Acts 4 - Yak'usda Ooghuni

Peter John bulh nahíyilhne but nébonilhti

¹ ꞋEt ꞌawhuz Peter John bulh dune bulh yahulhduk whe lubretne, lugliz whucho howunlíne bumoodih cha, ꞌinkꞌez Sadducee hubuhútnine bugho nindil.

² Whutsꞌodutni ndunne whelꞌaꞌne Jesus dazsai ꞌinkꞌez dunadija ꞌet huwun whubuhodulhꞌeh. ꞋEt whe yaidláne dunahudutádulh ꞌalha ꞌuhoontꞌoh.

³ ꞋInka ꞌom bun whutsꞌun ꞌabuhanꞌai ꞌawet hulhgha tsꞌun yoo ꞌun hoozulh ꞌet huwa.

⁴ ꞋEt hoontsꞌi lhane ubudántsꞌone Jesus dazsai ꞌinkꞌez dunadija-un buba ꞌalha ꞌuhoontꞌoh suliꞌ. ꞋEt ꞌawet ꞌalhgoh buba ꞌálhaꞌ hoontꞌohne 5,000ne atꞌenne huzdliꞌ.

⁵ ꞋEt ꞌawet ꞌom bun dzin Lizwif bumoodihne, butso whúdilhdzulhne cha, ꞌinkꞌez Moses be ꞌudustlꞌus ꞌukꞌu nunáguzne Jerusalem ꞌet ꞌilhúhozdil.

⁶ ꞋInkꞌez la lubret ꞌukꞌenus díztiꞌ-un Annas huyúlhni-un Caiaphas cha, John cha, Alexander cha, ꞌinkꞌez la lubret ꞌukꞌenus díztiꞌ-un tsꞌu haíndene, ꞌenne cha, tsꞌiyawh Jerusalem ꞌilhuhozdil.

⁷ Whelꞌaꞌne ꞌinkꞌez soo naꞌhuyinla-un, ꞌen cha dubut nébodinla ꞌinkꞌez hubuhoodulhkut “Dáhla whe ꞌahla? Ndai be úlhtus-i be uhtꞌi? Mbe booziꞌ gha ndun dune soo naꞌuhla?”

⁸ Ndoni Peter ꞌon nus ulhtus yulhtsi whe ubúlhni, “Israel ooduneꞌne bumoodihne ꞌinkꞌez butso whúdilhdzulhne cha,

⁹ ndun dune nulhúsyoh-un, ꞌen ba ꞌutꞌen unzoo-i ꞌutsꞌínla-i ꞌinkꞌez datsꞌínla whe soo náꞌtsꞌinla whe ꞌi ꞌandit ooka neoodulhkut.

¹⁰ ꞋEt huwa nohni ꞌinkꞌez Israel ootsꞌu hainzutne soo cho tꞌeoonahzeh, Jesus Nazareth whutꞌen-un, ꞌen tulalhgus kꞌeílhti, ꞌen Yakꞌusda nahuyílhnaꞌ. ꞋEn booziꞌ ꞌinkꞌez whélhtus-un ꞌi be ndun nulhúsyoh-un, ꞌen soo náꞌtsꞌinla.

¹¹ Jesus, ꞌen ꞌuntꞌoh Yakꞌusda ꞌukꞌu nusguz-i kꞌut ndutni whe ooghu yaduk, ‘Nohni yoh ꞌuwhulhꞌenne tse ꞌúndutulhꞌuz-i, ꞌi la ꞌuja ꞌukꞌenus tse ooka dáhotni-i suliꞌ.’

¹² Yinka ndulcho whe Jesus Christ ꞌen gha za ꞌuzdutijih. ꞋAw ꞌuyoonne yé ulhtus-i gha uzdoojih ꞌaítꞌoh. ꞋEt whuz unꞌa Yakꞌusda neghá whuninꞌai.”

¹³ ꞋEt nahíyilhne tꞌehonínzun Peter ꞌinkꞌez John ꞌenne ꞌantsꞌi ꞌoh dune, ꞌaw whulhodílꞌelne ꞌuhintꞌoh. ꞋAw lhoníljut whe yahulhduk, ꞌet huwa buba hooncha, ꞌinkꞌez tꞌehonanzin Jesus Christ yulh nusudilne hinli.

