Ephesians 4 - Yak'usda Ooghuni

ꞋIlho oohleꞌ

¹ Si, neMoodihti ooba ꞌadinꞌai-un ꞌustꞌoh. Njan Yakꞌusda dutihjih ha nohkaꞌ daniꞌ, ꞌet huba soo ꞌúlhdzooꞌ whe whuz toohdilh, ꞌet nohtsꞌu hukwaꞌ dusni.

² ꞋAhoolhyiz yo ꞌúdudulhdzun, ꞌinkꞌez nanilhtsulyaz néꞌlhoolhꞌen. Dzoh nahdeh-un whutsꞌu doohtni junih. Lhkꞌehsiꞌ whe ꞌilhoh dune oohleꞌ.

³ Ndoni ꞌen be tsꞌiyawh lhulh dune oohleꞌ. Tsꞌihꞌun unꞌa lhtsꞌun ꞌahtꞌeꞌ, ꞌi be ꞌilho oohleꞌ. ꞋEt ꞌi be nohdzi ndulcho-i be whuz unꞌa za hukwaꞌoohtꞌen.

⁴ ꞋIlho yustꞌe tsꞌuzdliꞌ ꞌinkꞌez ꞌilho Ndoni neyudinda. Ntsꞌenꞌa Yakꞌusda dutihjih ha nohkaꞌ daniꞌ ꞌet hukwa tse hóhleꞌ.

⁵ ꞋIlhoghun neMoodihti ꞌinkꞌez be néba ꞌalha ꞌuhoontꞌoh-i, ꞌi cha ꞌilho za. ꞋInkꞌez ꞌilho za be too beꞌ tsꞌulꞌih-i hoonli.

⁶ ꞋEt ꞌilhoghun Yakꞌusda, ꞌen ooba ꞌalha ꞌuhoontꞌohne, tsꞌiyawh buBá unli. Tsꞌiyai ando ꞌuntꞌoh ꞌinkꞌez wheni tsꞌiyawh netoh ꞌutꞌen. ꞋInkꞌez nohni tsꞌiyawh, ꞌilhoghun ꞌahli whe nohyudinda.

Ndai la Christ negha íninla-i

⁷ ꞋEt Christ, ꞌilhone tsinli whe ndi yun kꞌut lhelhdun huwa tsꞌana-un, ye unzoo-i, ꞌi be negha óoninla.

⁸ ꞋEt huwa Yakꞌusda ooghuni ndutni, ꞌoh daꞌ Christ yoo do whenya whe nyoonne nabilhchukne, whuz whe nábanla. ꞋInkꞌez dunene butlꞌa hónꞌai.

⁹ ꞋEt ndi “ndo whenya,” daja ni whe ꞌutni? Tulalhgus kꞌut dazsai whe yaidlane toh tsꞌe whenya, ꞌet ꞌuwhúlhni.

¹⁰ Ndun nyo whenya-un, ꞌen za ꞌudedo yakꞌuz whenája. Whuz tsꞌiyaitsuk lhadútileh ha.

¹¹ ꞋEn za ꞌutꞌen, whulohne cha whelꞌaꞌne butlꞌa hónꞌai. Whulohne cha nus hooꞌenne butlꞌa hónꞌai. ꞋEt whulohne cha khuni unzoo-i be yahutilhduk-un, ꞌet butlꞌa hónꞌai. ꞋInkꞌez whulohne cha Yakꞌusda ba ꞌilhunaoosdilne bughu tilehne ꞌinkꞌez dune hodutilhꞌehne, ꞌet cha butlꞌa hónꞌai wheꞌ hutꞌen.

¹² ꞋEt whe Yakꞌusda oochꞌeꞌne lhadúlyane ꞌubulhtsih. ꞋEt whuz unꞌa Jesus Christ be ꞌustléne ꞌutꞌen ꞌuhuyulhꞌen ꞌinkꞌez Christ ooyustꞌe nus za lheꞌiltus, ꞌet wheni ꞌuhutꞌen.

¹³ ꞋEt whutsꞌun ndet be neba ꞌalha ꞌuhoontꞌoh-un cha, ꞌinkꞌez ndet tꞌetsꞌoninzun Yakꞌusda ooYeꞌ ghun, ꞌet whutsꞌun tsꞌiyawh ꞌilho ꞌuztileh. ꞋEt whuz unꞌa soo lhadúlyane ꞌuztileh. ꞋInkꞌez Christ ꞌet nduntꞌoh whe ꞌen ookꞌoh tsꞌe hukwꞌunꞌa ꞌuztinelh.

¹⁴ ꞋAw ꞌon ꞌun tsꞌoodunne kꞌunꞌa lheꞌtsꞌoostꞌeꞌ ꞌet huwa. Dune buka hóodilhtsꞌi nabontiꞌah ha. Lhentsꞌun unꞌa dune hubohodulhꞌeh, ꞌi be ꞌantsꞌi nilhtsꞌi kꞌunꞌa lhelh tsꞌu náhutukuk leꞌ hutꞌen.

¹⁵ Kꞌus khuni ꞌalhaꞌ ꞌuntꞌoh-i, be lhkꞌetsꞌusiꞌ-i, ꞌi be yatsꞌulhduk, ꞌinkꞌez Christ netso whudilhdzulh-un, ꞌen tsꞌun soo cho uznooyeh hukwaꞌ tsꞌootꞌen.

¹⁶ ꞋEn be ooyustꞌe ndulcho lhkayánla. Whuz unꞌa ye ulhtus-i be lhootun. ꞋEt tsꞌiyawh lhghu naoodilhghuz-un ꞌi beꞌ whutꞌen ꞋEt whuz unꞌa za ꞌuwhutꞌen de, ꞌet de ooyustꞌe be lhkꞌetsꞌusiꞌ-i, ꞌi be ꞌon nus ulhtus ꞌinkꞌez unzoo tileh.

