Galatians 5 - Yak'usda Ooghuni

Christ ye nékꞌunꞌa ꞌanꞌoh-i, ꞌi be ꞌet whuz unꞌa nelanaditni. ꞋEt whe whulh núdolhyaꞌ

¹ ꞋEt huwa ndi Christ ye nékꞌunꞌa ꞌanꞌoh-i, ꞌi be ꞌet whuz unꞌa nelanaditnih. ꞋEt soo cho whulh núdolhyaꞌ. ꞋAw ꞌon ꞌat ꞌulhnane kꞌunꞌa oolhghel junih.

² Soo zulhtsꞌai. Si Paul njan nohdusni, ꞌet nohni ooka dune ꞌahli-i kꞌut nohotitꞌus de, ndet Christ nohba ꞌuhoonla-un, ꞌaw hoonli nohba lhuhóoloh tileh.

³ Doo cha za whunoh untistun. Mbe la dune yuka dune unli-i kꞌut huyuztꞌus de, ꞌet nduntꞌoh dune, ꞌen Moses be ꞌudustlꞌus, ꞌi tsꞌiyawh yukꞌuneꞌ ootꞌen hubaꞌ hoontꞌoh.

⁴ Nohni ndi Moses be ꞌudustlꞌus ꞌi be Yakꞌusda nalh tsꞌihꞌun unꞌa oohtꞌeꞌ hukwaꞌ ꞌahtꞌen de, ꞌet de Christ oochꞌa nasulhye whe ꞌahtꞌen. Ye unzoo-i, ꞌi cha oochꞌa sahkat whe ꞌahja.

⁵ Ndoni gha za wheni ooka tse tsꞌúhooli whe tsꞌihꞌun unꞌa whe dune tsꞌooleꞌ ha, ꞌet huba tsꞌilhꞌi ꞌet huwa.

⁶ ꞋEt wheni tsꞌiyawh Christ Jesus ꞌen bulh ꞌutsꞌintꞌoh de, ꞌet de yuka dune unli-i kꞌut huyuztꞌus, kꞌus ꞌaw lhitꞌus-un, ꞌet ꞌaw ꞌantsꞌi ꞌuhoontꞌoh. ꞋEt hoontsꞌi be ꞌalha ꞌuhoontꞌoh-i, ꞌi hooncha wheꞌ hoontꞌoh. ꞋI gha ꞌon nus lhkꞌetsꞌusiꞌ.

⁷ Soo úlhwus inleꞌ! Mbe gha njan khuni ꞌalhaꞌ ꞌuntꞌoh-i oochꞌa nasahdil?

⁸ Ndun nohoolhgooh-un, ꞌaw ꞌanih nohulhni-un, ꞌen tsꞌun iloh ꞌuntꞌoh.

⁹ Lhes oogha untuldoh-i, ntsool-iyaz ꞌi lhes ncha-i oogha yuntuldoh.

¹⁰ NeMoodihti sba ꞌalhaꞌ ꞌuntꞌoh ꞌaw ꞌutsꞌun unꞌa ꞌunoohzin ꞌaitꞌoh. Mbe dune tankꞌus nohnilhtꞌi-un, ꞌen mbe unli hoontsꞌi, Yakꞌusda yuba nahutiyeh.

¹¹ ꞋEt sulhutsinke ndi ooka dune ulhli-i ꞌawhuz hiyotꞌas dusni de, ꞌawhuz ꞌet za ndudúsni de, ꞌet di ha ꞌawhuz hukwa dzoh nusulhdzut? ꞋEt whuz unꞌa howu yasduk de, ꞌet Jesus Christ tulalhgus kꞌut dazsai-un howu yasduk de, ꞌaw daꞌ buba dzoh lheꞌduzoosnih ooleꞌ.

¹² Mbene la tankꞌus nohnilhtꞌine, ꞌenne didutchꞌoh úncha naꞌhoodudutꞌas.

¹³ Sulhutsinke Moses be ꞌudustlꞌus hikꞌúneꞌ ꞌustꞌenne oola naditnine ꞌahli whé ꞌahtꞌoh. ꞋEt hoontsꞌi ꞌaw ꞌilhoghun za nohba whuzꞌai. Ndi whe oola naditni-un ꞌet whahtꞌi, ꞌet hoontsꞌi soo cho khohdleꞌ. Nohyustꞌe nintaꞌtitꞌelh-un, ꞌet whutsꞌu níntꞌi de, ꞌet hólhchoot junih! ꞋEt kꞌus be nékꞌetsꞌinsiꞌ-i, ꞌi be lhba neꞌóohtꞌen.

¹⁴ Moses be ꞌudustlꞌus ꞌet whunílhcho ꞌilho khuni be lhaooduja, ꞌet ndutni, “Ntsꞌenꞌa la nyunchꞌoh kꞌenainsiꞌ, whuz unꞌa nyulh dune cha bukꞌeoonsiꞌ,” ni.

