Genesis 3 - Yak'usda Ooghuni

Dune nintaꞌutꞌih whutsꞌu nintꞌi

¹ ꞋEt tlꞌughus ꞌi lhelhdoh didoh-i Moodihti Yakꞌusda (Yahweh Elohim) ꞌuyinla-i unli ꞌinkꞌez tsꞌeke ꞌulhni, “Duchun yun kꞌut whuduchun ꞌaw tsꞌiyawh lhuzoohꞌal, ni eh?”

² ꞋEt tsꞌeke nyoon tlꞌughus ꞌuyulhni, “Nyoo duchun maiꞌ ha nuyeh-i, ꞌi tsꞌooꞌalh hubaꞌ hoontꞌoh,

³ ꞌet hoontsꞌi ha nuyeh kꞌet whuduchun whuniz nadanꞌa-i, ꞌi Yakꞌusda (Elohim) ꞌutni, ‘Nyoo duchun maiꞌ ꞌaw lhuzoohꞌal, kꞌus ootꞌa oohnalh junih, khun si daoohtsah,’” ni.

⁴ ꞋEt ndi tlꞌughus, tsꞌeke ꞌen ꞌuyulhni, “ꞋAlhaꞌ ꞌaw daoontsah ꞌaitꞌoh.

⁵ Yakꞌusda (Elohim) tꞌeooninzun ndet dzin uhꞌalh-un, hoohꞌen tihleh ꞌinkꞌez Yakꞌusda (Elohim) bundutilhꞌelh, hoonzoo-un ꞌinkꞌez hoontsiꞌ-un cha tꞌewhuntahzin.”

⁶ ꞋEt tsꞌeke duchun tsꞌuꞌalh huba unzoo, nulꞌen huba cha unzoo, duchun tsꞌuwhunih netilhtselh huba ookaꞌ whuninzun, oomaiꞌ yilhchoot ꞌinkꞌez yanꞌal, duki cha yuloh yutlꞌa nanꞌai ꞌinkꞌez ꞌen cha yanꞌal.

⁷ ꞋEt nahultꞌoh duna be huhonꞌen suliꞌ, ꞌinkꞌez nahultꞌoh ꞌustꞌet ꞌuhintꞌoh tꞌehonanzin, mai “fig” huyulhni ꞌi ootꞌan lhunaꞌ hidunilhkaꞌ ꞌi be be kꞌeꞌuzdla ꞌuhududulhtsi.

⁸ ꞋEt nawhudunikꞌaz whe Moodihti Yakꞌusda (Yahweh Elohim) ha nuyeh kꞌet ꞌoh nuya whe hiditsꞌo ꞌinkꞌez Adam duꞌat bulh ha nuyeh kꞌet duchun toh Moodihti Yakꞌusda (Yahweh Elohim) hichꞌa untilhꞌi.

⁹ ꞋEt Moodihti Yakꞌusda (Yahweh Elohim) Adam ha hizya ꞌinkꞌez ꞌuyulhni, “Ntsꞌe ꞌintꞌoh”.

¹⁰ ꞋEt ꞌutni, “Ha nuyeh kꞌez nyudastsꞌo ꞌinkꞌez whenuzjut, ꞌustꞌet ꞌustꞌoh ꞌet huwa untizꞌi.”

¹¹ ꞋInkꞌez ꞌuyulhni, “Mbe ꞌunyulhni ꞌustꞌet ꞌintꞌoh, duchun oomaiꞌ uhꞌalh junih nohdusni-i eh uhꞌal?”

¹² ꞋEt dune ꞌutni, “Tsꞌeke sgha nilhtꞌi-un duchun oomaiꞌ sgha ininꞌai ꞌinkꞌez ꞌi usꞌal.”

¹³ ꞋInkꞌez Moodihti Yakꞌusda (Yahweh Elohim) tsꞌeke ꞌulhni, “Dahoontꞌoh-un dainja?” ꞋInkꞌez tsꞌeke ꞌutni, “Tlꞌughus nasunanꞌa ꞌinkꞌez usꞌal.”

