Genesis 25 - Yak'usda Ooghuni

Abraham ꞌinkꞌez Keturah

¹ ꞋEt Abraham ooꞌat cha, Keturah huyulhni, ꞌen yughu nasda.

² ꞋEn cha yuba buzkeh hooni, Zimran, Jokshan, Medan, Midian, Ishbak, ꞌinkꞌez Shuah.

³ Jokshan ꞌen Sheba ꞌinkꞌez Dedan bulh buzkeh suliꞌ, ꞌinkꞌez Dedan ooyeꞌke ꞌenne Asshurim Lutushim ꞌinkꞌez Leumim.

⁴ ꞋInkꞌez Midian ooyeꞌke, ꞌenne Ephah, Epher, Hanoch, Abida ꞌinkꞌez Eldaah ꞌenne tsꞌiyawh Keturah buzkeh.

⁵ ꞋInkꞌez Abraham ndai la yutꞌi-i tsꞌiyawh Isaac gha ininla.

⁶ ꞋEt hoontsꞌi Abraham ꞌuyoonne tsꞌekoo ooꞌat bugha nyus ꞌuhintꞌohne, ꞌenne bubuzkeh ꞌenne cha butsꞌeꞌ tilhdil, butlꞌaꞌ ꞌandla ꞌinkꞌez ooyeꞌ Isaac yuchꞌaz ndaꞌ ꞌutsꞌun keyoh tsꞌe whuz whe balhꞌaꞌ.

Abraham dazsai ꞌinkꞌez ꞌahuyalhti

⁷ Njan duwhultsuk yus kꞌut ꞌet ndi yun kꞌut indaꞌ Abraham 175 yus kꞌut ꞌet ndi yun kꞌut indaꞌ.

⁸ ꞋEt Abraham ꞌen ꞌudekꞌez ha naji ꞌinkꞌez soo hoonyan suliꞌ whe dazsai. Tube hoonyan ꞌinkꞌez ndi yinka indaꞌ ꞌet ba whudizbun. ꞋEt whe duduneꞌ ꞌenne butsꞌun whe naja.

⁹ ꞋInkꞌez ooyeꞌke Isaac ꞌinkꞌez Ishmael, ꞌenne nyo Machpelah tseꞌan ꞌet ꞌahuyalhti. Mamre whutso Ephron ootlꞌo kꞌut, Zohar Hitt whutꞌen-un, ꞌen ooyeꞌ, ꞌet nyo tseꞌan ꞌet ꞌahuyalhti.

¹⁰ Nyoo tlꞌo kꞌut Abraham Heth buzkeh butsꞌun yonket-i, ꞌet Sarah oozih ꞌet Abraham ꞌahuyalhti.

¹¹ ꞋEt whe lhuwhuzut Abraham dazsai hukwꞌelhꞌaz, ꞌet Yakꞌusda (Elohim) ꞌen ooyeꞌ Isaac soo hoonzoo-un yubaꞌ hoonla. ꞋInkꞌez Isaac ꞌen Beer Lahai Roi ꞌet whutꞌi.

Ishmael ꞌinkꞌez Isaac tsꞌu haindene

¹² Ndunne ꞌenne Ishmael tsꞌu haindene: Ishmael ꞌen Abraham ooyeꞌ, Hagar Egypt whutꞌen-un, ꞌen Sarah yunat neꞌutꞌen-un, ꞌen ooyaz, ꞌen Abraham yughulhtsi-un ooyeꞌ.

¹³ Ndowhi ꞌi Ishmael ooyeꞌke bubooziꞌ: ꞌudechoo Nabajoth, ꞌet hukwꞌelhꞌaz Kedar, Adbeel ꞌinkꞌez Mibsam,

¹⁴ Mishma, Dumah, Massa,

¹⁵ Hadar, Tema, Jetur, Naphish, ꞌinkꞌez Kedemah.

¹⁶ ꞋEnne Ishmael ooyeꞌke ꞌuhintꞌoh. Ndi ꞌi bubooziꞌ ntsꞌe bukeyoh ꞌinkꞌez hudilhtsꞌi ꞌet. Whunizyai ꞌon ꞌat nanki (12) budayiyaz, ꞌenne ntsꞌe ha hande hukwa sih booziꞌ.

¹⁷ Ishmael ndi yun kꞌut ꞌinda-un, 137 be yus kꞌut ꞌet dazai. ꞋEn cha whutsodaꞌ yulh ꞌuntꞌohne butsꞌun whenya.

¹⁸ Yun kꞌut Havilah ꞌinkꞌez Shur ꞌet ꞌuwhuldzoh, Egypt whandaꞌ, Assyria tsꞌu wheti, ꞌoh huwhutꞌi ꞌinkꞌez Ishmael dunatneke butoh ꞌet dazsai.