¹⁵ ꞋEt hoontsꞌi ꞌantsꞌi lhike kꞌunꞌa lhehdulh de, doo ka sih nintaꞌlhólhꞌen. ꞋEt whuchꞌa huwohleꞌ!

Ndoni ꞌen be ndi yun kꞌut dulhtsꞌi

¹⁶ ꞋEt njan nohdusni, Ndoni ꞌen be ndi yun kꞌut dulhtsꞌi. ꞋEt nduhtꞌen de, nohyustꞌe ꞌutsꞌun nóotꞌi ꞌaitꞌoh.

¹⁷ ꞋEt neyustꞌe Ndoni chꞌaz níntꞌi. ꞋEt doo cha Ndoni neyustꞌe chꞌaz níntꞌi. ꞋEt whe lhchꞌa húhoolꞌi. ꞋEt huwa hukwaꞌ nahzun te, neꞌoohtꞌen junih.

¹⁸ ꞋEt Ndoni ꞌen za ookꞌoh tuneꞌ ꞌahtꞌen de, ꞌet de Moses be ꞌudustlꞌus daja ni, ꞌaw ꞌon ꞌun kꞌúnunoh noojoot ꞌaitꞌoh.

¹⁹ ꞋEt neyustꞌe be ꞌutꞌen kꞌoh-un, ꞌet whunilhchoh tꞌetsꞌoninzun. ꞋUyoonne ꞌat bulh nintaꞌtsꞌutꞌih, kꞌus lhghu lhikohne, ꞌenne bubulh nintaꞌtsꞌutꞌih, kꞌus lubeshi dutsun-i ꞌutsꞌulhꞌih. ꞋInkꞌez ꞌahoolhyiz dune kꞌus tsꞌekoo bulh lubeshi ꞌuztilelh whutsꞌúznintꞌi.

²⁰ ꞋEt ꞌukꞌeltsi neba ꞌalhaꞌ ꞌuntꞌoh-un, dune dezdulih-un cha. Lhtsꞌuzdutni ꞌinkꞌez lhchꞌa tsꞌúhooli. Lhgheꞌ tsꞌoolnih, tsꞌuhuzke, nekꞌoh tsꞌe zaꞌ ꞌutsꞌitꞌelh. ꞋEt lhelhdoh ꞌutsꞌintꞌoh whe ꞌilhoh didohne, wheni tsꞌiyawh whenichꞌoh nekꞌunꞌa ꞌonghohne whubutsꞌodulhꞌeh de,

²¹ ꞌuyoonne dune chꞌeꞌ haꞌ ꞌuzninzun ꞌinkꞌez dune tsꞌughan. ꞋAhoolhyiz taznutnai ꞌinkꞌez tsꞌiyantsuk whe hoontsiꞌ tuneꞌ tsꞌutꞌen. Ndi nduntꞌoh-i, ꞌinkꞌez ndet la tankꞌus neyustꞌe whutsꞌu nintꞌi-un, ꞌet whutso nohdusni, ꞌudaꞌ cha nohdasniꞌ. Mbene la ꞌet ndúhoontꞌoh tuneꞌ ꞌútꞌenne, ꞌaw Yakꞌusda whulerwe unli-un, butlꞌa hóoltsꞌit ꞌaitꞌoh.

²² ꞋEt hoontsꞌi Ndoni nebaꞌ yinla-i, ꞌi ꞌuntꞌoh, be lhkꞌetsꞌusiꞌ-i, be tsꞌónilhni cha, be nédzi dizghel, hoonli talhtsꞌodini-un, ꞌinkꞌez ꞌuyoonne tsꞌun tsꞌínzoo ꞌi cha. ꞋEt tsꞌiyaitsuk unzoo-i ꞌutsꞌulhꞌen, Yakꞌusda neba ꞌalhaꞌ ꞌuntꞌoh-un cha.

²³ ꞋUyoonne ghaꞌ tsꞌoleꞌ, ꞌinkꞌez kꞌohuzdunooltꞌi. ꞋEt ndutsꞌintꞌoh de, ꞌet de ꞌaw hoonli whe nekꞌehootaltsꞌulh-un hooloh.

²⁴ ꞋInkꞌez mbene Christ oochꞌeꞌ unline, ꞌet dáhoontꞌoh neyustꞌe lubeshi tsꞌu nintꞌi, ꞌet ꞌantsꞌi lubeshi tsꞌuznintꞌi-un leꞌ tsꞌintꞌoh, ꞌet tsꞌiyawh tulalhgus ꞌutsꞌodunilhtꞌo.

²⁵ Ndoni ꞌen be tsꞌukhuna. ꞋEt huwa Ndoni ꞌen be za bulh úztoodilh hubaꞌ hoontꞌoh.

²⁶ Khun te wheꞌ dudolhtiꞌ junih, tsꞌúhoskeꞌ junih, ꞌinkꞌez ꞌuyoonne chꞌeꞌ haꞌ ꞌuznoozin junih.