Genesis 23 - Yak'usda Ooghuni

Abraham duꞌat Sarah nyo tseꞌan ꞌet ꞌayalhti

¹ Sarah ꞌen 127 be yus kꞌut whe dazsai. ꞋEt njan duwhuldzoh Sarah khanaꞌ.

² ꞋEt Sarah ꞌen keyoh Kirjath Arba, (Hebron ꞌuhoontꞌoh) Canaan keyoh ꞌet dazsai ꞌinkꞌez Abraham whusainya ꞌinkꞌez Sarah yukꞌenudleh ꞌinkꞌez yukꞌetso.

³ ꞋEt Abraham oochꞌa dazsai-un oobut dudinya ꞌinkꞌez Heth buzkeh ꞌubulhni,

⁴ “ꞋUdun keyoh whutꞌen-un ꞌusli ꞌinkꞌez ꞌantsꞌi nohtoh nusya. Yun sgha nuhꞌaih, tsꞌun kꞌut wheni nohtoh sghu yaidlane ꞌet si ꞌabooslelh.”

⁵ ꞋInkꞌez Heth ooyeꞌke ꞌuhuyulhni,

⁶ “Nemoodih, neoozilhtsꞌai, lerwe yeꞌ dune uncha-un inli whe ꞌintꞌoh netoh, ndet hukwaꞌ ninzun-un hoonzoo-un ꞌet nghu yaidlane ꞌabinle, ꞌaw nchꞌa tsꞌuhotun ꞌaitꞌoh. Dune ꞌatanlelh-un ꞌet si nghu yaidlane ꞌabonlelh.”

⁷ ꞋEt Abraham dudinya ꞌinkꞌez Heth buzkeh soo yun bubut nachaniti.

⁸ ꞋInkꞌez ꞌubulhni, “Hukwaꞌ nahzun de njan snanto ꞌet ꞌabuhoolelh, soo zulhtsꞌai, Ephron, Zohar ooyeꞌ ꞌen bulh yalhduk.

⁹ Njan nyun kꞌut whuzꞌai-un tseꞌan Machpelah oochꞌeꞌ, ꞌet sgha hoꞌalh, ndet ꞌultsuk-un ꞌet la hosket ꞌinkꞌez dune ꞌatislelh-un.”

¹⁰ ꞋEt Ephron, Heth buyeꞌke butoh whutꞌi ꞌinkꞌez Ephron Hitt whutꞌen-un ꞌuntꞌoh, ꞌen Abraham ꞌuyulhni. Heth buzkeh bunalh, njan keyoh whuti dati-un dandilhne ꞌuyulhni,

¹¹ “ꞋAwundooh smoodih! Soo zilhtsꞌai, njan yun ꞌinkꞌez tseꞌan hukwꞌuh whuzꞌai, nduwhulcho ngha oonusꞌai ndune sduneꞌne buzkeh bunalh ngha oonusꞌai ꞌet nghu yaidlahne ꞌabinle.”

¹² ꞋEt Abraham tsꞌiyawh yun kꞌut whutꞌenne bubut nachanitno,

¹³ ꞌinkꞌez Ephron bulh yalhduk nyoonne dune bunalh ubulh ꞌuyulhni, “ꞋEt sgha ooninꞌaih de soo zilhtsꞌai, sooniya hukwꞌelha tiselh njan yun, sooniya ilhchoot ꞌinkꞌez ꞌet si sghu yaidlane ꞌabooslelh.”

¹⁴ ꞋInkꞌez Ephron, Abraham ꞌuyulhni,

¹⁵ “Smoodih soo zilhtsꞌai, ndi yun dit whunizyat whunizyai (400) ꞌultsuk-i silver ꞌet di whutaleh daꞌ nyun si bulh eguz, ꞌet nghu yaidlane ꞌabinle.”

¹⁶ ꞋInkꞌez Abraham Ephron yoozilhtsꞌai, ꞌinkꞌez Abraham nyoo silver nuyulhdaz Ephron yutsꞌiyoozi-i nyoonne Heth buzkeh bunalh, dit whunizyat whunizyai (400) silver ꞌet ꞌultsuk-i, ꞌoh daꞌ ꞌi yutlꞌa yandzai.

¹⁷ ꞋEt Ephron ooyun Machpelah ꞌuhoontꞌoh inleꞌ, Mamre whuzih, yun ꞌinkꞌez tseꞌan cha ꞌinkꞌez duchun cha nanudizꞌa-i tsꞌiyawh yuyonket.

¹⁸ ꞋEt Abraham nyoonne Heth buzkeh bunalh, ꞌinkꞌez keyoh whuti dati ꞌet dandilhne cha, ꞌenne bunalh ꞌi oogha ininkat.

¹⁹ ꞋEt hukwꞌelhꞌaz Abraham duꞌat Sarah nyo tseꞌan ꞌet ꞌayalhti, Machpelah ooyun kꞌut, Mamre whuzih (Hebron ꞌuntꞌoh), Canaan keyoh ꞌet.

²⁰ ꞋEt nyo yun kꞌut ꞌinkꞌez tseꞌan cha ookꞌut whuzꞌai, ꞌi Abraham yonket, Heth buzkeh ꞌenne bubuyonket dune ꞌadutilalh wheni.