Genesis 33 - Yak'usda Ooghuni

Jacob ꞌinkꞌez Esau lhghu hudistꞌaz

¹ ꞋEt Jacob ndo yutanꞌen whe dulhutsin Esau ꞌaz de uyalh yutilhꞌen, dit whunizyai whunizyat (400) dune ꞌet ꞌuhultsuk, ꞌenne hiyulh udulh whe ꞌet duduzke lhkꞌebanla, Leah cha, Rachel cha ꞌinkꞌez nyoonne nane buba ꞌutꞌenne cha butabuninla.

² ꞋInkꞌez ndune tsꞌekoo yuba ꞌutꞌenne ꞌinkꞌez tsꞌoodunne cha dubut nebuninla ꞌinkꞌez Leah duduzke te ooniz de nebuninla.

³ ꞋEt whe butso neninya ꞌinkꞌez yubut nachaniti, lhtakꞌantꞌit ꞌet yubut nachaniti ꞌet dulhutsin yuzih neninya.

⁴ ꞋEt hoontsꞌi Esau ꞌaz de tilhgai, yududilhgai ꞌinkꞌez yilhchoot ꞌinkꞌez yutsꞌilchun kꞌet ꞌet naiditsꞌooz ꞌinkꞌez nahultꞌoh hantse.

⁵ ꞋInkꞌez ndo yutanꞌen, ꞌet nyoonne tsꞌekoo ꞌinkꞌez tsꞌoodunne te, ꞌenne butilhꞌen ꞌinkꞌez ꞌutni, “Ndunne ꞌenne mbene wheꞌ hintꞌoh?” ꞋEt ꞌuyulhni, “Yakꞌusda (Elohim) ye unzoo-i gha mba ꞌutꞌen-un bugha buninla ꞌuhintꞌoh.”

⁶ ꞋEt nyoonne tsꞌekoo natneꞌutꞌenne ꞌinkꞌez tsꞌoodunne tubulh nus hutizdil ꞌinkꞌez yubut yo ꞌuntutsulh.

⁷ ꞋInkꞌez Leah cha duduzke tubulh hibut nenindil ꞌinkꞌez hibut yo ꞌuntutsulh, ꞌet hukwꞌelhꞌaz Joseph ꞌinkꞌez Rachel bulh hizih neninꞌaz, ꞌenne cha hibut yo ꞌuntizsel.

⁸ ꞋEt Esau ꞌutni, “Daja ninzun whe ndi lheltsuk-i nyulh ꞌuhintꞌoh?” ꞋEt ꞌuyulhni, “ꞋI bududisya, ꞌet de la soo cho sunolhꞌen smoodih.”

⁹ ꞋEt hoontsꞌi Esau ꞌutni, “Soo ꞌultsuk-i ꞌustꞌi sulhutsin, ndai la ꞌintꞌi-i nyunchꞌoh ꞌintꞌi.”

¹⁰ ꞋEt Jacob ꞌutni, “ꞋAwundooh! Sla ꞌineh, ꞌandit ꞌawet soo sunalhꞌen, ꞌet de ndi ntsꞌu tisdil-i ilhchoot ndet la nyisꞌen whe ꞌantsꞌi Yakꞌusda (Elohim) oonin nusꞌen sba leꞌ hoontꞌoh ꞌinkꞌez tubeh hoonintꞌiꞌ whe sunilhꞌen.

¹¹ Ndi soo hoonzoo-i sgha whultsꞌut ngha nusꞌai-i ilhchoot, Yakꞌusda (Elohim) tube stsꞌun nzoo inleꞌ ꞌinkꞌez tsꞌiyai lhai ꞌustꞌi.” ꞋEt doo cha ꞌuyulhni, ꞌinka yilhchoot.

¹² ꞋEt Esau ꞌutni, “Dugweꞌ ꞌawet uztoodilh ꞌinkꞌez ntso sih natoosjaꞌ.”

¹³ ꞋEt hoontsꞌi Jacob ꞌen ꞌuyulhni, “Smoodih tꞌeooninzun tsꞌoodunne tehutsun, ꞌinkꞌez ndi khuna-i whulukhi be ꞌudulhtuk whe ꞌuntꞌoh, ꞌi cha sulh ꞌuntꞌoh, ꞌinkꞌez dune tube ꞌilhudzin hiniyulh de nyoo khuna-i yaoodlah lah.

¹⁴ Whute smoodih! Stso inyalh, mba ꞌutꞌen-un ootso inyalh, ꞌinkꞌez ndune butso toosyaꞌ sih nanilhtsulyaz, khuna-i cha ꞌinkꞌez tsꞌoodunne cha, ndet la buba sooꞌ hoontꞌoh-un ꞌinkꞌez smoodih keyoh Seir ꞌet la ooghosyaꞌ.”

¹⁵ ꞋInkꞌez Esau ꞌutni, “Ndunne sulh nudilhne, oolohne nzih neboslelh.” ꞋEt hoontsꞌi ꞌutni, “Smoodih, ꞌawundooh, sooꞌ hoontꞌoh! Soo cho sunoolhꞌen sih.”

Jacob ꞌen yun kꞌut Canaan tsꞌun whuz oozya

¹⁶ ꞋEt Esau ꞌet dzin whe naja keyoh Seir whutsꞌun.

¹⁷ ꞋInkꞌez Jacob keyoh, Succoth huwhutni, tsꞌe whuz hoozdil. Yoh ꞌuhoonla ꞌinkꞌez khuna-i ba cha dilhtsꞌi-un ꞌuhoonla, ꞌet huwa nyo ꞌet ꞌandit Succoth huwhutni.

¹⁸ ꞋEt Jacob soo dalhinel whe nyo keyoh whuti, Shechem huwhutni, whuz oozya, Canaan yun kꞌut ꞌet whuzꞌai Paddan Aram tsꞌe hainya, ꞌinkꞌez nyo keyoh whuti ꞌet yoo ꞌaz tsꞌe dunimbali neninꞌai.

¹⁹ ꞋInkꞌez nyo nimbali neninꞌai-un yun, ꞌi Hamor buzkeh ꞌenne bubuyonket. Shechem oobá, whunizyai whunizyat (1,000) sooniya ꞌi kꞌelha.

²⁰ ꞋEt nyo loodel ꞌinla ꞌinkꞌez El Elohe Israel whulhni.