Ephesians 5 - Yak'usda Ooghuni

Be lhkꞌetsꞌutsiꞌ-i, ꞌi be ndi yun kꞌut dúlhtsꞌi

¹ ꞋEt nohni Yakꞌusda yukꞌentsiꞌne ꞌahtꞌoh, ꞌinkꞌez ꞌen buzkeh ꞌahtꞌoh. ꞋEt huwa ookꞌoh túneꞌ oohtꞌen.

² Be lhkꞌetsꞌusiꞌ-i, ꞌi be ndi yun kꞌut dúlhtsꞌi. Ntsꞌenꞌa Christ nékꞌensiꞌ whe neba butlꞌaꞌ dudilti, nohni cha whuz unꞌa za ꞌet ndóhneh. Neba daja whe Jesus whe khuna-un, ꞌet Yakꞌusda ba ꞌet whula ditni wheni neba. Christ neba daja la Yakꞌusda ooba hoonzoo wheꞌ hóontꞌiꞌ.

³ ꞋEt hoontsꞌi ndet whe nintaꞌahtꞌih-un, ꞌinkꞌez ꞌutꞌen dutsun-i cha, kꞌus ꞌuyoon dune chꞌeꞌ haꞌ nahzun cha, ꞌaw hoontsool-unyaz, hoontsꞌi nohni nohtoh nduntꞌi-i nohtoh hóleꞌ junih. Nohni Yakꞌusda oochꞌeꞌne ꞌahli ꞌet huwa whuz unꞌa ndi yun kꞌudólhtsꞌiꞌ hubaꞌ hoontꞌoh.

⁴ ꞋEt ndai la dutsun-i ꞌinkꞌez la hootꞌoh-i be yatsꞌulhduk. Hoontsiꞌ whe dlo kꞌunezduniꞌ-un cha, ꞌet tsꞌiyawh ꞌaw whuz unꞌa nohba lheꞌhóotꞌoh. ꞋEt kꞌus tube cho Yakꞌusda tsꞌun musi dahni.

⁵ Ndi tꞌeoonahzun, mbene nintaꞌutꞌihne, kꞌus ꞌutꞌen dutsun-i ꞌulhꞌenne, kꞌus ꞌuyoon dune chꞌeꞌ haꞌ ninzunne, ꞌenne ꞌukꞌeltsi tsꞌun tenadudline bubúlh hulhgha ꞌuhintꞌoh, ꞌet ꞌenne tsꞌiyawh, Yakꞌusda ꞌinkꞌez Christ, lerwe unli-un ꞌaw hoontsool-unyaz hoontsꞌi ꞌaw bughá hokat ꞌaitꞌoh.

⁶ Khun dune khuni laitꞌóh-i be nohnooꞌah junih. Nduntꞌohne Yakꞌusda yé huske-i, Yakꞌusda yukꞌunulheꞌustꞌenne bukꞌé dutaltsꞌulh wheꞌ hintꞌoh.

⁷ ꞋEt huwa butsꞌú nedohdilh junih.

Hootꞌen-i niz nohdilh

⁸ ꞋOh daꞌ tsálhgus yo dúlhtsꞌi inleꞌ ꞌet huwa. ꞋEt ꞌandit neMoodihti, ꞌen be hootꞌen-i nohba suliꞌ. ꞋInka tsꞌoodunne be hootꞌen-i niz nuhúdilh ꞌet ndóhtꞌeꞌ hubaꞌ hoontꞌoh.

⁹ Ndoni be ꞌutꞌen kꞌoh, tsꞌiyantsuk ndet hoonzoo-un, tsꞌihꞌun unꞌa ꞌuhoontꞌoh-un cha, ꞌinkꞌez khuni ꞌalhaꞌ ꞌuntꞌoh-i, ꞌi tsꞌiyawh Ndoni búlh ootsꞌun ha whúkat ꞌúhoontꞌoh wheꞌ hoontꞌoh ꞌet huwa.

¹⁰ ꞋEt ndahtꞌen de, ꞌet whuz unꞌa neMoodihti hoontꞌiꞌ tilhtselh.

¹¹ Tsalhgus yo dilhtsꞌine bube ꞌutꞌen kꞌoh ꞌaw lheꞌhóozooꞌ. Khun butsꞌu nedohdilh junih, kꞌus ndutꞌenne hukwaꞌ budáhni.

¹² Neꞌhutꞌen-un, ꞌet hukwaya hoonli kꞌet, ꞌaw whulohkhun whunistꞌi be hoontsꞌi howu yatsꞌoolhduk ꞌaitꞌoh.

¹³ ꞋEt hoontsꞌi tsꞌiyanne tꞌewhunilhdzin-un, ꞌet Yakꞌusda be hootꞌen-i, ꞌi be tꞌeoonudzih. ꞋEt tsꞌiyanne tꞌehonanzin, ndi Yakꞌusda be hootꞌen-i, ꞌi be ꞌuwhutꞌih.

¹⁴ ꞋEt huwa njan ndutni, “Mbe ꞌusti-un tsꞌenindzit! Yaidlane toh dunadindaih. ꞋEt de la Christ ootsꞌu ha yánduz-i, ꞌi nkꞌédodi.”

Whunih be yinka dúlhtsꞌi

¹⁵ ꞋEt huwa soo cho khahdli. Whunih be yinka dúlhtsꞌi. Whusnine kꞌunꞌa iloh. Kꞌus whunihne kꞌunꞌa oohtꞌeꞌ.

