Genesis 17 - Yak'usda Ooghuni

Yakꞌusda (Elohim) Abram ndi khuni ꞌi ooba lhaidinla

¹ ꞋEt Abram ꞌen ꞌilho hooloh whunizyai ꞌon ꞌat ꞌilho hooloh (99) nawhudizut whe, Moodihti (Yahweh) yunalhtsꞌet hainya ꞌinkꞌez ꞌuyulhni, “Yakꞌusda ꞋUkꞌenus ꞋUltus-un (El Shaddai) ꞌustꞌoh, stso inyalh ꞌinkꞌez ꞌaw hoonli nkꞌelhuholhtsꞌit.

² ꞋInkꞌez sghuni nyun, si bulh lhadutalneh ꞌinkꞌez ꞌonus lhane cha tihleh.”

³ ꞋEt Abram yubut nachanitno ꞌinkꞌez Yakꞌusda (Elohim) ꞌen yulh yalhduk, njan ꞌuyulhni,

⁴ “ꞋEt si whunilhꞌen, khuni ntsꞌun lhadusla-i ꞌudun keyoh whutꞌenne dune lhane ꞌenne bubá tanleh.

⁵ ꞋAw ꞌon ꞌun Abram lhunyodutasnelh, nyooziꞌ Abraham nyo dutanelh, lhelhtsꞌun whutꞌenne didoh lhane ꞌenne bubá nyuzusi ꞌet huwa.

⁶ Soo tsꞌihꞌun lhane ntsꞌu ha kedande nyutiselh, lhelhdoh didohne dune nyutiselh, lerwene ꞌenne hoontsꞌi ntsꞌu ha hande tileh.

⁷ ꞋInkꞌez khuni nyun bulh lhadilya-i, ꞌi ꞌet dutaꞌalh ntsꞌu haindene ꞌenne lhanꞌun te, ꞌilhiz wheni ndi khuni lhadutalneh, NYakꞌusda (Elohim) tisleh ꞌinkꞌez ntsꞌu haindene cha.

⁸ ꞋInkꞌez cha nyun cha ꞌinkꞌez ntsꞌu haindene nkꞌelhꞌaz, ndi yun nohgha nusꞌai, ꞌawhuz ꞌet tꞌenyuzinzun, Canaan yun tsꞌiyawh nohchꞌeꞌ ooleꞌ ꞌilhiz wheni, ꞌinkꞌez buYakꞌusda tisleh.”

⁹ ꞋInkꞌez Yakꞌusda (Elohim) Abraham ꞌuyulhni, “Nyun ndi khuni ntsꞌun lhadasla-i ootahtun, ntsꞌu haindene tubulh lhanꞌun te ndi khuni ootahtun.

¹⁰ Ndi ꞌi khuni ntsꞌun lhadasla-i, ꞌi ootahtun, nyun ꞌinkꞌez si bulh ꞌinkꞌez ntsꞌu haindene nkꞌelhꞌazne. Dune tsꞌoodunne whuzdline nohtoh ꞌenne tsꞌiyawh hika dune unli-un hubuhootatꞌus.

¹¹ Nyunchꞌoh cha ooka dune inli-i nyo titꞌus, ꞌet huwa tꞌentihdzeh ndi khuni lhadilya-i nyun, si bulh.

¹² Mbe la lhkꞌudidzin be yus kꞌut suliꞌ-un, ꞌen cha hititꞌus. Duneyaz ꞌandit whuzdline nyoh whuzdline, kꞌus sooniya be dune tꞌenuzuhzun tsꞌun ꞌohket-un tsꞌoodun ntsꞌu hainde lhilohne, ꞌen cha.

¹³ Mbe la nyoh whuzdline ꞌinkꞌez mbe la sooniya be ohketne, tsꞌiyawh ka dune unli-un hubotitꞌus, ndi sghuni ntsꞌun lhadusla-i nus whe lhkꞌelhꞌaz te ꞌet ndi ꞌi gha ꞌilhiz wheni be hoodutahtꞌen.

