Genesis 28 - Yak'usda Ooghuni

¹ ꞋEt Isaac, Jacob ꞌanih yudaniꞌ ꞌinkꞌez soo hoonzoo-un yuba whulhtsi, ꞌinkꞌez ꞌuyulhni, “ꞋAw Canaan whutsꞌekeꞌ ꞌilhoghun, ꞌen nꞌat wheni olhchoot junih.

² Dudinyaih ꞌinkꞌez Paddan Aram, Bethuel ooyoh tsꞌe inyalh, nloo oobá, ꞌinkꞌez ꞌet tsꞌeke nꞌat wheni ilhchoot, Laban buzkeh ꞌilhoghun nloo bulhutsin.

³ Yakꞌusda ꞋUkꞌenus ꞋUltus-un ꞋUstꞌoh (El Shaddai) soo cho ncha mba hoonzoo-un ngha hóotaltsꞌulh ꞌinkꞌez lhane hooleh dune huldlaine oohleh.

⁴ Abraham ye soo hoonzoo-un whusaínkat, ꞌi cha ntsꞌun tookat, nyun cha ꞌinkꞌez ntsꞌu ha hande nyulh ꞌuhintꞌoh ꞌenne cha. ꞋEt sih njan yun kꞌut nohchꞌeꞌ ooleꞌ, ꞌet ꞌutsꞌun hoontꞌen inli. Njan ꞌet Yakꞌusda (Elohim) ꞌen Abraham yugha óoniꞌai inleꞌ.”

⁵ ꞋEt Isaac, Jacob wheyalhꞌa ꞌinkꞌez yun kꞌut Paddan Aram tsꞌe whenya, Laban, Bethuel ooyeꞌ, Syria whutꞌen, ꞌen Rebekah bulhutsin Jacob ꞌinkꞌez Esau buloo.

Esau ꞌen Mahalath yughusda

⁶ ꞋEt Esau, Isaac, Jacob ꞌen soo hoonzoo-un ꞌubulhni ꞌinkꞌez whe yalhꞌaꞌ yun kꞌut Paddan Aram, ooꞌat yutaleh-un yolhchoot ha, ꞌinkꞌez yuba soo hoonzoo-un whulhtsih whe ꞌet njan ꞌuyulhni, “Nyun Canaan whutꞌenne tsꞌekoo butoh, ꞌenne nꞌat wheni olhchoot junih!”

⁷ ꞋInkꞌez Jacob dubá yukꞌoh tsꞌe ꞌuja, duloo cha yukꞌoh tsꞌe ꞌuja, ꞌinkꞌez yun kꞌut Paddan Aram tsꞌe whenya.

⁸ ꞋInkꞌez cha Esau, Canaan whutꞌenne whutsꞌekoo dubá ꞌaw hukwa lheꞌnizun.

⁹ ꞋEt Esau, Ishmael, Abraham ooyeꞌ, ꞌen tsꞌu whenya, ꞌinkꞌez Ishmael, ꞌen ootseꞌ Mahalath, ꞌen duꞌat wheni yilhchoot. Ishmael ootseꞌ Nabajoth, ꞌen bulhtus ꞌuntꞌoh, Mahalath, ꞌen cha ooꞌat yoleꞌ, ꞌuyoonne ooꞌatke tubulh.

¹⁰ ꞋAndit ꞌet Jacob ꞌen Beersheba whuz de ha naja ꞌinkꞌez keyoh Haran tsꞌun whenya.

¹¹ ꞋEt ꞌutsꞌun whenya ꞌinkꞌez ꞌulhdzis nduwhulhyiz whe ꞌet indaꞌ, sa yo whinꞌai ꞌet huwa, ꞌinkꞌez nyoo tse, ꞌet dizꞌai-i ꞌilho ꞌi yukꞌut tse nilhꞌai nantitelh wheni.

