Ephesians 1 - Yak'usda Ooghuni

Ephesus whutꞌenne Paul hadih ꞌubulhni

¹ Si Paul Jesus Christ ꞌen gha whelꞌaꞌ-un usdli. ꞋEt Yakꞌusda stsꞌu hukwaꞌ ninzun. Nohni Yakꞌusda oochꞌeꞌne keyoh Ephesus whutꞌine, nohni Jesus Christ ꞌaw oola doohtni ꞌaitꞌoh ndet la nohba ꞌalha ꞌuhoontꞌoh-un, nohni tsꞌiyawh hadih nohdusni.

² Yakꞌusda neBá ꞌinkꞌez Jesus Christ neMoodihti, ꞌen tsꞌun ye unzoo-i ꞌinkꞌez nohdzi dizghel-un nohgha óoninꞌai, nohbulh óotꞌeꞌ.

Christ, ꞌen naneonket

³ Yakꞌusda, Jesus Christ neMoodihti ooBá, ꞌen uzdílhtiꞌ. ꞋEn ꞌuntꞌoh Jesus Christ be yakꞌut whudiztiꞌ-un, ꞌet whunilhchoh Ndoni gha ndi negha ntꞌai.

⁴ NeBá ndi yun ꞌuitilelh whutso ꞌutahanéanla Jesus Christ ooyúzdutiltsꞌilh huba. ꞋEt whe lubeshi ooghu hoolohne tsꞌooleꞌ si, ꞌinkꞌez ꞌaw nekꞌehootaltsꞌulh-un hooloh. Ndi be lhkꞌetsꞌusiꞌ-i, ꞌi be neBá oobut ꞌet tsꞌoozooꞌ ha.

⁵ ꞋEt whe neBá ꞌudaꞌ neba lhaóodinla, wheni Jesus Christ ꞌen be dichꞌoh buzkehke ꞌuztileh ha. NeBá ꞌen ooba hoonzoo, didutchꞌoh hukwaꞌ ninzun, ꞌet whuz unꞌa ꞌuhoonla.

⁶ ꞋI gha ye unzoo diztiꞌ-i, ꞌi uzdólhtiꞌ. ꞋEt whuz unꞌa duYeꞌ yukꞌensiꞌ-un, ꞌen ooba sooꞌ tsꞌuldzooꞌ nesulhtsi.

⁷ Yakꞌusda neBá Jesus Christ ꞌen be duduzkaiꞌ be naneonket. ꞋInkꞌez nintaꞌtsꞌuntꞌen-un neba whunaꞌalhde. Ye unzoo-i dádiztiꞌ, ꞌet whuz unꞌa ꞌuniltsuk whe neba ꞌuhóonla.

⁸ Ye unzoo-i, ꞌi be lhanꞌun te ye whunih-i ꞌinkꞌez be tꞌeoonudzun-i, tsꞌiyawh ꞌi be ꞌet whuz unꞌa neba ꞌuhóonla.

⁹ Ndet la Yakꞌusda didutchꞌoh hukwaꞌ ninzun-i, neba wheꞌ hoontꞌoh hooyoh-un, ꞌet cha whunénilhtan. Dichꞌoh dudeni lhadínla, ꞌet whe hoontꞌiꞌ, ꞌet whuz unꞌa ꞌuhóoja.

¹⁰ ꞋEt whe ntsꞌoya hoozulh whula whusahóoltsꞌut de, ꞌet de ndet la yakꞌuz dilhtsꞌine, ndi yun dilhtsꞌine cha, ꞌenne tsꞌiyawh Christ ꞌen be ꞌilho za ubutilhtselh.

¹¹ Yakꞌusda dichꞌoh dudeni lhaídinla, ꞌet whuz unꞌa ꞌuwhutꞌen ꞌet huwa. ꞋEt ꞌudaꞌ neba lhaoodinla whe Jesus Christ ꞌen be netsꞌó tikulh-un nechꞌeꞌ whuzdliꞌ.

¹² ꞋEt wheni Lizwifne ꞌudechoo Christ, ꞌen ooka tse tsꞌuhooli. ꞋEt huwa wheni negha Yakꞌusda ye diztiꞌ-i dótiꞌ.

¹³ ꞋEn be khuni ꞌalhaꞌ ꞌuntꞌoh-i dáhtsꞌo. ꞋEt Jesus Christ nohba ꞌalhaꞌ ꞌuja. Ndi khuni, ꞌi gha duhjih. Jesus Christ hukwꞌelhꞌaz nohba ꞌalhaꞌ ꞌuja, ꞌet Ndoni, netsꞌú yoozi-un, ꞌen be nohehóodatꞌen Yakꞌusda oochꞌeꞌ suhliꞌ.

