Ephesians 6 - Yak'usda Ooghuni

Tsꞌoodunne uznulhyeh-un

¹ Tsꞌoodunneyaz nohni cha neMoodihti ꞌen gha nohdusneke bukꞌuneꞌ ꞌoohten. ꞋEt tsꞌihꞌun unꞌa ꞌuhoontꞌoh.

² Nohbá nohloo bulh budólhtiꞌ. ꞋI khuni ꞌi ꞌudechoo netlꞌá idanꞌai-i ꞌinkꞌez netsꞌu hoozi-un whulh ꞌuntꞌoh.

³ ꞋEt huwa ꞌi be saꞌ ndi yun kꞌut khutihnalh ꞌinkꞌez tsꞌiyantsuk whe sóoꞌ tihtꞌelh, ꞌet nohtsꞌú hoozi.

⁴ ꞋInkꞌez nohni dune buzkeh hoonline, nohuzkeh khun hubunólhchꞌeh junih. ꞋEt hoontsꞌi neMoodihti Whuneoodulhꞌeh-un, ꞌet ꞌi be soo cho bugha dahni, ꞌet whuz unꞌa dubun dunólhyeh.

ꞋUlhnane ꞌinkꞌez moodihne cha soo cho neꞌlhulhꞌen

⁵ ꞋUlhnane nohni cha, Christ nohdzi ndulcho-i be ookꞌuneꞌ ꞌahtꞌen, ꞌet ndunne ndi yun kꞌut nohmoodih unline, ꞌenne cha whuz unꞌa za nujut be dahtlut whe bukꞌuneꞌ oohten.

⁶ Nohmoodih nohnilhꞌen whe ꞌahcha naꞌdudulhꞌi de, ꞌet whuz unꞌa ndahtꞌen iloh, kꞌus Christ be ꞌulhnane suhliꞌ whe ndet Yakꞌusda nohtsꞌu hukwaꞌ ninzun-un, ꞌet hukwꞌunꞌa oohtꞌen.

⁷ Noheni hoonáhtꞌiꞌ whe neMoodihti ba ꞌulhnane ꞌahli, ꞌaw dune ba ꞌulhnane lháhloh.

⁸ ꞋEt tsꞌiyawh tꞌeoonáhzun, dune ꞌulhnane kꞌus ꞌulhnane bula nahuditnine hoontsꞌi, ꞌutꞌen unzoo-i ꞌahla, ꞌet whuz unꞌa neMoodihti tsꞌun nohba ꞌukꞌelha whutilhtselh.

⁹ ꞋInkꞌez mbe la moodih unline, nohni cha nohdutasnelh, nohbe ꞌulhnane bubeꞌ ꞌoonulhjoot-un whula dahtnih. Tꞌeoonuhzun nohnichꞌoh nohMoodihti, ꞌen ndo yakꞌuz usda ꞌinkꞌez ꞌen oonalh tsꞌiyanne lhulh hulhgha ꞌutsꞌintꞌoh wheꞌ tsꞌintꞌoh.

Ntsꞌenꞌa netsudule oochꞌa ꞌuznilhde

¹⁰ Sulhutsinke, ndi khuni ꞌudekꞌez-i ꞌuntꞌoh ꞌi be nohbulh yatisduk. NeMoodihti, ꞌen bé tsꞌilhtus. Yé ulhtus-i, ꞌi be tsꞌílhtus.

¹¹ Lhtsꞌutigan wheni be sóo nazdutitneh-i huba, Yakꞌusda negha ininla-i be soo nadahtneh. ꞋEt de netsudule ye ꞌuyoo unli-i, ꞌaw nohchꞌaꞌ oolhdeh ꞌaitꞌoh.

¹² ꞋEt ndi yun kꞌut yinka duneꞌne iloh bubulh Lheꞌtsꞌúdulh. ꞋEt hoontsꞌi ntsiꞌ-i nududehne, ndus de haíndilne cha, ꞌinkꞌez ꞌudetso whudilhdzulhne cha, ntsiꞌne yat whumoodihne cha, ꞌinkꞌez ndi yun kꞌut tsálhgus yo whumoodihne, ꞌenne tsꞌiyawh ꞌet bubulh Lheꞌtsꞌúdulh wheꞌ tsꞌutꞌen.

