Galatians 1 - Yak'usda Ooghuni

Yakꞌusda ba ꞌilhunaoodulhne, Galatia yun kꞌut dilhtsꞌine Paul hadih ꞌubulhni

¹ Si Paul whelꞌaꞌ-un usdli. ꞋAw dunene, ꞌenne bugha iloh ꞌusja, kꞌus ꞌilhoghun dune za iloh gha ꞌusja. ꞋEt hoontsꞌi Jesus Christ ꞌinkꞌez Yakꞌusda neBá, ꞌen ꞌuntꞌoh Jesus yaidlane toh dunaidilhti, ꞌen gha whelꞌaꞌ-un ꞌustꞌoh.

² ꞋInkꞌez neulhutsinke mbene la szih dilhtsꞌine, ꞌenne tsꞌiyawh nohni yun kꞌut Galatia tsꞌe Yakꞌusda ba ꞌilhunaoodulhne ꞌahli, nohni tsꞌiyawh hadih nohtsꞌutni.

³ Yakꞌusda neBá ꞌinkꞌez Jesus Christ neMoodihti, ꞌen ye unzoo-i ꞌinkꞌez dzi dinghel-i, nohgha óoninꞌai, bulh óohtꞌeꞌ.

⁴ ꞋEn ꞌuja nelubeshi gha huwaꞌ dudulti. ꞋEt whe ndi yun kꞌut ntsiꞌ-i yuchꞌa naneoozdla. Yakꞌusda neBá, ꞌet whuz unꞌa hukwaꞌ ninzun.

⁵ ꞋIlhiz wheni ooba tsꞌodílhtiꞌ, ꞌet ndo honeh.

ꞋAw ꞌuyoo khuni unzoo-i hooloh

⁶ Tube sba hooncha whe ꞌahtꞌen. Christ ye unzoo-i, ꞌi be dutihjih ha nohkaꞌ daniꞌ, ꞌet hoontsꞌi ꞌen ꞌahoh oochꞌaz násulhya ꞌinkꞌez ꞌuyoo khuni unzoo-i nahzun, ꞌi tsꞌu násulhya.

⁷ ꞋEt hoontsꞌi ꞌaw ꞌuyoo khuni unzoo-i hooloh. Whulohne dune nohba lhtanahuhólelh hukwaꞌ hutꞌen. Christ ooghuni unzoo-i ꞌutsꞌun unꞌa nohba naꞌhuyooleh hukwaꞌ hutꞌen.

⁸ ꞋEt hoontsꞌi wheni kꞌus yakꞌuz whulizas hoontsꞌi, ꞌuyoo khuni unzoo-i ꞌutsꞌun unꞌa ꞌuntꞌoh-i, ꞌi be nohbulh yatsꞌulhduk de, ꞌet de Yakꞌusda hoontsiꞌ tsꞌe yulhni whutooltsꞌit.

⁹ Ntsꞌenꞌa nohtsꞌudániꞌ, ꞌet doo cha za nohtsꞌutni, ndi khuni unzoo-i ꞌudaꞌ ulhchoot, ꞌinkꞌez mbe ꞌutsꞌun unꞌa nohulhni de, mbe hoontsꞌi ꞌutni-un, Yakꞌusda hoontsiꞌ tsꞌe yulhni whutooltsꞌit.

¹⁰ Daja nuhzun? Yakꞌusda tilah kꞌus dune tilah ba whudóstiꞌ? Soo cho whunulhꞌen, dune ba ꞌuszoo naꞌduduzꞌi de, ꞌet de Christ be ꞌulhna-un tisdleh, ꞌaw oosdleꞌ ꞌaitꞌoh.

Yakꞌusda ꞌutahásalhti ꞌen ba whelꞌaꞌ-un tisdleh

¹¹ ꞋEt sulhutsinke njan nohdúsniꞌ tꞌeoonóhzin ha ndi khuni unzoo-i be nohbulh yasduk, ꞌaw dune ghuni be lheꞌduzusnih.