¹² ꞋEt nusuti ꞌinkꞌez whunilhꞌen, kwꞌut dughaiti-i ndi yun kꞌut whedinꞌa, ndo yakꞌuz tsꞌe wheinꞌa, ꞌet Yakꞌusda (Elohim) oolizasne ndo cha whehudulh ꞌinkꞌez nyo cha whenahudulh.

¹³ ꞋInkꞌez whunilhꞌen ndo Moodihti (Yahweh) ꞌen usyin ꞌinkꞌez ꞌutni, “Si Moodihti (Yahweh) Abraham ooYakꞌusda (Elohim) mbá cha ꞌinkꞌez Isaac ooYakꞌusda (Elohim) cha ꞌustꞌoh. Ndi yun ookwꞌut sinti-i ꞌandit ngha tisꞌalh ntsꞌu haindene cha.

¹⁴ ꞋInkꞌez cha mbene la ntsꞌu haindene ndi yun kꞌut lhez lheꞌuntꞌoh. Lhai whuz unꞌa hutildlaiꞌ, nooꞌ cha ꞌinkꞌez ndaꞌ cha, whuz netihnelh, no cha, nyan ꞌinkꞌez ntsꞌu hainde-un cha, ꞌen gha ndi yun kꞌut dilhtsꞌine, ꞌenne tsꞌiyawh soo hoonzoo-un bugha hóotaltsꞌulh.

¹⁵ Whunilhꞌen nyulh ꞌustꞌoh, ntsꞌoh teninya te, nyulh ꞌutistꞌelh ꞌinkꞌez ndi yun kꞌut nenyutastelh. ꞋEt ꞌawet nghu natisdulh datisnelh la nyudusni-un, ꞌet ꞌawhusla whutsꞌun.”

¹⁶ ꞋEt Jacob tsꞌe nandzut ꞌinkꞌez ꞌutni, “ꞋAlhaꞌ la Moodihti (Yahweh) njan ꞌet usda ꞌinkꞌez ꞌaw ꞌazi tꞌeoonuzuszun.”

¹⁷ ꞋInkꞌez nuljut ꞌinkꞌez ꞌutni, “Tube ꞌusla njan huwa ꞌitꞌen! ꞋAlha ꞌet Yakꞌusda (Elohim) ooyoh ꞌinkꞌez njan ꞌet ꞌazi yakꞌuz ti tsꞌe whudatih!”

¹⁸ ꞋInkꞌez Jacob ꞌudaꞌ dudinya ꞌinkꞌez nyoo tse yukꞌutsenalhꞌaꞌ-i, ꞌi nyo whedinꞌa yulhtsi, ꞌinkꞌez khe yukꞌeilhdzo.

¹⁹ ꞋInkꞌez nyo ꞌet booziꞌ huwa dinꞌai, Bethel whulhni, ꞌet keyoh whutsodaꞌ ꞌet Luz huwhutni inleꞌ.

²⁰ ꞋEt Jacob nahizya whe ndutni, “Yakꞌusda (Elohim) sulh ꞌuntꞌoh de, ꞌinkꞌez ndiz unꞌa ꞌusilhdzun, ꞌinkꞌez tisyalh tsꞌe ꞌutꞌalh-i cha sgha tiꞌalh, ꞌinkꞌez naih be dune tisleh-i cha,

²¹ ꞌet de sbá ooyoh tsꞌe soo tsꞌihꞌun sdzi dizghel whe whuz natoosjaꞌ, ꞌet de Moodihti (Yahweh) ꞌen sih Yakꞌusda (Elohim) sba ooleꞌ.

²² ꞋEt ndi tse njan nadanꞌa kꞌunꞌa silhtsi, ꞌi Yakꞌusda (Elohim) ooyoh holeꞌ, ꞌinkꞌez ndai sgha ninla, ꞌi whunizyai ꞌon ꞌun (10%) ntsꞌun naꞌóotneh.”