¹⁹ Ndi ꞌi Abraham ooyeꞌ Isaac ootsꞌu ha yandene. Abraham ꞌen Isaac oobá.

²⁰ Isaac ꞌen dit whunizyai (40) naoodizut whe ooꞌat Rebekah ꞌen yughusda. Bethuel ootseꞌ ꞌen Syria whutꞌen, Padan Aram keyoh, ꞌet Laban, ꞌen Syria whutꞌen ꞌen bulhtus.

²¹ ꞋEt Isaac ꞌen Moodihti (Yahweh) yutsꞌu tedudlih duꞌat ba, ꞌaw buzkeh holeꞌ ꞌaitꞌoh. ꞋEt Moodihti (Yahweh) ꞌet yugha ooninꞌai ꞌinkꞌez Rebekah ulchan.

²² ꞋEt nyo oochan tsꞌe nane nukahulhoh, “Soo ꞌustꞌoh ꞌet hoontsꞌi ꞌet di ha njan dustꞌoh?” ni, ꞌinkꞌez Moodihti (Yahweh) yoodalhkut.

²³ ꞋEt Moodihti (Yahweh) ꞌen Rebekah ꞌuyulhni, “Nawh didohne ꞌenne nchan ꞌuhintꞌoh. Nawh didohne ꞌenne hubutalhtsi, ꞌilhoh didoh-un ꞌen onghun-un ha nus ulhtus, ꞌinkꞌez ꞌudetso whutileh-un ꞌen dukꞌoh-un yuba neꞌtitꞌen.”

²⁴ ꞋEt ꞌawet ooba newhultsꞌut ooyaz whutaleh ha, ꞌet nane lhtꞌudinke oochan.

²⁵ ꞋUdetso whuzdli-un ꞌen dulkꞌun ꞌinkꞌez ꞌantsꞌi naih ꞌugha unli ꞌi yesda leꞌ ꞌuntꞌoh ndulcho whe ooyustꞌe, ꞌen Esau huyulhni.

²⁶ ꞋEt hukwꞌelhꞌaz bulhutsin ꞌen whuzdli, ꞌinkꞌez Esau ookentsul ꞌi yilhchoot. ꞋEn Jacob huyulhni. Isaac lhkꞌu tat whunizyat be yus kꞌut (60) ꞌet nyoon tsꞌoodunne huwhuzdli.

²⁷ ꞋEt nyoonne duneyaz huniyilh, Esau ꞌen tube ꞌukaꞌ ꞌutꞌen-un ꞌinkꞌez chuntoh whuduneꞌ whe ꞌuyoo unli. ꞋEt hoontsꞌi Jacob ꞌen tꞌedusnih-un dune unli, nimbali tꞌah za whutꞌi.

²⁸ ꞋInkꞌez Isaac ꞌen Esau yukꞌensiꞌ, ndai yughan-i yuꞌalh, ꞌinkꞌez Rebekah ꞌen Jacob yukꞌensiꞌ.

Esau ndai la kꞌat le oogha itakulh-i, ꞌi Jacob ꞌen ye tsꞌun ꞌonket

²⁹ ꞋAw ꞌet Jacob tazul ꞌinla ꞌinkꞌez Esau ꞌen chuntoh tsꞌun ha naja ꞌinkꞌez tube nenintsai.

³⁰ ꞋEt Esau ꞌen Jacob ꞌuyulhni, “Sla ꞌinleh whe nyutazul dulkꞌun, ꞌi za sunailꞌalh, tube nenisai ꞌet huwa.” ꞋEt huwa booziꞌ ꞌi Edom tsꞌutni.

³¹ ꞋEt hoontsꞌi Jacob ꞌutni, “Ndai la mba ootadzilh-i kꞌat le, ꞌi ꞌandit be stsꞌeꞌ oonket.”

³² ꞋInkꞌez Esau ꞌutni, “Whunilhꞌen ꞌawet datisah! Be daoostꞌeꞌ suba ndi sba huyoozi-i?”

³³ ꞋEt Jacob ꞌutni, “ꞋAndit dzin stsꞌun nahinyeh.” ꞋEt huwa yutsꞌu nahizya ꞌinkꞌez ndai la kꞌat le oogha itakulh-i, ꞌi Jacob ꞌen ye tsꞌun ꞌonket.

³⁴ ꞋInkꞌez Jacob, Esau ꞌutꞌalh-i ꞌinkꞌez nyoo yuzdliz-i ha nuyeh, ꞌi yugha ininla ꞌinkꞌez ꞌi yanꞌal, ꞌinkꞌez dunadija ꞌinkꞌez ꞌaz whe naja. ꞋEt Esau ndai la kꞌat le oogha itakulh-i tsꞌiyawh ꞌaw yukalheꞌnizun, ꞌun yutilhdil.