¹² ꞋEt ꞌaw ndi dune tsꞌun uschoot iloh, ꞌinkꞌez ꞌaw dune whusodalhꞌeꞌ cha iloh, Jesus Christ ꞌen gha whusunilhtan.

¹³ ꞋEt whutsꞌo daꞌ si lizwifne bube ꞌutꞌen kꞌoh huwasna inleꞌ, ꞌet tsꞌiyawh whulh ꞌudahtsꞌo. Yakꞌusda ba ꞌilhunaoodulhne, ꞌenne tube dzoh nubusdeh ꞌinkꞌez musai ubooselh hukwa ꞌustꞌen inleꞌ.

¹⁴ ꞋInkꞌez stsodaꞌne dahántꞌeꞌ la ꞌet ꞌonus hostun hukwa ꞌistꞌen. ꞋEt whe lizwifne bube ꞌutꞌen kꞌoh huwun, ndunne sulh didowhne, mbene la sundultꞌohne, ꞌet hoontsꞌi tsꞌiyawh buba nus unzoo-un susdliꞌ inleꞌ.

¹⁵ ꞋEt ꞌawhuz chadusda whe, ꞌet Yakꞌusda ba hoonzoo whe ꞌutahasálhti ꞌinkꞌez ye unzoo-i be dutisjih ha skaꞌ daniꞌ,

¹⁶ ꞌinkꞌez duYeꞌ yusunilhtan. ꞋEt ꞌen ghun ꞌudun yun kꞌut whutꞌenne, ꞌenne ndi khuni unzoo-i be bubulh yátisduk ha. ꞋEt sulh dizulhne ꞌaw huwun bubulh yalhusdih

¹⁷ ndo Jerusalem tsꞌe hoontsꞌi lhtúsyal whe ndunne, mbene la stso whelꞌaꞌ unline, ꞌenne bubulh yalhusdih. ꞋEt hoontsꞌi yun kꞌut Arabia tsꞌe whesya. ꞋEt hukwꞌelhꞌaz doo cha za keyoh Damascus tsꞌe naoozúsja.

Datꞌen keyoh whuti Jerusalem tsꞌe

¹⁸ ꞋEt tat yus kꞌut hukwꞌelhꞌaz, ꞌet ndo Jerusalem tsꞌe whesya. Peter ꞌen tisꞌelh ha ꞌinkꞌez whunizyat ꞌon ꞌat kwulat dzin oozih usda.

¹⁹ ꞋEt ꞌonghohne whelꞌaꞌne, ꞌenne ꞌaw lhubusꞌel. NeMoodihti bulhutsin James, ꞌen za ꞌusꞌen.

²⁰ ꞋInkꞌez ndi nohtsꞌo kꞌesges-i, Yakꞌusda nalh ꞌunohdúsni, ꞌaw lhozustsꞌit.

²¹ ꞋEt hukwꞌelhꞌaz yun kꞌut Syria ꞌinkꞌez Cilicia, ꞌoh ho nususya.

²² ꞋEt Judea yun kꞌut tsꞌe, mbene la Christ ba ꞌilhunaoodulhne, ꞌenne ꞌawhuz sulh lhuhisꞌen.

²³ ꞋAntsꞌi sulh ꞌuhudantsꞌo. Ndiz unꞌa hodantsꞌo, “Whutsꞌo daꞌ dzoh nuneulhdzut inleꞌ-un, ꞌen ꞌawet be ꞌalha ꞌuhoontꞌoh-i ghun, tsꞌiyanne khuni unzoo-i be bubulh yalhduk suliꞌ, ꞌudaꞌ musai yoolhtselh hukwaꞌ yalhꞌen hoontsꞌi.”

²⁴ ꞋInkꞌez si sgha Yakꞌusda hudálhtiꞌ.