¹⁴ ꞋEt Moodihti Yakꞌusda (Yahweh Elohim) tlꞌughus ꞌulhni, “ꞋEt ndinja huwa ꞌuyoo khuna-i anus nkꞌehida whe ꞌintꞌoh, ꞌinkꞌez ꞌuyoo khuna-i chuntoh nulhꞌas-i anus, mbut tlꞌah whe nukedutanzut, ꞌinkꞌez lhez za tanꞌulh, yun ka tandalh nduwhulyiz whe.

¹⁵ ꞋInkꞌez nyun ꞌinkꞌez tsꞌeke bulh lhazdatni nohtiselh, ꞌinkꞌez nyuzkeh ꞌinkꞌez buzkeh. Ntsi yayinduntaꞌus ꞌinkꞌez ookentsul duntalhdah.”

¹⁶ ꞋEt tsꞌeke ꞌulhni, “Ndzi unduda-un ꞌinkꞌez datantꞌelh-un ꞌonus ꞌuwhulcho whutiselh, nyulh ꞌultsꞌulh whe nyuzkeh whutaleh, nki ookaꞌ untanzilh ꞌinkꞌez nyumoodih tileh.”

¹⁷ ꞋEt Adam ꞌulhni, “Nꞌat oozalhtsꞌaiꞌ ꞌet huwa ꞌinkꞌez ndi duchun oomaiꞌ, ‘Onꞌalh junih,’ nyudusni, inꞌal ꞌet huwa, nyun mba ndi yun ꞌi ookehida, ꞌutꞌen be ootsꞌu huyukat-i tanꞌulh yun ka tandalh ndwhulyiz whe.

¹⁸ Whus cho ꞌinkꞌez whusyaz bulh nankiltꞌoh ookꞌut mba ha ntiyeh, ꞌinkꞌez yun ha nuyeh-i tanꞌulh.

¹⁹ Nyunin tsꞌu halhdzilh whe ꞌutꞌalh-i onꞌalh, yun natandleh whutsꞌun. ꞋI ootsꞌu hainzut. Lhez ꞌintꞌoh ꞌinkꞌez lhez ꞌi tsꞌun natandleh.”

²⁰ ꞋInkꞌez Adam duꞌat Eve be yoozi, khunane tsꞌiyawh buloo ꞌet huwa.

²¹ ꞋInkꞌez Adam ooꞌat bulh Moodihti Yakꞌusda (Yahweh Elohim) ꞌen ndi zuz ꞌi buba ꞌuyinla hiye óokeꞌ ha.

²² ꞋEt Moodihti Yakꞌusda (Yahweh Elohim) ꞌutni, “Nulhꞌen, dune Neundultꞌoh suliꞌ, hoonzoo-un ꞌinkꞌez hoontsiꞌ-un tꞌewhunozin ha. ꞋInkꞌez ꞌandit doo ka si dula be ndi duchun oomaiꞌ yolhchoot ꞌinkꞌez yooꞌalh ꞌinkꞌez ꞌilhiz whutinalh.”

²³ ꞋEt huwa Moodihti Yakꞌusda (Yahweh Elohim) njan ha nuyeh kꞌet, Eden, ꞌet tenabunilhꞌaꞌ, ꞌinkꞌez njan yun whutꞌas tileh ꞌi ootsꞌu ha itsꞌalhti ꞌet, ootꞌeꞌ ha.

²⁴ ꞋEt dune teininyoot ꞌinkꞌez Eden ndaz tsꞌe ꞌet lizasne, Cherubne hubulhni, ꞌet nebunilhti, ꞌinkꞌez saluzti kwun dunukw dotꞌen lhelhtsꞌun nadighus-i duchun oogha tsꞌukhuna-i yugholeꞌ ha.