Genesis 14 - Yak'usda Ooghuni

Lot huyilhchoot

¹ ꞋEt ꞌuhooja Amraphel huyulhni, yun kꞌut Shinar whulerwe Arioch, keyoh Ellasar whulerwe, Chedorlaomer, yun kꞌut Elam whulerwe ꞌinkꞌez Tidal Goiim whutꞌenne whulerwe.

² Bera huyulhni, Sodom whulerwe, Birsha huyulhni Gomorrah whulerwe, Shinab Admah whulerwe, Shemeber Zeboiim whulerwe, ꞌinkꞌez Bela whulerwe, ꞌenne bubulh lhuwhehunigan.

³ Ndunne tsꞌiyawh lhtsꞌu nehudindil ꞌinkꞌez Siddim wheguz (ꞌet ꞌuhoontꞌoh, lisel yatooꞌ).

⁴ Whunizyat ꞌon ꞌat nat yus kꞌut (12) ꞌet ndun Chedorlaomer huyulhni ꞌen baꞌ hitꞌen ꞌinkꞌez whulh whinizyat ꞌon ꞌat tat yus kꞌut (13) ꞌet hichꞌaz nedindil.

⁵ Whulh whunizyat ꞌon ꞌat dunghi be yus kꞌut (14) whe Chedorlaomer ꞌinkꞌez nyoonne lerwe yulh ꞌutꞌenne, ꞌenne hubulh whelhonigan, nyoonne Reph whutꞌenne, keyoh Ashteroth-Karnaim hudilhtsꞌi, ꞌinkꞌez nyoonne Zuz whutꞌenne, ndunne keyoh Ham hudilhtsꞌi, ꞌinkꞌez nyoonne Em whutꞌenne, ꞌenne keyoh Shaveh Kiriathaim hudilhtsꞌi,

⁶ ꞌinkꞌez ndunne Hor whutꞌenne, ꞌenne dudzulh kꞌut dzulh Seir ꞌet El Paran whutsꞌun ꞌuhoolhdzoh, chuntoh ꞌuhoontꞌoh whenghoh ꞌet whutsꞌun.

⁷ ꞋEt lhtꞌanahunisdil ꞌinkꞌez keyoh Mishpat (Kadesh ꞌuhoontꞌoh) whuz hutizdil Amalek whutꞌenne bukeyoh ꞌinkꞌez Amor whutꞌenne bukeyoh ꞌenne Hazazon Tamar huwhutꞌen, ꞌenne bubulh whelhonigan.

⁸ ꞋInkꞌez Sodom whulerwe, Gomorrah whulerwe, Admah whulerwe ꞌinkꞌez Zeboi whulerwe ꞌinkꞌez Bela whulerwe, Zoar huwhutni ꞌenne tsꞌiyawh lhtsꞌu nehudindil ꞌinkꞌez Sidom dzulh eguz whuzꞌai-un ꞌet whelhonigan.

⁹ ꞋEt Chedorlaomer, Elam whulerwe, Tidal, ꞌudun keyoh whutꞌenne bulerwe, Amraphel, Shinar whulerwe, ꞌinkꞌez Arioch, Ellasar whulerwe, dine lerwe ꞌenne kwulane lerwe buchꞌaz nehudindil.

¹⁰ ꞋEt njan Sidom dzulh eguz whuzꞌai-un, asphalt huyulhni, lhai ꞌoh duntꞌi ꞌinkꞌez Sodom whulerwe ꞌinkꞌez Gomorrah whulerwe bulh whe tse halhdil. Whulohne ꞌet yahadla, ꞌet mbene la lhchꞌu tizkatne ꞌenne ndo dzulh tuz whe tse halhdil.

¹¹ ꞋEt ndunne dine lerwene, ꞌenne Sodom ꞌinkꞌez Gomorrah keyoh whuchꞌeꞌ tsꞌiyawh huyilhchoot, ndai la hikꞌu huna-i cha ꞌinkꞌez whe nahidil.

¹² Lot ꞌen cha huyilhchoot, Abram bulhutsin ooyeꞌ ꞌuntꞌoh. Sodom ꞌet whutꞌi, ndai la yutꞌi-i cha ꞌinkꞌez tsꞌiyawh hiyulh whenadil.

