Colossians 2 - Yak'usda Ooghuni

Ndi yun kꞌut khuni, ꞌi ꞌantsꞌi ꞌúntꞌoh, Christ ꞌen ꞌudetso ꞌuntꞌoh

¹ ꞋEt nohni Laodicea whutꞌenne, ꞌinkꞌez mbene la ꞌaw sulhiꞌelne, nohni tsꞌiyawh tꞌewhuntihzeh ꞌet nohtsꞌu hukwaꞌ nuszun, dawhulcho-i be hoolhtus whe nohba hukwaꞌ ꞌustꞌen.

² ꞋEt budzi do naꞌootneh ꞌinkꞌez be lhkꞌetsꞌusiꞌ-i be ꞌilho nahoodleꞌ. ꞋEt whuz unꞌa ndi Yakꞌusda be wheꞌ hoontꞌoh hooyoh-un, daltsuk ꞌuzooꞌ-i, ꞌi beꞌ hoontꞌoh, ꞌi tsꞌiyawh soo tsꞌihꞌun unꞌa tꞌewhuntiszeh. NeBá ꞌinkꞌez Christ cha, ꞌenne bughun ꞌuhoontꞌoh.

³ Dawhuldzooꞌ-i be tsꞌuwhunih-i ꞌinkꞌez daldzooꞌ-i be tꞌeoonúdzun-i cha, ꞌi tsꞌiyawh ꞌen ooyo tsꞌe neba whuntilhꞌi.

⁴ Njan nohdusni khun ꞌuyoonne soo yahalhduk whé nanohonooꞌah junih.

⁵ ꞋAw syustꞌe be nohbulh lheꞌustꞌoh. ꞋEt hoontsꞌi syughi ꞌi be nohbulh ꞌustꞌoh. ꞋInkꞌez hoonustꞌiꞌ whe tsꞌihꞌun unꞌa neꞌahtꞌen-un ꞌinkꞌez Christ ulhtus-i be nohba ꞌalhaꞌ ꞌuntꞌoh, ꞌet tsꞌiyawh tꞌeoonúszun.

⁶ ꞋEt huwa ntsꞌenꞌa Christ Jesus ꞌen neMoodihti úlhchoot, ꞌet whuz unꞌa ndi yun kꞌut dúlhtsꞌi.

⁷ ꞋEn be ꞌantsꞌi nohghih whuzdliꞌ leꞌ ꞌahtꞌoh, ꞌinkꞌez ꞌen be ulhtus sáhli. ꞋEt whuz unꞌa nohba ꞌalha ꞌuhoontꞌoh-un, ꞌen bulh ꞌilho oohleꞌ ha. ꞋEt whunanohodalhꞌeꞌ, ꞌet whe ꞌon nus ulhtusne tihle. ꞋEt huwa lhkꞌuz te musi dáhtni.

⁸ Huwahli doo ka la ꞌuyoonne nanohonooꞌah bukꞌúneꞌ oohtꞌen ha. Dune dichꞌoh dukꞌunꞌa nuní hunuzut-un, kꞌus ꞌantsꞌi khuni be yáhalhduk-un, kꞌus dune didutchꞌoh dukꞌoh tsꞌe huhutni, kꞌus ndi yun kꞌut huwu ni hukwꞌunꞌa dune hohodulhꞌeꞌ. ꞋAw njan Christ ookꞌunꞌa iloh.

⁹ Yakꞌusda dantꞌoh la unli, ꞌet Christ ꞌen tsꞌiyawh ꞌilho yustꞌe za yudinda ꞌet huwa.

¹⁰ ꞋInkꞌez nohni cha ooyudúlhtsꞌi, ꞌet whe lhadíntꞌohne suhliꞌ. Njan dune ꞌudetso whudilhdzulh-un ꞌinkꞌez dune ando ꞌuhintꞌoh-un, Christ ꞌaw ꞌen za tsꞌiyantsuk kꞌuneꞌ whulꞌen.

Moses be ꞌudustlꞌus ookꞌuneꞌ tsꞌutꞌen-un, Christ tsꞌiyawh neba gak whulhtsi

¹¹ ꞋInkꞌez ꞌen be nohuhúztꞌus leꞌ ꞌahtꞌoh. ꞋAw dune oola be lheꞌhóonel. Lubeshi nohyustꞌe be ꞌulhꞌen-i, tsꞌiyawh nohyustꞌe yuchꞌa nayuzdla. Whuz unꞌa Christ ꞌunohínla.

¹² Too be ꞌúlhneh whe ꞌet ꞌantsꞌi hiyulh ánohalhti léꞌahtꞌih. ꞋInkꞌez Yakꞌusda be ꞌutꞌen-i, ꞌi be yaidlane toh Christ dunabudinla, ꞌet nohba ꞌalha ꞌuhoontꞌoh. ꞋEt ꞌi be dunabudinla, ꞌet whuz unꞌa nohni cha hiyulh dúnanuhodinla wheꞌ hoontꞌoh.

