Ephesians 3 - Yak'usda Ooghuni

Wheꞌ hoontꞌoh hooyoh-un tsꞌet ha hóoltsꞌut

¹ ꞋEt whula gha tsꞌe Si Paul nohni ꞌudun yun kꞌut whutꞌenne nohba Christ Jesus ꞌen ba ꞌustꞌen. ꞋEt huwa ꞌadinꞌai-un usdli.

² ꞋEt Yakꞌusda dichꞌoh ye unzoo-i, ꞌi nohni nohba sghantꞌai, ꞌet whulh ꞌúdahtsꞌo de.

³ ꞋInkꞌez sba whe hóodiltsai-un, ꞌet ꞌi be dahoontꞌoh-un huwa Yakꞌusda sutꞌeoonalhdzin, ndi buba wheꞌ hoontꞌoh hooyoh-un huwun. ꞋEt Whutsodaꞌ khuni ntsool-iyaz be nohtsꞌó kꞌeꞌisguz.

⁴ ꞋEt ookꞌu yalhduk de, Christ ꞌen gha buba wheꞌ ꞌuntꞌoh hooyoh-i tꞌeoonúszun, nohni cha whuz unꞌa tꞌewhuntihzeh.

⁵ ꞋUdaꞌ niz yun kꞌut whutꞌenne ndet ꞌuwhúlhni-un, ꞌaw tꞌelhuhonízil inleꞌ. ꞋEt ꞌandit dzin tsꞌiyawh tꞌetsꞌonanzin. Ndoni be Yakꞌusda ba whelꞌaꞌne ꞌinkꞌez Yakꞌusda be nus hooꞌenne, tsꞌiyawh bubutꞌeoonalhzin.

⁶ ꞋUdun yun kꞌut whutꞌenne ꞌinkꞌez Lizwifne, ꞌenne cha ꞌilho yustꞌe hooleꞌ hubaꞌ hoontꞌoh. ꞋInkꞌez Yakꞌusda, Christ ꞌen be ndi khuni unzoo-i, ꞌi be netsꞌu hooszi. Wheni tsꞌiyawh nebaꞌ hoontꞌoh wheꞌ hoontꞌoh.

⁷ Khuni unzoo-i be ꞌustle-un susdliꞌ. Dahoontꞌoh hukwꞌunꞌa Yakꞌusda ye ulhtus-i, ꞌi be ꞌuwhutꞌen, ꞌet whuz unꞌa ye unzoo-i, ꞌi be stlꞌa hóoltsꞌut.

Wheꞌ hoontꞌoh hooyoh-un tsꞌet ha hóoltsꞌut ꞌet huwun

⁸ Si hoontsꞌi, Yakꞌusda oochꞌeꞌne buba nyo ꞌuntꞌohne, ꞌenne buba nyo ꞌustꞌoh hukwꞌunꞌa ꞌududuzdzun. ꞋEt hoontsꞌi ndi Yakꞌusda ye unzoo-un, ꞌet sghá whultsꞌut. ꞋEt ꞌi be ꞌudun yun kꞌut whutꞌenne, khuni unzoo-i be ndúwhulcho budutásnelh. Christ Ye diztiꞌ-i hooncha kꞌet, ꞌaw whula toh hooloh, ꞌet huwun budutásnelh.

⁹ ꞋEt whe la buba wheꞌ hoontꞌoh hooyoh-un, ꞌet ꞌi be tsꞌiyanne ꞌalhgoh ꞌilho didowhne tsꞌooleꞌ. Soo ꞌudechoo whutsꞌun, Yakꞌusda tsꞌiyanne buchꞌá whuntizꞌi. ꞋInkꞌez tsꞌiyanne dune honilhꞌen ubutiselh ha. ꞋEn ꞌuja Jesus Christ ꞌen be tsꞌiyaitsuk ꞌinla.