¹³ ꞋEt huwa lhtsꞌutigan wheni be sóo nazdutitneh ha negha íninla-i, ꞌi tsꞌiyawh be soo nadoohtneh hubaꞌ hoontꞌoh. ꞋEt whe ꞌoh de hoontsiꞌ-un whusahónzut de, ꞌaw nohchꞌa oodeh ꞌaitꞌoh. Tsꞌiyawh lhadáhja de, ꞌet de nudútalhyalh!

¹⁴ ꞋEt huwa dudahdilh ꞌinkꞌez nohtsꞌi toh ndai la khuni ꞌalhaꞌ ꞌuntꞌoh-i, ꞌi be soo cho tsunadulhꞌooh. Nohyustꞌe be tsꞌihꞌun unꞌa ꞌuhoontꞌoh-i, ꞌi cha be náhdilh.

¹⁵ ꞋInkꞌez khuni unzoo-i whe nedzi ba be sooꞌ hoontꞌoh-i, ꞌi be óohꞌes leꞌ oohneh.

¹⁶ ꞋEt ndi neba be ꞌalha ꞌuhoontꞌoh-i, ꞌi ꞌantsꞌi neꞌi súbal leꞌ ꞌuntꞌoh ólhchoot. ꞋI be kꞌaza kwun leꞌ ꞌuntꞌoh, ꞌi ntsiꞌ-un netsꞌítutsoh. Be ꞌalha ꞌuhoontꞌoh-i, ꞌi be la nanoolhnoh.

¹⁷ ꞋInkꞌez be uzdujis-i, ꞌi be úznilhꞌai leꞌ tsꞌintꞌoh. ꞋInkꞌez Ndoni oosaluzti, ꞌohwhi ulhchoot. ꞋI Yakꞌusda ooghuni ꞌuntꞌoh.

¹⁸ Tenadudli ꞌinkꞌez Yakꞌusda tsꞌun teniꞌ uznilhdzun-i cha, ꞌet whuz unꞌa tenadahdli. Ndoni ꞌen be ꞌahoolhyiz ꞌetsul lheꞌduzíhni whe tenadahdli. ꞋInkꞌez ntsꞌoh dawhutꞌen ꞌet hoontsꞌi, huwahli whe Yakꞌusda oochꞌeꞌne, ꞌenne tsꞌiyawh buba tenadahdli.

¹⁹ ꞋInkꞌez si cha sba tenadahdli. ꞋI be khuni unzoo-i sgha tíkulh ꞌinkꞌez ꞌaw whelhusaz whe yatisduk. ꞋEt whe la be wheꞌ hoontꞌoh hooyoh-i, ꞌi ghun ꞌonghohne daja ni-un, ꞌet tsꞌiyawh whubuntistun.

²⁰ ꞋEt whe Yakꞌusda ba usyin-un ꞌustꞌoh, ꞌadusꞌai hoontsꞌi. ꞋInka soo cho sba tenadahdli. ꞋEt whe ꞌaw whelhusaz whe ꞌuyoonne cha bubulh yatisduk ꞌinkꞌez si tsꞌihꞌun unꞌa ꞌuwhutisdlelh.

Ye unzoo-i nohbulh óotꞌeꞌ

²¹ Si ntsꞌenꞌa la dastꞌen ꞌinkꞌez si stsꞌun sulh dahooja la, ꞌet Tychicus ꞌen tsꞌiyantsuk nohdutánelh. ꞋEn ꞌuntꞌoh neulhutsin ookꞌetsꞌinsiꞌ, neMoodihti tsꞌihꞌun unꞌa ba ꞌustle-un, ꞌen ꞌuntꞌoh.

²² ꞋEt huwa ndun nohtsꞌú tisꞌaꞌ. ꞋEt de datsꞌútꞌen-un tꞌeoonoohzeh. ꞋInkꞌez soo cho nohdzi hoontꞌiꞌ yoolhtselh.

²³ Nohni sulhutsinke tsꞌiyawh be nédzi dizghel-i nohgha tíkulh. Yakꞌusda neBá ꞌinkꞌez Christ neMoodihti be nékꞌetsꞌinsiꞌ-i, ꞌinkꞌez be ꞌalha ꞌuhoontꞌoh-i, ꞌi bulh nohgha títꞌalh.

²⁴ Mbene la Christ neMoodihti soo ꞌalhaꞌ ꞌi be yukꞌensiꞌne, ꞌenne ye unzoo-i bubulh ꞌutitꞌelh. ꞋEt ndo honeh.