Genesis 20 - Yak'usda Ooghuni

Abraham ꞌinkꞌez Abimelech

¹ ꞋInkꞌez Abraham ꞌet whe dinya whe nyan wheinya, Kadesh ꞌinkꞌez Shur bulh ꞌet whulheguz ꞌet hootꞌeꞌ, ꞌinkꞌez Gerar howhutni whuz cha whuloh te whutꞌi.

² ꞋEt Abraham nyoon Sarah duꞌat, ꞌen ꞌubulhni, “Sulhtus ꞌuntꞌoh.” ꞋInkꞌez Abimelech, Gerar whulerwe, ꞌen Sarah yilhchoot.

³ ꞋEt hoontsꞌi Yakꞌusda (Elohim) Abimelech ꞌulhdzis nute whe yughu ninya ꞌinkꞌez ꞌuyulhni, “A, dune dazsai-un inli whe ꞌintꞌoh ndun tsꞌeke ilhchoot-un ꞌuyoon dune ꞌat ꞌuntꞌoh.”

⁴ ꞋEt hoontsꞌi Abimelech ꞌaw yuzih nulhiyal ꞌinkꞌez ꞌuyulhni, “Moodihti (Adonai) dune tsꞌihꞌun ꞌuntꞌohne didohne tsꞌiyawh eh butanghan?

⁵ ꞋAw lakw sulhdinel, ‘Sulhtus ꞌuntꞌoh sulhdinel?’ ꞋInkꞌez didutchꞌoh cha ꞌutni, ‘Sulhutsin ꞌuntꞌoh,’ ni. Sdzi tsꞌihꞌun ꞌuntꞌoh ꞌinkꞌez sla cha ꞌaw lhditsun whe njan ꞌet dusja.”

⁶ ꞋInkꞌez Yakꞌusda (Elohim) ꞌuyulhni nute whe, “A, tꞌeoonuszun ndzi tsꞌihꞌun ꞌuntꞌoh whe ꞌinja ꞌinkꞌez si cha nintaꞌtantꞌelh-un whuchꞌa nyostun whe ꞌustꞌoh ꞌet huwa ꞌaw ootalhanal.

⁷ ꞋAndit ꞌet huwa ndun tsꞌeke ootlꞌaꞌ nayilhtih, nus hooꞌen-un dune ꞌuntꞌoh, ꞌinkꞌez si mba tenadoodli ꞌinkꞌez khonaꞌ. ꞋAw ootlꞌa nalhuyilhtel de, ꞌalha dantantsah whe ꞌintꞌoh ꞌinkꞌez mbene la nchꞌeꞌ unline ꞌenne cha tsꞌiyawh.”

⁸ ꞋEt ꞌom bun Abimelech ꞌudaꞌ dudinya ꞌinkꞌez mbene la yuba ꞌutꞌenne tsꞌiyawh ꞌanih budaniꞌ ꞌinkꞌez tsꞌiyawh daja ni la tsꞌiyawh bubudaniꞌ, ꞌinkꞌez dune tsꞌiyawh hunilhjoot.

⁹ ꞋInkꞌez Abimelech, Abraham ꞌanih yudaniꞌ ꞌinkꞌez ꞌuyulhni, “Dane ꞌinla whe ꞌintꞌoh? Ndet whe tankꞌus ꞌunyusla ha lheꞌhoontꞌoh-un skꞌehoonꞌai ꞌinkꞌez njan whulerwe ꞌusli-un cha ꞌutꞌen untsiꞌ-i cha? ꞋAw ndusonleꞌ hubaꞌ lheꞌhootꞌoh whuz unꞌa ꞌusinla.”

¹⁰ ꞋEt Abimelech ꞌen Abraham ꞌuyulhni, “Daja ninzun whe ꞌinja ꞌet dinja yulhni?”

¹¹ ꞋInkꞌez Abraham ꞌutni, “Dune Yakꞌusda (Elohim) ehunuljut-un njan keyoh ꞌaw hooloh nuszun, ꞌet huwa ꞌusja ꞌinkꞌez sꞌat ꞌen gha tila sozoolhghelh nuszun.

¹² ꞋEt hoontsꞌi ꞌalha sulhtus ꞌuntꞌoh. Sbá ootseꞌ ꞌuntꞌoh, ꞌaw sloo ooyaz iloh ꞌuntꞌoh ꞌinkꞌez sꞌat suliꞌ.

¹³ ꞋInkꞌez ꞌet ꞌuhooja Yakꞌusda (Elohim) sbá ooyoh huwutisya whe ꞌet ndun tsꞌeke dusni, ‘Njan whe ꞌinzoo whe ꞌet tsꞌiyantsuk sba ꞌet doneh ntsꞌoh te nitꞌas te, sulhutsin ꞌuntꞌoh doniꞌ.’”

¹⁴ ꞋEt Abimelech ꞌusbai ꞌinkꞌez musdoos dune cha, tsꞌeke ꞌinkꞌez dune bulh, yunatneꞌ ꞌutꞌenne ꞌenne cha, tsꞌiyawh Abraham gha buninla, ꞌinkꞌez yuꞌat cha yutlꞌa nayalhti.

¹⁵ ꞋInkꞌez Abimelech ꞌutni, “Whunilhꞌen ndi syun njan mbut whuzꞌai, ndet hukwaꞌ ninzun-un, ꞌet hoontꞌi.”

¹⁶ ꞋInkꞌez Sarah ꞌen cha ꞌuyulhni, “Whunilhꞌen nyulhutsin 1,000 silver nukat-i ꞌi cha oogha inusla. ꞋI gha mbene la nyulh ꞌutꞌenne cha ꞌinkꞌez ꞌuyoonne nalh cha, ꞌawet tsꞌihꞌun mba nawhúsdliꞌ wheꞌ hoontꞌoh!” ꞋEt whe hukwa yudaniꞌ.

¹⁷ ꞋEt Abraham Yakꞌusda (Elohim) tsꞌun tenadidli ꞌinkꞌez Yakꞌusda (Elohim) Abimelech soo naꞌyinla, yuꞌat cha ꞌinkꞌez tsꞌekoo yunat neꞌutꞌenne cha, ꞌinkꞌez bubuzkeꞌ whuzdliꞌ.

¹⁸ ꞋEt whe Moodihti (Yahweh) ndunne Abimelech ooyoh dilhtsꞌine tsꞌekoo tsꞌiyawh buchan whudanaꞌdinla, ndun Sarah ꞌen gha.