Colossians 4 - Yak'usda Ooghuni

¹ ꞋInkꞌez nohni moodih unline, noheꞌustlenne tsꞌihꞌun ꞌuntꞌoh-i ꞌinkꞌez lhgha ꞌuntꞌoh, ꞌi buba kꞌelha yulhꞌi. Tꞌeoonuhzun nohni cha ndo yakꞌuz tsꞌe nohMoodihti hoonli.

Ye unzoo-i, ꞌi bulh Christ ba tsꞌootꞌen

² ꞋAhoolhyiz tenadahdli. ꞋInkꞌez musi dahni.

³ Wheni cha neba tenadoohdli. Yakꞌusda neba dáhaꞌ dootan ooghuni be yatsꞌoolhduk ha. ꞋEt Christ ghun wheꞌ hoontꞌoh hooyoh-un, ꞌet tsꞌiyanne, tsꞌun howu yatsꞌoolhduk. ꞋAndit ꞌet huwa ꞌadusꞌai.

⁴ ꞋInkꞌez sba tenadoohdli, yatisduk-un tsꞌihꞌun unꞌa ꞌudoosniꞌ ha.

⁵ Ooba ꞌalhaꞌ lheꞌhootꞌohne, ꞌenne soo cho bughohleꞌ. Ndet ꞌandit nohghá whultsꞌut-un, whunih be ꞌuhoolhꞌen.

⁶ ꞋAhoolhyiz nohghuni unzoo-i be bubulh yaoolhduk. ꞋEt huwa tꞌeoonóhzin buba hootazooꞌ kꞌunꞌa, ꞌet ꞌilhoghun hinli whe bubulh yátilhduk.

ꞋUdekꞌez khuni butlꞌa náditꞌai

⁷ Ndun Tychicus, ꞌen neulhutsin ookꞌetsꞌinsiꞌ-un, ꞌinkꞌez neMoodihti ꞌen ba tsꞌihꞌun unꞌa nela ꞌutꞌen, ꞌinkꞌez Jesus Christ ba sulh ꞌulhna unli. ꞋEn si sghun tsꞌiyawh nohdutánelh.

⁸ ꞋInka ꞌet huwa nohtsꞌú tísꞌaꞌ. ꞋEt datohtꞌoh-un soo cho tꞌewhuntizeh ha, ꞌinkꞌez nohdzi do naꞌyooleh.

⁹ Onesimus ꞌen yulh tiꞌus. ꞋEn cha tsꞌihꞌun unꞌa neulhutsin ꞌinkꞌez wheni tsꞌiyawh ookwꞌetsꞌinsiꞌ, nohbulh ꞌilhoghun ꞌuntꞌoh. ꞋEnne bugha njan tsꞌiyawh dawhutꞌen-un tꞌewhuntihzeh.

¹⁰ Aristarchus, ꞌen cha sulh ꞌadinꞌai ꞌinkꞌez hadih nohúlhni. ꞋEt Barnabas oonat-un, Mark, ꞌen cha hadih nohúlhni. Ootsun datítꞌelh-un, ꞌet ꞌudaꞌ tꞌeoonáhzun. Nohghu ninya de, soo cho hoonáhtꞌiꞌ whe nohghoyaꞌ.

¹¹ ꞋEt Jesus, Zoosta cha huyulhni, ꞌen cha hadih nohúlhni. ꞋEnne tsꞌiyawh yuka dune unli-i kꞌut ꞌustꞌusne ꞌúhintꞌoh. ꞋEnne za Yakꞌusda dune kꞌúneꞌ bulꞌen-un, ꞌet huba slaꞌ hutꞌen, ꞌinkꞌez sóo slaꞌ hutꞌen.

¹² Epaphras ꞌen cha nohbulh ꞌilhoghun ꞌuntꞌoh, ꞌinkꞌez hadih nohúlhni. Christ ooba ꞌulhna ꞌuntꞌoh. Soo kꞌus hooncha whe nohba tenadudli. ꞋEt whe Yakꞌusda nohtsꞌun hukwaꞌ ninzun-un, tsꞌihꞌun unꞌa ꞌen ba nudútalhyalh ꞌinkꞌez lhadúlyane cha tihleh.

¹³ ꞋAlha ꞌudusni, hooncha whe nohba nintꞌi. ꞋAw nohni za iloh, ndunne Laodicea whutꞌenne cha ꞌinkꞌez ndunne Hierapolis whutꞌenne, ꞌenne cha.

¹⁴ Luke ꞌen yoo be duyun unli, ꞌen tsꞌiyawh ookꞌetsꞌinsiꞌ ꞌinkꞌez Demas ꞌen cha hadih nohúlhni.

¹⁵ Ndunne Laodicea whutꞌenne neulhutsinke, ꞌenne tsꞌiyawh hadih neba budóhni. ꞋInkꞌez Nymphas, ꞌen cha, ooyoh Yakꞌusda ba ꞌilhunaoodulhne, ꞌenne cha hadih sba budóhni.

Ye unzoo-i nohbulh óotꞌeꞌ

¹⁶ Nohnichꞌoh nohtoh ndi ꞌudustlꞌus ookꞌu yalhduk de, mbene la Laodicea Yakꞌusda ba ꞌilhunaoodulhne, ꞌenne cha hikꞌu yaoolhduk hubaꞌ hoontꞌoh. ꞋEt ndai ꞌudustlꞌus butsꞌo tlꞌa iyanꞌai-i, ꞌi cha nohni cha ookꞌu yaoolhduk.

¹⁷ ꞋInkꞌez Archippus ꞌen dóhniꞌ, “NeMoodihti ndet ntlꞌa hónꞌai-un, tsꞌiyawh lhaoodonleh. ꞋEt whuz unꞌa la lhaoodonleh”.

¹⁸ Sichꞌoh sla be hadih dusni whe ꞌukꞌu nusúsguz, “Paul”. Ndi sluztih tlꞌoolh be ꞌadusꞌai oonaoodoolhnoh junih. Ye unzoo-i nohbulh ootꞌeꞌ. ꞋEt ndo honeh.