¹⁴ Ndun nulhúsyoh-un soo náꞌuja ꞌinkꞌez Peter John bulh buzih usyin hinilhꞌen whe ꞌet huwa ꞌaw dája hudooniꞌ ꞌaitꞌoh.

¹⁵ ꞋEt ꞌinka yaduk bayoh tenábonilhꞌaꞌ ꞌinkꞌez la hukwꞌu nuhúhulhyeꞌ.

¹⁶ ꞋInkꞌez la lhuhoodulkut, “Ndunne dune dábuztilelh?” hutni la, “Jerusalem whutꞌenne tsꞌiyawh tꞌehonínzun ꞌukꞌenus huwa ꞌítꞌen-un, ꞌet ꞌuhuhóonla. ꞋAw whutsꞌutsꞌoodódlai ꞌaitꞌoh.

¹⁷ ꞋEt huwa ꞌaw ꞌon ꞌun ꞌuyoonne tꞌeoonoozeh whuchꞌa, ndunne dune tube cho bubeꞌ tsꞌoonolhjoot Jesus Christ booziꞌ gha ꞌaw ꞌon ꞌun ꞌuyoonne dune bulh yáhoolhduk junih.”

¹⁸ ꞋEt yoh danáboninla ꞌinkꞌez ꞌubuhútni, “Ntsꞌoh dáhoontꞌoh ꞌet hoontsꞌi, ꞌaw Jesus booziꞌ gha yahoolhduk kꞌus dune húhodoolhꞌeh íloh!”

¹⁹ ꞋEt Peter John bulh ꞌuhútni. “Nohnichꞌoh hukwꞌu nuní nulhzut, nohkꞌunꞌa tilah kꞌus Yakꞌusda ookꞌunꞌa tilah ꞌuztinelh? Ndet la Yakꞌusda nalh tsꞌihꞌun ꞌuhoontꞌoh?

²⁰ Ntsꞌenꞌa suba tsꞌuhonꞌen-un ꞌinkꞌez tsꞌodántsꞌo-un huwu yalhtsꞌoolhduk?”

²¹ Nahíyilhne ꞌo ꞌun cha bube hoonolhjoot, “Jesus ghu yahoolhduk junih!” ꞌubuhútni, ꞌinkꞌez bula nahuditni. ꞋAw huwa dzoh nubuhoolhdzut-un hooloh, dune tsꞌiyanne Yakꞌusda ba hodílhtiꞌ njan dáhooja ꞌet huwa.

²² Ndun dune huwa ꞌítꞌen kꞌunꞌa soo náꞌhuyinla-un, ꞌen dit whunizyat ꞌon ꞌun be yus kꞌut whe ꞌuntꞌoh.

Oobá ꞌalha ꞌuhoontꞌohne hunooljut-un whuchꞌa ténahadudli

²³ ꞋEt soo bula nahuditni ibulh, Peter John bulh bubulh nudilhne butsꞌu náhoostꞌaz ꞌinkꞌez lubret ꞌukꞌenus diztiꞌ-un ꞌinkꞌez butsó whudilhdzulhne cha dája ꞌubuhútni la ꞌet hukwꞌú nuhuhoolnuk.

²⁴ ꞋEt hodántsꞌo whe tsꞌiyawh lhgha Yakꞌusda tsꞌun tenawhehúndunidli, “NeMoodihti nyun Yakꞌusda ꞌintꞌoh tꞌétsꞌonínzun, yat, ndi yun, yatooꞌ, ꞌinkꞌez bunghun cha ꞌínla, ꞌinkꞌez di la bulh ꞌúhoonla-i tubulh.

²⁵ Netsodaꞌ-un David nye ꞌustle-un, Ndoni gha mba yalhduk ínleꞌ whe ndutni, ‘ꞋUdun yun kꞌut whutꞌenne, di ha hohunílchꞌe? Di ha ndunne dune Yakꞌusda chꞌaz yáhalhduk?

