Acts 9 - Yak'usda Ooghuni

Saul Jesus Christ tsꞌu nálhꞌa

¹ ꞋEt hoozulh whe Saul neMoodihti yugha hodulꞌehne húnilchꞌe kꞌet tsꞌiyawh butighan huwu yalhduk ꞌinka Lizwif lubret ꞌukꞌenus díztiꞌ-un tsꞌú whenya,

² ꞌinkꞌez yoodulhkut keyoh Damascus huwhutni tsꞌe Lizwif bulugliz whulubretne duba butsꞌó kꞌehooꞌooges butsꞌu húkwaꞌ ꞌutni, ndunne Jesus kꞌunꞌa ꞌuninzunne tsꞌiyawh dune ꞌinkꞌez tsꞌekoo cha ꞌabule, ꞌinkꞌez Jerusalem tsꞌe nabutoolaꞌ ha ꞌet wheni.

³ ꞋEt Saul Damascus whenghoh uyalh whe, ꞌet khuntsul ndus de whutsꞌun oonat tube kwun ulhtus-i diznukw.

⁴ ꞋInkꞌez yun ꞌet náltsꞌut ꞌinkꞌez laꞌ whutni, “Saul di ha dzoh nusílhdzut whe ꞌintꞌen?”

⁵ “Moodihti mbe inli?” ni Saul. “Si Jesus ꞌustꞌoh. Si ꞌusilhꞌen dzoh nusílhdzut. Mbe la tutsus nulé-un ookꞌú nulheꞌzintꞌen de, nyunchꞌoh za dzoh nunáꞌdudildzut,” yúlhni.

⁶ ꞋEt dutlut ꞌinkꞌez ooba hooncha, ꞌinkꞌez ꞌutni, “SMoodihti ndet datísnelh-un stsꞌu hukwaꞌ ninzun?” ꞋInkꞌez neMoodihti uyúlhni, “Dunadindaih ꞌinkꞌez keyoh tsꞌe ínyalh. ꞋEt dune datánelh-un nyodóniꞌ,” yúlhni.

⁷ Nyoonne dune Saul bulh nudilhne ꞌilhiz nehúnindil ꞌinkꞌez tꞌehudínel, yaduk hodidtsꞌo hoontsꞌi ꞌaw dune lhuhisꞌen.

⁸ Saul dunadija ꞌinkꞌez yutánꞌen whe lhuhoos̱ꞌen suliꞌ. ꞋInka hila ilhchoot ꞌinkꞌez Damascus tsꞌe huyoolhya.

⁹ Tat dzin ꞌet ꞌaw lhuhoos̱ꞌen. ꞋEt ndulyiz whe ꞌaw lheꞌusꞌal ꞌinkꞌez too hoontsꞌi lhusnaiꞌ.

¹⁰ ꞋEt keyoh Damascus ꞌet la ꞌilhoghun ooba ꞌalha ꞌuhoontꞌoh-un, Ananias huyúlhni, ꞌen be nghun néwhultsꞌut whe neMoodihti yulh yátilhduk ꞌinkꞌez ndutni, “Ananias” yúlhni. ꞋEt ꞌaho Ananias, “SMoodihti, njan susda,” yúlhni.

¹¹ ꞋEt neMoodihti uyúlhni, “Lhadíntneh ꞌinkꞌez ti lhtsꞌe oodizꞌa huwhutni tsꞌe whuz inyalh Judas ooyoh tsꞌe, ꞌinkꞌez dune Tarsus whutꞌen-un, Saul huyúlhni-un, ꞌen ookaꞌ oodolhkut. ꞋEt tenadudli whe ꞌuntꞌoh.

¹² ꞋInkꞌez be nghun néwhultsꞌut whe Ananias huyúlhni-un, ꞌen la daninya yunilhꞌen ꞌinkꞌez yutsi kꞌut dilhni hoonꞌen naoodleꞌ ha.”

¹³ Ananias ꞌet la uyúlhni, “NeMoodihti lhane dune ndun Saul ꞌen bulh ꞌudastsꞌo, njan ꞌet ndúja. Jerusalem whutꞌenne, nchꞌeꞌne, lheꞌulcho ꞌi be dzoh nubulhde whe ꞌuntꞌoh.

¹⁴ ꞋInkꞌez ndiz Damascus tsꞌe oozya lubret moodihne mbene la ooba ꞌalha ꞌuhoontꞌoh ilhchootne ꞌinkꞌez nyooziꞌ be yalhduk, tsꞌiyawh ꞌaboolelh ha higha óoninꞌai.”

¹⁵ Moodihti ꞌet uyúlhni, “Inyalh ꞌinkꞌez dája nyudúsni-un ꞌuhoonleh. Si Saul ꞌutahásti whe ꞌuntꞌoh, sbaꞌ titꞌelh ꞌet wheni. ꞋUdun yun kꞌut whutꞌenne, lerwene cha ꞌinkꞌez Israel ootsꞌu hainzutne cha tsꞌiyawh si sghun tꞌehonózin ꞌet whúbuntilhtun ꞌet wheni.

