Genesis 37 - Yak'usda Ooghuni

Joseph hooncha huwunute

¹ ꞋEt Jacob nyo Canaan yun kꞌut ꞌet whutꞌi ꞌet ꞌaw oobá tꞌenuszun.

² Jacob ntsꞌoh tuneꞌustꞌen: Joseph ꞌen whunizyat ꞌon ꞌat lhtakꞌantꞌit be yus kꞌut (17) ꞌet nus khuna-i ghaꞌ unꞌaih dulhutsinke tubulh, bubulh ꞌutꞌen nyoonne bulhutsinke ꞌenne Bilhah buzkeh ꞌinkꞌez Zilpah buzkeh cha, oobá ooꞌatke, ꞌenne bubulh ꞌutꞌen ꞌinkꞌez Joseph dubá ꞌen yulh nahoolnuk tankꞌus neꞌhutꞌen huwun.

³ ꞋEt Israel, Joseph ꞌonghunne duzkeh buba nus yukꞌensiꞌ. ꞋUdekꞌoh ooyeꞌ ꞌinkꞌez duneti whe ooyeꞌ yuzdliꞌ ꞌet huwa, ꞌinkꞌez dzoot yuba ꞌinla, lhelhtsꞌun otꞌen-i ꞌi dzoot yubaꞌ yinla.

⁴ ꞋEt bulhutsinke dalcho-i be la bubá Joseph yukꞌensiꞌ huwhunilhꞌen, ꞌinka hitsꞌu dutni ꞌinkꞌez ꞌaw soo cho hiyulh yalhulhduk.

⁵ ꞋEt Joseph nusuti ꞌinkꞌez dulhutsinke bubulh nahoolnuk. ꞋEt ꞌonus hitsꞌu dutni suliꞌ.

⁶ ꞋEt ꞌubulhni, “Ndi oowanususti-i oozulhtsꞌai.

⁷ ꞋEt ꞌatsꞌo nus lhes ha nanyai-i, ꞌaw lhduniltꞌo whe be neꞌtsꞌudulhchꞌuz ꞌinkꞌez ndi lhadusla-i ꞌi ꞌatsꞌo do ꞌuja ꞌinkꞌez ꞌantsꞌi usyin leꞌ ꞌuntꞌoh, ꞌinkꞌez be neꞌdilhchus-i nohchꞌeꞌ ꞌi ndi lhadusla-i ꞌi hinadilhya ꞌinkꞌez hibut yo ꞌuntutsulh.”

⁸ ꞋInkꞌez bulhutsinke ꞌet ꞌuhuyulhni, “Nelerwe tanleh whe ꞌudini ꞌinkꞌez nemoodih tanleh whe ꞌudini?” ꞋEt tsꞌo ꞌonus hitsꞌu dutni nute-un huwa ꞌinkꞌez ooghuni cha huwa tsꞌiyawh hitsꞌu dutni.

⁹ ꞋEt doo cha ꞌudun huwu nusuti ꞌinkꞌez dulhutsinke hubudaniꞌ ꞌinkꞌez ꞌutni, “Whunulhꞌen doo cha ꞌudun huwu nususti. ꞋAndit ndi dzenis oozaꞌ ꞌinkꞌez ꞌulhdzis oozaꞌ cha ꞌinkꞌez whunizyai ꞌon ꞌat ꞌilho sum, ꞌi cha sbut yo ꞌuhuntutsulh.”

¹⁰ ꞋEt dubá yudaniꞌ ꞌinkꞌez dulhutsinke cha budaniꞌ ꞌinkꞌez oobá hukwaꞌ yundaniꞌ ꞌinkꞌez ꞌuyulhni, “Dainja whe ꞌinja? Ndiz unꞌa nusinti nloo ꞌinkꞌez si cha ꞌinkꞌez nyulhutsinke tsꞌiyawh mbut yo untitsulh wheꞌ dini?”

