Acts 3 - Yak'usda Ooghuni

Whelꞌaꞌne nulhúsyoh-un soo náꞌhinla

¹ ꞋEt ꞌilhudzin Peter ꞌinkꞌez John bulh dzetniz hukwꞌelhꞌaz, 3:00 atꞌen ꞌuhúnitꞌoh Lizwif bulugliz whucho tsꞌótizꞌuz, tenahududli neóoninzut ꞌet wheni.

² Hukwuti hoonzoo huwhútni-un, ꞌet la dune yinka usda ndulyiz whe nulhúsyoh-un usda. Dzin totsuk whuz huyookaih. Mbene la Lizwif bulugliz whucho tsꞌe túdilhne sooniya ha butsꞌu dátso.

³ ꞋEt Peter ꞌinkꞌez John bulh yoh tsꞌe hútizꞌaz whe ubutílhꞌen ꞌinkꞌez hoonliyaz higha óoꞌalh ha butsꞌu dátso.

⁴ Soo cho hinilhꞌen whe la Peter ꞌutni, “Nenilhꞌen!” yulhni.

⁵ ꞋInka la ꞌubunilhꞌen hoonli higha tiꞌalh ha butsꞌe úka tse hooli.

⁶ ꞋEt Peter uyúlhni, “ꞋAw silver ꞌinkꞌez gold cha lhustꞌi, ꞌet hoontsꞌi ndai la ꞌustꞌi-i ngha tísꞌalh. Jesus Christ Nazareth whutꞌen-un whelhtus ꞌinkꞌez booziꞌ gha didinyaih ꞌinkꞌez ninya!”

⁷ ꞋInkꞌez Peter ndun dune nulhúsyoh-un nailhnih tsꞌe yula ilhchoot ꞌinkꞌez dedilhya ibulh ooke, ookechunoh tubulh hoolhtus whuzdliꞌ.

⁸ ꞋAho dudillhoh ꞌinkꞌez nádinya. ꞋEt Lizwif bulugliz whucho tsꞌe bubúlh tizꞌaz. Nuya ꞌinkꞌez ndo túllhuk cha ꞌutꞌen ꞌinkꞌez Yakꞌusda dílhtiꞌ.

⁹ Tsꞌiyanne yunilhꞌen nuya ꞌinkꞌez Yakꞌusda dílhtiꞌ.

¹⁰ Ndun dune nulhúsyoh-un nahuyóolhtsꞌit Lizwif bulugliz whucho hukwuti hoonzoo ꞌet usda-un, ꞌen ꞌúntꞌoh. Soo whe búgha ꞌunjaz whe hinilhꞌen ꞌinkꞌez buba hooncha.

Lizwif bulugliz whucho tsꞌe Peter bubulh yálhduk

¹¹ Peter, John bulh ꞌawhuz ndun dune soo naꞌyinla-un uboontun za ꞌuntꞌoh whe dune tsꞌiyawh njan Solomon oobuntsilh bet huwhútni-un tsꞌe whuz butsꞌú hoolhghaz.

¹² ꞋEt Peter ꞌubunilhꞌen ꞌinkꞌez ubúlhni, “Israel ootsꞌu hainzutne, di ha nenulhꞌen ꞌinkꞌez whe nóhgha ꞌunjaz? ꞋAw whenichꞌoh be tsꞌinzoo kꞌus be tsꞌílhtus ꞌi gha iloh ndun dune nuya natsꞌúlhtsi.

¹³ Netsodaꞌne Abraham, Isaac, ꞌinkꞌez Jacob lhanꞌun te lhuzkehke hinli whe ꞌuhoontꞌoh. ꞋInkꞌez buYakꞌusda Jesus Christ yukꞌúneꞌ ꞌustꞌen-un, ꞌen ncha yulhtsi ꞌinkꞌez yudálhtiꞌ. Lizwif huwunlíne tlꞌálhti Pilate yula nadutitnih ꞌet hoontsꞌi nohni oochꞌaz nedihdil inleꞌ.

¹⁴ ꞋEn lubeshi ooghu hooloh ꞌinkꞌez tsꞌihꞌun dune cha unli, ꞌet hoontsꞌi oochꞌáz nedihdil ꞌinkꞌez dune silhghí-un, ꞌen Pilate nohtsꞌu yúlanadootni ootsꞌo húkwaꞌ dahni.