¹⁶ ꞋEt ꞌinkꞌez sichꞌoh whúntistun datꞌen whe si sgha dzoh nutizut-un huwun.”

¹⁷ ꞋInka Ananias whuz whenya ꞌinkꞌez yoh danínya whe Saul yekꞌédilni ꞌinkꞌez ndutni, “Saul, sulhutsin neMoodihti sutílhꞌaꞌ, Jesus dichꞌoh, ndiz ínyalh whe ti nye nghun be hóodiltsai-un, ꞌen sutílhꞌaꞌ honꞌen naoondleꞌ ꞌinkꞌez Ndoni nyudóoltsꞌit ha.”

¹⁸ ꞋEt ꞌaho hoonliyaz ꞌugoos ndultꞌoh-i Saul oona kꞌéhayankat, ꞌinkꞌez ꞌaho hooꞌen nasdliꞌ. Dudinya ꞌinkꞌez too béꞌ ꞌulya.

¹⁹ Hukwꞌelhꞌaz ꞌet ꞌanꞌal ꞌaho ulhtus násdliꞌ. ꞋEt Saul Jesus yugha hodulꞌehne dzoh saꞌ dzin Damascus ꞌet buzih indaꞌ.

Damascus ꞌet Saul khuni unzoo-i be bubulh yálhduk

²⁰ ꞋEt ꞌaho Lizwif bulugliz tsꞌe danínya ꞌinkꞌez Christ ghun bubulh yáwhenilhduk, “ꞋEn Yakꞌusda ooYeꞌ ꞌúntꞌoh,” ubúlhni.

²¹ Mbene la yuditsꞌóne tsꞌiyawh buba hooncha ꞌinkꞌez ꞌulhodutni, “Ndun dune Jerusalem ꞌet ndi yooziꞌ be yalhdukne, ꞌenne ubughan ꞌen ꞌuntꞌoh ꞌinkꞌez ꞌet huwa za ndiz oozya ndunne ubitálhchulh ꞌinkꞌez lubret moodihne tsꞌu nábutilelh ꞌet wheni.”

²² ꞋEt hoontsꞌi Saul ooghuni ꞌon nus ulhtus whe dune bubulh yálhduk ꞌinkꞌez Jesus ꞌen Christ ꞌuntꞌoh tsꞌihꞌun buba ꞌálhaꞌ hoontꞌoh ꞌubulhtsi kꞌet Lizwifne Damascus whutꞌenne ꞌaw dája hidóniꞌ ꞌaitꞌoh.

²³ ꞋEt lhat dzin inleꞌ whe Lizwifne ꞌilhúhozdil ꞌinkꞌez Saul ntsꞌenꞌa la hituzilhghelh huwun lhahódinla.

²⁴ Dzin ꞌinkꞌez ꞌulhdzis ibulh njan keyoh hukwuti-un ꞌahoolhyiz huwu hinli hituzilhghelh ha, ꞌet hoontsꞌi Saul dahítilelh-un ꞌet tꞌewhunanzin.

²⁵ ꞋEt ꞌilhe ꞌúlhdzis Jesus yugha hodulꞌehne Saul huyílhchoot ꞌinkꞌez sih keyoh whunasúꞌa-i ookonínꞌa-un, ꞌet hukwaꞌ húyalhti ꞌinkꞌez chalhyal cho be húyalhti ꞌinkꞌez yoo ꞌaz tsꞌe nahúyalhdlukw.

Saul Jerusalem tsꞌe oozya

²⁶ ꞋEt Saul Jerusalem tsꞌe oozya ꞌinkꞌez Jesus yugha hodulꞌehne butsꞌú nedojaꞌ hukwa ꞌutꞌen, ꞌet hoontsꞌi ꞌen ꞌaw Jesus yugha hodulꞌeh-un ꞌuntꞌoh lhonízun, ꞌinkꞌez tube huyé nuljut.

²⁷ ꞋEt hoontsꞌi Barnabas yughu ninya ꞌinkꞌez yula ꞌuja whe whelꞌaꞌne butsꞌú yoolhti ꞌinkꞌez la ubudániꞌ dája whe Saul ti uyalh whe neMoodihti inꞌen ꞌinkꞌez yulh yaílhduk cha ꞌuja. ꞋInkꞌez ubúlhni datꞌen whe ꞌaw lhníljut whe Damascus whutꞌenne Jesus booziꞌ gha bubulh yálhduk.

²⁸ ꞋEt Saul buzih netlꞌa dindaꞌ ꞌinkꞌez Jerusalem ndulcho whe nuya, ꞌaw lhníljut whe Jesus booziꞌ gha Yakꞌusda ooghuni be bubulh yálhduk.