¹⁴ ꞋInkꞌez dune tsꞌoodun ꞌaw lhuhuyitꞌus-un ꞌen ꞌudun nehuyolhtelh ndi khuni ntsꞌun lhadasla-i kꞌeininyuz ꞌet huwa.”

¹⁵ ꞋEt Yakꞌusda (Elohim) Abraham ꞌuyulhni, “Nꞌat Sarai dini-un ꞌet ꞌetsul ꞌudonih ꞌinkꞌez Sarah ꞌi booziꞌ tileh.

¹⁶ ꞋInkꞌez soo hoonzoo-un ooba whutiselh ꞌinkꞌez duneyaz ꞌen mba nyaz tileh. ꞋInkꞌez ꞌen soo hoonzoo-un ooba whutiselh ꞌinkꞌez ndoh hidoh ꞌenne buloo tileh, ꞌinkꞌez lerwene cha hitsꞌu ha tidoh.”

¹⁷ ꞋEt Abraham yubut nachanitno ꞌinkꞌez udloh ꞌinkꞌez dudzi yo tsꞌe ꞌutni, “Dune 100 be yus kꞌut soo toleh ooyeꞌ whutaleh? ꞋInkꞌez Sarah ꞌen cha 90 be yus kꞌut soo tilah ooyaz holeꞌ?”

¹⁸ ꞋInkꞌez Abraham Yakꞌusda ꞌuyulhni, “Ishmael soo nyun ba khuna ooleꞌ?”

¹⁹ ꞋEt Yakꞌusda (Elohim) ꞌutni, “ꞋAwundooh Sarah nꞌat nyeꞌ nghu tilhtsi ꞌinkꞌez Isaac dutanelh. Sghuni lhadusla-i ꞌilhiz wheni ꞌen cha ootsꞌun lhadutisleh, mbene la ootsꞌu haindene hukwꞌelhꞌaz ꞌenne cha.

²⁰ ꞋInkꞌez Ishmael ꞌen ghun nyudastsꞌo. Whunilhꞌen soo hoonzoo-un oogha whultsꞌut, ꞌinkꞌez lhane ootsꞌu hainde tileh. Whunizyane ꞌon ꞌat nane lerwe yeꞌke ootsꞌu ha tidoh ꞌinkꞌez ꞌen didoh-un ncha tíselh.

²¹ ꞋEt hoontsꞌi ndi sghuni Isaac tsꞌun lhadutisleh. Sarah ndo whuya whudizulh nat de, ꞌet nyeꞌ tileh.”

²² ꞋEt yulh yalhduk-un ꞌetsul ꞌudija ꞌinkꞌez Yakꞌusda (Elohim) ndo whe naja.

²³ ꞋEt Abraham duyeꞌ Ishmael yilhchoot ꞌinkꞌez mbene la yuyoh whuzdline ꞌinkꞌez mbene la sooniya kꞌelha bubonketne, dune tsꞌiyawh Abraham ooyoh dilhtsꞌine ꞌet dzin za yuka dune unli-un hubuhuztꞌus Yakꞌusda (Elohim) yulhni hukwꞌunꞌa.

²⁴ Abraham ꞌet 99 be yus kꞌut whe yuka dune unli-un huyuztꞌus.

²⁵ ꞋEt ooyeꞌ Ishmael whunizyat ꞌon ꞌat tat be yus kꞌut whe ooka dune unli-un huyuztꞌus.

²⁶ ꞋEt dzin za Abraham ooyeꞌ Ishmael ꞌen bulh hika dune unline hubuhuztꞌus.

²⁷ ꞋInkꞌez mbene la ooyoh dune ꞌet whutꞌine, ꞌinkꞌez sooniya be bubonketne, ꞌenne cha hika dune unli-un tsꞌiyawh hubuhuztꞌus.