Genesis 39 - Yak'usda Ooghuni

Joseph ꞌen keyoh Egypt ꞌet ꞌulhna suliꞌ

¹ ꞋAndit whe Joseph ntsꞌun Egypt tsꞌe whehiyalhti, ꞌinkꞌez Potiphar, ꞌen budayi cho Pharaoh lhuganne ꞌen huba neꞌduniꞌ, ꞌen ꞌilhoghun bumoodih unli, ꞌen Egypt whutꞌen ꞌen yonket. Ishmael whutꞌenne tsꞌun ꞌen ntsꞌun whehuyalhti.

² ꞋEt Moodihti (Yahweh) Joseph yulh ꞌuntꞌoh ꞌinkꞌez tube soo dinꞌa suliꞌ. Nyoon Egypt whutꞌen oomoodih yinli-un ꞌen ooyoh usda.

³ ꞋInkꞌez oomoodih yunilhꞌen ꞌahoolhyiz Moodihti (Yahweh) yulh ꞌuntꞌoh ꞌinkꞌez oola kꞌez tsꞌiyawh be unzoo yulhtsi.

⁴ ꞋInkꞌez Joseph tube ooba yinzoo ꞌinkꞌez yuba ꞌutꞌen. ꞋEt ooyoh dulcho whumoodih unli yulhtsi, ꞌinkꞌez ndai la yutꞌi-i cha tsꞌiyawh yula kꞌeyanla.

⁵ ꞋEt yoh moodih yulhtsi ꞌet whutsꞌun ꞌinkꞌez ndai la yutꞌi-i cha tsꞌiyawh yutlꞌa yanla. ꞋEt huwa Moodihti (Yahweh) nyoo Egypt whutꞌen ooyoh dilhtsꞌine soo hoonzoo-un bugha whultsꞌut. ꞋInkꞌez ndai la yutꞌi-i cha, yoh yutꞌi-i cha ꞌinkꞌez ootlꞌo kꞌuz cha yutꞌi-i, tsꞌiyawh Moodihti (Yahweh) soo hoonzoo-un oogha whultsꞌut.

⁶ ꞋEt ndai la yutꞌi-i, tsꞌiyawh Joseph yula kꞌeyanla, ꞌaw didut tꞌeoonuszun di ꞌutꞌi, ꞌutꞌalh-i yuꞌalh-i, ꞌi yuꞌalh. ꞋInkꞌez Joseph dunezooꞌ, ooyustꞌe dulcho whe unzoo, sooꞌ otꞌen cha ꞌuntꞌoh.

⁷ ꞋEt hukwꞌelhꞌaz whudizulh, ꞌet nyoon oomoodih ooꞌat, Joseph ꞌen yukaꞌ ninzun hukwꞌunꞌa yunilhꞌen ꞌinkꞌez ꞌuyulhni, “Schan tꞌesinti.”

⁸ ꞋEt hoontsꞌi yuchꞌa tse disnih, ꞌinkꞌez nyoon oomoodih ooꞌat ꞌuyulhni, “Whunilhꞌen smoodih ꞌaw njan yoh dastꞌen ꞌet tꞌeoonuszun. Ndai la yutꞌi-i cha tsꞌiyawh sla kꞌeyanla. ꞋEt ꞌinkꞌez ndi yutꞌi, ꞌi tsꞌiyawh stlꞌa honla slakꞌez tsꞌe.

⁹ ꞋAw njan yoh ꞌaw sanus ꞌulchone hooloh. ꞋAw hoonli cha schꞌa nulhonulhꞌiꞌ. ꞋEt ꞌandit nyun ꞌen ooꞌat inli, ꞌet huwa ntsꞌenꞌa ꞌutisnelh lheꞌwhulcho-un, lheꞌwhultsiꞌ-un ꞌet ꞌutisnelh ꞌinkꞌez Yakꞌusda oochꞌaz lubeshi nedutasdalh?”

¹⁰ ꞋEt dzin totsuk yulh yalhduk, ꞌet hoontsꞌi ꞌaw lhidustsꞌo, yuchan tꞌeooteꞌ yulhni.

¹¹ ꞋEt ꞌuhooja ꞌoh whuya whudizulh atꞌen, ꞌet Joseph yoh tsꞌe whe naja ꞌutitꞌelh huba, dune cha yoh hooloh.

¹² Tsꞌeke yunaih yilhchoot ꞌinkꞌez ꞌuyulhni, “Schan tꞌesinti!” Ndi naih yoontun-i, ꞌi yoontun whe yuchꞌa tilhgai ꞌinkꞌez ꞌaz whelgai.

¹³ ꞋEt ndi oonaih oola kꞌet yulhchooz, nyoon tsꞌeke yunilhꞌen, ꞌen cha ꞌaz whelgai.

¹⁴ Nyoonne dune ꞌenne whuyoh dunene butsꞌa hanyih ꞌinkꞌez ꞌubulhni, “Whunulhꞌen, ndun Hebrew whutꞌen-un ꞌen neghi nilhti neghodloh ha, ꞌinkꞌez yoh daninya ꞌinkꞌez duchan tꞌeoosteꞌ sulhni, ꞌinkꞌez tube cho ꞌasuzdzul!

¹⁵ ꞋEt ꞌawet hisyih ꞌet sudantsꞌo whe ꞌet ꞌinkꞌez oochꞌa ꞌazdzul, ndi oonaih ꞌi ndi slakꞌez yula ditni ꞌinkꞌez ꞌaz whelgai!”

¹⁶ ꞋEt ndi naih yoontun, Joseph oomoodih dananja whutsꞌun yoontun, ꞌinkꞌez yulh yatilhduk.

¹⁷ ꞋInkꞌez ꞌuyulhni, “Nyoon Hebrew dune ba ꞌutꞌen-un njan danilhti-un, szih neninya ꞌinkꞌez sghudloh.

¹⁸ ꞋEt oochꞌa ꞌazdzul whe ndi oonaih ꞌi szih yula ditni ꞌinkꞌez ꞌaz whelgai.”

¹⁹ ꞋEt Joseph oomoodih whulh ꞌudantsꞌo ndi khuni yudantsꞌo ooꞌat daja yulhni la, “Mba ꞌutꞌen-un njan ꞌet dusinla,” ꞌet hunilchꞌe.

²⁰ ꞋEt Joseph oomoodih yilhchoot ꞌinkꞌez dune ꞌahudinꞌai-un, ndet lerwe be ꞌulhnane ꞌadinlane, ꞌet ꞌayanꞌai, ꞌinkꞌez nyo tsa kꞌet ꞌet ꞌadinꞌai.

²¹ ꞋEt hoontsꞌi Moodihti (Yahweh) Joseph yulh ꞌuntꞌoh, ꞌinkꞌez yugha teꞌninzun, nyo ꞌadinꞌai-un humoodih ꞌen yuba unzoo suliꞌ.

²² ꞋInkꞌez nyo tsa kꞌet ꞌahudinla-un humoodih, nyo ꞌadinlane tsꞌiyawh Joseph tlꞌa banla. Ntsꞌoh dahutꞌen-un ꞌet Joseph ba ꞌuhoontꞌoh.

²³ ꞋEt nyo ꞌahudinla-un whumoodih, Joseph ndai la yughana-i ꞌaw lhinilhꞌen, Moodihti (Yahweh) yulh ꞌuntꞌoh ꞌet huwa. ꞋInkꞌez ntsꞌoh datꞌen ndai la yughana tsꞌiyawh Moodihti (Yahweh) diztiꞌ yulhtsi.