Genesis 4 - Yak'usda Ooghuni

Cain ꞌen Abel yuzilhghi

¹ ꞋEt Adam duꞌat Eve, tꞌeinanzin ꞌinkꞌez ooꞌat ulchan ꞌinkꞌez Cain ꞌen yulhtsi ꞌinkꞌez ꞌutni, “Moodihti (Yahweh) tsꞌun dune sgha ninzut.”

² ꞋEt doo cha Eve ꞌulhtsi, ꞌandit ꞌet bulhutsin Abel ꞌen ꞌusbai ghunli unli, ꞌet Cain ꞌen yun ghana-un suliꞌ.

³ ꞋEt whudizulh whutoh Cain yun whumaiꞌ, Moodihti (Yahweh) gha italelh ha yughi ninla.

⁴ Abel cha ꞌusbai ꞌudechoo whuzdli-i nilhkꞌa whe whuz wheyanla ꞌinkꞌez Moodihti (Yahweh) Abel yudilhtiꞌ ꞌinkꞌez yuba soo ꞌuja.

⁵ ꞋEt hoontsꞌi Cain yuba whusayanla-i ooba lheꞌyizooꞌ ꞌinkꞌez Cain tube hunilchꞌe ꞌinkꞌez oonin tsꞌe ꞌutsꞌun unꞌa ꞌuja.

⁶ ꞋEt huwa Moodihti (Yahweh) ꞌen Cain ꞌuyulhni, “Ndet huwa hunilchꞌe ꞌinkꞌez nyunin tsꞌe ꞌutsꞌun unꞌa ꞌinja?

⁷ Soo ꞌantꞌen, ꞌaw lakw ꞌuyoo neba lheꞌhootazooꞌ? ꞋEt ꞌaw soo lheꞌzintꞌen de, ꞌutꞌen untsiꞌ-i dati ꞌusꞌai whe ꞌuntꞌoh. ꞋInkꞌez nkaꞌ ninzun whe ꞌuntꞌoh, ꞌet hoontsꞌi whuchꞌa whumoodih ꞌonleꞌ.”

⁸ ꞋEt Cain dudulhutsin Abel yulh yailhduk, ꞌet ꞌuhooja nus tlꞌo kꞌut ꞌuhintꞌoh whe, Cain dudulhutsin Abel yuchꞌaz nedinja ꞌinkꞌez yuzilhghi.

⁹ ꞋEt whe Moodihti (Yahweh) Cain ꞌuyulhni, “Nyulhutsin Abel daja?” Cain ꞌutni, “Tꞌeoonuzuszun, si eh sulhutsin ghusli?”

¹⁰ ꞋInkꞌez ꞌutni, “Ntsꞌenꞌa dainja? Yun whutsꞌun nyulhutsin buzkaiꞌ stsꞌun huyih.

¹¹ ꞋAndit ꞌawet ndi yun mba whutátsiꞌ. Yun diztsꞌo nla kꞌez nyulhutsin buzkaiꞌ ookꞌeijul ꞌet huwa.

¹² Yun gha itanalh te, daltus la hukwꞌunꞌa mba ookꞌut ha lheꞌuntizye. Ndi yun kꞌut tandalh whutoh nunulꞌiꞌ-un ꞌinkꞌez yoh lhuhootꞌiꞌ-un tanleh.”

¹³ ꞋEt Cain ꞌen Moodihti (Yahweh) uyúlhni, “Be sba nahisda-i ꞌonus sba hoondaz kꞌet ꞌaw whulh oostꞌeꞌ ꞌaitꞌoh.

¹⁴ ꞋAlha ꞌandit dzin whutsꞌun ndi yun kꞌut suntinyoot nyunin ba whuꞌiz ꞌutistꞌelh, ndi yun kꞌut nunulꞌiꞌ-un ꞌinkꞌez yoh lhuhootꞌiꞌ-un tisleh, ꞌinkꞌez mbe nasilhti-un sutuzilhghelh whe ꞌuntꞌoh”.

¹⁵ ꞋEt Moodihti (Yahweh) ꞌuyulhni, “ꞋEt huwa, mbe Cain silhghi-un lhtakꞌantꞌit ꞌuwhultsuk-un ooba kꞌutitnelh.” Doo ka si Moodihti (Yahweh) ꞌen Cain ye hoodalhꞌen khun nahiyilhti ꞌinkꞌez hizoolhghelh whuchꞌa.

Cain tsꞌu haindene

¹⁶ ꞋEt Cain Moodihti (Yahweh) chꞌa suya ꞌinkꞌez yun kꞌut Nod huwhutni-un ꞌet nenina, haꞌ nuyeh kꞌet Eden ꞌon daz tsꞌe.

¹⁷ ꞋInkꞌez Cain duꞌat tꞌeinanzin, ulchan ꞌinkꞌez Enoch ooyaz whuzdli. ꞋInkꞌez keyoh whuti ꞌuhoonla ꞌinkꞌez duyeꞌ booziꞌ, Enoch be hoozi.

¹⁸ Irad ꞌen Enoch ooyeꞌ suliꞌ ꞌinkꞌez Irad, Mehujael ooyeꞌ suliꞌ ꞌinkꞌez Mehujail ꞌen Methushael, ꞌinkꞌez Methushael, Lamech ooyeꞌ suliꞌ.

¹⁹ ꞋEt Lamech nane tsꞌekoo ilhchoot, duꞌatke eni, ꞌilhoghun ooꞌat, Adah booziꞌ ꞌinkꞌez ꞌon ꞌat-un ꞌen Zillah huyulhni.

²⁰ ꞋInkꞌez Adah, ꞌen Jabal ooyaz suliꞌ. ꞋEn buzkehkene nimbali bet huwhutꞌi ꞌinkꞌez khuna-i ꞌi nulhyeh.

²¹ Bulhutsin booziꞌ Jubal, ꞌen ndi harp ꞌinkꞌez flute hiyulhni ꞌi be hujun, ꞌenne tsꞌiyawh hube ꞌabá.

²² Zillah, ꞌen cha buzke hooni. ꞋIlhoghun ꞌen Tubal-Cain hiyulhni. ꞋEn mbe ndi ꞌutes ꞌinkꞌez dulkꞌun te ꞌinkꞌez lhuztih bulh yugha khuna ꞌenne tsꞌiyawh hubodulhꞌeh. ꞋInkꞌez Tubal-Cain bulhtus ꞌen Naamah tsꞌutni.

²³ ꞋEt Lamech duꞌatke ꞌubulhni, “Adah ꞌinkꞌez Zillah, soo zulhtsꞌai, dune ka sulhtsi huwa sisghi, chilh hoontsꞌi sundilhdaꞌ hukwa sisghi”.

²⁴ Cain kꞌutitnelh te, lhtakꞌantꞌit tighan, ꞌet de Lamech lhtakꞌantꞌit whunizyat ꞌon ꞌat lhtakꞌantꞌit ꞌuwhultsuk-un.

Adam doo cha za ooyeꞌ hooni

²⁵ Adam doo cha duꞌat tꞌenanzin whe ooyaz dune suliꞌ, ꞌen Seth yulhni. Eve ꞌutni, “Yakꞌusda (Elohim) ꞌuyeꞌ sgha nilhti, ꞌen Abel yukꞌenaidalhti, Cain yuzilhghi-un.”

²⁶ Seth cha ooyeꞌ whuzdliꞌ, Enosh yulhni. ꞋEt ndoh dzin dunene Moodihti (Yahweh) booziꞌ be ka whehuninyih.