Genesis 40 - Yak'usda Ooghuni

ꞋAdinlane buba nute

¹ ꞋEt hukwꞌelhꞌaz ꞌet nduhooja whe ndunne Egypt whutꞌenne lerwe ooyoh ꞌuhutꞌen, dayi neꞌutꞌen, ꞌinkꞌez nyo yoh lhes ꞌulhtꞌes-un cha, bumoodih lerwe hiba dzoh ꞌuja.

² ꞋInkꞌez lerwe Pharaoh ꞌen ndunne nane yuba neꞌutꞌenne, ꞌenne dayi neꞌutꞌen ꞌinkꞌez dayi ꞌulhtꞌes, ꞌenne tube whe bubulh hunilchꞌe.

³ ꞋInkꞌez nahultꞌoh ꞌabanꞌai, nyoon Pharaoh lhuganne oodayi cho ooyoh, ꞌen tlꞌa balhti, Joseph ꞌadinꞌai-un ꞌet.

⁴ ꞋInkꞌez nyo Pharaoh lhuganne oodayi cho, Joseph ꞌen tlꞌa balhti ꞌinkꞌez buba neꞌutꞌen. ꞋInkꞌez ꞌatsul ꞌet ꞌahudanꞌaꞌ.

⁵ ꞋEt nyoon yoh ꞌutꞌen moodih ꞌinkꞌez nyoon lhes ꞌulhtꞌes-un lerwe ba ꞌutꞌenne nyo ꞌahudinꞌai, nahultꞌoh nuhuztez, ꞌilhe ꞌulhdzis za, lhelhtsꞌun unꞌa nuhuztez.

⁶ ꞋInkꞌez Joseph bughu daninya bundadaꞌ, ꞌinkꞌez bunilhꞌen, ꞌinkꞌez nahultꞌoh ni hinli.

⁷ ꞋEt Pharaoh oomoodihne hubulh ꞌuhutꞌenne ꞌubulhni, “Di ha ꞌuhtꞌoh nohdzi unduda ꞌandit dzin?”

⁸ ꞋInkꞌez ꞌuhuyulhni, “Naníltꞌoh ꞌandit ꞌulhdzis nusítez ꞌinkꞌez daja ni whe ꞌutni-un, ꞌaw nedoniꞌne hooloh.” ꞋInkꞌez Joseph ꞌubulhni, “Ndet huwa ꞌet nusuhtez-un, Yakꞌusda ꞌen za iloh lakw ba ꞌuhoontꞌoh. Tꞌewhuntihzeh hukwaꞌ nuzun de, sudúhni.”

⁹ ꞋEt nyoon yoh ꞌutꞌen moodih, Joseph daja la nusuti ꞌet yadaniꞌ ꞌinkꞌez ꞌutni, “Whunilhꞌen njan nuste-un ꞌantsꞌi duchun ꞌi sbut nadanꞌa.

¹⁰ ꞋEt ndi duchun ꞌi ta oozooschum hoonli ꞌinkꞌez ootsꞌu haꞌ nulhyeh. Ootsꞌahaꞌ nalhyai ꞌinkꞌez mai tsꞌekoo tooꞌ huyilhꞌi, ꞌi mai ꞌi ootsꞌahaꞌ inalhyai.

¹¹ ꞋInkꞌez Pharaoh oolubot ꞌi sla kꞌesꞌai ꞌinkꞌez nyoo mai uschoot ꞌinkꞌez nyo Pharaoh oolubot ꞌet dunisni ꞌinkꞌez Pharaoh oola kꞌeyiskai.”

¹² ꞋInkꞌez Joseph ꞌuyulhni, “Daja ni whe ꞌutni nyudutasnelh. Ndi ta ꞌuzooschum ꞌi tat dzin ꞌuntꞌoh.

¹³ Tat dzin inleꞌ de, Pharaoh whutsodaꞌ daintꞌen la, ꞌet nenyanutalhtelh, ntsi ndo ꞌuyutilelh ꞌinkꞌez oolubot ꞌi ootlꞌa itankalh, whutsodaꞌ dailhꞌen lah ba ꞌintꞌen daꞌ.

¹⁴ ꞋEt hoontsꞌi snaoolnih ꞌawet mba sooꞌ hooja de, ꞌinkꞌez stsꞌun onzooꞌ, Pharaoh sba oobulh yaoolhduk ꞌinkꞌez njan tenaoosjaꞌ.

¹⁵ ꞋAlha Hebrew whutꞌenne bukeyoh ꞌet whutsꞌun sgho ndunistꞌi whe ꞌustꞌoh. ꞋAw hoonli lheꞌusnel whe njan ꞌaw ꞌasuhooꞌalh huba lheꞌhootꞌoh.”

¹⁶ ꞋEt nyoon lerwe ba lhes ꞌulhtꞌes-un, nyoon ꞌon ghun-un huwu nusuti-un hoonzoo, ꞌet Joseph ꞌuyulhni, “Si cha whuz unꞌa nususti ꞌinkꞌez njan ꞌet ta lhyul lhestsꞌai, ꞌi stsi kꞌusla.

¹⁷ ꞋUdedo telh ꞌi lhelhdoh-i lhes sutꞌe-i te, ꞌi Pharaoh ba ꞌuntꞌoh, ꞌinkꞌez dutꞌaiyaz ndo stsi kꞌuskai whe tsꞌiyawh huyanꞌal.”

¹⁸ ꞋEt Joseph ꞌuyulhni, “Daja ni whe ꞌutni nyudutasnelh. Ta telh, ꞌi tat dzin ꞌuntꞌoh.

¹⁹ Tat dzin inleꞌ, ꞌet Pharaoh ntsi ꞌi nchꞌa ndo itilelh, ꞌinkꞌez duchun kꞌez ꞌet nzeꞌtigus ꞌinkꞌez dutꞌai ꞌi nyustꞌe hitiꞌulh.”

²⁰ ꞋEt ꞌuhooja whulh tat dzin inleꞌ whe, ꞌet Pharaoh whuzdli dzin ꞌinkꞌez dune ghu nusuya duba ꞌutꞌenne ba, ꞌinkꞌez nyoon yoh huwunli, ꞌutꞌen ghunli-un whumoodih, ꞌinkꞌez nyoon lhes ꞌulhtꞌes-un bulh, ꞌenne butsi do ꞌuyinla.

²¹ ꞋEt ndun ꞌutꞌen moodih yilhꞌi-un, cha za ꞌet nenainilhti ꞌinkꞌez lubot ꞌi Pharaoh oola kꞌeyanꞌai.

²² ꞋEt hoontsꞌi nyoon lhes ꞌulhtꞌes-un, ꞌen yuze ꞌuzguz, Joseph daja yulhni la whuz ꞌunꞌa.

²³ ꞋEt hoontsꞌi nyoon ꞌutꞌen moodih-un, ꞌaw Joseph yunaoodilhnoh.