Genesis 2 - Yak'usda Ooghuni

¹ ꞋAwet yakꞌuz, yun kꞌut, ꞌinkꞌez ndai tsꞌiyawh ꞌuhoonla, ꞌi lhaoodinla.

² ꞋEt whulh lhtakꞌantꞌit dzin suliꞌ, ꞌet Yakꞌusda (Elohim) be ꞌutꞌen, ꞌi lhaidinla ꞌinkꞌez whulh lhtakꞌantꞌit dzin ꞌet nalyiz. Ndi be ꞌutꞌen ꞌi tsꞌiyawh lhaoodinla.

³ ꞋInkꞌez Yakꞌusda (Elohim) whulh lhtakꞌantꞌit dzin ꞌet soo hoonzoo-un whulhtsi ꞌinkꞌez ꞌudun duba neooninla. Njan whulh lhtakꞌantꞌit dzin ꞌet nalyiz be ꞌutꞌen ꞌi tsꞌiyawh lhaoodinla ꞌet huwa, Yakꞌusda (Elohim) ndi ꞌuyinla ꞌi lhaoodinla.

⁴ Njan ꞌet soo ꞌudechoo wheꞌ whuditꞌen hukwꞌelhꞌaz yakꞌuz ꞌinkꞌez yun kꞌut njan dzin Moodihti Yakꞌusda (Yahweh Elohim) ꞌen ndi yakꞌuz ꞌinkꞌez yun kꞌut ꞌuhoonla,

⁵ ꞌawhuz yun whutꞌan ꞌinkꞌez oomaiꞌ hooni-i, ꞌinkꞌez dilhtan-i cha yun kꞌut ha lhusye whe, Moodihti Yakꞌusda (Yahweh Elohim) nawhulhtih-un ꞌinkꞌez dune yun gha oonaꞌ ha hooloh.

⁶ ꞋEt hoontsꞌi tootsul whuzdliꞌ ꞌi be yun kꞌut naooniltsul.

⁷ ꞋInkꞌez Moodihti Yakꞌusda (Yahweh Elohim) yun lez ꞌi dune yulhtsi ꞌinkꞌez be tsꞌukhuna bulh yuni ꞌainyulh ꞌinkꞌez dune khuna suliꞌ.

Yakꞌusda (Elohim) ba haꞌ nuyeh kꞌet ꞌet dune neninꞌaz

⁸ Eden huwun ndaz de ꞌet Moodihti Yakꞌusda (Yahweh Elohim) ꞌen haꞌ nuyeh kꞌet newhuninꞌai. ꞋEt ꞌaꞌ nule ꞌinkꞌez ndun dune yulhtsi, ꞌen ꞌet neinilhti.

⁹ Njan yun kꞌut Moodihti Yakꞌusda (Yahweh Elohim) tsꞌiyai duchun nulꞌen huba nzoo-i ꞌinkꞌez ꞌutꞌalh huba nzoo-i ꞌainanla. Duchun oogha tsꞌukhuna-i cha whuniz ha nuyeh yun ꞌet ꞌuyinla. ꞋInkꞌez ndi duchun be tꞌeoonudzun ndet hoonzoo ꞌinkꞌez ndet hoontsiꞌ ꞌet cha.

¹⁰ ꞋEt ndi tookꞌoh Eden whutsꞌu hainli, ꞌi ha nuyeh kꞌet be nawhunultsul, ꞌet ꞌukoh didun lhkꞌeinli whuzdliꞌ.

¹¹ Soo ꞌudechoo whutsꞌu hainli, ꞌi Pishon huyulhni, ndi ꞌi yun kꞌut Havilah ndulcho whunadizdli, ꞌet gold hooni.

¹² ꞋInkꞌez njan yun kꞌut gold ꞌi unzoo. Bdellium ꞌinkꞌez onyx tse ꞌi ꞌet hooni.

¹³ Njan whulh nat tookꞌoh ye dinli, ꞌi Gihon hiyulhni, ꞌi ꞌuntꞌoh. Yun kꞌut Cush, ꞌet ndulcho whunasuli.

¹⁴ Bulh ta-i ꞌukoh ꞌi Hiddekel huyulhni, ꞌi Assyria whandaꞌ tsꞌe wheinli. Bulh dunghi ꞌukoh ꞌi Euphrates ꞌuntꞌoh.

¹⁵ ꞋEt Moodihti Yakꞌusda (Yahweh Elohim) ha nuyeh kꞌet Eden ꞌet dune neninilhti, yugholeꞌ ꞌinkꞌez yotꞌeꞌ ha.

¹⁶ ꞋInkꞌez Moodihti Yakꞌusda (Yahweh Elohim) ndun dune khuni yutlꞌa danꞌai whe nduyulhni, “Ndi duchun tsꞌiyawh njan ha nuyeh ꞌi onꞌalh ndet hukwaꞌ ninzin totsuk.

¹⁷ Ndi duchun be tꞌeoonudzun-i, ndet hoonzoo-un, ꞌinkꞌez ndet hoontsiꞌ-un, ꞌi oomaiꞌ ꞌaw lhuzonꞌal. Ndet dzin inꞌal-un, ꞌalha datantsah.”

¹⁸ ꞋEt Moodihti Yakꞌusda (Yahweh Elohim) ꞌutni, “Dune dichꞌoh ꞌuhintꞌoh de ꞌaw lheꞌhoozooꞌ wheꞌ hoontꞌoh, yulaꞌ titꞌelh-un yundultꞌoh-un ooba ꞌoosleh si.”

¹⁹ Ndi yun kꞌut ꞌet Moodihti Yakꞌusda (Yahweh Elohim) tsꞌiyai khuna-i, dutꞌai ndo yat nudilh, ꞌi tsꞌiyawh Adam tsꞌun nebuninla, ꞌet ntsꞌenꞌa hubootazih ha. ꞋInkꞌez ntsꞌenꞌa hubonziꞌ, ꞌi huboozi suliꞌ.

²⁰ ꞋEt Adam ꞌen ndi musdoos, dutꞌai ndo yat nudilh, ꞌinkꞌez tlꞌo kꞌut khuna-i, ꞌi tsꞌiyawh hubooziꞌ whulhtsi. ꞋEt ꞌinkꞌez Adam yulh ndultꞌoh ꞌen yulaꞌootꞌen hooloh.

²¹ ꞋInkꞌez ꞌet Moodihti Yakꞌusda (Yahweh Elohim) Adam bulh cho yukꞌedinꞌai, ꞌet Adam nanisti ꞌinkꞌez oocha ꞌilhoghi Yakꞌusda yutsꞌu haídantan ꞌinkꞌez yutsung lhtsꞌun be naíyunilhni.

²² Moodihti Yakꞌusda (Yahweh Elohim) ndi ꞌucha dune tsꞌu ha idantan, ꞌi tsꞌeke yulhtsi ꞌinkꞌez dune yughi nilhti.

²³ ꞋEt Adam ꞌutni, “Ndi ꞌandit stsꞌun ootsꞌun ꞌuntꞌoh ꞌinkꞌez stsung ootsung ꞌuntꞌoh. Tsꞌeke booziꞌ ooleꞌ si, dune tsꞌu halti ꞌet huwa”.

²⁴ ꞋEt huwa dune dubá ꞌinkꞌez duloo bulh bula dootnih ꞌinkꞌez duꞌat bulh ootꞌe ꞌinkꞌez ꞌilho yustꞌe hooleꞌ.

²⁵ ꞋInkꞌez nahultꞌoh ꞌustꞌet, dune ꞌinkꞌez duꞌat bulh whe ꞌaw yooya cha lhuhiloh.