Ephesians 2 - Yak'usda Ooghuni

Ye unzoo-i, ꞌi be dahjih

¹ ꞋInkꞌez nohni nintaꞌnahtꞌen ꞌinkꞌez nohlubeshi be dasáhtsai inleꞌ, ꞌet khahna nohulhtsi.

² ꞋEt ꞌoh daꞌ ndi yun kꞌut whe ꞌutꞌen kꞌunꞌa yinka dúlhtsꞌi inleꞌ. Mbe tazai kꞌuz ye ulhtus-i whe moodih tileh-un, ꞌet yutlꞌa hónꞌai, ꞌen netsudule ꞌen kꞌuneꞌ nohulꞌen-un inleꞌ. Mbene ꞌawhuz Yakꞌusda yukꞌunulheꞌustꞌenne, ꞌenne buyudinda.

³ ꞋOh daꞌ wheni cha whuz unꞌa za bukꞌunꞌa ꞌustsꞌintꞌoh inleꞌ. Neyustꞌe lubeshi tsꞌu nintꞌi, ꞌet whuz unꞌa za neyustꞌe ꞌutitꞌelh hukwaꞌ ninzun, ꞌinkꞌez ne-eni cha, ꞌet tsꞌiyawh ꞌutsꞌuholhꞌen inleꞌ. ꞋInkꞌez Yakꞌusda ndet whe bubulh hunilchꞌe-un, ꞌet cha neba whusaóotikulh ínleꞌ ꞌuyoonne kꞌunꞌa.

⁴ ꞋEt hoontsꞌi Yakꞌusda dalcho-i be nekꞌensiꞌ, ꞌet huwa tube cho negha teꞌninzun.

⁵ ꞋOh daꞌ nintaꞌtsꞌuntꞌen-un ꞌet whe yaidlane leꞌ tsꞌantꞌeꞌ. ꞋEt hoontsꞌi Christ ꞌen be Yakꞌusda tsꞌukhuna nesulhtsi. Ye unzoo-i, ꞌi be dahjih.

⁶ ꞋInkꞌez yakꞌuz tsꞌe Christ Jesus ꞌen bulh Yakꞌusda dunanedinla. Lhelhdun ndo yakꞌuz tsꞌe ꞌen yuzih nenéninla.

⁷ ꞋEt whe neBá dalcho ye unzoo-i nus de whudizulh-un whusaootiltsꞌulh, nduwhulyiz Christ Jesus ꞌen be neBá whunéuntilhtun. ꞋI be netsꞌun tizooꞌ wheꞌ hoontꞌoh.

⁸ Ye unzoo-i, ꞌi be be neba ꞌalha ꞌuhoontꞌoh-i gha uzdujih ꞌet huwa. ꞋAw whenichꞌoh negha iloh whe uzdujih. Yakꞌusda ꞌen negha óoninꞌai.

⁹ ꞋAw ꞌutꞌen unzoo-i, ꞌi gha iloh uzdujih. Doo ka la whulohne wheꞌ hududóltiꞌ.

¹⁰ Wheni Yakꞌusda ꞌuyinlane ꞌutsꞌintꞌoh ꞌet huwa. Christ Jesus ꞌen ooyúzdultsꞌi whe ꞌen be ꞌandidi natsꞌusdliꞌ, ꞌutꞌen unzoo-i ꞌuztilhꞌelh ha. ꞋEt whe whutso Yakꞌusda neba lhaóodinla. ꞋEt ookꞌoh nutsꞌóodilh ha.

Christ duzkaiꞌ ꞌi be Yakꞌusda be nghoh nenóhninla

¹¹ ꞋEt huwa whunalhnih, nohyustꞌe be ꞌudun yun kꞌut whutꞌenne ꞌahtꞌoh. Ndunne Lizwifne, mbe dune dula be hika dune unli-i kꞌut ustꞌúsne, ꞌenne ooka dune ꞌahli-i kꞌut ꞌaw lhítꞌus nohuhútni.

¹² ꞋEt ꞌoh daꞌ nohni Christ ooyit ꞌahtꞌoh inleꞌ. Israel ootsꞌu haíndene ꞌaw butoh lheꞌáhtꞌoh inleꞌ. Ndai Yakꞌusda duduneꞌne dughuni buba lhaídinla-i butsꞌú yoozi butsꞌun whusaootikulh-un, ꞌaw hoontsool-unyaz hoontsꞌi hoohꞌen ꞌaitꞌoh inleꞌ. ꞋAw hukwaꞌ itohꞌen-un hooloh ꞌinkꞌez Yakꞌusda ooyit ꞌahtꞌoh inleꞌ.

