Galatians 2 - Yak'usda Ooghuni

Khuni unzoo-i tsꞌihꞌun unꞌa ooghu yasduk

¹ ꞋEt whunizyat ꞌon ꞌat dit yus kꞌut hukwꞌelhꞌaz, Barnabas bulh doo cha ndo Jerusalem tsꞌe natitꞌaz. Titus ꞌen cha uschoot ꞌinkꞌez nebulh tizꞌaz.

² Senghun neꞌwhultsꞌut-un, ꞌet huwa doo cha za Jerusalem tsꞌe nunásusja whe Jerusalem ꞌet whunilhchoh ꞌubudásniꞌ. Ndi khuni unzoo-i, ꞌi be ndunne ꞌudun yun kꞌut whutꞌenne bubulh yasduk, ꞌet whunilhchoh ꞌubudásniꞌ. ꞋInkꞌez nchane unline, ꞌenne whuꞌiz ꞌet bubulh yasduk. ꞋEt whe ꞌaw ꞌantsꞌet lheꞌústꞌel whuzdliꞌ.

³ ꞋEt hoontsꞌi Titus, sulh ꞌutꞌen-un, ꞌen Greek whutꞌen-un unli, ꞌet hoontsꞌi ꞌaw yuka dune unli-i hititꞌus whutsꞌun lhehinilhtꞌi.

⁴ Whulohne neulhutsinke naꞌhududilꞌi. ꞋEnne bugha ꞌuhooja nunútꞌiꞌ be netabonínla. Neghu hooleꞌ ha datsꞌintꞌoh whe dune tsinli. Christ Jesus ꞌantsꞌi nekꞌunaꞌanꞌoh neꞌleꞌneyinla. Wheni doo cha Moses be ꞌudustlꞌus kꞌut ꞌi be ꞌulhnane nehoolhtselh hukwaꞌ hutꞌen.

⁵ ꞋEt hoontsꞌi nduntꞌohne ꞌaw ꞌilhoh sadzi ookꞌoh whuntátꞌoh ꞌet hoontsꞌi butlꞌa ꞌuzdudooyelh ꞌaitꞌoh. ꞋEt whe ndi khuni unzoo-i be ꞌalha ꞌuhoontꞌoh-i, ꞌi be whuz unꞌa za oohtꞌeꞌ.

⁶ ꞋEt ndunne nchane unli butsꞌutni, ꞌenne lhgha za ubunusꞌen. Mbe hinli ꞌet hoontsꞌi sba dalhúhitꞌoh. Yakꞌusda nalh lhgha za ꞌutsꞌintꞌoh ꞌet huwa.

⁷ ꞋEt hoontsꞌi Peter ndi khuni unzoo-i yutlꞌa idanꞌai whe ꞌi be yuka dune unli-i kꞌut huyuztꞌusne, ꞌenne bubulh yatilhduk ha, ꞌet whuz unꞌa si cha ndi khuni unzoo-i stlꞌa idanꞌai, ꞌi be ꞌudun yun kꞌut whutꞌenne bubulh yaóosduk ha. ꞋEt ndunne nchane, ꞌenne tsꞌiyawh tsꞌihꞌun unꞌa tꞌehonanzin.

⁸ Ntsꞌenꞌa Yakꞌusda Peter lizwifne buba whelꞌaꞌ-un yulhtsi, ꞌet whuz unꞌa si cha ꞌudun yun kꞌut whutꞌenne buba whelꞌaꞌ-un sulhtsi ꞌet huwa.

⁹ ꞋInka James, Cephas, ꞌinkꞌez John, ꞌenne butsꞌutni keyoh whuduchun unline, ꞌenne ndi ye unzoo-un ꞌet stlꞌa hónꞌai, ꞌet tsꞌihꞌun unꞌa tꞌehonanzin, ꞌet de Barnabas ꞌinkꞌez si cha ꞌet huwa nela nahúzꞌai. ꞋEt whuz unꞌa tsꞌiyanne whúbuznilhtan, wheni ꞌinkꞌez James, Cephas ꞌinkꞌez John te lhulh ꞌutsꞌintꞌoh za búznidulh. Wheni ꞌudun yun kꞌut whutꞌenne butsꞌúztidulh, ꞌinkꞌez ꞌenne Lizwifne butsꞌu hutidulh.

¹⁰ Mbe la telꞌenne, ꞌenne ꞌaw bunalh tsꞌodulhnoh ꞌet za hukwaꞌ huninzun, ꞌinkꞌez si cha whuz unꞌa hukwaꞌ nuszun.

Moses be ꞌudustlꞌus ꞌaw doo cha ookꞌuneꞌ tsꞌootꞌen huba lheꞌhóotꞌoh

¹¹ ꞋEt Peter ꞌoh daꞌ keyoh Antioch tsꞌe oozya whe ꞌutsꞌun unꞌa ꞌuja. ꞋEt huwa oonin tsꞌe dásniꞌ.

