Acts 8 - Yak'usda Ooghuni

Saul ooba ꞌalha ꞌuhoontꞌohne bube zúla

¹ ꞋEt nyoon Saul hiyeni kꞌunꞌa ꞌuyínla. ꞋEt dzin za Jerusalem tsꞌe Jesus ba ꞌilhozdílne bube túzilalh ꞌinkꞌez dzoh nótizut. ꞋEt tsꞌiyanne ooba ꞌalha ꞌuhoontꞌohne Judea ꞌinkꞌez Samaria whutꞌenne bukeyoh tsꞌe whuz tsꞌiyawh whutabonínyoot. Whelꞌaꞌne, ꞌenne za ꞌawet hudilhtsꞌi.

² Whulohne soo Yakꞌusda tsꞌun téninilhzunne Stephen ꞌuhuyalhti tube oogha budzi únduda ꞌinkꞌez hutso.

³ ꞋEt hoontsꞌi Saul, ꞌen Jesus Christ gha ꞌilhozdílne gak hubutilhtselh hukwaꞌ ninzun. Yoh totsuk dune cha, tsꞌekoo cha tébugus ꞌinkꞌez ꞌabule.

Khuni unzoo-i Philip ye yátilhduk

⁴ ꞋEt ꞌawet ooba ꞌalha ꞌuhoontꞌohne ndulcho whe nuhúdilh ꞌinkꞌez ndi khuni unzoo-i huye yálhduk.

⁵ ꞋEt Philip ꞌen keyoh Samaria whuzꞌaí-un whuz oozya ꞌinkꞌez Christ, ꞌen ghun dune bubulh yálhduk.

⁶ ꞋInkꞌez ꞌilhozdílne Philip yalhduk hidántsꞌo ꞌinkꞌez huwa ꞌítꞌen teneꞌútꞌen cha hinilhꞌen whe, tsꞌiyawh tꞌehudusnih ꞌinkꞌez huyoozílhtsꞌai.

⁷ ꞋEt whe ntsiꞌ-i nududeh-i buyáhanainanyoot whe ꞌahúldzul. ꞋInkꞌez lhane dune délhdusnine cha ꞌinkꞌez dzoh nudilhne cha ꞌenne soo náꞌbalhꞌen.

⁸ ꞋInkꞌez nyo keyoh Samaria whuzꞌai-un tsꞌiyawh huhóontꞌiꞌ.

⁹ ꞋEt hoontsꞌi whuz ꞌilhoghun dune, Simon huyúlhni-un, ꞌet usda. ꞋEn whutsodaꞌ ꞌahoolhyiz duyun ꞌinkꞌez buba néꞌdulhde ꞌet whe, “Si dune unchá-un ꞌustꞌoh!” ubúlhni whe Samaria whutꞌenne buba hooncha.

¹⁰ ꞋInkꞌez tsꞌiyanne keyoh dilhtsꞌíne hoonzooꞌ ꞌuntꞌohne ꞌinkꞌez telꞌenne cha hinilhꞌen ꞌinkꞌez huyoozílhtsꞌai. ꞋEt, “Ndun Simon ꞌen ꞌuntꞌoh Yakꞌusda ba hooncha túneꞌ ꞌutꞌen-un unli,” hutni.

¹¹ Soo saꞌ buba duyun unli ꞌinkꞌez buba hooncha ꞌet huwa hiyoozilhtsꞌai.

¹² ꞋEt hoontsꞌi Philip ooghuni buba ꞌálhaꞌ ꞌutni-un, ꞌet huwa dune cha, tsꞌekoo cha, tsꞌiyawh too béꞌ hulya. ꞋEn khuni unzoo-i be yaílhduk inleꞌ. Ndi khuni Yakꞌusda dune kꞌúneꞌ bulꞌen-un huwun ꞌinkꞌez Jesus Christ booziꞌ ghun, ꞌi ye bubulh yaílhduk inleꞌ.

¹³ ꞋEt huwa Simon ꞌen cha ooba ꞌalha ꞌuhoontꞌoh suliꞌ. ꞋEt too be ꞌúlya whe Philip yulh zaꞌ ꞌutꞌen. Ntsꞌoh la huwa ꞌítꞌen ꞌinkꞌez hooncha te neꞌútꞌen-un tsꞌiyawh ꞌet huwun la Simon ooba hooncha.

