Genesis 34 - Yak'usda Ooghuni

Dinah ꞌen bulh dzoh ꞌuhooja

¹ ꞋEt Dinah, Leah ooyatsꞌe, Jacob ghu yulhtsi inleꞌ-un, nyo tsꞌekoo nyoh whutꞌine, ꞌoh whutꞌine, ꞌenne butsꞌu tizya.

² ꞋInkꞌez Shechem, Hamor ooyeꞌ, nyo keyoh lerwe yeꞌ unli, yutilhꞌen whe yilhchoot ꞌinkꞌez yuchantꞌinteꞌ ꞌinkꞌez nintaꞌyunilhꞌen.

³ Oozul tubeh nyoon Dinah ooba yinzoo, Jacob ootseꞌ, ꞌinkꞌez tube yukꞌensiꞌ ꞌinkꞌez soo cho yulh yalhduk.

⁴ ꞋEt Shechem dubá Hamor yulh yalduk ꞌuyulhni, “Ndun tsꞌekeyaz ꞌen sꞌat tileh wheni sba ilhchoot.”

⁵ ꞋEt Jacob whulh ꞌudantsꞌo yutseꞌ Dinah nintaꞌyunilhꞌen, ꞌet whulh ꞌudantsꞌo ꞌet nyoonne ooyeꞌke nus khuna-i bulh ꞌuhutꞌen ꞌinkꞌez Jacob ꞌaw whusanahidil whutsꞌun lhubudinel.

⁶ ꞋEt Hamor, Shechem oobá, Jacob yughu ninya yulh yatilhduk huba.

⁷ ꞋInkꞌez Jacob ooyeꞌke nus ꞌuhutꞌen whe whuz de ha nahidil ꞌinkꞌez whulh ꞌuhudantsꞌo tube buba dzoh suliꞌ ꞌinkꞌez honilchꞌe. Lheꞌhoontꞌoh whe kꞌunꞌa hukwaya hoonli ꞌuja, Israel ootseꞌ yuchantꞌinteꞌ, ꞌaw nduhoneh huba lheꞌhootꞌoh.

⁸ ꞋEt hoontsꞌi Hamor bubulh yalhduk ꞌinkꞌez ꞌubulhni, “Syeꞌ Shechem oozul ntseꞌ tube yukꞌeni unli ooꞌat yutaleh wheni oogha inilhtih.

⁹ ꞋInkꞌez nebulh lhgho dolhtsꞌiꞌ. Ntseꞌkene ꞌenne negha buninle ꞌinkꞌez wheni netseꞌke ꞌenne hubilhchoot.

¹⁰ ꞋEt de sih nezih hoohtꞌeꞌ ꞌinkꞌez nyo yun cha ꞌet ꞌusꞌai, ꞌi kꞌut hoontꞌi ꞌinkꞌez hoohket ꞌinkꞌez ꞌeꞌoohket. Teꞌahtꞌen ꞌinkꞌez nohnichꞌoh eni nohgha ꞌoozit sih.”

¹¹ ꞋEt Schechem ꞌen cha Dinah oobá ꞌinkꞌez bulhutsinke ꞌenne ꞌubulhni, “Nohba ꞌuszoo ooleꞌ. Daja suduhni-un ꞌet la nohgha ooslelh.

¹² Daltsuk haꞌ nuhzun ꞌinkꞌez nohtsꞌu tisdulh-i. Daja duhni daltsuk-i ꞌinkꞌez ndun tsꞌekeyaz sꞌat tileh huba sgha nulhtih.”

¹³ ꞋEt hoontsꞌi Jacob ooyeꞌke Shechem ꞌinkꞌez Hamor bulh ꞌubuhutni ꞌinkꞌez whunutꞌih ꞌi be bubulh yahulhduk, nyoon dudulhtus Dinah nintaꞌinilhꞌen ꞌinka.

¹⁴ ꞋInkꞌez ꞌubuhutni, “ꞋAw ꞌet dutsꞌooneh ꞌaitꞌoh, ꞌaw neulhtus ꞌaw yuka dune lhitꞌus-un gha tsꞌoolhtelh ꞌaitꞌoh. Wheni neba hukwaya hoonli wheꞌ hoontꞌoh.

¹⁵ ꞋEt njan ꞌilhughun huwa ꞌet de ꞌaꞌah usdutinelh nekꞌunꞌa ꞌutantꞌelh, dune tsꞌiyawh yuka dune unli-un hubotitꞌus.

¹⁶ ꞋEt de la netseꞌke nohgha butsꞌolelh ꞌinkꞌez nohtseꞌke hubutsꞌitalhchulh ꞌinkꞌez nohzih tsꞌotitꞌelh ꞌinkꞌez ꞌilhoghun yinka duneꞌne ꞌuztileh.

