Genesis 29 - Yak'usda Ooghuni

Jacob ꞌen Rachel yughu ninya

¹ ꞋEt Jacob tizya tsꞌe whenya, ndaꞌ keyoh whutꞌenne bukeyoh tsꞌe oozya.

² ꞋInkꞌez whunalhꞌen ꞌinkꞌez tlꞌo kꞌut whuniz ꞌet too dizꞌai ꞌinkꞌez whunulhꞌen tawh didoh-i ꞌusbai, ꞌi nus ustez nyo too dizꞌai-un ꞌet whutooꞌ-i higha huyulhdzoh, nyo too dizꞌai-un too kꞌet whudah ꞌet ꞌatsꞌo tse dizꞌai.

³ ꞋInkꞌez nyoo ꞌusbai tsꞌiyawh nyo ꞌet ꞌilho ulhꞌus ꞌinkꞌez nyoo tse ꞌi tsꞌo sanahidunulhgih, ꞌinkꞌez ꞌusbai too highalhdzoh, ꞌinkꞌez nyoo tse ꞌet nenahiduꞌaih.

⁴ ꞋInkꞌez Jacob ꞌubulhni, “Sulhutsinke ntsꞌez de hahdil whe ꞌuhtꞌoh?” ꞋInkꞌez ꞌuhutni, “Haran tsꞌe ha tsꞌandil.”

⁵ ꞋInkꞌez ꞌubulhni, “Nahor ooyeꞌ, Laban, tꞌenuhzun eh?” ꞋInkꞌez ꞌuhutni, “Tꞌezninzun.”

⁶ ꞋEt ꞌubulhni, “Soo ꞌuntꞌoh eh?” ꞋInkꞌez ꞌuhutni, “Soo ꞌuntꞌoh ꞌinkꞌez whunilhꞌen ootseꞌ Rachel ꞌusbai bugha tatilhdzoh ha whuz de uyalh.”

⁷ ꞋInkꞌez ꞌutni, “Whunulhꞌen ꞌawhuz dzetniz whenghoh, ꞌawhuz khuna-i ꞌilhunahuyoontayulh ꞌinkꞌez ꞌusbai cha higha tatilhdzoh ꞌinkꞌez bughaꞌ hutiꞌalh-un cha.”

⁸ ꞋEt hoontsiꞌ ꞌuhutni, “ꞋAw ꞌet dutsꞌooneh ꞌaitꞌoh. ꞋUsbai tsꞌiyawh ꞌilhunaoolhꞌaz whutso ꞌinkꞌez tse cha too kꞌet whusanahidunti lhgih, ꞌet de ꞌusbai oogha tatsꞌulhdzoh.”

⁹ ꞋAwhuz yalhduk whe Rachel dubá be ꞌusbai bulh whusainanyoot, ꞌusbai ghunli-un tsꞌeke ꞌet huwa.

¹⁰ ꞋInkꞌez ꞌuhooja Jacob, Rachel, Laban ootseꞌ, ooloo bulhutsin, yutilhꞌen whe ꞌinkꞌez Laban be ꞌusbai, ooloo bulhutsin, Jacob ꞌet nyoo tse whusanaidunalhgai ꞌinkꞌez ooloo bulhutsin Laban be ꞌusbai ꞌi yugha tanilhdzo.

¹¹ ꞋInkꞌez Jacob, Rachel naiditsꞌooz ꞌinkꞌez tube cho whenintse.

¹² ꞋInkꞌez Jacob, Rachel yulhni, oobá oonadun ꞌustꞌoh, ꞌinkꞌez Rebekah ooyaz ꞌustꞌoh, yulhni. ꞋEt Rebekah whelgai ꞌinkꞌez dubá yudaniꞌ.

¹³ ꞋEt ꞌuhooja Laban ndi khuni yudantsꞌo Jacob, bulhtus ooyaz, whuz oolhgai ꞌinkꞌez shih beꞌ yilchoot, ꞌinkꞌez naiditsꞌooz. ꞋInkꞌez duyoh dainilhti. ꞋEt Jacob Laban ndi tsꞌiyawh yudaniꞌ.

¹⁴ ꞋInkꞌez Laban ꞌuyulhni, “ꞋAlhaꞌ syustꞌe ꞌinkꞌez stsꞌun cha inli.” ꞋInkꞌez ꞌilhoh sanun yuzih indaꞌ.

Jacob ꞌen Leah ꞌinkꞌez Rachel bughusda

¹⁵ ꞋEt Laban, Jacob ꞌuyulhni, “Snadun inli, ꞌet huwa ꞌaw eh ꞌantsꞌi ꞌet sbaꞌ tantꞌelh? Sudini, daltsuk kꞌelha la ꞌintꞌen?”

¹⁶ Laban nane ootseꞌke hoonli, ꞌudetso-un ꞌen Leah huyulhni, ꞌinkꞌez ꞌudekꞌoh-un ꞌen Rachel huyulhni.

¹⁷ Leah oona soo lheꞌíltus, ꞌet hoontsꞌi Rachel tubeh sooꞌ otꞌen.