¹⁴ ꞋEt whelꞌaꞌne Jerusalem tsꞌe whulh ꞌuhúdantsꞌo Samaria whutꞌenne Yakꞌusda ooghuni huyílhchoot ꞌinka Peter ꞌinkꞌez John bulh whuz whebuhalhꞌaꞌ.

¹⁵ ꞋEt whuz hoozꞌaz whe ꞌet ooba ꞌalha ꞌuhoontꞌohne Ndoni buyudóoltsꞌit ha buba tenahudidli.

¹⁶ ꞋAwhuz Ndoni buyúlh dulhtsꞌit, Jesus booziꞌ ꞌi gha za too beꞌ hulya.

¹⁷ ꞋEt Peter ꞌinkꞌez John bulh bukꞌehúdilni whe ꞌawet Ndoni buyudíltsꞌut.

¹⁸ ꞋEt Simon ꞌubunilhꞌen whelꞌaꞌne dune bukꞌodílhni te Ndoni buyudúltsꞌuk. ꞋEt Peter John bulh sooniya bugha óoꞌalh hukwaꞌ bulhꞌen.

¹⁹ ꞋInkꞌez ubúlhni, “Si cha ndi be tsꞌílhtus-i sghu náhꞌaih ꞌet la bukꞌudúznine Ndoni buyudóoltsꞌit.”

²⁰ ꞋEt hoontsꞌi Peter uyúlhni, “Ndi Yakꞌusda negha óoninꞌai-un sooniya be ootankulh ninzun de, nyun ꞌinkꞌez nzooneya bulh hukwꞌelha dutáhkꞌun wheꞌ hoontꞌoh!

²¹ Ndi neꞌutꞌen ꞌaw nelaꞌolhꞌen huba lheꞌíntꞌoh ꞌinkꞌez Yakꞌusda nalh ꞌaw ndzi tsꞌihꞌun lheꞌítꞌoh ꞌet huwa, ꞌaw netsꞌúlh dintni cha ꞌintꞌoh.

²² Njan tankꞌus unꞌa nuní ninzut-un whuchꞌaz nailꞌah ꞌinkꞌez neMoodihti ootsꞌun ténadinli njan dunínzun-un, khun tilah mba ꞌún whutoolhdilh.

²³ Tꞌenyunúszun, daintꞌoh la ꞌoonih ntsiꞌ-i dimbun ꞌinkꞌez lubeshi ꞌetsul ꞌonleh ꞌaítꞌoh!”

²⁴ ꞋEt Simon, John ꞌinkꞌez Peter bulh ubúlhni, “NeMoodihti tsꞌun sba tenadahdli. ꞋEt la datisnelh sudahni-un ꞌawet ndulhohosneh.”

²⁵ ꞋEt whe bughuni ulhtus whe neMoodihti ooghuni ghu yáhálhduk hukwꞌelhꞌaz John ꞌinkꞌez Peter bulh Jerusalem tsꞌe nahoostꞌas. Hiꞌus whe Samaria whutoh keyoh whuyaz totsuk khuni unzoo-i be dune bubulh yáhulhduk.

Philip Ethiopia moodih yuyálhduk

²⁶ ꞋEt neMoodihti oolizaz Philip yulh yátilhduk whe uyúlhni, “Lhadíntneh ꞌinkꞌez ndet Jerusalem whe diti nꞌaz Gaza tsꞌu ti tsꞌe whuz ti inyalh,” whuz dune lhuhóotꞌih tsꞌe.

^27-28 ꞋInka Philip lhadúja ꞌinkꞌez whuz whenya. ꞋEt Ethiopia dune, ꞌen eunuch hubuhútnine, ꞌen la duyoh tsꞌe nádalh. Ethiopia whulerwe tsꞌekeꞌ ꞌen ba sooniya ghunli-un dune ncha huyilhꞌi. Jerusalem tsꞌe Yakꞌusda tsꞌun teni noolhdzin ha whuz nusúya, luwagin be whuz de nágooh, ꞌoh whuya ugooh whe la Isaiah, Yakꞌusda be nus hóoꞌen-un, ꞌen yukꞌuneꞌ úzguz-i, ꞌi la yukꞌuyalhduk.