¹⁷ ꞋEt ꞌaw lhunedahtsꞌil de, ꞌinkꞌez nohka dune uhli-i nohuztꞌus de, ꞌet de ndun neulhtus natsꞌitalhchulh ꞌinkꞌez naztidulh.”

¹⁸ ꞋEt ndi khuni ꞌi tube buba yinzoo Hamor ꞌinkꞌez ooyeꞌ Shechem ꞌen cha.

¹⁹ ꞋEt nyoon chilh ꞌahoh ꞌet duja nyoon Jacob ootseꞌ ooba yinzoo ꞌinka ꞌonus huwa ꞌitꞌen-un ꞌuja oobá ooyoh dilhtsꞌine buba nus.

²⁰ ꞋInkꞌez Hamor ꞌinkꞌez Shechem ooyeꞌ te nyo keyoh whudatih ꞌet nehunindil ꞌinkꞌez nyo keyoh whuduneꞌne bubulh yahulhduk.

²¹ “Ndunne dune nebulh soo dune hinli wheꞌ hintꞌoh, ꞌet huwa njan yun kꞌut huhootꞌeꞌ ꞌinkꞌez ꞌuhooket teꞌhootꞌen, ndi yun soo ꞌulcho whe ꞌuntꞌoh. Butseꞌke ꞌenne butsꞌolhchoot neꞌatke wheni, ꞌinkꞌez wheni netseꞌke bugha butsꞌolelh.

²² Njan ꞌilhoghun ꞌet za ndutsꞌuja te, ꞌandit za dune neulh dune hutileh, whe ꞌilho tsꞌutileh. ꞋEt ndun nedune ꞌenne tsꞌiyawh hika dune unli ꞌi ookꞌut tsꞌootꞌus, ꞌet didut tsꞌiyawh nduhintꞌoh.

²³ Ndi bughunaꞌ huyutꞌi-i cha ꞌinkꞌez khuna-i tsꞌiyawh nechꞌeꞌ tileh? ꞋAntsꞌi ꞌaꞌah uzdoonih ꞌet de la nebulh dune hooleꞌ.”

²⁴ ꞋEt nyo keyoh whuti tenindilne tsꞌiyawh Hamor, Shechem bulh ooyeꞌ, hubodantsꞌo, dune tsꞌiyawh yuka dune unli-i bubuhuztꞌus, nyo keyoh tenindilne.

²⁵ ꞋEt ꞌuhooja whulh tat dzin tsꞌiyawh bubulh ꞌultsꞌulh, nane Jacob ooyeꞌke Simeon ꞌinkꞌez Levi bulh Dinah bulhutsin, saluzti huyilhchoot ꞌinkꞌez soo tsꞌet ꞌet nyo keyoh whuti dune tsꞌiyawh hubuhanghan.

²⁶ ꞋInkꞌez Hamor ꞌinkꞌez Shechem ooyeꞌ, ꞌenne cha saluzti be bubozilhghi ꞌinkꞌez Dinah Shechem ooyoh ꞌet tenahinilhti ꞌinkꞌez tenahundil.

²⁷ Jacob ooyeꞌke ndunne huba ha nghanne buzih nehunindil ꞌinkꞌez nyo keyoh cha tsꞌiyai hilhchoot, bubulhtus nintaꞌhinilhꞌen ꞌet hukwa.

²⁸ ꞋEt nyoo dude ꞌusbai, musdoos dune cha ꞌinkꞌez khuna-i donkey cha, ꞌinkꞌez nyo keyoh ꞌusla-i cha nus yun kꞌut ꞌusla-i cha tsꞌiyawh huyilhchoot.

²⁹ ꞋInkꞌez huye hoonzooꞌ ꞌuntꞌoh-i cha tsꞌiyawh huyilhchoot. Ntsoolneyaz ꞌinkꞌez buꞌatke cha hubuhilhchoot, ꞌinkꞌez ndai la yoh ꞌusla-i cha tsꞌiyawh huyilhchoot.

³⁰ ꞋEt Jacob ꞌen Simeon ꞌinkꞌez Levi ꞌen ndo ꞌubulhni, “Tube sba dzoh ꞌuhja! Ndunne dune ndoh whutꞌine buba ska lheꞌhunizun suliꞌ. Canaan whutꞌenne ꞌinkꞌez Perizz whutꞌenne, tube wheni tsꞌintsool wheꞌ tsꞌintꞌoh, tsꞌiyawh ꞌilhohozdil ꞌinkꞌez la schꞌaz nehudindil ꞌinkꞌez la sozoolhghelh. Gak sotilhtselh syoh whutꞌine cha, si cha.”

³¹ ꞋEt hoontsꞌi ꞌuhutni, “Neulhtus ꞌantsꞌi ꞌulꞌenne kꞌunꞌa neꞌuztilhꞌen?”