¹⁸ ꞋEt Jacob, Rachel yukꞌentsiꞌ ꞌinkꞌez ꞌuyulhni, “Lhtakꞌandit whunizyat (7) yus kꞌut ꞌet mba ꞌoostꞌen, Rachel ꞌudekꞌoh-un ꞌen kꞌelha.”

¹⁹ ꞋInkꞌez Laban ꞌuyutni, “ꞋUyoon dune gha tistꞌelh whutso, ꞌet ꞌonus sooꞌ hoontꞌoh nyun ngha tistꞌelh. Szih sinda.”

²⁰ ꞋEt Jacob lhtakꞌandit yus kꞌut ꞌet Rachel yukꞌelha ꞌitꞌen. ꞋAntsꞌi ꞌatsulyaz ooba leꞌ hoontꞌoh, tube yukꞌentsiꞌ kꞌet.

²¹ ꞋEt Jacob, Laban ꞌuyulhni, “Sꞌat sgha nilhtih, ꞌawet dzin lhaoodusla ꞌinkꞌez la oostꞌeꞌ.”

²² ꞋInkꞌez Laban dune tsꞌiyawh ooduneꞌne ꞌilhubozdla ꞌinkꞌez dune ghu nusuya.

²³ ꞋEt ꞌuhooja ꞌet hulhgha dutseꞌ Leah yilhchoot ꞌinkꞌez Jacob ghi nilhti, ꞌen cha ooꞌat yuzdliꞌ.

²⁴ ꞋInkꞌez Laban yuba ꞌutꞌen-un, Zilpah huyulhni, ꞌen dutseꞌ Leah yuba ootꞌen ha yugha inilhti.

²⁵ ꞋEt ꞌuhooja bundadaꞌ Leah ꞌatsꞌo ꞌuntꞌoh, ꞌinkꞌez Laban ꞌuyulhni, “Dainja whe ꞌinja, wheꞌ sinla? Rachel iloh lakw mba ꞌistꞌen ꞌinkꞌez di ha nasunanꞌa?”

²⁶ ꞋInkꞌez Laban ꞌutni, “Njan nekeyoh, ꞌaw ꞌudekꞌoh-un, ꞌen, ꞌudetso-un ootso dune gha butsꞌolhtelh ꞌaitꞌoh.

²⁷ ꞋAndit lisman lhaoodinleh, ꞌinkꞌez ndun ꞌen cha ꞌantꞌen hukwꞌelha ngha tsꞌoolhtelh. ꞋInkꞌez doo cha ꞌon ꞌun lhtakꞌantꞌit yus kꞌut, ꞌet sih sba ꞌontꞌen.”

²⁸ ꞋInkꞌez Jacob ꞌet lisman lhaoodinla, ꞌinkꞌez dutseꞌ Rachel ꞌen cha ooꞌat yutaleh ha yugha inilhti.

²⁹ ꞋInkꞌez Laban, yuba ꞌutꞌen-un tsꞌeke, Bilhah, ꞌen dutseꞌ Rachel yubaꞌ ootꞌen ha yugha inilhti.

³⁰ ꞋEt Jacob, Rachel ꞌen cha ooꞌat yuzdliꞌ, ꞌinkꞌez ꞌen Leah anus yukꞌensiꞌ. ꞋInkꞌez Laban doo cha lhtakꞌantꞌit (7) yus kꞌut ꞌet yuba ꞌitꞌen.

Jacob buzkeh

³¹ ꞋEt Moodihti (Yahweh), Leah ꞌaw dune yukꞌelhisiꞌ ꞌinka oochan yudahaꞌdanꞌai, ꞌinkꞌez Rachel ꞌen ꞌaw buzkeh hooloh.

³² ꞋEt Leah ulchan ꞌinkꞌez dune ooyaz suliꞌ. Ruban ꞌi be yoozi ꞌinkꞌez ꞌutni, “Moodihti (Yahweh) ꞌalha njan whe undusda-un whunalhꞌen, ꞌet huwa ski skꞌeoosiꞌ la.”

³³ ꞋEt doo cha za ulchan ꞌinkꞌez dune ooyaz suliꞌ. ꞋInkꞌez ꞌutni, “Dune skꞌelhisiꞌ, Moodihti (Yahweh) whudantsꞌo, ꞌet huwa dune ꞌen syaz sgha inilhti.” ꞋInkꞌez ꞌen Simeon yulhni.

³⁴ ꞋEt doo cha za ulchan ꞌinkꞌez dune ooyaz suliꞌ. ꞋInkꞌez ꞌutni, “ꞋAndit ꞌet la ski skꞌeootsiꞌ ooleꞌ, ꞌawet tane ooyeꞌ susi ꞌet huwa.” ꞋEt huwa duneyaz boozi, Levi, yulhni.

³⁵ ꞋInkꞌez doo cha za ulchan ꞌinkꞌez dune ooyaz suliꞌ. ꞋInkꞌez ꞌutni, “ꞋAndit ꞌet Moodihti (Yahweh) dutástiꞌ!” ꞋEt huwa yooziꞌ, Judah, yulhni. ꞋEt hukwꞌelhꞌaz ꞌet ꞌawet buzkeh hoonli-un ꞌetsul ꞌuja.