¹³ ꞋEt ꞌilhoghun nintanalgai-un whe Abram, Hebrew whutꞌen-un, ghu ninya ꞌinkꞌez yulhni. Abram ꞌen njan duchun, oak hiyulhni, ꞌet whutꞌi. Ndi duchun ꞌi ndun Amor whutꞌen, Mamre ꞌintꞌoh, ꞌen ye ꞌuntꞌoh-i ꞌuntꞌoh. Boono Eshcol ꞌinkꞌez boono Aner ꞌen, Abram hitsꞌu dutni ꞌuhintꞌoh.

¹⁴ ꞋEt Abram bulhutsin Lot huyulhna huyulhni whe duduneꞌne 318 ꞌenne hodilꞌeꞌne yuba ꞌutꞌenne, Abram hiyoh whuzdline, ꞌenne buba untizyoot keyoh Dan whutsꞌun.

¹⁵ ꞋEnne tsꞌiyawh lhkꞌebanla ꞌinkꞌez ꞌulhdzis whe yuba ꞌutꞌenne tubulh ndunne bubulh whelhonigan Hobah whutsꞌun whenabonanyoot Damascus whano ꞌet ꞌuhoontꞌoh.

¹⁶ ꞋEt ndai la huyilhchoot-i cha ꞌinkꞌez bulhutsin Lot cha, highu huyilhchoot-i cha, tsꞌekoo cha ꞌinkꞌez dunene tsꞌiyawh nabuhilhchoot.

¹⁷ ꞋEt Sodom whulerwe, Shaveh wheguz ꞌet, ꞌen Abram yududizya (Lerwe wheguz whuzꞌai huwhutni), Chedorlaomer hichꞌaꞌ nilhde hukwꞌelhꞌaz ꞌinkꞌez lerwe hiyulh ꞌutꞌenne tubulh.

¹⁸ ꞋEt Melchizedek Salem whulerwe, ꞌutꞌalh-i cha ꞌinkꞌez tsꞌekoo tooꞌ cha ꞌi bubut neininla, ꞌen Yakꞌusda ꞌukꞌenus diztiꞌ-un (El Elyon) ꞌen oolubret ꞌuntꞌoh.

¹⁹ Soo hoonzoo-un ubulh yalhduk whe ꞌutni “Yakꞌusda ꞌukꞌenus diztiꞌ-un (El Elyon) yakꞌuz ꞌinkꞌez ndi yun kꞌut cha oochꞌeꞌ hoonli-un ꞌen gha Abram soo hoonzoo-un oogha hootaltsꞌulh.

²⁰ Yakꞌusda ꞌukꞌenus diztiꞌ-un (El Elyon) ꞌen soo hoonzoo-un ꞌuntꞌoh, nchꞌaz ditnine nlakꞌebanla.” ꞋInkꞌez 1/10th yutꞌi tsꞌiyawh yugha ininla.

²¹ ꞋEt Sodom whulerwe Abram yulhni, “Dune ꞌenne sgha buninle ꞌinkꞌez ndai la hoonli-i, ꞌi nyunchꞌoh ilhchoot.”

²² ꞋEt hoontsꞌi Abram Sodom whulerwe yulhni, “Ndi sla ꞌuntꞌoh Moodihti (Yahweh) Yakꞌusda ꞌukꞌenus yoo do ꞌuntꞌoh (El Elyon) ꞌen ootsꞌun duduzni, ꞌen yakꞌuz cha ndi yun kꞌut cha oochꞌeꞌ hoonli.

²³ ꞋAw hoonli lhituzaschulh ꞌughabatsꞌeꞌ ntsool-iyaz kꞌus kenatlꞌoolh hoontsꞌi ndai la nchꞌeꞌ ꞌaw hoschoot ꞌaitꞌoh, doo ka la ꞌudoniꞌ ‘Abram hoonzooꞌ ꞌuntꞌoh susi doniꞌ la.’

²⁴ Ndai la chilke hiyanꞌal-i ꞌinkꞌez dune sulh tizdilne Aner, Eshcol ꞌinkꞌez Mamre ꞌenne oochꞌeꞌ huyolhchoot dulhni.”