¹⁰ ꞋEt whe yakꞌuz tsꞌe mbene la ꞌudetso whudilhdzulhne, ꞌinkꞌez mbene la moodihne, ꞌenne tsꞌiyawh Yakꞌusda ba ꞌilhunaoosdilne bugha ndo Yakꞌuz dilhtsꞌine, Yakꞌusda ye whunih-i tsꞌiyawh ndet ꞌuwhúlhni-un bubutꞌewhuntilhzeh.

¹¹ ꞋUdechoo whutsꞌun neBá ꞌuninzun-un, whuz unꞌa Christ Jesus neMoodihti, ꞌen gha ꞌuhóonla.

¹² ꞋEn be ꞌaw whélhtsꞌoojoh whe be ꞌalha ꞌuhoontꞌoh-i, ꞌi gha ꞌaw whelhtsꞌuniljut whe neBá oobut néztiyalh.

¹³ ꞋEt huwa nohtsꞌu tedusdli, nohba dzoh nususzut-un huwa, nohdzi kꞌoh ooneh junih, ꞌet nohtsꞌu hukwaꞌ dusni. ꞋEt whe whunólhni.

Wheꞌ hoontꞌoh hooyoh-un tsꞌet ha hóoltsꞌut neba hooncha

¹⁴ ꞋEt huwa Jesus Christ neMoodihti ooBá, ꞌen oobut sgwutsi be nenúsya.

¹⁵ Booziꞌ gha mbene yakꞌuz dilhtsꞌine ꞌinkꞌez ndi yun kꞌut khunane cha, ꞌenne tsꞌiyawh buzkehke hoodzi.

¹⁶ ꞋEn tsꞌun nohba tenadusdli, Ye diztiꞌ-i, ꞌi hooncha kꞌet ꞌaw ꞌuzdooniꞌ ꞌaitꞌoh, ꞌet ꞌuwhultsuk Ndoni gha ye ulhtus-i nohgha ítaꞌalh. ꞋEt whe nohyughi unli-i, ꞌi be ulhtus tíleh.

¹⁷ Be nebe ꞌalha ꞌuhoontꞌoh-i, ꞌi be Christ nohdzi yo whutitꞌelh. ꞋInkꞌez be nekꞌetsꞌinsiꞌ-i, ꞌi be yoh ookꞌu whuzꞌai-i, ooghih hoonli kꞌunꞌa dutsꞌo.

¹⁸ ꞋEt whe Yakꞌusda oochꞌeꞌne bubulh nohni cha Jesus Christ be nekꞌetsꞌintsiꞌ-i, soo cho be tꞌéwhuntihzeh, dádiltel ꞌinkꞌez dadilyiz, dádiltai cha ꞌinkꞌez ndo dawhuldzoh tsꞌe cha, ꞌet ꞌulcho-i be.

¹⁹ Christ ye nékꞌensiꞌ-i, hooncha kꞌet, ꞌaw tꞌetsꞌonózin ꞌaitꞌoh, ꞌi be la tꞌeoonoohzeh. ꞋInkꞌez ndai Yakꞌusda yé dizbun-i, ꞌi be la doohbun.

²⁰ ꞋEt neBá ndet la ootsꞌo hukwaꞌ tsꞌutni-un ꞌinkꞌez howu nuni uznuzut-un cha, ꞌet ꞌon nus ꞌultsuk-i negha tilelh whe ꞌuntꞌoh. Ndoni ye ulhtus-i neyoh ꞌuntꞌoh, ꞌet ꞌi beꞌ whutꞌen.

²¹ ꞋInka ndi yun ꞌetsul ꞌutinelh whutsꞌun ꞌinkꞌez hukwꞌelhꞌaz ꞌilhiz wheni, ꞌet Christ Jesus ꞌen ba ꞌilhunaoodúlhne neBá uzdólhtiꞌ hubaꞌ hoontꞌoh. ꞋEt ndo honeh.