ꞋAndidun-un dune

¹⁷ ꞋEt huwa njan huwun nohdusni, neMoodihti nalh ꞌudusni, ꞌudun yun kꞌut whutꞌenne ꞌaw lahootꞌoh hukwꞌunꞌa nuni hunudeh. ꞋEnne bukꞌunꞌa oohtꞌeꞌ junih.

¹⁸ Bubeni tsalhgus yo ꞌuntꞌoh, ꞌet huwa Yakꞌusda ye khuna-i chꞌoh ꞌuhintꞌoh. ꞋAw hoonli tꞌehonuszun, budzi dutsꞌun suliꞌ ꞌet huwa.

¹⁹ ꞋAw tsꞌiyantsuk hukwꞌu nuní lhonulhdzut. Tsꞌiyantsuk whula huditni. Buyustꞌe whutsꞌu nintꞌi-un, ꞌet za hukwaꞌ huninzun. Soo ꞌutꞌen dutsun-i ꞌuhutilhꞌelh, ꞌet za whutsꞌó nintꞌi.

²⁰ ꞋEt hoontsꞌi nohni Christ ꞌaw ndoohoontꞌoh-un ooghun lhuhodúlhꞌel.

²¹ ꞋAlhaꞌ tilah, ꞌen ghun whulh ꞌúdahtsꞌo ꞌinkꞌez ꞌen be hodilhꞌeꞌ inleꞌ de, ntsꞌenꞌa whula Jesus be ꞌalhaꞌ nudzun-i unli ꞌet huwa.

²² ꞋEt ꞌudaꞌ datsꞌintꞌoh la inleꞌ, ꞌet tsꞌiyawh ꞌetsul ꞌuwhahleh ꞌinkꞌez chꞌaz whúnulhtꞌi. ꞋEt nduhoontꞌoh-un, ꞌet tsꞌiyawh tube hoontsiꞌ wheꞌ hoontꞌoh. Ndet la whutsꞌu náhtꞌi-un, ꞌet whe nanihtꞌa.

²³ ꞋInkꞌez noheni be howu nuní nahzut-un, ꞌet ndúwhulcho ꞌandit-i nahoolhtselh.

²⁴ ꞋEt ꞌandit hukwꞌunꞌa yun kꞌenaihdilh, ꞌet whuz unꞌa whulhchoot. Yakꞌusda be ꞌutꞌen kꞌoh ꞌuhoolya. Ndiz unꞌa Yakꞌusda ꞌuhóonla, tsꞌihꞌun ꞌuhoontꞌoh-un, ꞌinkꞌez khuni ꞌalhaꞌ ꞌuntꞌoh-i ꞌet whe lubeshi ooghu hooloh, ꞌet whuz unꞌa neba ꞌuhóonla.

Yakꞌusda ooyughi khun oodachꞌe oohneh junih

²⁵ ꞋEt huwa ꞌilhone ꞌahli whahtsꞌit-un ꞌetsul ꞌudóhnih! ꞋInkꞌez ꞌandit whutsꞌun ꞌilhone ꞌahli whe nohenghoh whutꞌine bulh, ꞌenne cha khuni ꞌalhaꞌ ꞌuntꞌoh-i, ꞌi be bubulh yaoolhduk, tsꞌiyawh ꞌilhoh didowhne tsinli, ꞌet huwa.

²⁶ Nohuhuske be lubeshi olhchoot junih. Khun te hunúlhchꞌe whe te sa yo tóoꞌalh junih.

²⁷ Khun te netsudule hukwaꞌ ninzun tuneꞌ nohoolhꞌen junih.

²⁸ Ndunne ꞌundunutꞌihne, ꞌenne tsꞌiyawh ꞌetsul ꞌuhooneh, ꞌantsꞌi ꞌuhootꞌen, ꞌet de la buba ꞌukꞌelha holeꞌ. Dula be hoonzoo-un huwaóonaꞌ. ꞋEt de la dune hoonli undunidzitne hoonli be bulaꞌ ooneh.

²⁹ Khuni ntsiꞌ-i be yaoolhduk junih. ꞋEt khuni unzoo-i hiye yalhduk-i, ꞌi be ꞌon nus hilhtus hutileh, ꞌi be yalhduk. ꞋEt de la mbene la nohoozílhtsꞌaine, ꞌenne buba hootázooꞌ.

³⁰ Yakꞌusda ooyughi khun oodachꞌe oohneh junih. ꞋEn nohbe hóodatꞌen nohulhtsi ndet dzin nanohootakulh-un ꞌet wheni.

³¹ Ndet nohba dzoh ꞌuhoontꞌoh-un, huske kꞌet ꞌantsꞌi nohdzi dízkꞌun leꞌ ꞌahtꞌoh, huske cha, ꞌinkꞌez ꞌi be ꞌahoolhyiz lhulhúzahke cha, ꞌinkꞌez ꞌahoolhyiz lhghú yalhduk, ꞌinkꞌez dune tsꞌu dahni-un cha, ꞌi tsꞌiyawh chꞌa nasulhye.

³² ꞋInkꞌez tsꞌiyawh lhtsꞌu ꞌoóhzooꞌ, ꞌinkꞌez tsꞌiyantsuk whe nohdzi óolhdzooꞌ whe lhgha teꞌuntihdzin, ꞌinkꞌez ntsꞌenꞌa Christ, ꞌen be Yakꞌusda nohlubeshi nohba yunaꞌalhde, ꞌet nohni cha whuz unꞌa za ꞌilhone ꞌahli whe lhba ꞌun whutoolhdilh.