¹¹ ꞋInkꞌez bulhutsinke higheꞌ oolnih ꞌinkꞌez oobá ꞌen ꞌantsꞌi huwu nuninuzut za ꞌuntꞌoh.

Joseph ꞌen bulhutsinke hiye ꞌonket

¹² ꞋEt bulhutsinke bubá ooghunaꞌ Shechem tsꞌe highaꞌ tiꞌalh ha whuz whehandil.

¹³ ꞋInkꞌez Israel, Joseph ꞌulhni, “Nyulhutsinke Shechem tsꞌe whuz khuna-i ghaꞌ huꞌaih. ꞋAnih whuz nyutoosꞌa sih!” ꞋEt ꞌuyulhni, “A, njan susda.”

¹⁴ ꞋEt whe Israel ꞌuyulhni, “Sla ꞌineh whe, inyalh nyulhutsinke soo ꞌuhintꞌoh whe, khuna-i cha soo ꞌuntꞌoh whe, ꞌinkꞌez khuni ꞌi whuz sba natonꞌalh.” ꞋEt whe njan Hebron whenkoh ꞌet whe yalhꞌaꞌ ꞌinkꞌez Shechem tsꞌe whenya.

¹⁵ ꞋEt ꞌuyoon dune Joseph nayilhti ꞌantsꞌi nus ꞌet ꞌatsꞌo nus lhelhtsꞌoyalh ꞌinkꞌez dune ꞌuyulhni, “Di huninta whe ꞌintꞌen?”

¹⁶ ꞋEt ꞌutni, “Sulhutsinke bukunusta whe ꞌustꞌen. Sudini ntsꞌe suba khuna-i ghaꞌ hunꞌaih.”

¹⁷ ꞋEt dune ꞌutni, “ꞋUtsꞌun whehandil wheꞌ hintꞌoh. ‘Dothan ntsꞌez uztoodilh,’ hutni whe ꞌet hubudastsꞌo.” ꞋEt Joseph whuz buba whenanya ꞌinkꞌez Dothan ꞌet nabinla.

¹⁸ ꞋEt ꞌaz de uyalh hitilhꞌen whe lhahodinla hituzilhghelh-un.

¹⁹ ꞋEt ꞌulhodutni, “Nyoon nute-un ꞌaz de uyalh.

²⁰ ꞋEt huwa ꞌandit tsꞌuzoolhghelh ꞌinkꞌez tsa kꞌet ꞌatsꞌooneh! ꞋInkꞌez la ꞌuzdooniꞌ, ‘Khuna-i yellhoh,’ ꞌuzdooniꞌ la, huwunute-un dahoneh subah!”

²¹ ꞋEt hoontsꞌi Reuben budantsꞌo ꞌinkꞌez bula kꞌeháyalhti ꞌinkꞌez ꞌutni, “ꞋAw lhtsꞌuzoolhghelh.”

²² ꞋInkꞌez Reuben ꞌubulhni, “ꞋAw buzkaih hoolhtselh junih! ꞋAntsꞌi njan tsa kꞌet ꞌet ꞌatsoolhtelh, chuntoh ꞌuhoontꞌoh, ꞌaw ootalhizohnal.” ꞋEt de la yoolhyih ꞌinkꞌez dubá tsꞌun naitoolhtelh, ꞌinka ꞌutni.

²³ ꞋEt ꞌuhooja Joseph dulhutsinke bugha ninya whe nyoo dzoot huye ha yalhti, nyoo dzoot lhelhtsꞌun otꞌen-i.

²⁴ ꞋEt huyilhchoot ꞌinkꞌez nyo tsa kꞌet ꞌet ꞌahuyano, nyo tsa kꞌet ꞌaw too hooloh.