²⁹ Lizwif, Greek kꞌuyalhdukne, ꞌenne cha bubulh yálhduk ꞌinkꞌez bubulh húkwꞌu nuhúlhyeꞌ ꞌet hoontsꞌi hizoolhghelh hukwaꞌ huyulhꞌen.

³⁰ ꞋEt ndunne ooba ꞌalha ꞌuhoontꞌohne náhuhoonꞌai whe Saul Caesarea tsꞌe buchꞌa húyoolhti. ꞋInkꞌez la dukeyoh, Tarsus huwhútni, tsꞌe whehúyalhꞌaꞌ.

³¹ ꞋEt ndulcho whe Judea, Galilee, ꞌinkꞌez Samaria whulh Jesus ba ꞌilhúhozdilne ꞌaw dzoh nulhuldehne hooloh. Yakꞌusda ehunuljut, ꞌinkꞌez buba hoonzoo whe lhódizut. Ndoni gha ooba ꞌalha ꞌuhoontꞌohne ulhtus úbulhtsi. ꞋEt huwa ꞌon nus lhane huzdliꞌ ꞌinkꞌez neMoodihti za hudílhtiꞌ suliꞌ.

Keyoh Lydda ꞌinkꞌez Joppa huwhútni-un, ꞌet Peter huwa ꞌítꞌen tuneꞌ ꞌútꞌen

³² ꞋEt ꞌawet Peter soo ndulcho whe nuya. ꞋEt ꞌilhoh Yakꞌusda oochꞌeꞌne, Lydda whutꞌenne bughu ninya,

³³ ꞌenne butsꞌú nuya whe ꞌilhoghun dune, Aeneas huyúlhni, ghu ninya. ꞋEn la lhkꞌu dit yus kꞌut délhdusni ꞌinkꞌez la sulhti za ꞌuntꞌoh.

³⁴ ꞋInkꞌez Peter uyúlhni, “Aeneas Jesus Christ soo naꞌunyinla! Dudinyaih ꞌinkꞌez nlili kꞌut soo náꞌhoonleh,” yúlhni. ꞋAho Aeneas dudinya.

³⁵ ꞋInkꞌez keyoh Lydda ꞌinkꞌez Sharon huwhutni-un whutꞌenne ndun dune Aeneas huyanꞌen whe tsꞌiyawh neMoodihti hitsꞌu nálhya.

³⁶ ꞋEt keyoh Joppa huwhútni-un ꞌilhoghun tsꞌeke ꞌet whutꞌen-un Tabitha huyulhni. ꞋEn ooba ꞌalha ꞌuhoontꞌoh-un. Booziꞌ Greek kꞌunꞌa “Dorcas” huyúlhni ꞌet “Yestsꞌe” ni whe ꞌutni. ꞋEn ꞌahoolhyiz hoonzoo túneꞌ ꞌutꞌen, ꞌinkꞌez telꞌenne cha laꞌ ꞌutꞌen.

³⁷ ꞋEt ꞌoh daꞌ nduda suliꞌ ꞌinkꞌez dazsai. Hizi tunáhuyulhti ꞌinkꞌez howhutꞌí-un dohyo ꞌet nehinilhti.

³⁸ Joppa Lydda whutsꞌun ꞌaw lhnilhdzaꞌ ꞌet Jesus yugha hodulꞌehne, Peter Lydda usda whulh ꞌúhudantsꞌo nane dune, ꞌenne whuz whe bahalhꞌaꞌ, “ꞋAwheꞌ soo ꞌa netsꞌínyalh!” huyúlhni.

³⁹ ꞋEt ꞌaho Peter lhadúja ꞌinkꞌez bubulh whenátꞌaz. Whuz oozya whe ndo huwhutꞌi dohyo tsꞌe, whuz whenya. Tsꞌiyawh tsandilhne higha óozdil, hutso whe nyoon tsꞌeke, Dorcas khuna daꞌ dzootꞌan ꞌinkꞌez dzoot te buba ꞌuyalhꞌen-i, hinalhtsꞌet nahúyule.

⁴⁰ ꞋEt Peter tsꞌiyanne ꞌaz whenaílhꞌaꞌ, dugwutsi be nenínya ꞌinkꞌez tenadidli. Nyoo nezi yutsꞌu nálhꞌa ꞌinkꞌez ꞌutni, “Tabitha, dudinyaih!” ꞋEt yutánꞌen ibulh Peter yutilhꞌen whe dó netlꞌa dindaꞌ.

⁴¹ ꞋEt Peter yula ilhchoot ꞌinkꞌez didilhya. ꞋEt Yakꞌusda oochꞌeꞌne, tsandilhne tubulh, bukahizya ꞌinkꞌez khuna whe butlꞌa náyalhti.

⁴² ꞋEt Joppa ndulcho whe njan whulh ꞌúhudantsꞌo whe lhane neMoodihti buba ꞌálhaꞌ yintꞌoh suliꞌ.

⁴³ ꞋEt Peter, Simon ꞌuzus ꞌúlhꞌen-un, ꞌatsulyaz yuzih indaꞌ.