¹³ ꞋEt ꞌandit Christ Jesus ꞌen bulh ꞌahtꞌoh. ꞋOh daꞌ Yakꞌusda ooghu nilhdzaꞌ ꞌahtꞌoh inleꞌ, ꞌet hoontsꞌi Christ, ꞌen duzkaiꞌ, ꞌi be ꞌandit be nghoh ꞌahtꞌoh.

Christ ꞌen gha nedzi dizghel

¹⁴ Christ ꞌen gha nedzi dizghel. Ndi sih leꞌ ꞌuntꞌoh ꞌi ne-eguz, ꞌi be lhelhdun uzdilhtsꞌi inleꞌ. Ndi sih ꞌi neba hooloh yulhtsi. ꞋEt whe ꞌilhoh didowhne natsꞌusdliꞌ ꞌet huwa.

¹⁵ Moses be ꞌudustlꞌus ꞌukꞌu nusguz-i, ꞌi be Lizwifne ꞌinkꞌez ꞌudun yun kꞌut whutꞌenne lhchꞌaz uzditni inleꞌ, ꞌet neBá Jesus Christ duyustꞌe be neba gak whulhtsi. ꞋEt huwa wheni whutsodaꞌ nawh uzdidowh inleꞌ whe ꞌandit Jesus Christ bulh ꞌutsꞌintꞌoh. ꞋEt whuz unꞌa nawh didowhne ꞌilhoh uzdidowh za neulhtsi. ꞋEt huwa netoh whudizghel whulhtsi.

¹⁶ ꞋInkꞌez dutulalhgus ꞌi be nawh didowhne ꞌilho za neulhtsi. ꞋEt whe lhkꞌeke nabulhtsi. ꞋEt whuz unꞌa Yakꞌusda tsꞌu neoozdla. Ndi lhchꞌaz uzditni-un, dutulalhgus be ꞌet tsꞌiyawh neba gak whulhtsi.

¹⁷ ꞋInkꞌez nohni ꞌaw Yakꞌusda ghu nuní lhnuszutne, ꞌinkꞌez mbene Yakꞌusda ghu nuní nuzutne cha, Jesus Christ whusainya ꞌinkꞌez ꞌenne tsꞌiyawh khuni unzoo-i be tsꞌihꞌun unꞌa lhtsꞌun ꞌuhootꞌeꞌ ha, ꞌet ubudániꞌ.

¹⁸ ꞋEt huwa Jesus Christ ꞌen be wheni nawh didowhne ꞌilho za tsꞌuzdliꞌ whe Ndoni, ꞌen be neBá netlꞌa hónꞌai whe tsꞌiyawh ootsꞌuztoodilh ha.

Christ ꞌen tse yoh ookꞌu whuzꞌai-i unli

¹⁹ ꞋEt huwa ꞌutsꞌun whutꞌenne ꞌinkꞌez ꞌutsꞌun keyoh whutꞌenne ꞌahli inleꞌ, ꞌet ꞌandit ꞌet ꞌaw ndúlhahtꞌoh. ꞋEt kꞌus Yakꞌusda oochꞌeꞌne bubulh ꞌahtꞌoh. Yakꞌusda ooyoh dilhtsꞌine butoh ꞌahtꞌoh suhliꞌ.

²⁰ Nohni Yakꞌusda ooyoh léꞌahtꞌoh. Whelꞌaꞌne ꞌinkꞌez Yakꞌusda be nus hooꞌenne, tsꞌiyawh yoh ookꞌu whuzꞌaine hinli. ꞋInkꞌez nohni whunohodalhꞌeꞌ, ꞌet huwa bubulh ꞌáhtꞌoh. Christ ꞌen dichꞌoh ꞌukꞌenus tse yoh ookꞌu whuzꞌai-un unli whe ꞌuntꞌoh.

²¹ Jesus Christ ꞌen be yoh tsꞌiyawh whudutsꞌo whe ꞌuhóolya. ꞋEt ꞌi be neMoodihti ooyoh ꞌon nus whudiztiꞌ suliꞌ.

²² Nohni cha ꞌen be za lhadúlyane ꞌahli. ꞋEt whe Yakꞌusda Ndoni be nohyudinda.