Genesis 1 - Yak'usda Ooghuni

¹ Soo ꞌudechoo wheꞌ whuditꞌen whe Yakꞌusda (Elohim) ndi yun ꞌinkꞌez yakꞌuz ꞌet ꞌuhóonla.

² Yun, ba ndo hoonli lhiloh ꞌinkꞌez ꞌaw ookꞌut ꞌet hooloh inleꞌ, yatoo kꞌut tsaholhgus za hoonli inleꞌ. Yakꞌusda (Elohim) ooyughi too kꞌut nudultsꞌut.

³ ꞋEt Yakꞌusda (Elohim) ꞌen ꞌutni, “ꞋEt njan be hootꞌen-i holeꞌ.” ꞋEt hootꞌen whuzdliꞌ.

⁴ ꞋInkꞌez Yakꞌusda (Elohim) be hootꞌen-i yunilhꞌen, unzoo whe ꞌuntꞌoh ꞌinkꞌez be hootꞌen-i ꞌinkꞌez tsaholhgus bulh lhulcho ꞌuyinla.

⁵ Yakꞌusda (Elohim) ndi be hootꞌen ꞌi dzin yulhni, ꞌinkꞌez ndi tsalhgus, ꞌi ꞌulhdzis yulhni, ꞌet whe hulhgha ꞌinkꞌez bundadaꞌ ꞌet soo ꞌudechoo dzin whuzdliꞌ.

⁶ ꞋEt Yakꞌusda (Elohim) ndutni, “Too toh yat holeꞌ ꞌinkꞌez ndo whutooꞌ ꞌinkꞌez yun kꞌut too cha lhulcho ooleꞌ.”

⁷ ꞋEt Yakꞌusda (Elohim) yat ꞌuhoonla, ꞌinkꞌez ndi too lhkꞌeyalhdzo njan too ꞌinkꞌez ndo yat cha, ꞌet ndúhooja.

⁸ ꞋInkꞌez Yakꞌusda (Elohim) ndo yat ꞌet yakꞌuz whulhni. ꞋEt hulhgha ꞌinkꞌez bundadaꞌ ꞌet whulh nat dzin whuzdliꞌ.

⁹ ꞋEt Yakꞌusda (Elohim) ꞌutni, “Ndi too yakꞌuz ba nyo ꞌi ꞌilho ooleꞌ, ꞌinkꞌez ꞌet yun dizgi ha hooltsꞌit.” ꞋEt nduhóoja.

¹⁰ ꞋInkꞌez Yakꞌusda (Elohim) ndi yun dizgi ꞌi yun kꞌut whulhni, ꞌinkꞌez ndi too ꞌilhoh nedimbun ꞌi yatooꞌ yulhni. ꞋEt Yakꞌusda (Elohim) ooba hoonzoo.

¹¹ ꞋEt Yakꞌusda (Elohim) ꞌutni, “Ndi yun kꞌut ꞌet tlꞌo, ndai ꞌutꞌan ha nuyeh ootse whulih. Mai chun oomaiꞌ whulih tsꞌiyawh dichꞌoh oochꞌeꞌ nawhudlih, ꞌi ooleꞌ,” ni ꞌet whe nduhóoja.

¹² ꞋEt ndi yun kꞌut tlꞌo, ndai ꞌutꞌan ha nuyeh ootse whulih whukꞌunꞌa, ꞌinkꞌez mai chun oomaiꞌ whulih tsꞌiyawh dichꞌoh ootse nawhudlih. ꞋEt Yakꞌusda (Elohim) ooba hoonzoo.

¹³ ꞋEt hulhgha ꞌinkꞌez bundadaꞌ ꞌet whulh tat dzin.

¹⁴ ꞋEt Yakꞌusda (Elohim) ꞌutni, “Ndo yakꞌuz hootꞌen ooleꞌ, ꞌi be lhulhcho lhtsꞌe hozit whe dzin ꞌinkꞌez ꞌulhdzis, ꞌi be ntsꞌoh hoozulh, dzin ꞌinkꞌez naoodizulh ꞌet cha.

¹⁵ ꞋInkꞌez ꞌet ndi yakꞌuz be hootꞌen, ꞌi yun kꞌut be hootꞌen ooleꞌ,” ꞌet nduhóoja.

¹⁶ ꞋEt Yakꞌusda (Elohim) ꞌen nanki be hootꞌen-i cho whulhtsi. ꞋEt ndi tube be hootꞌen-i, ꞌi dzin huba suliꞌ ꞌinkꞌez dzohyaz be hootꞌen-i, ꞌi ꞌulhdzis huba suliꞌ. ꞋInkꞌez ndi sum ꞌi cha ꞌuyinla.

¹⁷ Yakꞌusda (Elohim) ꞌen ndo yakꞌuz ndi be hootꞌen-i whulhtsi, ꞌi ndi yun kꞌut hukwꞌedodi huba.