¹² Whulohne James yulh ꞌutꞌenne, ꞌenne keyoh Antioch nehútidulh whutso, Peter ꞌudun yun kꞌut whutꞌenne ꞌahoolhiz bula ꞌáꞌalh. ꞋEt hoontsꞌi James yulh ꞌutꞌenne whusahándil whe, ꞌet Peter buchꞌa nasja. Ndunne Lizwifne bube nuljut ꞌet huwa.

¹³ ꞋInkꞌez ꞌonghohne Lizwifne, duba naꞌudzooꞌne ꞌenne cha Peter bulh buchꞌa nahusdil. ꞋInkꞌez Barnabas, ꞌen hoontsꞌi, hinalh nduhútꞌen ꞌinkꞌez ꞌen cha bubundulꞌen suliꞌ.

¹⁴ Ndi khuni unzoo-i ꞌalhaꞌ ꞌuntꞌoh-i, ꞌi daja ni, ndunne Lizwifne ꞌaw tsꞌihꞌun hikꞌú nulheꞌustꞌen. ꞋEt nawhusꞌai whe, tsꞌiyanne nalh ꞌet hukwa Peter njan dúdusni, “Nyun Lizwif ꞌintꞌoh ꞌet hoontsꞌi ꞌudun yun kꞌut whutꞌenne kꞌunꞌa dune inli. ꞋInkꞌez di ha ꞌudun yun kꞌut whutꞌenne Lizwif kꞌunꞌa dune hooleꞌ hukwaꞌ bilhꞌen?

¹⁵ Wheni Lizwif tsinli whe tsꞌuwhuzdli. ꞋAw ꞌudun yun kꞌut whutꞌenne kꞌunꞌa lheꞌtsꞌítꞌoh.

¹⁶ Moses be ꞌudustlꞌus ꞌi gha za ꞌutsꞌutꞌen de, ꞌaw tsꞌihꞌun dune lhtsꞌiloh. Jesus Christ neba ꞌalhaꞌ ꞌuntꞌoh ꞌet huwa tsꞌihꞌun dune tsinli ꞌet tꞌetsꞌoninzun. ꞋInkꞌez Christ Jesus ꞌen neba ꞌalhaꞌ ꞌuntꞌoh-un unli ꞌet whe Christ neba ꞌalhaꞌ ꞌuntꞌoh-un, ꞌet ꞌi be tsꞌihꞌun dune tsꞌuzdliꞌ. Moses be ꞌudustlꞌus kꞌuneꞌ ꞌutsꞌutꞌen de, ꞌaw ꞌet huwa iloh tsꞌihꞌun dune tsꞌuzdliꞌ. Moses be ꞌudustlꞌus kꞌuneꞌ ꞌutꞌenne, ꞌaw ꞌilhoghun hoontsꞌi tsꞌihꞌun unꞌa lheꞌínel ꞌet huwa.

¹⁷ Wheni Lizwifne, Christ ꞌen be tsꞌihꞌun ꞌuntꞌohne tsꞌooleꞌ ꞌet za hukwaꞌ ꞌuzninzun de, ꞌet hoontsꞌi lubeshi ꞌulhꞌenne tsinli, ꞌet natsꞌuhoonꞌai de, Christ ꞌen cha eh lubeshi tsꞌu nóhnilhtꞌi unli? Ntsꞌenꞌa ꞌuwhutátꞌelh? ꞋAw ꞌuhótꞌeꞌ ꞌaitꞌoh!

¹⁸ ꞋEt ndi Moses be ꞌudustlꞌus kꞌut ꞌudun nenúsdla ꞌinkꞌez doo cha za náschoot ꞌinkꞌez ookꞌuneꞌ tistꞌen de, ꞌet de khuni kꞌunusyuz wheꞌ tisnelh.

¹⁹ Moses be ꞌudustlꞌus kꞌut, whulh dasúsai le ꞌustꞌoh, ꞌaw ꞌon ꞌat ookꞌú nulheꞌtuzistꞌel ꞌet huwa. ꞋEt whuz unꞌa Yakꞌusda ba khusna zaꞌ tistꞌelh.

²⁰ Christ tulalhgus kꞌut bulh dasusai le ꞌustꞌoh, ꞌet ꞌaw ꞌon ꞌun lhuhúsnoh le ꞌustꞌoh, ꞌet hoontsꞌi Christ syudinda. ꞋInkꞌez ye khuna-i, ꞌi be khusna. Yakꞌusda ooYeꞌ sba ꞌalhaꞌ ꞌuntꞌoh-un, ꞌet ꞌi gha yun kꞌut khusna. ꞋEn ꞌuja skꞌensiꞌ kꞌet sba whutlꞌaꞌ dudilti.

²¹ ꞋAw Yakꞌusda ye unzoo-i ꞌaw ꞌudun neoosꞌalh ꞌaitꞌoh! Moses be ꞌudustlꞌus kꞌut, ꞌi be tsꞌihꞌun dune tsꞌooleꞌ ꞌaitꞌoh. ꞋEt whuz unꞌa ꞌuhoontꞌoh de, ꞌet Christ ꞌantsꞌet whe neba dazsai leꞌwhutatꞌelh,” Peter ꞌet ndudúsni.