¹⁵ ꞋInkꞌez mbe oogha tsꞌúkhuna-un, ꞌen úhla súlhghi, ꞌet hoontsꞌi Yakꞌusda nahuyílhnaꞌ ꞌet ndulcho whe wheni nena be tsꞌuhonꞌen.

¹⁶ ꞋEt Jesus ooba ꞌalhaꞌ yintꞌoh ꞌinkꞌez ndi yé ulhtus ꞌi gha ndun dune soo náꞌuja. ꞋEn ꞌuntꞌoh nilhꞌen. ꞋAlhaꞌ ꞌi be hoontꞌoh ndun dune nohbut usyin-un, ꞌen Jesus ooba ꞌalhaꞌ yintꞌoh-un, ꞌet ꞌi be soo naꞌuja.

¹⁷ ꞋInkꞌez sulhutsinke tꞌewhunúszun nohni ꞌinkꞌez nohtso whudilhdzulhne te Jesus dálhꞌen la tꞌéoonuzúhzun ꞌet huwa ꞌíhtꞌen.

¹⁸ ꞋEt ꞌudaꞌ whe Yakꞌusda daniꞌ ꞌet ndunne Yakꞌusda be nus hóoꞌenne ꞌet la, Christ dzoh nutizut, hutni. ꞋEt whuz unꞌa ꞌuhóoja whúlhtsi.

¹⁹ ꞋEt huwa noheni nahandunahle ꞌinkꞌez Yakꞌusda ootsꞌu nálhyeh, ꞌawet de za la nohlubeshi nohunáyóolhdeh.

²⁰ ꞋEt de la Yakꞌusda Jesus Christ ꞌen cha nohtsꞌítoolhꞌaꞌ. Whutsodaꞌ ꞌudaꞌ ꞌet yughun nohodániꞌ inleꞌ.

²¹ ꞋEn ndo yakꞌuz ꞌet usda ndet la tsꞌiyantsuk doo cha soo náꞌwhutilelh nasdliꞌ ꞌet whutsꞌun. ꞋUdaꞌ Yakꞌusda be nus hóoꞌenne huwu yuhalhduk ínleꞌ.

²² ꞋAlha ꞌudaꞌ Moses ndutni inleꞌ, ‘Yakꞌusda neMoodihti ꞌilhoghun Yakꞌusda be nus hóoꞌen-un si skꞌunꞌa ꞌuntꞌoh-un, ꞌen nohtsꞌítilhꞌalh. Nohkeyoh ꞌilhoghun ꞌen ꞌutinelh. Daja nohdutánelh-un tsꞌiyawh oozólhtsꞌaiꞌ.

²³ ꞋInkꞌez mbene la ndun Yakꞌusda be nus hóoꞌen-un lhuhuyoozílhtsꞌaine, ꞌenne la Yakꞌusda ooduneꞌne buchꞌa buhuzdla ꞌinkꞌez gak ubotilhtselh.’”

²⁴ ꞋEt Peter ꞌon ꞌun ndutni, “Mbene la Yakꞌusda be nus hóoꞌenne ndet la ꞌuwhutánelh-un huwu yahalhduk daꞌ, Samuel cha ꞌinkꞌez ꞌuyoonne la yukꞌélhꞌaz khanaꞌne cha, ꞌenne cha, whuz unꞌa za ꞌuhutni inleꞌ.

²⁵ Nohni cha Yakꞌusda be nus hóoꞌenne butsꞌu háhde ꞌinkꞌez ndai la Yakꞌusda nohtsodaꞌne khuni buba lhaídinla-i, nohni cha nohba ꞌuntꞌoh. Ndi khuni buba lhaídinla-i, Abraham cha tlꞌa díltsꞌut inleꞌ, ‘Ntsꞌu haínzut-un, ꞌen gha dune ndi yun kꞌut buba hoonzoo tileh,’ ꞌet Yakꞌusda Abraham yulhni.

²⁶ ꞋInkꞌez Yakꞌusda duYeꞌ Jesus, ꞌen dunaidilhti whe nohni ꞌudechoo ꞌen nohtsꞌú whe yalhꞌaꞌ. ꞋEt dutsun-i be túneꞌ ꞌahtꞌen-un whuchꞌa nanóhuzdla. ꞋEt huwa Yakꞌusda Jesus ꞌudechoo nohtsꞌítilhꞌaꞌ whe nohba hoonzoo ooleꞌ ha.”