Genesis 22 - Yak'usda Ooghuni

Yakꞌusda Abraham yoolhdzai

¹ ꞋEt njan hukwꞌelhꞌaz ꞌet ꞌuhooja, Yakꞌusda (Elohim), Abraham yoolhdzai ꞌinkꞌez ꞌuyulhni, “Abraham!” ꞋEt Abraham ꞌutni, “Njan ꞌustꞌen.”

² ꞋInkꞌez ꞌutni, “Nyeꞌ ilhchoot, nyeꞌ ꞌaw ꞌilhoghun Isaac ilhchoot ookꞌeintsiꞌ, ꞌinkꞌez yun kꞌut Moriah tsꞌe whuz ilhtelh. ꞋInkꞌez dolhkꞌun nyo dzulh nyudutasnelh-un, ꞌet si stsꞌun dolhkꞌun sih.”

³ ꞋEt Abraham ꞌom bun ꞌudaꞌ dudinya, donkey hikꞌeꞌinla ꞌinkꞌez nane chilke ꞌenne cha dudulh hubutilhꞌaz, ꞌinkꞌez ooyeꞌ Isaac cha. Tsuz cha lhtsꞌu neidilhnat yudutalhkꞌun wheni, ꞌinkꞌez dudinya. Whuz Yakꞌusda (Elohim) whuyuntilhtun-un tsꞌe whuz whenya.

⁴ ꞋEt whulh tat dzin Abraham ꞌet Abraham ndo yutanꞌen, ꞌet nyo nilhdzaꞌ ꞌet whutilhꞌen.

⁵ ꞋInkꞌez Abraham nyoonne chilkeyaz ꞌubulhni, “Njan donkey oozih suhke ndun tsꞌoodun ꞌinkꞌez nꞌun tatꞌus ꞌinkꞌez Yakꞌusda (Elohim) ootsꞌu teniꞌ uznilhdzun, ꞌinkꞌez sih nohghu naootꞌas.”

⁶ ꞋEt Abraham nyoo tsuz lhtsꞌe nidilhnat-i yilhchoot ꞌinkꞌez Isaac ꞌen yutꞌuyuzꞌai yutoogheꞌ ha. Didut kwun ꞌi yutizꞌai ꞌinkꞌez lhuztiꞌ cha ꞌinkꞌez whehanꞌaz.

⁷ ꞋInkꞌez Isaac, Abraham dubá yulh yatilhduk ꞌinkꞌez ꞌutni, “ꞋUbá!” ꞋInkꞌez Abraham ꞌutni, “Syeꞌ, njan si ꞌustꞌoh.” ꞋInkꞌez Isaac ꞌutni, “Whunilhꞌen! Kwun cha titꞌai ꞌinkꞌez tsuz cha, ꞌinkꞌez ꞌusbaiyaz dutalhkꞌun-i daja?”

⁸ ꞋInkꞌez Abraham ꞌutni, “Syeꞌ Yakꞌusda (Elohim) didutchꞌoh la ndi ꞌusbaiyaz netlꞌa yoolhtelh,” ꞌinkꞌez nahultꞌoh whehanꞌaz.

⁹ ꞋEt ndet Yakꞌusda (Elohim) whenilhtan-un ꞌet nehuninꞌaz ꞌinkꞌez Abraham loodel ꞌinla ꞌinkꞌez tsuz cha yukꞌedinla ꞌinkꞌez duyeꞌ Isaac yulhghel ꞌinkꞌez tsuz yukꞌeyilhti.

¹⁰ ꞋInkꞌez Abraham lhuztih yilhchoot ꞌinkꞌez duyeꞌ yutuzilhghelh ha do dutilhni.

¹¹ ꞋEt hoontsꞌi Moodihti (Yahweh) oolizas yakꞌuz whutsꞌun yukahizya ꞌinkꞌez ꞌutni, “Abraham! Abraham!” ꞋEt Abraham ꞌutni, “Njan ꞌustꞌoh.”

¹² ꞋInkꞌez ꞌuyulhni, “Nyeꞌ ookꞌedolnih junih kꞌus hoonli ꞌonleꞌ junih! ꞋAndit tꞌeooniszin Yakꞌusda (Elohim) be niljut, nyeꞌ ꞌen hoontsꞌi oochꞌa lhuyoontun ꞌaw ꞌilhoghun nyeꞌ, si schꞌa lhoontun.”

¹³ ꞋEt Abraham ndo yutanꞌen ꞌinkꞌez whunilhꞌen njan ootꞌa ꞌet ꞌusbai dune whutoh tsꞌuldílhtan, ꞌet oode be usdlooh. ꞋEt Abraham whuz whenya ꞌinkꞌez ꞌusbai dune yílhchoot ꞌinkꞌez ꞌi be yutsꞌeꞌ dalhkꞌun ooyeꞌ yukꞌedalhti.

¹⁴ Abraham nyo hooziꞌ whulhtsi, “Moodihti ꞋEn Neghaꞌ ooꞌalh (Yahweh-Yireh),” whulhni. ꞋEt ꞌandit whutsꞌun ꞌi boozi unli, “Moodihti (Yahweh) oodzulh kꞌut ꞌet la neghaꞌ ooꞌalh.”

¹⁵ ꞋEt Moodihti (Yahweh) oolizas ꞌen ndo yakꞌuz tsꞌun whulh nat hika huyih,

¹⁶ ꞌet ꞌutni, “Sichꞌoh ooghu nahizusya, ni Moodihti (Yahweh), njan ꞌet dinja-un huwa, ꞌaw nyeꞌ ꞌen hoontsꞌi ꞌaw ꞌilhoghun nyeꞌ ꞌen hoontsꞌi schꞌa lhoontun.

¹⁷ Be soo hoonzoo-un ꞌi ꞌutisdlilh, mba soo hoonzoo-un tileh. ꞋInkꞌez ntsꞌu haindene lhane whutaleh, sum kꞌunꞌa huldlai tileh, sai taba usdzai-i cha ꞌet ꞌultsuk-i hutileh ntsꞌu haindene, ꞌinkꞌez nchꞌaz ditnine bukeyoh ꞌi huyootatun.

¹⁸ Ntsꞌu hainde-un ndi yun kꞌut dune tsꞌiyawh soo hoonzoo-un bugha hóotaltsꞌulh, skꞌunꞌa ꞌinja ꞌet huwa.”

¹⁹ ꞋEt Abraham chilkeyaz bughu nahuntꞌaz, dunahuditꞌaz ꞌinkꞌez keyoh Beersheba tsꞌe whehandil, ꞌinkꞌez Abraham keyoh Beersheba ꞌet whutꞌi.

Nahor tsꞌu haindene

²⁰ ꞋEt ꞌuhooja hukwꞌelhꞌaz Abraham hidaniꞌ, “ꞋAlhaꞌ Milkah ꞌen cha buzkeh hooni Nahor nyulhutsin ꞌen buzkeh:

²¹ ꞋUdetso ooyaz Uz huyulhni, bulhutsin Buz ꞌinkꞌez Aram oobá Kemuel.

²² Chesed, Hazo, Pildash, Jidlaph, ꞌinkꞌez Bethuel.”

²³ ꞋInkꞌez Bethuel ꞌen Rebekah ooyaz suliꞌ, ndune lhkꞌudine ꞌenne Milcah, Nahor bubulhtsi, Abraham bulhutsin.

²⁴ Nahor ndun ooꞌat ꞌen yughu yulhtsi ꞌuntꞌoh, ꞌen booziꞌ Reumah, ꞌen cha buzkeh hooni: Tebah, Gaham, Thahash, ꞌinkꞌez Maachah.