞌihꞌun dunene uhli de, nohni nohtoh ꞌilhoghun ꞌen ꞌadooꞌaꞌ ꞌinkꞌez nohni lhes maiꞌ bulh whuz nohyoh tsꞌe nahdulh.

²⁰ ꞋInkꞌez ꞌudekꞌoh-un nohulhutsin, ꞌen sba whusalhtih. Nohghuni ootalhdzih ꞌet huwa ꞌinkꞌez ꞌaw yaoohdlah ꞌaitꞌoh.” ꞋInka ꞌet nduhuja.

²¹ ꞋEt ꞌulhodutni, “ꞋAlhaꞌ nekꞌehoonkatne tsinli. Neulhutsin oozul netsꞌutedudlih inleꞌ ꞌinkꞌez ꞌaw lhtsꞌuditsꞌil, ꞌet huwa njan nekꞌehooltsꞌut.”

²² ꞋInkꞌez Reuben bubulh yatilduk ꞌinkꞌez ꞌubulhni, “ꞋAw lakw lhunodusnel inleꞌ! ‘Ndun duneyaz ootsꞌun nintaꞌoohtꞌen junih!’ nohdusni, ꞌinkꞌez ꞌaw lhusoozulhtsꞌai. ꞋEt huwa whunulhꞌen buzkaih ꞌawet netsꞌun hukwaꞌ whutni.”

²³ ꞋEt hoontsꞌi ꞌaw tꞌehonuszun Joseph tꞌewhuninzun, yuba yalhduk-un ꞌen yuba yalhduk whe bubulh yalhduk ꞌet huwa.

²⁴ ꞋInkꞌez buchꞌaz nalhꞌa ꞌinkꞌez intse. ꞋEt doo cha butsꞌun nalhꞌa bubulh yalhduk ꞌinkꞌez Simeon yilhchoot ꞌinkꞌez bubut ꞌet yulhghel.

Bulhutsinke Canaan tsꞌe whe nahidil

²⁵ ꞋEt Joseph ꞌubulhni, ꞌuyoonne dune ndi ꞌeꞌuzdla-i tsꞌiyawh lhes maiꞌ be buba idulhbun ꞌinkꞌez ndai la hikꞌelha hitilhtselh-i, ꞌi tsꞌiyawh sooniya ꞌeꞌuzdla-i be nayuhdzaiꞌ ꞌinkꞌez nahidutilyelh-i cha butlꞌahle. ꞋEt whuz unꞌa ꞌubinla.

²⁶ ꞋEt nyoo budonkey cha tsꞌiyawh hitꞌunaꞌuzdla lhes maiꞌ be ꞌinkꞌez whe nahidil.

²⁷ ꞋEt nehunina ꞌilhoghun nyoo ꞌeꞌuzdla-i kꞌunayanꞌuk, nyoon dughunaꞌ yughaꞌ tiꞌalh ha, nehunina-un soo ꞌudedo nyoo sooniya ꞌet usdzai yutilhꞌen.

²⁸ ꞋEt dulhutsinke ꞌubulhni, “Szooniya stlꞌa nahuyanꞌai, njan ꞌet ꞌuntꞌoh, sꞌezdla-i bet!” ꞋEt budzin soo tsꞌihꞌun yo ꞌuja ꞌinkꞌez hunilhjoot ꞌinkꞌez ꞌilhodutni “Dahoontꞌoh-un ꞌet Yakꞌusda (Elohim) negha ooninꞌai?”

²⁹ ꞋEt Jacob dubá ꞌen hitsꞌu naoosdil Canaan yun kꞌut, ꞌinkꞌez hiyulh nahoolnuk ntsꞌoh te bubulh dahootꞌen-un ꞌuhuyulhni,

³⁰ “Mbene la nyo yun whumoodih unli-un, tubeh khuni dutsꞌun ꞌi be nebulh yalhduk, ꞌinkꞌez nulhdulhꞌenne keyoh honilhꞌen ooba leꞌ tsꞌintꞌoh.

³¹ ꞋEt hoontsꞌi ꞌutsꞌutni, ‘Tsꞌihꞌun dunene tsinli, ꞌaw nulhdulhꞌenne lhtsꞌiloh.

³² Whunizyane ꞌon ꞌat nane lhulhutsinke tsinli, ꞌubá ooyeꞌke ꞌutsꞌintꞌoh. ꞋIlhoghun hooloh suliꞌ, ꞌinkꞌez ꞌudekꞌoh-un ꞌen ꞌubá yuzih usda, Canaan yun kꞌut ꞌet,’ tsꞌutni.

³³ ꞋEt dune nyo keyoh whumoodih unli neulhni, ‘Njan whe la tsꞌihꞌun dune uhli tꞌeoonoohzeh, ꞌilhoghun nohulhutsin njan nenulhtih, ꞌinkꞌez ꞌutꞌalh-i nohyoh tsꞌe tꞌalh-i hooloh tsꞌe nahlelh ꞌinkꞌez nahdulh.

³⁴ ꞋInkꞌez ꞌudekꞌoh-un nohulhutsin, ndiz toolhteꞌ. ꞋEt de la tꞌeoonooszin ꞌaw nulhdulhꞌenne lhuhloh, tsꞌihꞌun dune uhli ꞌinkꞌez ndun nohulhutsin nohtlꞌa natistelh ꞌinkꞌez njan ꞌet sih ꞌohket.’”

³⁵ ꞋEt ꞌuhooja, duꞌezdla-i huye ha ꞌalhkat whe ꞌilhoghun dune buzooniya yukꞌelha yulhtsi-i, ꞌi be ꞌuzdla-i be yuzdzai ꞌet hitilhꞌen. Bubá cha yunilhꞌen. Tube hunilhjoot.

³⁶ ꞋInkꞌez Jacob bubá ꞌubulhni, “Tube tsꞌodi suzulhtsi nohtoh. Joseph ꞌen hooloh suliꞌ, Simeon cha hooloh suliꞌ, ꞌinkꞌez ꞌandit Benjamin ꞌen natilhtelh hukwaꞌ nuhzun. ꞋI tsꞌiyawh sdachꞌe ꞌuhoontꞌoh.”

³⁷ ꞋEt Reuben dubá yulh yatilhduk ꞌinkꞌez ꞌuyulhni, “Syeꞌke nahultꞌoh bubuzolhghelh ꞌaw Simeon ntsꞌu nalhtustel de. Sla kꞌelhtih ꞌinkꞌez whusunaoostelh lah.”

³⁸ ꞋEt hoontsꞌi ꞌuyulhni, “ꞋAw syeꞌ nohbulh tooꞌas ꞌaitꞌoh. Ndun nohulhutsin ꞌen dazsai. Dichꞌoh ꞌet ndun syeꞌ hoonli bulh ꞌuhooja de uhdulh whe, ꞌet de stsi dulgi-i tsꞌodi bulh nyo tsꞌun kꞌut tsꞌe tisyalh.”