Genesis 11 - Yak'usda Ooghuni

Babel whunedanꞌa

¹ Ndi yun kꞌut ꞌoh daꞌ ꞌilho khuni za hoonli tsꞌiyanne lhkꞌunꞌa yahulhduk.

² ꞋEt ꞌuhooja ndaꞌ ndaz de hutizdil whe yun, Shiner huyulhni, ꞌi hikꞌeindil ꞌet ꞌuhoontꞌoh duchun hooloh-un nahuhoonꞌai ꞌet nehunina.

³ ꞋEt lhgha ꞌuhudutni, “ꞋAnih, tse tlꞌus ꞌi ꞌutsꞌooleh, ꞌinkꞌez soo cho whe tsꞌoolhtꞌes.” Tse tlꞌus ꞌi tse ba huyutꞌi ꞌinkꞌez be tsꞌuwhudzeh, ꞌi hiye whutlꞌus ba.

⁴ ꞋEt ꞌuhutni, “ꞋAnih njan keyoh whuti ꞌutsꞌodoolneh ꞌinkꞌez ndo yakꞌuz nainꞌa-i nyiz-i cho ꞌi ꞌutsꞌooleh. ꞋEt wheni si neooziꞌ hoonli holeꞌ, ndi ꞌutsꞌinla da, doo ka si ndulcho whe ndi yun kꞌut yatsꞌodilh.”

⁵ ꞋEt whe Moodihti (Yahweh) ndus de hainya ꞌinkꞌez nyo keyoh whunilhꞌen ꞌinkꞌez nyoo nainꞌa-i cho yoh huyulhtsi, ꞌi cha ꞌuhuyinla-i yunalhꞌen.

⁶ ꞋEt Moodihti (Yahweh) ꞌutni, “A ꞌilhune za hinli dune ꞌinkꞌez lhkꞌunꞌa za yahulhduk. ꞋEt njan ꞌet ꞌazi wheꞌ honilhꞌen ndai la ꞌuhitilelh hukwaꞌhuninzun-un tsꞌiyawh si ꞌuhuhooleh.

⁷ ꞋAnih butsꞌun tsꞌutoodilh, ꞌinkꞌez bughuni ꞌi buchꞌa lhtatsꞌuholelh. ꞋEt si lhulh hoodostsꞌo.”

⁸ ꞋEt whe Moodihti (Yahweh) lhchꞌa buninla, ꞌinkꞌez njan yun kꞌut ndulhcho nehunindil. ꞋEt whe dune whutꞌi whucho nehoninꞌai ꞌet ꞌetsul ꞌuhuja.

⁹ ꞋEt huwa nyo nainꞌa-i cho, ꞌi Babal huyulhni, ndai la huye yalhduk-i cha tsꞌiyawh Moodihti (Yahweh) lhelhtsꞌun unꞌa yahulhduk hubulhtsi ꞌinkꞌez ndulcho yahandil.

Shem tsꞌu haindene

¹⁰ Shem huyulhni-un, ꞌen ootsꞌu ha yandene ndi ꞌi ꞌuntꞌoh: whunizyat whunizyai ꞌet be yus kꞌut (100) whe ooyeꞌ Arphaxad huyulhni, ꞌen ooyeꞌ suliꞌ dutadiltꞌo hukwꞌelhꞌaz nat yus kꞌut ꞌet whuzdliꞌ.

¹¹ Arphaxad ookꞌelhꞌaz whuzdli-un ꞌet Shem 500 yus kꞌut ꞌet nahidaꞌ whe ꞌet ooyeꞌke cha ꞌinkꞌez ootseꞌke cha nahodleꞌ.

¹² Arphaxad ꞌen tat whunizyai ꞌon ꞌat kwulat be yus kꞌut whe ꞌet Shelah huyulhni, ꞌen ooyaz suliꞌ.

¹³ Shelah whuzdli hukwꞌelhꞌaz Arphaxad 403 be yus kꞌut whe dune cha ꞌinkꞌez tsꞌekoo cha ꞌenne buzkeh nasdliꞌ.

¹⁴ Shelah ꞌen tat whunizyat be yus kꞌut (30) whe ꞌet ooyeꞌ, Eber huyulhni, ꞌen ooyeꞌ suliꞌ.

