Colossians 3 - Yak'usda Ooghuni

Neyustꞌe lubeshi whutsꞌu nintꞌi-un whulazdootni kꞌus Christ netsꞌu hukwaꞌ ninzun-un, ꞌet za hukwaꞌ ꞌuznoozin

¹ ꞋEt huwa Christ ꞌen bulh dunadahdil de, ꞌet ndo Yakꞌuz tsꞌe dahoontꞌoh la ꞌet za hukwaꞌ ꞌuntihzilh. ꞋEt Christ Yakꞌusda nailhni tsꞌunkꞌus usda.

² Ndo yakꞌuz tsꞌe dahoontꞌoh la ꞌet za noheni toh whudólhꞌaꞌ, ndi yun kꞌut ꞌuhoontꞌohꞌun, ꞌet iloh huwun nuní nahzut.

³ Dasáhtsai leꞌ ꞌahtꞌoh ꞌinkꞌez ꞌilhiz be háhna-i, ꞌi Christ ꞌen bulh Yakꞌusda bulh ꞌilho sahleꞌ.

⁴ Christ ꞌen be tsꞌúkhuna-i ꞌuntꞌoh. ꞋIlhudzin be hoodutaltsilh ꞌet ꞌoh de nohni cha ye diztiꞌ-i, ꞌi be ꞌen bulh whuz unꞌa ꞌutihnelh.

⁵ ꞋEt huwa ndi yun kꞌut nohyustꞌe daootsah-un howa núlhtih. Ninta lheꞌzoohtꞌen, nintaꞌtsꞌutꞌih-un, ꞌinkꞌez whudutsun tuneꞌ oohtꞌen junih, ꞌinkꞌez nintaꞌuztitꞌelhꞌun, ꞌet hukwa lheꞌnuzooszin, hoontsiꞌ tuneꞌ utihtꞌen-un hukwaꞌ noohzin junih, ꞌinkꞌez ꞌuyoonne chꞌeꞌ haꞌ noohzin junih, ꞌet ꞌukꞌeltsi neba ꞌalhaꞌ ꞌuntꞌóh-un leꞌ hoontꞌoh.

⁶ ꞋEt whula gha tsꞌe, mbene la ndutꞌenne, ꞌenne bugha Yakꞌusda ye hunilchꞌe-i, yukꞌunulheꞌustꞌenne, ꞌenne tsꞌiyawh butsꞌu hóoltsꞌulh.

⁷ ꞋOh daꞌ nohni cha ꞌet za ndáhtꞌen inleꞌ.

⁸ ꞋEt hoontsꞌi ꞌandit njan ndahtꞌen-un tsꞌiyawh whula doohtni hubaꞌ hoontꞌoh. Huzahke-un, hunulhchꞌoh cha, kꞌunáhdzun, Yakꞌusda chꞌaz yalhduk-un, khuni untsiꞌ-i bé yalhduk,

⁹ ꞌinkꞌez lhunoohtꞌah junih. ꞋEt ꞌudaꞌ datsꞌintꞌoh la inleꞌ, ꞌun whutulhdil ꞌet huwa.

¹⁰ ꞋInkꞌez ꞌandit ꞌuyoonne nasahdliꞌ. ꞋEt mbe whuz unꞌa ꞌuneyinla, ndet ooghun tꞌetsꞌoninzun-un, ꞌet ꞌi be ꞌon nus ulhtusne natsꞌusdliꞌ. ꞋEt whe ntsꞌenꞌa Christ unli-un, ꞌen ookꞌunꞌa ꞌutsꞌootꞌeꞌ ha.

¹¹ Mbene la ooba ꞌalha ꞌuhoontꞌohne, ꞌenne tsꞌiyawh lhunduhúltꞌoh. ꞋAw Greekne kꞌus Lizwifne hooloh. ꞋAw yuka dune unli-i kꞌut ꞌustꞌusne kꞌus ꞌaw lhitꞌusne cha, ꞌutsꞌiz de haindene kꞌus Scythia whutꞌenne cha, ꞌulhnane kꞌus bula nahuditnine dune cha, ꞌenne tsꞌiyawh. ꞋEt hoontsꞌi Christ ꞌen za tsꞌiyai unli ꞌinkꞌez tsꞌiyawh nebulh ꞌúntꞌoh.