²⁵ ꞋInkꞌez natlꞌa hudiltsꞌiꞌ ꞌuhutiꞌulh wheni, ꞌet do hitanꞌen whe ꞌaz de Ishmael whutꞌenne ꞌaz de hidulh, Gilead tsꞌe ha handil. Camel duntꞌi-i khuna-i cha tsꞌiyawh bulh, bulh butaꞌwhutꞌen-i, lhai cha huyilelh, ꞌinkꞌez balm ꞌinkꞌez myrrh huyulhni, nduntꞌi-i cha Egypt tsꞌe huyutizdla.

²⁶ ꞋEt Judah dulhutsinke ꞌubulhni, “Di suba negha ookat neulhutsin tsꞌuzilhghi ꞌinkꞌez buzkaiꞌ tsꞌuntilhꞌi de?

²⁷ ꞋAnih nyoonne Ismael whutꞌenne ꞌaz de ꞌudulhne, ꞌenne be butsꞌeꞌ tsꞌoket, ꞌaw kwꞌelhtsꞌudolhni, neulhutsin ꞌuntꞌoh, ꞌinkꞌez neyustꞌe cha unli.” ꞋEt bulhutsinke huyoozalhtsꞌaiꞌ.

²⁸ ꞋEt ndunne Medianne ooketne ꞌowhuya hidulh, ꞌet bulhutsinke Joseph nyo tsa kꞌet ha nahuyalhti ꞌinkꞌez nyoonne Ismail whutꞌenne, ꞌenne nat whunizyai (20) silver, ꞌi kꞌelha huye ꞌonket ꞌinkꞌez nyoonne Joseph huyilhchoot ꞌinkꞌez Egypt tsꞌe whehuyalhti.

²⁹ ꞋEt Reuben nyo tsa kꞌet whuz naoosja ꞌinkꞌez Joseph ꞌaw nyo tsa kꞌet hooloh, ꞌet dunaih yayidalhchꞌul.

³⁰ ꞋInkꞌez dulhutsinke bughu nanja ꞌinkꞌez ꞌutni, “Duneyaz ꞌawet hooloh suliꞌ! Ntsꞌe subah toosya?”

³¹ ꞋEt nyoo Joseph oodzoot huyilhchoot ꞌinkꞌez dúbe ntsool-iyaz, ꞌi hizilhghi ꞌinkꞌez nyoo dzoot ꞌi buzkaih hiye tunahuyulhchooz.

³² ꞋEt ndi dzoot lhelhtsꞌun otꞌen-i, ꞌi bubá hitsꞌu nahuyoolhchooz ꞌinkꞌez ꞌuhutni, “Ndi natsꞌilhchooz nyeꞌ oodzoot tila ꞌuntꞌoh kꞌus ꞌawundooh tilah?”

³³ ꞋEt nayoolhtsꞌit ꞌinkꞌez ꞌutni, “Syeꞌ oodzoot ꞌuntꞌoh! Khuna-i ꞌantsꞌi yellhoh, ꞌaw nawh lheꞌhootꞌoh Joseph yabeꞌ yidalhchꞌul.”

³⁴ ꞋEt Jacob dunaih yayidalhchꞌul ꞌinkꞌez doso ꞌi dutsꞌitoh nayuzguz, ꞌinkꞌez duyeꞌ lhat dzin whe yukꞌeninudleh.

³⁵ ꞋEt ooyeꞌke ꞌinkꞌez ootseꞌke cha tsꞌiyawh kꞌenahinoꞌah kwaꞌ hutꞌen. ꞋEt hoontsꞌi ꞌaw kꞌenahinoꞌah ꞌaitꞌoh ꞌinkꞌez ꞌutni, “Nyo stsꞌun kꞌut tsꞌe tisyalh, syeꞌ ookꞌeni untislelh.” ꞋInkꞌez oobá yukꞌetso.

³⁶ ꞋEt nyoonne Median whutꞌenne, yun kꞌut Egypt tsꞌe, nyoon Potiphar huyulhni, ꞌen tsꞌun huye ꞌonket. ꞋEn Pharaoh lhuganne moodih, nyo huwunline bumoodih cha unli.