¹⁸ ꞋInkꞌez ꞌowhi dzin ꞌinkꞌez ꞌulhdzis bulh kꞌuneꞌ hoolꞌen ha. ꞋInkꞌez lhulcho ꞌuhoonla be hootꞌen-i ꞌinkꞌez tsalhgus yo. ꞋInkꞌez Yakꞌusda (Elohim) whunilhꞌen ꞌinkꞌez ooba hoonzoo.

¹⁹ ꞋEt hulhgha ꞌinkꞌez bundadaꞌ ꞌet whulh dit dzin whuzdliꞌ.

²⁰ ꞋEt Yakꞌusda (Elohim) ꞌutni, “Too toh lhai cho lho nduntꞌoh-i holeꞌ, ꞌinkꞌez dutꞌai yun ando yat ndulcho dutꞌai be nuhootꞌo”.

²¹ ꞋEt Yakꞌusda (Elohim) toot lho cho ꞌinkꞌez ꞌusjiz-i nuhutnah-i lhelhdoh didoh toot nuyeh-i ꞌinkꞌez nutꞌo-i lhelhdoh didoh-i ꞌinla. ꞋInkꞌez ꞌowhi yunilhꞌen, unzoo whe ꞌuntꞌoh. ꞋEt Yakꞌusda (Elohim) ooba hoonzoo suliꞌ.

²² ꞋEt Yakꞌusda (Elohim) soo hoonzoo-un hubúlhni, ꞌinkꞌez njan ndutni, “Lhkꞌuz whe lhai oohleꞌ ndi too doolhbun yatooꞌ tuz, ꞌinkꞌez dutꞌai cha ndi yun kꞌut lhkꞌuz teh lhai ooleꞌ.”

²³ ꞋEt hulhgha ꞌinkꞌez bundadaꞌ ꞌet kwulat dzin suliꞌ.

²⁴ ꞋEt Yakꞌusda (Elohim) ꞌutni, “Ndai la khuna-i dichꞌoh didoh-i, khuna-i, musdoos te, yun nulhꞌas-i, ꞌuyoo khuna-i, tsꞌiyawh didutchꞌoh dudun dotꞌen, yun tsꞌu halhꞌas,” ꞌet whuz unꞌa ꞌuhooja.

²⁵ ꞋEt Yakꞌusda (Elohim) khuna-i yun kꞌut nulhꞌas ꞌilhoh didoh-i, musdoos ꞌilhoh didoh-i ꞌinkꞌez tsꞌiyai yun nulhꞌas-i, ꞌilhoh didoh-i ꞌinkꞌez Yakꞌusda (Elohim) yanꞌen, unzoo whe ꞌuntꞌoh.

²⁶ ꞋEt Yakꞌusda (Elohim) ꞌutni, “Dune ꞌutsꞌooleh, neundotꞌen-un, nekꞌunꞌa ꞌuntꞌoh-un, yatoo kꞌut, lho, dutꞌai ndo nudilh-i, musdoos, yun kꞌut cha, yun kꞌut nulhꞌas-i cha, ꞌowhi tsꞌiyawh yumoodih ooleꞌ sih”.

²⁷ ꞋEt Yakꞌusda (Elohim) dune ꞌinla, dukꞌunꞌa Yakꞌusda (Elohim) ndotꞌeꞌ, ꞌen dune ꞌinkꞌez tsꞌekoo cha ꞌen ꞌubinla.

²⁸ ꞋEt Yakꞌusda (Elohim) soo hoonzoo-un ꞌubulhni ꞌinkꞌez Yakꞌusda (Elohim) njan ndubulhni, “Lhane cho nohuzkeh ooleꞌ, ndi yun doolhbun ꞌinkꞌez oomoodih uhli, lho, dutꞌai, nudilh-i cha ꞌinkꞌez ndi yun kꞌut ꞌusjiz-i cha tsꞌiyawh”.

²⁹ ꞋEt Yakꞌusda (Elohim) ꞌutni, “Whunulhꞌen, yun ha nuyeh-i oomaiꞌ hoonli-i, ꞌananukat-i yun kꞌut hooni-i, duchun oomaiꞌ ꞌananukat-i, nohni nohba ꞌutꞌalh-i tileh.

³⁰ ꞋInkꞌez cha ndi yun kꞌut ꞌusjiz-i, dutꞌai ndo nudilh-i, ꞌinkꞌez yun kꞌut nulhꞌas-i cha, ndi yun kꞌut ha nuyeh-i yutiꞌulh huba bugha ínusꞌai,” ꞌinkꞌez whuz unꞌa ꞌuhooja.

³¹ Yakꞌusda (Elohim) yaneꞌ yalhꞌen-i yunilhꞌen, tsꞌiyawh ꞌuyinla-i ꞌinkꞌez ꞌalha tube unzoo. ꞋEt hulhgha ꞌinkꞌez bundadaꞌ ꞌet bulh lhkꞌu tat dzin. ꞋEt tsꞌiyawh whunalhꞌen whe tube ooba hoonzoo. ꞋEt hulhgha ꞌinkꞌez bundadaꞌ ꞌet whulh lhkꞌu tat dzin suliꞌ.