¹⁵ Eber hukwꞌelhꞌaz ꞌet Shelah 403 yus kꞌut whe ꞌet ꞌuyoonne dune cha ꞌinkꞌez tsꞌekoo cha buzkeh nasdliꞌ.

¹⁶ Eber tat whunizyat ꞌon ꞌat dit be yus kꞌut (34) whe ꞌet Peleg huyulhni, ꞌen ooyeꞌ suliꞌ.

¹⁷ ꞋEt Peleg ookꞌelhꞌaz ꞌet Eber 430 yus kꞌut ꞌuyoonne dune cha, tsꞌekoo cha buzkeh nasdliꞌ.

¹⁸ Peleg tat whunizyat be yus kꞌut (30) whe ꞌet Reu huyulhni ꞌen ooyeꞌ suliꞌ.

¹⁹ Reu whuzdli hukwꞌelhꞌaz whe ꞌet Peleg nat whunizyat nat ꞌinkꞌez ꞌilho hooloh be yus kꞌut (209) whe ꞌet ꞌuyoonne dune cha ꞌinkꞌez tsꞌekoo cha nawhusdliꞌ.

²⁰ Reu tat whunizyat ꞌon ꞌat nat be yus kꞌut (32) whe ꞌet ooyeꞌ, Serug huyulhni, ꞌen ooyeꞌ suliꞌ.

²¹ Serug whuzdli hukwꞌelhꞌaz Reu 207 be yus kꞌut whe ꞌet ꞌuyoonne, dune cha tsꞌekoo cha buzkeh nawhusdliꞌ.

²² Serug tat whunizyat be yus kꞌut (32) whe ꞌet Nahor huyulhni-un, ꞌen ooyeꞌ suliꞌ.

²³ Nahor whuzdli hukwꞌelhꞌaz Serug 200 be yus kꞌut ꞌet ꞌuyoonne dune cha ootseꞌke cha nawhusdliꞌ.

²⁴ Nahor nat whunizyat ꞌon ꞌat ꞌilho hooloh be yus kꞌut (29) whe ꞌet Terah huyulhni-un ꞌen ooyeꞌ suliꞌ.

²⁵ Terah hukwꞌelhꞌaz, Nahor 119 be yus kꞌut ooyeꞌke ꞌinkꞌez ootseꞌke cha nawhuzdliꞌ.

²⁶ ꞋEt Terah lhtakꞌantꞌit whunizyat be yus kꞌut (75) whe ꞌet Abram huyulhni-un, Nahor ꞌinkꞌez Haran ꞌenne buzkeh suliꞌ.

Terah tsꞌu haindene

²⁷ ꞋEt Terah tsꞌu haindene: ꞌenne Abram, Nahor ꞌinkꞌez Haran. Haran ꞌen Lot ooyeꞌ suliꞌ.

²⁸ ꞋInkꞌez Haran ꞌen dubá yutso dazsai, didutchꞌoh dukeyoh ꞌet Chaldeanne bukeyoh ꞌet.

²⁹ ꞋEt Abram ꞌinkꞌez Nahor bulh buꞌat whuzdliꞌ. Abram ooꞌat, ꞌen Sarai huyulhni, ꞌinkꞌez Nahor ooꞌat, ꞌen Milcah huyulhni, Haran ootseꞌ, Milcah oobá ꞌinkꞌez Iscah oobá.

³⁰ ꞋEt Sarai ꞌen oochan danáwhudiltsꞌut, oobuzkeh hooloh.

³¹ ꞋInkꞌez Terah duyeꞌ Abraham, duchai Lot te, Haran ooyeꞌ ꞌinkꞌez duyasꞌat, Sarai duyeꞌ, Abram ooꞌat cha. Ur, Chaldean bukeyoh, ꞌet Canaan tsꞌe whehandil, keyoh Haran highu nindil ꞌinkꞌez ꞌet huhootꞌeꞌ.

³² ꞋEt whe Terah oodzin ꞌet 205 be yus kꞌut yinka indaꞌ, ꞌinkꞌez Terah ꞌen Haran keyoh tsꞌuwhutni, ꞌet dazsai.