ꞋAndit dune nasdliꞌ-un dantꞌoh la

¹² Yakꞌusda ꞌutahanóhanla ꞌet whe oochꞌeꞌ ꞌahli, ꞌinkꞌez nohkꞌensiꞌ. ꞋEt huwa ndiz unꞌa oohtꞌeꞌ. ꞋUyoonne gha teꞌnoohzin, ꞌuyoonne tsꞌun oohzooꞌ, yo ꞌududólhdzin, ꞌinkꞌez ꞌuyoonne nanilhtsulyaz neꞌboolhꞌen. ꞋInkꞌez tsꞌiyantsuk saꞌ whe dzoh nutihzut-un whulh oohyin.

¹³ Lhulh sooꞌ tsꞌintꞌoh, ꞌinkꞌez tsꞌiyantsuk lhba whunawhudulhneh. Nohtoh ꞌilhoghun ꞌuyoon kꞌehoonꞌai de, ntsꞌenꞌa Christ nohba whunaoodilhnoh, nohni cha whuz unꞌa za buba whunaoodoolhnoh.

¹⁴ Be lhkꞌetsꞌusiꞌ-i, ꞌi ꞌudetso netsꞌóoꞌalh. ꞋI be ꞌukꞌenus hoonzoo whe ꞌilhoh ꞌutsꞌintꞌoh.

¹⁵ ꞋInkꞌez Yakꞌusda be nedzi dizghel-i, ꞌi be nohdzi yo kꞌuneꞌ hoolꞌen ꞌutahanóhanla ꞌilho yustꞌe ooleꞌ ha. ꞋInkꞌez musi noohzin.

¹⁶ Christ ooghuni be whutnih-i cha soo cho nohdzi yo hóleꞌ. Yakꞌusda ooghuni be ꞌahjun. Shun be teniꞌ uznilhdzun-i cha. ꞋEt Ndoni be ꞌahjun. Whulhodulhꞌeh ꞌinkꞌez lhgha dáhtni. Be hoonzoo-i, ꞌi be nohdzi yo hóleꞌ, ꞌinkꞌez neMoodihti tsꞌun ꞌahjun.

¹⁷ ꞋInkꞌez dahtꞌen nohghuni ꞌinkꞌez nohꞌeꞌutꞌen whe cha, Jesus neMoodihti booziꞌ, ꞌi be ndahtꞌen. ꞋInkꞌez ꞌen be Yakꞌusda neBá, ꞌen tsꞌun musi dahni.

Lhuzkehkene Yakꞌusda ooba ꞌalhaꞌ ꞌuntꞌohne

¹⁸ Nohni tsꞌekoo nohkike butlꞌaꞌ dudulhye, ꞌet neMoodihti ba hoonzoo wheꞌ hoontꞌoh.

¹⁹ Dune nohꞌatke bukꞌeoohsiꞌ. ꞋInkꞌez bube zóohlaꞌ junih.

²⁰ Tsꞌoodunne tsꞌiyantsuk whe nohdusneke bukꞌuneꞌ oohten. ꞋEt ndahtꞌen de, neMoodihti hoontꞌiꞌ.

²¹ ꞋInkꞌez dunene nohuzkehke hubunólhchꞌeh junih! Doo ka si iloh tuneꞌ hutꞌen hooleꞌ.

²² Nohni ꞌustlenne unline, ndi yun kꞌut nohmoodih unline, ꞌenne tsꞌiyawh bukꞌuneꞌ oohtꞌen. Nohmoodih nohnilhꞌen te za oohtꞌen junih. ꞋEt hoontsꞌi nohdzi tsꞌihꞌun unꞌa whe Yakꞌusda bé nulhjut, ꞌinkꞌez nohmoodihne bukꞌuneꞌ oohtꞌen.

²³ ꞋInkꞌez dahtꞌen-un nohdzi ndulcho-i be ndóhtꞌen. Ndahtꞌen-un neMoodihti za ba ꞌahtꞌen ꞌaw dune ba iloh ꞌahtꞌen.

²⁴ Tꞌeoonúhzun neMoodihti nohtsꞌu yoozi-i, ꞌi nohgha ítalelh. Christ neMoodihti ꞌen be ꞌulhnane ꞌahli ꞌet huwa.

²⁵ ꞋEt hoontsꞌi tankꞌus ítꞌelhne, ꞌenne whuz unꞌa buba ꞌukꞌelha whutaleh. ꞋInkꞌez neBá nalh tsꞌiyawh lhgha za ꞌutsꞌintꞌoh ꞌet huwa.