²⁹ ꞋEt Ndoni Philip yulh yátilhduk, “Whuz ootsꞌínyalh ꞌinkꞌez luwagin oozih kꞌut tainyaih,” yúlhni.

³⁰ ꞋEt Philip yughulgai ꞌinkꞌez la Isaiah ꞌukꞌunéyuzguz ꞌi kꞌut ꞌukꞌu yalhduk yuduztsꞌai, ꞌinka yoodulhkut, “Ndai la ookꞌu yailhduk-i daja ni-un, ꞌet tꞌeoonínzun eh?” yúlhni.

³¹ “Ntsꞌénꞌa tꞌentászin? Dune hiye súnulhtun de, ꞌet de ndi daja ni whe ꞌutni-un nahósꞌalh,” yúlhni. ꞋInkꞌez la Philip, “Sghu dinyaih, ꞌinkꞌez szih sinda,” yúlhni.

³² Ndi Yakꞌusda ooghuni ookꞌu nusgúz-i, ꞌilhoghun ꞌet la hukwꞌu yalhduk-un ndutni whe, “ꞋUsbai hituzilhghelh tsꞌu hítulhtih-i, dantꞌoh la, ꞌinkꞌez ꞌusbaiyaz ha hititꞌus te tꞌedusnih, ꞌet nduntꞌoh ꞌaw yalhtílhdih.

³³ Tsꞌiyanne nalhtsꞌet ꞌet hooncha whe hukwayá hoonli tunéꞌ huyulhꞌen, ꞌinkꞌez ꞌaw tsꞌihꞌun unꞌa nulhéꞌhuyilhꞌel. Yun kꞌut ye khúna-i, ꞌi ooghu yílchoot ꞌet huwa ꞌaw ye kédindene, ꞌenne cha dune tꞌebunúszun.”

³⁴ ꞋEt ndun eunuch Philip ꞌulhni, “Sudíni ndun Yakꞌusda be nus hóoꞌen-un mbe ꞌulhni, dichꞌoh tilah naꞌdudútni kꞌus ꞌuyoon dune tilah ꞌulhni?”

³⁵ ꞋEt Philip yawhénilhduk ndi dune yukꞌu yailhduk-i Yakꞌusda ooghuni ꞌet wheꞌ diniꞌ whe khuni unzoo-i Jesus ghun tsꞌiyawh yudániꞌ.

³⁶ Higooh whe too hoonli-un hugho ningoo. ꞋEt nyoon moodih ꞌutni, “Njan too hooni. Dáhoontꞌoh huwa ꞌaw too beꞌ ꞌóoznih ꞌaítꞌoh?”

³⁷ ꞋEt Philip uyúlhni, “ꞋAlha mba ꞌalha ꞌuhoontꞌoh de, ꞌet too beꞌ talnelh.” “Jesus Christ ꞌen Yakꞌusda ooYeꞌ ꞌuntꞌoh, ꞌet sba ꞌálhaꞌ hoontꞌoh!” yúlhni.

³⁸ ꞋEt ndun eunuch luwagin ꞌilhiz nenintan ꞌinkꞌez nahultꞌoh Philip ꞌinkꞌez ndun eunuch bulh déhahanꞌaz ꞌinkꞌez tahánꞌaz. ꞋEt Philip eunuch too beꞌ yinla.

³⁹ ꞋEt too ha náhitꞌaz ibulh Philip Ndoni be whedánde ꞌinkꞌez nyoon eunuch ꞌaw ꞌon ꞌat nalhuyítꞌel whe didut tube cho whunílhni whe dukeyoh tsꞌe whenágoo.

⁴⁰ ꞋInkꞌez la Philip keyoh Azotus huwhútni ꞌet nuya whe hitilhꞌen. ꞋEt whunat keyoh wheyaz whutꞌenne keyoh Caesarea tsꞌootayalh whutsꞌun tsꞌiyawh khuni unzoo-i be bubulh yálhduk.