Genesis 15 - Yak'usda Ooghuni

Yakꞌusda (Elohim) ꞌen Abram khuni ooba lhaidinla

¹ ꞋEt nduhooja hukwꞌelhꞌaz Moodihti (Yahweh) ooghuni Abram honꞌen whe nduyulhni, “Abram, wheniljut ꞌilhoh. Nyun mba neꞌi súbal ꞌusli, soo ꞌukꞌenus mba kꞌelha whutaleꞌ-un.”

² ꞋEt hoontsꞌi Abram ꞌutni, “Moodihti Yakꞌusda (Adonai Yahweh) di sgha tanꞌalh? ꞋAw suzkeh cha hooloh mbe la skꞌedutiyalh ꞌen Eliezer Damascus whutꞌen-un eh ꞌuntꞌoh?”

³ ꞋEt Abram ꞌutni, “Whunilhꞌen ꞌaw suzkeh sghalhinlel. Mbe la syoh whuzdli-un ꞌen skꞌedutiyalh-un tileh.”

⁴ ꞋEt whunilhꞌen, Moodihti (Yahweh) ooghuni weidiltsꞌut ꞌutni, “Ndun ꞌaw nkꞌelhdutisyal whe ꞌuntꞌoh nyustꞌe tsꞌu hainzut-un ꞌen nkꞌedutiyalh.”

⁵ ꞋEt nꞌaz teinilhti ꞌinkꞌez ꞌuyulhni, “Ndo yakꞌuz tsꞌe whunilhꞌen sum hoolhto hukwa soo tila holhto.” ꞋInkꞌez ꞌet ꞌuyulhni, “Mbene la ntsꞌu haindene ꞌet ꞌuhutiltsuk.”

⁶ ꞋEt Moodihti (Yahweh) yuba ꞌalha ꞌudija, ꞌinkꞌez “Tsꞌihꞌun dune unli,” ꞌuyulhni.

⁷ ꞋEt ꞌuyulhni, “Si, Moodihti (Yahweh) ꞌustꞌoh. Ndunne Chaldea whutꞌen, ꞌet buyun kꞌut Ur, ꞌet whuchꞌa njan yun kꞌut nchꞌeꞌ whutileh ha.”

⁸ ꞋEt ꞌuyulhni, “SMoodihti Yakꞌusda (Adonai Yahweh), ntsꞌenꞌa tꞌewhuntazin stlꞌa whutikulh ꞌet?”

⁹ ꞋEt nduyulhni, “Tat be yus kꞌut-i musdoos tsꞌekeyaz cha, tat be yus kꞌut-i tsꞌeke ꞌusbai cha, ꞌinkꞌez tat be yus kꞌut-i dúbe cha, dutꞌai ꞌimbin cha, turtle dove huyulhni, ꞌinkꞌez dutꞌaiyaz cha, pigeon huyulhni, ꞌi ndiz stsꞌinlelh.”

¹⁰ ꞋEt ndokhi tsꞌiyawh yughi ninla, tsꞌiyawh lhkꞌeyantꞌaz lhzih neininla, ꞌet nyoo dutꞌai ꞌi ꞌaw yutꞌalhanal.

¹¹ ꞋEt whe dutꞌai cho, vulture huyúlhni, ꞌi ndi khuna-i huyanghan, ꞌi yukꞌendil whe Abram whenabunanyoot.

¹² ꞋEt hulhgha sa nainꞌai whe soo bulh cho ꞌi Abram ookwꞌeidiltsꞌut ꞌinkꞌez whunulhꞌen soo wheioonujut-un ꞌinkꞌez tsaholhgus-un ꞌet ookwꞌeoodiltsꞌut.

¹³ ꞋEt whe Yakꞌusda (Elohim) Abram ꞌuyulhni, “Soo soo cho tꞌeoononzeh, ntsꞌu hainde ꞌen ꞌuyoo yun kꞌut ꞌet ꞌaw tꞌelhonizun ꞌinkꞌez ꞌaw hubeꞌ hoolhdzun chaíloh. ꞋEt ndunne yun kꞌut whutꞌen, ꞌen dzoh neꞌbulhꞌen ꞌinkꞌez bunat neꞌhootꞌen whe 400 nawhudizut whutsꞌun bubaꞌ hutitꞌelh.

¹⁴ ꞋEt mbene la bubaꞌ hitꞌenne hukwꞌelhꞌaz buba nahutisyeh soo lhai hutꞌi whe whusahutidulh.

¹⁵ ꞋEt hoontsꞌi, nyun mbákene soo tsꞌihꞌun mba oodizghel leꞌ hoontꞌoh ꞌet butsꞌun tanyalh. Soo yoo ꞌun inzulh whe ꞌet ꞌanyotilhtelh.

¹⁶ ꞋEt whulh dit dune nawhusdli-un, ꞌet ndiz nahutidulh. Amor whutꞌenne tankꞌus unꞌa ꞌuhutꞌen-un ꞌawhuz lhalhodusne.”

¹⁷ ꞋEt ꞌuhooja, hulhgha sa yo wheinꞌai whe tsaholhgus whuzdliꞌ. Whunulhꞌen lhes ꞌutes-un lhut ootsꞌa hadanꞌa ꞌinkꞌez daltꞌai bulh ꞌi ndi khuna-i lhtsꞌeltꞌaz-i beguz lhuyuzkat.

¹⁸ ꞋEt dzin za Moodihti (Yahweh) Abram tsꞌun khuni ooba lhaidinla whe njan ndutni, “Ntsꞌu haindene ꞌenne ndi yun bugha óonusꞌai, Egypt whedinli tsꞌun ꞌinkꞌez ndi ꞌukoh whucho, ꞌet Euphrates ꞌukoh whucho ꞌet.

¹⁹ Ken whutꞌenne cha, Kenez whutꞌenne cha, ꞌinkꞌez Kadmon whutꞌenne cha.

²⁰ Hitt whutꞌenne cha, Periz whutꞌenne cha ꞌinkꞌez Reph whutꞌenne cha.

²¹ Amor whutꞌenne cha, Canaan whutꞌenne cha, Girgash whutꞌenne cha ꞌinkꞌez Jebus whutꞌenne, ꞌenne cha.”