¹⁶ ꞋAndit dzin whudizulh-un ꞌahoolhyiz dune tankꞌus ꞌuhitꞌelh za ꞌuhutꞌen. ꞋEt huwa dzin hoondukw-unyaz neba ꞌet whuzꞌai-un, ꞌet tsꞌihꞌun unꞌa ꞌutsꞌuhooleh hukwaꞌ tsꞌootꞌen.

¹⁷ ꞋEt huwa khun ilóh tuneꞌ oohtꞌen junih. Kꞌus neMoodihti ꞌen nohtsꞌu hukwaꞌ ninzun-un, ꞌet za tꞌeoonahzeh hukwaꞌ ꞌahtꞌen.

¹⁸ Khun te tanoohtnaiꞌ junih. ꞋI be be khahna-i nintaꞌulhꞌih. ꞋAntsꞌi Ndoni be dahbun.

¹⁹ Yakꞌusda ooghuni be ꞌahjun. Shun teniꞌ ꞌuznilhzun-i, be cha ꞌahjun, ꞌinkꞌez Ndoni shun be ꞌahjun. Nohdzi yo whe nohMoodihti shun be dúlhtiꞌ, ꞌet whuz unꞌa lhulh yalhduk.

²⁰ Jesus Christ neMoodihti, ꞌen booziꞌ be Yakꞌusda ꞌen ꞌuBá, ꞌen tsꞌun tsꞌiyantsuk huwun ꞌahoolhyiz musi dahni.

²¹ Yakꞌusda be nulhjut whe ꞌalhgoh lhudúlhtiꞌ whe ꞌilhoh dune oolhleꞌ.

Ndi yun kꞌut lhghuzdilhtsꞌine, Christ ꞌinkꞌez oolugliz nduwhultꞌoh

²² Nohni ookike hoonline, nohnichꞌoh nohkike bukꞌuneꞌ ꞌahtꞌen. ꞋEt neMoodihti ooghuni ulhchoot, ꞌet whuz unꞌa oohtꞌeꞌ.

²³ Nohkike nohtso hudilhdzulh ꞌet huwa. Christ, Yakꞌusda ba ꞌilhunaoodulhne butso-un unli, ꞌet whúz unꞌa ꞌet ndúhoontꞌoh. ꞋInkꞌez Christ, wheni ooyustꞌe ꞌutsꞌintꞌoh, ꞌen neulhyis-un ꞌuntꞌoh.

²⁴ ꞋEt huwa wheni Yakꞌusda ba ꞌilhunaoodulhne, ntsꞌenꞌa Christ neando ꞌuntꞌoh ookꞌuneꞌtsꞌutꞌen, ꞌet whuz unꞌa tsꞌekoo cha dukike tsꞌiyantsuk whe bukꞌúneꞌ hootꞌen.

²⁵ Nohkike, nohꞌatke bukꞌeoohsiꞌ. Ntsꞌenꞌa Christ wheni Yakꞌusda ba ꞌilhunaoodulhne nekꞌensiꞌ ꞌinkꞌez neba huwáꞌ dudulti.

²⁶ ꞋEt Christ neba daja la, wheni Yakꞌusda ba ꞌilhunaoodulhne Yakꞌusda ba ꞌudun nenéninla. Too za-i kꞌunꞌa dughuni be ootsun hoolohne naneulhtsi.

²⁷ ꞋEt whe wheni Yakꞌusda ba ꞌilhunaoodulhne soo ꞌukꞌenus lhadintꞌohne tsꞌinle whe Christ dichꞌoh dubut nenétalelh. ꞋAw tsunyaz hoontsꞌi nekꞌut be lhuhóodastꞌen. ꞋInkꞌez ꞌutsꞌun unꞌayaz hoontsꞌi lheꞌtsꞌítꞌoh. ꞋInkꞌez lubeshi ooyit ꞌuztitꞌelh, ꞌaw whuz unꞌa nekꞌehóotaꞌalh-un hootaloh.

²⁸ ꞋEt whuz unꞌa dunene duꞌatke bukꞌehoosiꞌ. ꞋEt dahintꞌoh la dichꞌoh kꞌenahusiꞌ, whuz unꞌa za duꞌatke bukꞌehoosiꞌ hubaꞌ hoontꞌoh.

²⁹ ꞋEt ꞌaw ꞌilhoghun dune dichꞌoh duyustꞌe tsꞌu dutnine hooloh kꞌus dichꞌoh duyustꞌe soo néꞌyulhꞌen. ꞋEt whuz unꞌa za neMoodihti Yakꞌusda ba ꞌilhunaoodulhne tsꞌiyawh bughunli.

³⁰ Christ ooyustꞌe ndulcho whe wheni tsꞌiyawh ooloh tsinli ꞌet huwa.

³¹ Njan ꞌet huwa, dune dubá ꞌinkꞌez duloo cha buchꞌa ooyaꞌ ꞌinkꞌez duꞌat za yulh ootꞌeꞌ ꞌinkꞌez nahúltꞌo ꞌilho za hooleꞌ.

³² Ndi buba wheꞌ hoontꞌoh hooyoh-un, ꞌet hooncha wheꞌ hoontꞌoh. ꞋEt daja dusni wheꞌ dusni, mbe la Christ tsꞌutni-un ꞌinkꞌez Yakꞌusda ba ꞌilhunaoodulhne, ꞌenne ꞌudúsni.

³³ Njan ꞌet doo cha za nohdutasnelh, dáhoontꞌoh whe tsꞌiyawh nohnichꞌoh kꞌenahsiꞌ, ꞌet whuz unꞌa za nohꞌatke bukꞌeoohsiꞌ hubaꞌ hoontꞌoh. ꞋInkꞌez nohni tsꞌekoo nohkike soo cho ubudólhtiꞌ.