Genesis 16 - Yak'usda Ooghuni

Hagar ꞌinkꞌez Ishmael

¹ ꞋEt Sarai, Abram ooꞌat ꞌaw buzkeh hooloh inleꞌ, Egypt whutꞌen tsꞌeke yunat neꞌutꞌen-un Hagar huyulhni ꞌen yutꞌi.

² ꞋEt Sarai Abram ꞌuyulhni, “Whunilhꞌen Moodihti (Yahweh) ꞌaw suzkeh hooloh sulhtsi, ndun sba neꞌutꞌen-un ꞌen ꞌinleh ꞌinkꞌez ꞌet de tila tsꞌoodunne oostꞌeꞌ.” ꞋEt Abram, Sarai yukꞌunꞌa ꞌuja.

³ ꞋEt Sarai, Abram ooꞌat yuba neꞌutꞌen-un Hagar ilhchoot, Egypt whutꞌen-un unli ꞌinkꞌez duki yugha inilhti, yuꞌat ooleꞌ ha. ꞋEt Abram whunizyat yus kꞌut (10) ꞌet nyo Canaan keyoh indaꞌ.

⁴ ꞋEt Hagar tꞌeinanzin ꞌinkꞌez ulchan. ꞋEt ulchan tꞌeoonanzin, nyoon tsꞌeke yuba ꞌutꞌen-un ooba yintsiꞌ suliꞌ.

⁵ ꞋEt Sarai, Abram ꞌuyulhni, “Whe nintaꞌnustꞌen-un nkꞌeholtsꞌit! Ndun tsꞌeke ngha nusti ꞌinkꞌez ulchan tꞌeoonanzin whe, oostsꞌu dutni suliꞌ. Moodihti (Yahweh) nyun, si bulh neba nahutiyeh.”

⁶ ꞋEt Abram, Sarai ꞌuyulhni, “A, ꞌalha nyun mba ꞌutꞌen-un nyun nlakꞌet ꞌuhoontꞌoh, ntsꞌenꞌa hukwaꞌ ninzun-un kꞌunꞌa ꞌinleh.” ꞋInkꞌez Sarai yuba ꞌutꞌen-un tubeh dzoh nayulhdzut, ꞌinkꞌez Hagar yughu wheitselhya.

⁷ ꞋEt Moodihti (Yahweh) oolizas nyo too naindli-un, chuntoh ꞌet whuzih, ꞌet nayilhti, nyo too naindli-un whuzih, Shur tsꞌu wheti-un.

⁸ ꞋInkꞌez ꞌuyulhni, “Hagar, Sarai ba ꞌutꞌen-un, ntsꞌez de hainya ꞌinkꞌez ntsꞌe tinya whe ꞌintꞌen?” ꞋEt ꞌutni, “Sarai smoodih ooba ꞌustꞌen-un oochꞌa tsꞌe tisya whe ꞌustꞌen.”

⁹ ꞋEt Moodihti (Yahweh) oolizas ꞌuyulhni, “Ooba ꞌintꞌen-un ootsꞌun naindalh ꞌinkꞌez ntsꞌe hukwaꞌ ninzun-un kꞌunꞌa neꞌnyoolhꞌen si.”

¹⁰ ꞋEt Yakꞌusda (Yahweh) oolizas ꞌuyulhni, “Ntsꞌu haindene lhane ngha tislelh. Huldlai kꞌet ꞌaw bootsꞌolhto ꞌaitꞌoh tileh.”

¹¹ ꞋInkꞌez Moodihti (Yahweh) oolizas, cha yulhni, “Whunilhꞌen ꞌawet tsꞌoodun bulh ꞌintꞌoh suliꞌ. Dune nyaz tileh ꞌinkꞌez booziꞌ Ishmael dutanelh. Njan teneꞌnilhdzun Moodihti (Yahweh) nyudantsꞌo.

¹² Tube dune nzoodilꞌi-un tileh, tsꞌiyanne dune buchꞌaz ditni tileh ꞌinkꞌez tsꞌiyanne dune hichꞌaz ditni tileh, ꞌinkꞌez dulhutsinke butoh ꞌet dune tileh.”

¹³ ꞋEt Moodihti (Yahweh) yutsꞌu huyih whe ꞌen dulh yailhduk, “Nyun ꞌintꞌoh, ndun Yakꞌusda-Ndun-Sunilhꞌen (El Roi)” ꞋInkꞌez ꞌutni, “Mbe la siꞌen-un, si cha tila ꞌusꞌen eh?”

¹⁴ ꞋEt huwa njan too dizꞌai-un ꞌet ꞌuwhuhutni Beer Lahai Roi. Whunulhꞌen Kadesh ꞌinkꞌez Bered bulh whetoh ꞌuhoontꞌoh.

¹⁵ ꞋEt Hagar duneyaz ꞌen Abram yughu sulhtsi ꞌinkꞌez Abram duyeꞌ yoozi Ishmael yulhni.

¹⁶ ꞋEt ꞌoh whuya whudizulh Abram ꞌen lhkꞌu dit whunizyat ꞌon ꞌat lhkꞌu tat be yus kꞌut (86) whe Ishmael yughu yulhtsi.