¹⁴ NeBá yutꞌi-i netsꞌu whutikulh-un, Yakꞌusda Ndoni negha ídinꞌai. ꞋI be ꞌet whuloh neba ꞌet neltsꞌut, mbene Yakꞌusda dichꞌoh duchꞌeꞌ ubulhtsine, ꞌenne nabootakulh ꞌet whutsꞌun. ꞋEt whe Yakꞌusda ye diztiꞌ-i, ꞌi dutátiꞌ.

Yakꞌusda ye whunih-i nohghaídoꞌalh, ꞌet huba tenadahdli

¹⁵ ꞋEt Jesus Christ neMoodihti nohba ꞌalhaꞌ ꞌuntꞌoh, ꞌinkꞌez Yakꞌusda oochꞌeꞌne, ꞌenne tsꞌiyawh bukꞌehsiꞌ, ꞌet nohbulh ꞌúdustsꞌo.

¹⁶ ꞋEt huwa si cha nohba tenadusdli-un whe nohba musi dusni, ꞌaw ꞌetsul ꞌudósnih ꞌaitꞌoh. ꞋAhoolhyiz stenadudli toh nohghuni zástan.

¹⁷ NeMoodihti Jesus Christ ooYakꞌusda, ꞌen ooBá ye diztiꞌ-i bulh ꞌuntꞌoh, ꞌen tsꞌun nohba tenadusdli whe Ndoni ꞌen be be whutnih-i ꞌinkꞌez noheni taoodutakulh-un, ꞌet nohtlꞌa hónꞌai. ꞋEt whe Yakꞌusda dantꞌoh-un unli, ꞌon nus tꞌentihzeh.

¹⁸ ꞋEt noheni be whunulꞌen kꞌunꞌa ꞌon nus hoohꞌen whe soo tsꞌihꞌun unꞌa lhat-un whuntilhꞌelh. ꞋEt whuz unꞌa njan uzdoojih ha nekaꞌ daniꞌ-un negha óoninꞌai, ꞌet hukwa itohꞌen, ꞌet tꞌewhuntihzeh. ꞋInkꞌez Yakꞌusda oochꞌeꞌne bulh ndi yutꞌi-i netsꞌú whutikulh-un tsꞌuwhutꞌi, dáwhuldzooꞌ wheꞌ hoontꞌoh, ꞌet tꞌewhuntihzeh.

¹⁹ Wheni mbe ooba ꞌalha ꞌuhoontꞌohne, Yakꞌusda ye ulhtus-i daltus whe netsꞌun ꞌuntꞌoh, ndi hooncha whe yé ulhtus-i, ꞌi be ꞌutꞌen. ꞋEt whuz unꞌa nohba tenadusdli.

²⁰ ꞋOh daꞌ Christ, ꞌen yaidlane toh dunadilhti. ꞋInkꞌez ndo yakꞌuz dughu nailhni tsꞌunkꞌus nátlꞌa idalhdaꞌ.

²¹ ꞋEt whutsꞌun Christ tsꞌiyawh buba ndo ꞌuntꞌoh. Mbene ꞌudetso whudilhdzulhne, butso whudilhdzulh. Mbene dune ando ꞌuntꞌohne, buba ndo ꞌuntꞌoh. Mbene la ulhtusne, ꞌenne cha kꞌuneꞌ bulꞌen. ꞋInkꞌez mbene la moodih unline, ꞌenne bumoodihti ꞌuntꞌoh. ꞋAndit ꞌaho ꞌinkꞌez whuz de whudizulh-un, ꞌet hoontsꞌi mbene la booziꞌ nchane, ꞌenne tsꞌiyawh Christ buba ndo ꞌuntꞌoh.

²² ꞋInkꞌez Yakꞌusda ꞌukꞌenus ye ulhtus-i, ꞌi be tsꞌiyaitsuk Christ duketlꞌah neíninla. ꞋInkꞌez Yakꞌusda ba ꞌilhunaoodulhne tsꞌiyai be ꞌenne tsꞌiyawh butso whudilhdzulh.

²³ Yakꞌusda ba ꞌilhunaoosdilne, ꞌenne tsꞌiyawh Christ ooyustꞌe ꞌutsꞌintꞌoh. Ooyustꞌe lhadúlyane tsinli. ꞋEn tsꞌutꞌi de, ꞌaw ꞌutsꞌun unꞌa ꞌutsꞌootꞌeꞌ hukwa lheꞌtsꞌuntiszil.