Genesis 13 - Yak'usda Ooghuni

Abram ꞌinkꞌez Lot ꞌet lhchꞌa hustꞌaz

¹ ꞋEt Abram Egypt whuchꞌa huzdil, ooꞌat cha ꞌinkꞌez Lot cha bubulh tizꞌaz whe tsꞌiyawh huyutꞌi-i tubulh ndaꞌ hutizdil.

² Abram tube hoonzooꞌ ꞌuntꞌoh, khuna-i cha lhai yutꞌi ꞌinkꞌez silver ꞌinkꞌez gold tubulh lhai yutꞌi.

³ ꞋEt hutizdil Bethel whutsꞌun hutizdil ndet daꞌ ꞌudaꞌ nimbali neninꞌai inleꞌ ꞌet ꞌudechoo whutsꞌun Bethel ꞌinkꞌez Ai whulhetoh whuz hoozdil.

⁴ ꞋUdechoo loodel neninꞌai inleꞌ ꞌet whutsꞌun ꞌet whuz hoozdil. ꞋEt Abram Moodihti (Yahweh) yutsꞌun tenadidli.

⁵ Lot ꞌen cha Abram bubulh tizya, khuna-i cha, musdoos cha, ꞌinkꞌez nimbali cha, lhai cha ꞌutꞌi.

⁶ Ndi yun ꞌaw soo lheꞌilcho hikꞌoh hutinalh huba ꞌaw lhzih huhootꞌeꞌ ꞌaitꞌoh, tube lhai hoonli tsꞌiyai hutꞌi kꞌet.

⁷ ꞋEt Abram bughunaiꞌ ghunline ꞌinkꞌez Lot bughunaiꞌ ghunline ꞌenne ꞌaw ꞌulhuholdzin ꞌaitꞌoh. ꞋOh daꞌ ndunne Canaan whutꞌenne ꞌinkꞌez Periz whutꞌenne, ꞌenne cha njan yun kꞌut huwhutꞌi.

⁸ ꞋEt Abram, Lot yulhni, “ꞋAw hoonli huwun nyun ꞌinkꞌez si bulh lhdulhyoh ꞌudotniꞌ ꞌaitꞌoh. ꞋInkꞌez si skhunai-i ghunline, ꞌinkꞌez nyun nghunai-i ghunline, lhulh dulhyoh hudotni ꞌaitꞌoh. Lhulhlhutsinke tsinli ꞌet huwa.

⁹ Nyoo yun lheꞌulcho-i nilhꞌen. Schꞌa sinyaiꞌ ꞌintlꞌus tsꞌe whuz inyalh ꞌinkꞌez si cha nailhni tsꞌe toosyaꞌ, kꞌus nyun nailhni tsꞌe inyalh ꞌinkꞌez si ꞌintlꞌus tsꞌe si toosyaꞌ.”

¹⁰ ꞋEt Lot whunilhꞌen Jordon keyoh duchun hooloh-un tsꞌiyawh yunilhꞌen. Too cha lhai wheꞌ hoontꞌoh, (Moodihti (Yahweh) Sodom ꞌinkꞌez Gomorrah bulh gak whutilhtselh whutsꞌo), Moodihti (Yahweh) ha nuyeh kꞌet ꞌet nduhoontꞌoh inleꞌ, Egypt dahoontꞌoh la Zoar tsꞌu wheti tsꞌe, ꞌet nduhoontꞌoh.

¹¹ ꞋEt Lot nyo yun kꞌut Jordan whunat tsꞌiyawh ꞌet ꞌutahaooditꞌai, ꞌinkꞌez ndaꞌ wheinya ꞌet ꞌinkꞌez ꞌet lhchꞌa hustꞌaz.

¹² Abram ꞌen Canaan keyoh ꞌet nenina ꞌinkꞌez Lot ꞌen keyoh whuti duchun hooloh-un ꞌinkꞌez ꞌet nimbali neninꞌai Sodom whutsꞌun.

¹³ ꞋEt hoontsꞌi nyoonne Sodom dunene tubeh hintsiꞌ, ꞌinkꞌez Moodihti (Yahweh) chꞌaz lubeshi ꞌuhulhꞌen.

¹⁴ ꞋEt Moodihti (Yahweh) ꞌen Abram ꞌuyulhni Lot bulh lhchꞌa hustꞌaz hukwꞌelhꞌaz whe, “Whunilhꞌen ndet sinyin ꞌet whutsꞌun whunilhꞌen, no cha, nyan cha, ndaꞌ cha, ꞌinkꞌez nooꞌ cha.

¹⁵ Ndai la yun nilhꞌen-i ꞌilhiz wheni tsꞌiyawh ntsꞌu haindene tubulh ꞌi nohgha nusꞌai.

¹⁶ ꞋInkꞌez ntsꞌu ha hande ꞌenne yun kꞌut lhez kꞌunꞌa butiselh. ꞋEt whe dune yun kꞌut lhez hodutilhto de, ꞌet si ntsꞌu haindene ꞌenne cha si bulh olto.

¹⁷ Dudinyaih ꞌinkꞌez yun kꞌinyaih inyalh, dawhulhyiz la ꞌinkꞌez dawhulhtel la ndi yun ꞌi ngha tisꞌalh ꞌet huwa.”

¹⁸ ꞋEt Abram dunimbali nanayanꞌai ꞌinkꞌez ndun Mamre ooduchun, Terebinth huyulhni, ꞌet nenina. Keyoh Hebron ꞌuhoontꞌoh ꞌinkꞌez ꞌet loodel ꞌinla Yakꞌusda tsꞌun.