²⁶ Ndi yun kꞌut lerwene, ꞌenne cha lhotigan wheni. ꞋInkꞌez yun moodihne cha ꞌilhúhozdil Yakꞌusda ꞌinkꞌez ooChrist, ꞌenne hichꞌaz nedindil wheꞌ hutꞌen.’”

²⁷ ꞋEt ꞌon ꞌun tenahududli whe ꞌuhutni, “ꞋEt njan Jerusalem ꞌet Herod ꞌinkꞌez Pontius Pilate bulh ꞌudun yun kꞌut whutꞌenne cha ꞌet Israel ootsꞌu hainzutne cha tsꞌiyawh ꞌilhuhozdil whe ꞌalhaꞌ ꞌi be nYeꞌ Jesus lubeshi ooghu hooloh-un, ꞌen ooka tse hóodli neba yulhtsí-un, ꞌen hichꞌaz nedindil ꞌet wheni.

²⁸ ꞋEt ꞌudaꞌ be ilhtus-i ꞌinkꞌez nyeni be ndunínzun inleꞌ whe lhawhudinla. ꞋEt ꞌandit ꞌilhuhozdil ꞌinkꞌez daóotanelh dini ínleꞌ ꞌet ꞌoh whuya lheꞌhitꞌelh.

²⁹ ꞋEt huwa neMoodihti, neyeꞌ hoonulhjoot-un, ꞌandit dzin buboozílhtsꞌai ꞌinkꞌez ꞌaw lhtsꞌuníljut whe wheni, mbaꞌ tsꞌutꞌenne, nghuni unzoo-i be yatsꞌoolhduk neghá whuninꞌaih.

³⁰ ꞋEt huwa neMoodihti, be ílhtus ꞌi be dune ílhyis ꞌinkꞌez nYeꞌ Jesus, lubeshi ooghu hooloh-un, ꞌen yé ulhtus-i, ꞌi gha tsꞌiyanne bunalhtsꞌet hooncha ꞌinkꞌez huwa ꞌítꞌen tuneꞌ whutꞌen hóleꞌ.”

³¹ ꞋEt ꞌawet tenáhúdúdli ꞌetsul ꞌuhudíja whe, nyo ꞌilhúhozdíl-un ndulcho nahúhoosnai ꞌinkꞌez Ndoni buyudíltsꞌut whe ꞌaw lhoníljut whe Yakꞌusda ooghuni be bubulh yáwhehunilhduk.

Ooba ꞌalha ꞌuhoontꞌohne ꞌalhgoh lhghuhudli

³² Ooba ꞌalha ꞌuhoontꞌohne ꞌalhgoh tsꞌiyanne lhgha zaꞌ hutꞌen. ꞋAw oochꞌeꞌne hooloh. Ndai la huyutꞌi ꞌalhgoh huyé neꞌutꞌen.

³³ ꞋAw lhoníljut whe whelꞌaꞌne soo khuni ulhtus-i be, “ꞋAlhaꞌ hoontꞌoh whe Jesus neMoodihti ꞌen dunadija,” hutni, ꞌinkꞌez Yakꞌusda tube butsꞌun únzoo.

³⁴ ꞋAw ꞌilhoghun butoh ꞌendunidzit-un hooloh. Mbene la yoh kꞌus yun lhadíntꞌoh utꞌíne, wheꞌ honket,

³⁵ ꞌinkꞌez la sooniya bugha yúltsꞌuk-i, whelꞌaꞌne butlꞌa háyudzih. ꞋI la ꞌalhgoh mbene la ꞌen dunidzítne butá háyúdzih.

³⁶ ꞋInkꞌez ꞌilhoghun dune, Joses huyúlhni, ꞌen Levite-un ꞌuntꞌoh ꞌet Cyprus whuzdlí-un, ꞌen whelꞌaꞌne “Barnabas” huyúlhni, ndi booziꞌ ꞌi la, “ꞋEn nedzi ulhtus ilhꞌí-un,” ni whe ꞌutni.

³⁷ ꞋEn yun yutꞌi-i be ꞌónket ꞌinkꞌez whelꞌaꞌne butlꞌa yándzai.