¹³ ꞋInkꞌez nohni nintaꞌahtꞌih-un ꞌinkꞌez nohyustꞌe kꞌut ꞌaw lhunohuhítꞌus, ꞌet huwa dazahtsai whe ꞌahtꞌoh. ꞋEt hoontsꞌi ꞌandit ꞌen bulh nakhíhtnaꞌ whe ꞌahtꞌoh. Tsꞌiyawh whe tankꞌus ꞌútsꞌitꞌen-un neba whula ditni.

¹⁴ Dune neꞌhutitꞌen-un Moses ooghuni ꞌukꞌu neyuzguz-i nedulhyoh ꞌuhoontꞌohꞌun, ꞌet tsꞌiyawh neba whusanáhonꞌai. Ndi ꞌukꞌehóoguz-un, ꞌet nedulhyo tsꞌe hoontꞌoh. ꞋAw whenghu tsꞌóyaꞌ ꞌaitꞌoh. Ndi khuni yílhchoot ꞌinkꞌez tulalhgus kꞌut wheyundunilhtꞌo whe tsꞌiyawh neba gak whulhtsi.

¹⁵ Ndunne ntsiꞌ-i nududehne ꞌudetso whudilhdzulhne, ꞌinkꞌez dune ando ꞌuhintꞌoh-un cha, ꞌet whe hilhtus-un tsꞌiyawh bughu nahóolhchoot. Tsꞌiyanne nalh yooya ꞌubulhtsi. ꞋEt whe buchꞌaꞌ nilhde.

¹⁶ ꞋEt huwa ndai ꞌahꞌalh-i ꞌinkꞌez ndai ꞌahtnai cha, kꞌus budzenis whuti, ꞌinkꞌez sa iꞌaih-un cha, ꞌinkꞌez Lizwif nahulyis dzin cha, ndi ꞌi tsꞌiyawh ꞌet huwun nohodoolhtsiꞌ junih.

¹⁷ ꞋOhwhi ꞌantsꞌi tsa whusꞌih leꞌ hoontꞌoh. ꞋEt hoontsꞌi nus de whusawhutiltsꞌulh-un, Christ oochꞌeꞌ ꞌuhoontꞌoh, ꞌet za tsꞌihꞌun ꞌuhoontꞌoh.

¹⁸ Ndet whuchꞌa oonúlhde-un nohghá whultsꞌut khun ꞌuyoonne nohghu ha óodunitꞌah de, khun bukꞌoh tsꞌe oohneh junih. Ndutꞌenne huhoontꞌiꞌ whe huwhutsꞌit whe dudzi yo ꞌuhilhdzun naꞌhududilꞌi. ꞋInkꞌez lizas tsꞌun tenahududli. ꞋInkꞌez ndet la ꞌaw lhuhuhóoꞌel-un cha tꞌehonínzun naꞌhududilꞌi. ꞋInkꞌez buyustꞌe whutsꞌun nintꞌi-un, ꞌet whuz unꞌa ꞌuhuninzun. ꞋI be ꞌantsꞌi nahúchun leꞌ hutꞌen.

¹⁹ ꞋInkꞌez Jesus netso whudilhdzulh-un, ꞌen ooyustꞌe ꞌutsꞌintꞌoh. ꞋEn ꞌaw soo cho lhuhuyootun. ꞋEt ꞌen gha ꞌon nus tsꞌilhtus lheh. ꞋInkꞌez ꞌen gha tsꞌiyawh ꞌilho ꞌuztileh. ꞋEt whuz unꞌa ooyustꞌe nuyeh. Ndai nuyeh-i, ꞌi Yakꞌusda ꞌen ꞌuhóonla,

²⁰ ꞌudekꞌez ndi yun kꞌut nohba ꞌalha ꞌuhoontꞌoh-un, ꞌet whuchꞌa Christ ꞌen bulh dasáhtsai leꞌ ꞌahja. ꞋInkꞌez ꞌandit dzin ꞌet di ha ꞌawhuz hukwꞌuneꞌ ꞌahtꞌen?

²¹ Ootꞌa oohnalh junih! Khun oonahóhlih junih! Nóhleꞌ junih! ꞋEt za whunohodalhꞌeꞌ.

²² Ndi nduntꞌoh-i, ꞌi tsꞌiyawh gak whulhih. Khuni netlꞌa ditꞌai-i ꞌinkꞌez dune whuneoodalhꞌeꞌ-un, ꞌet whuz unꞌa za ꞌuhoontꞌoh.

²³ ꞋEt tsꞌiyawh be tsꞌuwhunih-i bulh ꞌuntꞌoh leꞌ ꞌuntꞌoh. ꞋEt whe dune dichꞌoh dukꞌunꞌa tenahududli huwhulhtsi. Teꞌhududilꞌen naꞌhududilꞌi. ꞋInkꞌez duyustꞌe dzoh nahuyulhdzut. ꞋEt hoontsꞌi ꞌohwhi ꞌaw hoonli lhuhooloh. ꞋEt ndúhoontꞌoh-un tsꞌiyawh ꞌaw neyustꞌe lubeshi whutsꞌu nintꞌi-un, ꞌaw ꞌet whuchꞌa nela ꞌewhudoneh ꞌaitꞌoh.