Genesis 12 - Yak'usda Ooghuni

Abram ooba hoonzoo ooleꞌ la

¹ ꞋEt Moodihti (Yahweh) Abram ꞌulhni, “Nkeyoh cha whuchꞌa sinyaiꞌ, nyunatneke cha whuchꞌa sinyaiꞌ, ꞌinkꞌez mbá ooyoh cha teninyaiꞌ, ꞌinkꞌez yun whununtistun-un hoonli.

² Tube didoh-un ncha-un nyutiselh, soo hoonzoo-un ntsꞌun tiszooꞌ ꞌinkꞌez nyooziꞌ cha ncha tiselh. ꞋInkꞌez ꞌuyoonne ba soo hoonzoo-un bugha hóotaltsꞌulh ꞌintꞌoh nyutiselh.

³ Mbene la mba soo hoonzoo-un ngha hóotaltsꞌulh, ꞌenne cha soo hoonzoo-un bugha hóotaltsꞌulh, ꞌinkꞌez mbe la nkꞌehiyihne cha bukꞌehutisyih, ndi yun kꞌut dilhtsꞌine ꞌenne tsꞌiyawh nyun ngha soo hoonzoo-un bugha hóotaltsꞌulh.”

⁴ ꞋEt Abram Moodihti (Yahweh) daja la ꞌet nduja whe tizya Lot ꞌen yulh tizꞌaz ꞌinkꞌez Abram ꞌen lhtakꞌantꞌit whunizyat ꞌon ꞌat kwulat be yus kꞌut (75) whe ꞌet njan Haran huwu tizya.

⁵ ꞋEt Abram duꞌat yilhchoot ꞌinkꞌez Lot ooꞌat cha hubilhchoot ꞌinkꞌez ndai la huyutꞌi-i cha tsꞌiyawh nahuyalhdzoo ꞌinkꞌez mbe la dune bugha nindene ꞌenne cha Haran, Canaan tsꞌe yun kꞌuz whehandil ꞌinkꞌez Canaan nehunindil.

⁶ Abram ꞌoh whuya keyoh lhusuya ꞌinkꞌez keyoh Shechem huwhutni-un Moreh duchun Terabim huyulhni, ꞌi nadanꞌa ꞌet whutsꞌun ꞌinkꞌez Canaan whutꞌenne ꞌenne nyo yun kꞌut hudilhtsꞌi.

⁷ ꞋEt Moodihti (Yahweh) Abram yunalhtsꞌet hainya ꞌinkꞌez ꞌuyulhni, “Mbene la ntsꞌu haindene ꞌenne ndi yun bugha ítasꞌalh.” ꞋEt Moodihti (Yahweh) yunalhtsꞌet hainya-un ꞌen yutsꞌun loodel ꞌinla.

⁸ ꞋEt whutsꞌun Bethel huwhutni-un dzulh hoonli ꞌon daꞌ whuz wheinya, ꞌet nimbali neninꞌai ba nooꞌ ꞌet. Bethel ꞌinkꞌez ꞌon daꞌ ꞌet Ai ꞌet loodel neninꞌai. Moodiht (Yahweh) tsꞌun ꞌinkꞌez Moodihti (Yahweh) yooziꞌ ꞌi yukaꞌ daniꞌ.

⁹ Abram ꞌet nyan za Negev lhoyalh.

¹⁰ ꞋEt ꞌuhooja nyo keyoh dai whuzdliꞌ ꞌinka Abram Egypt tsꞌe wheinya tube dai whuzdliꞌ ꞌet huwa.

¹¹ ꞋEt ꞌuhooja ꞌawet Egypt wheinghoh whe duꞌat Sarai ꞌuyulhni, “Tꞌeoonuszun tube tsꞌeke ꞌinzooꞌ whe ꞌintꞌoh.

¹² ꞋEt huwa ꞌet la ꞌuhoneh Egypt nenitꞌaz de nyo nilhꞌen whe ꞌet la ꞌuhudooniꞌ, ‘Ndun ooꞌat ꞌuntꞌoh,’ ꞌinkꞌez la sozoolhghelh nyun ꞌaw nyozoolhghelh ꞌaitꞌoh.

¹³ ꞋEt soo cho ꞌudoniꞌ ndun ꞌen sulhutsin ꞌuntꞌoh ꞌet de la soo oostꞌeꞌ nyun gha. ꞋInkꞌez la nyulh khoosnaꞌ.”

¹⁴ ꞋEt Abram Egypt neninya whe nyoonne Egypt whutꞌenne tsꞌeke hitilhꞌen whe tube tsꞌekezooꞌ.

¹⁵ Lerwe ooyeꞌke Pharaoh ꞌenne cha hinilhꞌen ꞌinkꞌez dubá ꞌen hidaniꞌ, “Ndun ꞌen tube tsꞌekezooꞌ,” ꞌinkꞌez nyoon tsꞌeke ꞌen Pharaoh ooyoh tsꞌe huyoolhti.

¹⁶ Abram soo cho neꞌhuyulhꞌen nyoon ooꞌat ꞌen gha. ꞋUsbai cha musdoos dune cha donkey huyulhni, dune cha, tsꞌekoo ꞌinkꞌez dune cha hinat neꞌutꞌenne. Donkey tsꞌekoo cha ꞌinkꞌez camel huyulhni, ꞌi higha hininla.

¹⁷ ꞋEt hoontsꞌi Pharaoh tube dada untsiꞌ-i Pharaoh ooyoh cha ꞌet dinzut whulhtsi Sarai, Abram ooꞌat, ꞌen gha.

¹⁸ ꞋEt Pharaoh Abram ꞌanih yudaniꞌ, “Dane ꞌinla whe neꞌinla? ꞋEt di ha lhunedinelh, ndun tsꞌeke nꞌat ꞌuntꞌoh?

¹⁹ ꞋEt di ha ꞌuneꞌdini, ‘Ndun sulhtus ꞌuntꞌoh?’ Nedini sꞌat eni daꞌ ꞌoschoot ooleꞌ. ꞋEt huwa ndun nꞌat nailhchoot ꞌinkꞌez ntsꞌe tanyalh tsꞌe inyalh.”

²⁰ ꞋEt Pharaoh duduneꞌne ꞌubulhni ꞌinka whenahuyalhꞌaꞌ ooꞌat cha ꞌinkꞌez ndai tsꞌiyawh yutꞌi cha.